2010ལོ་ནས་བཟུང་། ཐེན་ཅིན་གྲོང་ཁྱེར་གྱིས་རྨ་ལྷོ་བོད་རིགས་རང་སྐྱོང་ཁུལ་ལ་ཁ་གཏད་རོགས་སྐྱོར་བྱེད་འགོ་བརྩམས་པ་དང་། མིག་སྔའི་བར་དུ། ཐེན་ཅིན་གྱིས་རྨ་ལྷོ་འཕེལ་རྒྱས་ཀྱི་གནས་ཚུལ་དངོས་ལ་དམིགས་ནས། ལོ་ངོ་བཅོ་ལྔའི་རིང་ལ་བསྡོམས་པས་མ་དངུལ་སྒོར་ཐེར་འབུམ་གཅིག་དང་དུང་ཕྱུར་བརྒྱད་བྱེ་བ་ལྔ་ས་ཡ་གཅིག་བཏང་བ་དང་། མཚོ་སྔོན་རོགས་སྐྱོར་གྱི་ལས་གཞི567ལག་བསྟར་བྱས་ཏེ། རྨ་ལྷོ་ཁུལ་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་འཛད་མེད་ཀྱི་སྒུལ་ནུས་ཆེན་པོ་བསྣན།
རྒྱུས་ལོན་བྱུང་བ་ལྟར་ན། ཐེན་ཅིན་གྲོང་ཁྱེར་གྱིས་དུས་རབས་གསར་བའི་ཁ་གཏད་རོགས་སྐྱོར་བྱ་བའི་རེ་བར་རྐང་བཙུགས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཀྱི་གཙོ་ཐིག་དམ་འཛིན་བྱས་ལ། ཐོན་ལས་མཉམ་ལས་དང་དམངས་ཚིས་འགན་སྲུང་གི་དཀྱིལ་སྙིང་ཆེན་པོ་གཉིས་ལ་དམིགས་ནས། འཇོན་མི་ནང་འདྲེན་སྐྱེད་སྲིང་དང་སྨན་བཅོས་དང་སློབ་གསོའི་རོགས་སྐྱོར། མི་རིགས་མཉམ་འདྲེས་བཅས་ཕྱོགས་གསུམ་གྱི་ཐད་ནས་གནད་ཕིགས་ཇུས་འདོན་བྱས་པ་དང་། སྤྱི་མཐུན་མཉམ་ལས་ཀྱི་མཚོ་སྔོན་རོགས་སྐྱོར་གྱི་མ་དཔེ་གསར་བ་གསར་སྐྲུན་བྱས་ཏེ། ཁ་གཏད་རོགས་སྐྱོར་བྱ་བའི་ཆུ་ཚད་སྔར་ལས་ཇེ་མཐོར་གཏོང་བར་སྐུལ་འདེད་བཏང་།
ཐོན་ལས་རྒྱུད་སྐུད་ཀྱི་ཁྱབ་ཁོངས་སུ། ཐེན་ཅིན་གྱི་མཚོ་སྔོན་ལ་རོགས་སྐྱོར་བྱེད་པའི་དཔུང་སྡེ་ཡིས་རྨ་ལྷོ་ཁུལ་གྱི་ཁྱད་ལྡན་ཐོན་ཁུངས་ལ་རྒྱབ་རྟེན་བྱས་ནས། ལྗང་མདོག་རྩིས་ནུས་ཐོན་ལས་ལག་བསྟར་བྱེད་པར་སྐུལ་འདེད་བཏང་བ་དང་། རིག་གནས་ཡུལ་སྐོར་ཐོན་ལས་མཉམ་བསྲེས་སྒོས་འཕེལ་རྒྱས་སུ་བཏང་སྟེ། ཞིང་ཕྱུགས་ཐོན་རྫས་རིམ་སྤོར་བྱེད་པར་རོགས་ཤུགས་བཏོན། ཐེན་ཅིན་གྱི་ལག་རྩལ་དང་མ་དངུལ། ཚོང་རའི་དགེ་མཚན་ནང་འདྲེན་བྱས་པ་བརྒྱུད་དེ། སྟོབས་ཤུགས་ཡོད་རྒུས་རྨ་ལྷོ་ཁུལ་གྱི་དེང་རབས་ཅན་གྱི་ཐོན་ལས་མ་ལག་བཙུགས་པ་དང་། ཐོན་ལས་ཀྱི་སྲོག་ཤིང་འགྲན་རྩོད་ནུས་ཤུགས་རྒྱུན་མ་ཆད་པར་མཐོར་འདེགས་སུ་བཏང་།
དམངས་ཚིས་ཞི་མཛེས་བཟོ་སྐྲུན་གྱིས་རྨ་ལྷོ་ཁུལ་གྱི་རྨང་གཞི་སྒྲིག་ཆས་དང་སྤྱི་ཐུན་ཞབས་ཞུའི་ཆུ་ཚད་རྒྱུན་མཐུད་ངང་ལེགས་བསྒྱུར་བྱས། སྡོད་ཁང་འགན་སྲུང་ནས་སློབ་གསོ་སྨན་བཅོས་བཅས་དམངས་ཚིས་ལས་གཞི་རབ་དང་རིམ་པ་ལག་བསྟར་བྱས་པ་དེས། ས་གནས་མང་ཚོགས་ཀྱི་ཐོབ་ཚོར་དང་སྐྱིད་སྣང་མངོན་གསལ་སྒོས་ཇེ་མཐོར་བཏང་བ་དང་། བདེ་སྐྱིད་འཚོ་བའི་མཛེས་སྡུག་གི་རི་མོ་བྲིས།
འགྲོ་འོང་བརྗེ་རེས་དང་མཉམ་འདྲེས་ལ་སྐུལ་འདེད་གཏོང་བའི་ཕྱོགས་ནས། འགྲོ་འོང་བརྗེ་རེས་དང་མཉམ་འདྲེས་འགུལ་སྐྱོད་ཀྱིས་རིགས་མི་འདྲ་བའི་བརྗེ་རེས་བྱ་འགུལ་སྣ་ཚོགས་སྤེལ་བ་བརྒྱུད་དེ། ཐེན་ཅིན་དང་མཚོ་སྔོན་ས་ཆ་གཉིས་ཀྱི་མིའི་འགྲོ་འོང་ཇེ་དམ་དུ་གཏོང་བར་སྐུལ་འདེད་བཏང་བ་དང་། མི་རིགས་བར་གྱི་ཕན་ཚུན་རྒྱུས་ལོན་དང་ཡིད་ཆེས་ཇེ་བརྟན་དུ་བཏང་ལ། སྲ་ཞིང་བརྟན་པའི་མི་རིགས་ཀྱི་སེམས་སྦྲེལ་ཟམ་པ་བཙུགས།
འཇོན་མིའི་འཆར་གཞིས་འཇོན་མི་ནང་འདྲེན་དང་སྐྱེད་སྲིང་བྱེད་པར་དོ་སྣང་ཆེན་པོ་བྱས་པ་དང་། ཐེན་ཅིན་གྱིས་ཆེད་ལས་མི་སྣ་བདམས་ནས་རྨ་ལྷོ་ཁུལ་དུ་མངགས་ཏེ་རོགས་སྐྱོར་བྱ་བ་སྤེལ་བ་མ་ཟད། རིམ་པ་མང་བའི་འཇོན་མི་སྐྱེད་སྲིང་བྱ་བར་རྩ་འཛུགས་བྱས་ནས། ས་དེའི་གསར་གཏོད་འཕེལ་རྒྱས་ཐད་གསོན་ཤུགས་གསར་བ་བསྣན།
སྨན་བཅོས་དང་སློབ་གསོ་རོགས་སྐྱོར་ཁྲོད། ཐེན་ཅིན་གྱི་སྨན་བཅོས་རུ་ཁག་གིས་སྔོན་ཐོན་ལག་རྩལ་དང་འདུ་ཤེས་རྨ་ལྷོ་རུ་ཁྱེར་ཡོང་ནས། ས་དེའི་སྨན་བཅོས་ཆ་རྐྱེན་ཇེ་ལེགས་སུ་བཏང་བ་དང་། སློབ་གསོའི་རོགས་སྐྱོར་གྱིས་དགེ་རྒན་གྱི་གསོ་སྦྱོང་དང་སློབ་ཁྲིད་ཐོན་ཁུངས་མཉམ་སྤྱོད་བྱེད་པ་སོགས་ཀྱི་རྣམ་པ་བརྒྱུད་དེ། རྨ་ལྷོ་ཁུལ་གྱི་སློབ་གསོ་སློབ་ཁྲིད་ཀྱི་སྤུས་ཚད་རྒྱུན་མ་ཆད་པར་ཇེ་མཐོར་གཏོང་བར་སྐུལ་འདེད་བཏང་།
ཐེན་ཅིན་གྱི་མཚོ་སྔོན་ལ་རོགས་སྐྱོར་བྱེད་པའི་སྤྱི་མཐུན་མཉམ་ལས་མ་དཔེ་ཡི་གསར་གཏོད་ལག་ལེན་གྱིས། རྨ་ལྷོ་ཁུལ་གྱི་དཔལ་འབྱོར་སྤྱི་ཚོགས་སྤུས་ཚད་མཐོ་བའི་ངང་འཕེལ་རྒྱས་སུ་གཏོང་བའི་ཐད་སྒུལ་ཤུགས་ཆེན་པོ་བསྣན་པ་མ་ཟད། རྒྱལ་ཡོངས་ཀྱི་ཁ་གཏད་རོགས་སྐྱོར་བྱ་བའི་ཐད་ཉམས་མྱོང་རྩ་ཆེན་འདོན་སྤྲོད་བྱས། རྗེས་ཕྱོགས་སུ། ཐེན་ཅིན་དང་མཚོ་སྔོན་གཉིས་ཀྱིས་མུ་མཐུད་དུ་ལག་གདང་སྦྲེལ་ནས་མཉམ་སྐྱོད་བྱེད་པ་དང་། མཐུན་སྒྲིལ་མདུན་སྐྱོད་ཀྱི་དུས་རབས་ཀྱི་ལེའུ་གསར་བ་འབྲི་རྒྱུ་རེད།
རིན་ཆེན་མཚོས་བསྒྱུར།
