ཀྲུང་གོ་གུང་ཁྲན་ཏང་དབུ་བརྙེས་ནས་ལོ་བརྒྱ་འཁོར་ལ་ཉེ་བའི་སྐབས་འདིར། ཏང་ཀྲུང་དབྱང་གི་བྱ་བའི་བཀོད་སྒྲིག་དང་ཞིང་ཆེན་ཏང་ཨུའི་གཅིག་གྱུར་བཀོད་སྒྲིག་ལྟར། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཝང་ཅན་ཅུན་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཞིན་ཁྲང་ཞིང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ་ཝུའུ་ཞའོ་ཅུན། དེ་མིན་ཞིང་ཆེན་ཏང་ཨུའི་རྒྱུན་ལས་ཨུ་ཡོན་དག་གིས་སོ་སོར་རང་ཞིང་གི་ཏང་ནང་ཁུལ་གྱི་བྱས་རྗེས་གཟི་བརྗིད་མཚན་སྙན་ཐོབ་པའི་ཏང་ཡོན་དང་འཚོ་བར་དཀའ་ཁག་ཡོད་པའི་ཏང་ཡོན། ཏང་ཡོན་རྒན་པ། ལས་བྱེད་པ་རྒན་པ་དང་སྔོན་གཤེགས་དཔའ་བོའི་ཁྱིམ་མི། གཞུང་དོན་གྱི་ཆེད་དུ་རང་སྲོག་བློས་བཏང་བའི་ཏང་ཡོན་རྒན་པའི་ཁྱིམ་མི་བཅས་ལ་འཚམས་འདྲི་བྱས་པ་དང་། ཏང་ནང་ཞུགས་ནས་ལོ་ལྔ་བཅུ་འགོར་ཡོད་པའི་ཏང་ཡོན་རྣམས་ལ་དྲན་གསོའི་རྟགས་མ་བྱིན་པར་མ་ཟད། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་ཐུགས་ཁུར་དང་བརྩེས་སེམས་བརྒྱུད་སྤྲོད་བྱས།
ཝང་ཅན་ཅུན་ཏང་ཡོན་རྒན་པ་དང་ལས་བྱེད་པ་རྒན་པ་སངས་རྒྱས་སྐྱབས་ཀྱི་ཁྱིམ་དུ་སོང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་གཟིགས་ཞིབ་གནང་སྐབས་ཞིང་ཆེན་དང་པུའུ་རིམ་པའི་ལས་འཁྱུར་ངལ་གསོ་བྱས་པའི་བློ་མཐུན་རྒན་པ་རྣམས་ལ་བརྩེ་བའི་འཚམས་འདྲི་བྱས་པ་བརྒྱུད་བསྒྲགས་བྱས་པ་དང་། ཁོས་ཞིང་ཆེན་ཡོངས་ཀྱི་བཅོས་སྒྱུར་འཕེལ་རྒྱས་གཏན་འཇགས་ཁྲོད་བྱས་རྗེས་འབུར་ཐོན་བཞག་པར་བཀའ་དྲིན་ཆེ་ཞུས། ཝང་ཅན་ཅུན་གྱིས་བཤད་རྒྱུར། ཁྱེད་ཀྱིས་ལས་གནས་གང་ཡིན་རུང་སློབ་སྦྱོང་དཔྱིས་ཕྱིན་པ་བྱེད་པ་དང་བྱ་བ་འབད་པས་བསྒྲུབས་ལ། ལས་གནས་དང་བྲལ་རྗེས་ཀྱང་སྔར་བཞིན་རང་སྟོབས་འདོན་སྤེལ་བྱས་ཏེ། ལོ་དྲུག་ཅུ་ཙམ་གྱི་གསར་བརྗེའི་ལོ་རྒྱུས་དང་། ཏང་ནང་ཞུགས་ནས་ལོ་ལྔ་བཅུ་ཙམ་གྱི་རིང་ལ་དཔེ་སྟོན་སྣེ་ཁྲིད་ཀྱི་བྱེད་ནུས་འདོན་སྤེལ་བྱས་པ་དང་། དུས་སྐབས་མི་འདྲ་བ་དང་དུས་རིམ་མི་འདྲ་བའི་ནང་ཞིང་ཆེན་ཡོངས་ཀྱི་བཅོས་སྒྱུར་འཕེལ་རྒྱས་གཏན་འཇགས་ཀྱི་ཆེད་དུ་བྱས་རྗེས་གལ་ཆེན་བཞག་ལ། ཁྱེད་ཀྱི་ཆབ་སྲིད་རང་རྟོགས་དང་ཆབ་སྲིད་བརྩེ་བ། ཏང་ལ་བཅངས་པའི་བབ་ཆགས་ཀྱི་བརྩེ་སེམས་བཅས་ནི་བསམ་པའི་རྒྱུ་ནོར་རྩ་ཆེན་ཞིག་ཡིན། ཀྲུང་གོ་གུང་ཁྲན་ཏང་གིས་ལོ་ངོ་བརྒྱའི་ལོ་རྒྱུས་བརྒྱུད་མྱོང་བ་དང་། ཏང་གི་ལོ་རྒྱུས་ནི་ཏང་དང་མི་དམངས་ཀྱིས་གསར་གཏོད་བྱས་པ་ཡིན་ལ། མཚོ་སྔོན་གྱི་བཅོས་སྒྱུར་འཕེལ་རྒྱས་གཏན་འཇགས་ནི་མི་རབས་ནས་མི་རབས་བར་རྒྱུན་མཐུད་འབད་འཐབ་བྱེད་དགོས་པའི་བརྒྱུད་རིམ་ཞིག་ཡིན། དུས་རབས་གསར་པར་ཞུགས་པ་དང་། ལངས་གནས་གསར་པར་འགྲེང་པ། མཚོ་སྔོན་གསར་པ་འཛུགས་སྐྲུན་བཅས་བྱེད་ན། ང་ཚོས་ཐོག་མཐའ་བར་གསུམ་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པའི་རླབས་ཆེན་དར་ཆ་མཐོན་པོར་སྒྲེང་དགོས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་གཟིགས་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་དོན་འཁྱོལ་ནན་མོ་བྱེད་དགོས་པར་མ་ཟད། ཐོག་མའི་སེམས་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་རྒྱུ་དེ་རྩ་བའི་སྒུལ་ཤུགས་སུ་བྱེད་པ་དང་། མཚོ་སྔོན་གྱི་རིགས་སོ་སོའི་བྱ་བ་སྐས་རིམ་གསར་པ་ཞིག་ཏུ་སླེབས་པར་ཧུར་ཐག་གིས་སྐུལ་འདེད་བཏང་སྟེ་མཚོ་སྔོན་སྔར་ལས་འཕེལ་རྒྱས་འབྱུང་བར་བྱེད་པ་དང་། མཚོ་སྔོན་གྱི་རིགས་སོ་སོའི་མི་དམངས་སྔར་ལས་བདེ་སྐྱིད་ལྡན་པར་བྱེད་དགོས། ཝང་ཅན་ཅུན་གྱིས་བློ་མཐུན་རྒན་པ་སངས་རྒྱས་ཀྱི་ལུས་ཕུང་བདེ་ཐང་དང་ནད་མེད་ཚེ་རིང་ཡོང་བའི་སྨོན་འདུན་ཞུས།
ཁྱེད་ཀྱི་སྐུ་གཟུགས་བདེ་ཐང་ཡིན་ནམ། འཚོ་བར་དཀའ་ཁག་ཡོད་དམ། ཏང་དང་སྲིད་གཞུང་ལ་ད་རུང་བླང་བྱ་ཅི་ཞིག་ཡོད་དམ། ཝང་ཅན་ཅུན་སྔ་གཞུག་ཏུ་ཏང་ཡོན་པེ་ཆིན་ཡོན་དང་ཐེན་པོ་ལི། མང་ཚོགས་ཉིག་ཞིག་ཀྲི་བཅས་ཀྱི་ཁྱིམ་དུ་སོང་ནས་། ཁོ་ཚོའི་ལུས་ཕུང་བདེ་ཐང་གི་གནས་ཚུལ་དང་འཚོ་བའི་གནས་ཚུལ་ཞིབ་འདྲི་བྱས། ཝང་ཅན་ཅུན་གྱིས་ཏང་ནང་ཞུགས་ནས་ལོ་རེ་ལྔ་འགོར་ཡོད་པའི་པེ་ཆིན་ཡོན་ལ་དྲན་གསོའི་རྟགས་མ་བཏགས་པ་དང་། ཁོ་མོའི་ལག་པར་འཇུས་ཏེ་ཁྱེད་ཀྱིས་ཏང་གི་བཀའ་ལ་ཉན་པ་དང་། ཏང་གི་རྗེས་སུ་འབྲངས་པ། ཏང་གི་ཆེད་དུ་བྱ་བ་འབད་པར་བསྒྲུབས་པ་དེ་ཏང་དང་མི་དམངས་ཀྱིས་བརྗེད་མི་སྲིད་ལ། ཏང་ཀྲུང་དབྱང་གིས་ཏང་ནང་ཞུགས་ནས་ལོ་ལྔ་བཅུ་འགོར་ཡོད་པའི་ཏང་ཡོན་རྒན་པ་རྣམས་ལ་དྲན་གསོའི་རྟགས་མ་གནང་བ་ནི་ཏང་གིས་རང་གི་བུ་དང་བུ་མོར་ཐུགས་ཁུར་གནང་བ་ཡིན། ད་ལྟ་ཁྱེད་ཀྱི་ལུས་ཕུང་བདེ་ཐང་ཡོང་རྒྱུ་ནི་གལ་ཆེ་ཤོས་དེ་ཡིན་པ་དང་། ལུས་ཕུང་བདེ་ཐང་ཡོང་བ་ནི་ཏང་ལ་ཕུལ་བའི་བྱས་རྗེས་ཡིན་ཟེར། ཝང་ཅན་ཅུན་གྱིས་བློ་མཐུན་ཐེན་པོ་ལི་ཡིས་ལས་འཁྱུར་ངལ་གསོ་བྱས་རྗེས་ཀྱང་སྒེར་སེམས་མེད་པར་དུས་ཡུན་རིང་པོའི་ནང་གཞིས་ཁུལ་ཀྱི་མང་ཚོགས་དག་ལ་ཏང་གི་སློབ་ཁྲིད་བྱས་པར་ཁས་ལེན་གང་ལེགས་བྱས་པ་དང་། ཁོས་གུང་ཁྲན་ཏང་ཡོན་ཞིག་གི་ཚད་གཞི་ལྟར་རང་ཉིད་ལ་རེ་བ་ནན་མོ་བཏོན་ཏེ་གུང་ཁྲན་ཏང་ཡོན་གྱིས་དཔེ་སྟོན་སྣེ་ཁྲིད་ནུས་པ་འདོན་སྤེལ་གང་ལེགས་བྱས་པར་གཟེངས་བསྟོད་བྱས་ལ། ཁོས་མུ་མཐུད་དུ་མང་ཚོགས་ཀྱི་དྲིལ་སྒྲོག་བྱ་བ་བཟང་བོར་བསྒྲུབ་དགོས་པ་དང་། ཏང་གི་འབོད་སྐུལ་དང་འདོད་ཚུལ་མང་ཚོགས་ཀྱི་རང་འགུལ་འགུལ་སྐྱོད་དུ་བསྒྱུར་དགོས་པའི་སྐུལ་མ་བཏང་། ཝང་ཅན་ཅུན་གྱིས་ཉིག་ཞིག་ཀྲི་ཡི་ལུས་སྟོབས་བཟང་བ་དང་བུ་ཕྲུག་ལ་སྲི་ཞུ་ལྡན་པ། ཁྱིམ་ཚང་བདེ་སྐྱིད་ལྡན་པའི་གནས་ཚུལ་མཐོང་རྗེས་སེམས་ལ་དགའ་སྤྲོའི་ཁེངས་པ་དང་། ཁོ་མོར་དེང་སྐབས་རྒྱལ་ཁབ་ལ་ལོ་རེ་ནས་ལོ་རེར་འགྱུར་ལྡོག་གསར་པ་འབྱུང་བཞིན་ཡོད་པ་དང་། མི་དམངས་ཀྱི་འཚོ་བ་ལོ་རེ་ནས་ལོ་རེར་ཇེ་བཟང་དུ་འགྲོ་བཞིན་ཡོད་ལ། ཏང་དབུ་བརྙེས་ནས་ལོ་བརྒྱ་འཁོར་རྗེས་འཕེལ་རྒྱས་སྔར་ལས་མགྱོགས་པ་དང་། འཚོ་བ་སྔར་ལས་སྐྱིད་པོ་ཡོང་ངེས་ཡིན་ལ། ཁོ་མོས་ལུས་པོར་གཅེས་སྤྲས་དང་ཚེ་མཇུག་སྐྱིད་པོ་ཞིག་རོལ་དགོས་པའི་བཅོལ་གདམས་བྱས།
ཞིན་ཁྲང་ཞིང་སྔ་གཞུག་ཏུ་ཏང་ཡོན་རྒན་པ་ཁྲིན་དབྱི་དང་། སྔོན་གཤེགས་དཔའ་བོའི་ཁྱིམ་མི་ཝང་ཆིན་ཧྲན། ཏང་ནང་གི་གཟི་བརྗིད་མཚན་སྙན་ཐོབ་མཁན་ཝང་ཧའེ་ཐའོ་བཅས་ཀྱི་ཁྱིམ་དུ་སོང་ནས་ཁོ་ཚོར་འཚམས་འདྲི་བྱས་པ་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ནས་ཁོ་ཚོར་དུས་ཆེན་གྱི་འཚམས་འདྲི་བྱས། ལོ་གྱ་གཅིག་ཡིན་པའི་ཏང་ཡོན་རྒན་པ་ཁྲིན་དབྱི་ཡི་ཁྱིམ་དུ། ཞིན་ཁྲང་ཞིང་གིས་ཁོ་མོར་དྲན་གསོའི་རྟགས་མ་བཏགས་པ་དང་། འཚོ་བའི་གནས་ཚུལ་ཞིབ་འདྲི་བྱས། ཁྲིན་དབྱི་ནི་དུས་ཡུན་རིང་བོར་སློབ་དེབ་རྩོམ་འབྲིའི་བྱ་བ་སྒྲུབ་པའི་སློབ་གསོ་བ་རྒན་པ་ཞིག་ཡིན་པ་ཤེས་རྗེས། ཞིན་ཁྲང་ཞིང་གིས་སློབ་དེབ་ནི་སློབ་གསོ་སྤེལ་བའི་གཞི་རྩའི་བསྲུང་བྱ་ཡིན་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་དེབ་རྩོམ་སྒྲིག་བྱ་བར་ཧ་ཅང་མཐོང་ཆེན་བྱེད་བཞིན་ཡོད་ལ། དེའི་སྔོན་ཆེད་དུ་མི་དམངས་སློབ་གསོ་དཔེ་སྐྲུན་ཁང་གི་བློ་མཐུན་རྒན་པ་དག་ལ་འཕྲིན་ལན་བསྐུར་ནས་རེ་བ་ནན་མོ་བཏོན་མྱོང་ཞེས་བཤད། ཞིན་ཁྲང་ཞིང་གིས་ཁྲིན་དབྱི་ལ། ཁྱེད་ཀྱིས་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲངས་ནས་མཚན་སྙན་དང་ཁེ་ཕན་མི་བསམ་པར་སློབ་གསོ་བྱ་བའི་ཁྲོད་དུ་ཆེས་རྨང་གཞི་དང་ཆེས་གལ་ཆེ་བ། ཆེས་རྩ་བའི་བྱ་བ་གལ་ཆེན་བསྒྲུབས་ཏེ་ཏང་གི་སློབ་གསོའི་ལས་དོན་གྱི་ཆེད་དུ་མི་ཚེ་གང་བོར་འབད་འཐབ་བྱས་པ་ཡིན། ཏང་གི་ལོ་བརྒྱའི་འཁྲུངས་སྐར་བསུ་ལ་ཉེ་བའི་སྐབས་སུ་ང་ཚོས་ཁྱེད་ལ་བརྩེ་བའི་ངང་འཚམས་འདྲི་དང་། ཁྱེད་ཀྱི་ལུས་ཕུང་བདེ་ཐང་དང་ནད་མེད་ཚེ་རིང་ཡོང་བའི་སྨོན་འདུན་ཞུས་པ་ཡིན་ཟེར། ཞིན་ཁྲང་ཞིང་གིས་འབྲེལ་སྡེ་ཁག་གིས་ཏང་ཡོན་རྒན་པའི་འཚོ་བར་དོ་ཁུར་བྱེད་དགོས་པ་དང་། ཁོ་ཚོའི་དངོས་ཡོད་དཀའ་གནད་ཐག་གཅོད་རོགས་བྱེད་དགོས་པའི་བཅོལ་གདམས་བྱས། ཞིན་ཁྲང་ཞིང་གིས་སྔོན་གཤེགས་དཔའ་བོའི་ཁྱིམ་མི་དག་གི་འཚོ་བའི་གནས་ཚུལ་ལ་དོ་ཁུར་ཆེན་པོ་བྱེད་བཞིན་ཡོད། སྔོན་གཤེགས་དཔའ་བོའི་ཁྱིམ་མི་ཝང་ཆིན་ཧྲན་གྱིས་ཁྱིམ་ཚང་གི་འཚོ་བའི་ཆ་རྐྱེན་བཟང་བ་དང་། ཀྲུང་གོ་གུང་ཁྲན་ཏང་ལ་བཀའ་དྲིན་ཚད་མེད་ཞུ་བ་ཐོས་རྗེས། ཞིན་ཁྲང་ཞིང་སེམས་བདེ་བར་གྱུར་ནས་དགའ་སྤྲོ་ཆེན་པོ་སྐྱེས། ཁོས་བཤད་རྒྱུར། ཁྱེད་ཚོའི་མི་རབས་གོང་མ་དག་གིས་ཏང་དང་མི་དམངས་ཀྱི་ལས་དོན་གྱི་ཆེད་དུ་དཔའ་ངར་ཆེད་བསྐྱེད་ཀྱིས་རང་སྲོག་བློས་བཏང་བ་དང་། དེས་ཀྲུང་གོ་གུང་ཁྲན་ཏང་མིའི་ཆོད་སེམས་བརྟན་པོ་དང་དམིགས་འབེན་ལག་བསྟར་བྱེད་ཕོད་པ། དཀའ་སྤྱད་ཀྱིས་བྱས་རྗེས་འཇོག་པ། དག་གཙང་སྤྱི་གཞོལ་གྱི་བླ་མེད་གཤིས་རྒྱུད་དང་བླ་མེད་སྙིང་སྟོབས་མངོན་པར་བྱས་ཡོད་པ་དང་། .
ཁྱེད་ཚོས་ཁོ་ཚོའི་སྙིང་སྟོབས་དར་སྤེལ་དང་འཚོ་བར་བཀོད་སྒྲིག་བཟང་བོ་བྱེད་པ་དང་། ལུས་ཕུང་ལ་གཅེས་སྤྲས་བྱས་ཏེ་བྱེད་ཐབས་ཆེས་ལེགས་པོས་སྔོན་གཤེགས་དཔའ་བོར་སེམས་གསོ་ཞུ་རྒྱུ་ནི་རེ་བ་ཡིན་ཟེར། ཞིན་ཁྲང་ཞིང་གིས་འབྲེལ་ཡོད་སྡེ་ཁག་གིས་སྔོན་གཤེགས་དཔའ་བོའི་ཁྱིམ་མི་དག་གི་འཚོ་བར་དོ་ཁུར་ཆེན་པོ་བྱས་ཏེ། བརྩེ་སེམས་དང་འགན་འཁྲི་ཁྱེར་ནས་རོགས་སྐྱོར་སྲིད་ཇུས་སོ་སོ་དོན་འཁྱོལ་ནན་མོ་བྱེད་དགོས་པའི་བླང་བྱ་བཏོན། ཝང་ཧེ་ཐའོ་ཡི་ཁྱིམ་དུ། ཞིན་ཁྲང་ཞིང་གིས་ཁྱེད་ཀྱིས་ཡུས་ཧྲུའུ་ས་འགུལ་དང་ཝུན་ཁྲོན་ས་འགུལ། ཡ་ཨན་ས་འགུལ་སོགས་རང་བྱུང་གནོད་འཚེའི་སྐབས་བསྟུན་རོགས་སྐྱོར་བྱ་བའི་དཔྱད་ཞིབ་བརྒྱུད་མྱོང་བ་དང་། ཐེངས་རེ་རེར་རང་སྲོག་ལ་མི་འཛེམ་པར་གནོད་འཚེའི་མདུན་དུ་བསྐྱོད་ནས་བྱས་རྗེས་འབུར་ཐོན་བཞག་པ་དང་། ཏང་ཡོན་གྱི་འདུ་ཤེས་དང་ཏང་ཡོན་གྱི་ཚད་གཞི་མངོན་པར་བྱས་ཡོད་ལ། ཁྱེད་ཀྱིས་གཟི་བརྗིད་ལ་གཅེས་སྤྲས་དང་གྲུབ་འབྲས་དར་སྤེལ་བཏང་སྟེ་གཟི་བརྗིད་སྔར་ལས་ཆེན་པོ་བརྩོན་ལེན་བྱེད་རྒྱུ་ནི་རེ་བ་ཡིན་ཟེར། ང་ཚོས་ཁྱེད་དང་ཕུལ་བྱུང་ཏང་ཡོན་རྣམས་ལ་སློབ་སྦྱོང་བྱས་ཏེ། སྤྱི་ཚོགས་ཡོངས་སུ་སྔོན་ཐོན་བསྟེན་པ་དང་སྔོན་ཐོན་གྱི་རྗེས་སུ་འབྲངས་པའི་སྣང་ཚུལ་བཟང་བོ་བསྐྲུན་པ་དང་། མཚོ་སྔོན་གསར་པ་འཛུགས་སྐྲུན་བྱེད་པའི་ཁྲོད་དུ་ཏང་དང་མི་དམངས་ལ་བྱས་རྗེས་འཇོག་པའི་སྟོབས་ཤུགས་གཅིག་སྡུད་བྱེད་ངེས་ཡིན་ཟེར།
ཝུའུ་ཞའོ་ཅུན་གྱིས་སོ་སོར་བློ་མཐུན་རྒན་པ་ཡེའོ་ཞང་ཁྲིན་དང་། ཞིང་ཆེན་ཡོངས་ཀྱི་པྲོག་གསར་གློ་ཚད་རིམས་ནད་འགོག་བཅོས་ཀྱི་སྔོན་ཐོན་མི་སྒེར་སུན་ཀྲི་ནཱ། སྔོན་གཤེགས་དཔའ་བོའི་ཁྱིམ་མི་ཁྲིན་ཡུས་ལན། དཀའ་ཁག་ཡོད་པའི་ཏང་ཡོན་ལིས་ཀུའེ་ལན་བཅས་ལ་འཚམས་འདྲི་བྱས་པ་དང་། ཁོ་ཚོའི་འཚོ་བ་དང་ལུས་ཕུང་གི་གནས་ཚུལ་ཞིབ་འདྲི་བྱས་པར་མ་ཟད། ཏང་དང་སྲིད་གཞུང་གི་ཐུགས་ཁུར་བསྐྱལ། ཡེའོ་ཞང་ཁྲིན་གྱི་ཁྱིམ་དུ། ཝུའུ་ཞའོ་ཅུན་གྱིས་བློ་མཐུན་རྒན་པ་རྣམས་ལ་དུས་ཆེན་གྱི་འཚམས་འདྲི་དང་སྨོན་འདུན་ཞུས་པ་དང་། ཁོ་ཚོས་མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཁྲོད་བྱས་རྗེས་འབུར་ཐོན་བཞག་པར་བཀའ་དྲིན་ཆེ་ཞུས་པར་མ་ཟད། བློ་མཐུན་རྒན་པའི་བསམ་འཆར་དང་གྲོས་གཞི་ལ་ནན་ཏན་གྱིས་ཉན། ཡེའོ་ཞང་ཁྲིན་དང་ལིས་ཀུའེ་ལན་གྱི་ཁྱིམ་དུ་། ཝུའུ་ཞའོ་ཅུན་གྱིས་ཁོ་ཚོར་དྲན་གསོའི་རྟགས་མ་བྱིན་པ་དང་། ཏང་ཀྲུང་དབྱང་གིས་ཁྱེད་ཚོར་དྲན་གསོའི་རྟགས་མ་གནང་བ་ནི་ཏང་ཡོན་རྒན་པ་དག་གིས་ཏང་ལ་བློ་དཀར་བ་དང་མི་དམངས་ལ་བློ་དཀར་བར་བྱེད་པའི་གཟེངས་བསྟོད་ཡག་ཤོས་ཡིན་ཟེར། སུན་ཀྲི་ནཱ་དང་ཁྲིན་ཡུས་ལན་གྱི་ཁྱིམ་དུ། ཝུའུ་ཞའོ་ཅུན་གྱིས་བཤད་རྒྱུར། གནད་འགག་གི་དུས་སྐབས་དང་ཉེན་ཁར་ཐུག་པའི་དུས་སུ། ཁྱེད་དང་ཁྱེད་ཚོའི་ཁྱིམ་མི་དག་གིས་རང་སྲོག་བློས་བཏང་སྟེ་སྒེར་སེམས་མེད་པར་བྱས་རྗེས་བཞག་པས། ཏང་དང་སྲིད་གཞུང་གིས་ཁྱེད་ཚོར་བཀའ་དྲིན་ཞུ་བཞིན་ཡོད། ལིས་ཀུའེ་ལན་གྱི་ཁྱིམ་དུ། ཝུའུ་ཞའོ་ཅུན་གྱིས་རིམ་པ་སོ་སོའི་ཏང་དང་སྲིད་གཞུང་གིས་ཐོག་མཐའ་བར་གསུམ་དུ་མང་ཚོགས་ཀྱི་བདེ་སྡུག་སེམས་སུ་ཉར་ཏེ་འཚོ་བའི་ཁྲོད་ཀྱི་དངོས་ཡོད་དཀའ་གནད་ཐག་གཅོད་རོགས་བྱེད་བཞིན་ཡོད་ཟེར།
བསྟུད་མར་ཉིན་འགའི་རིང་ལ། ཞིང་ཆེན་ཏང་ཨུའི་རྒྱུན་ལས་ཨུ་ཡོན་མགོན་པོ་བཀྲ་ཤིས་དང་ཐིན་ཅ་ཚའེ། ལིས་ཅེ་ཞང་། ཝང་ཡུས་ཡན། ཡུས་ཚུང་ལི། མཱ་ཅི་ཞའོ། དབྱིན་པའེ། ཁྲིན་རུའེ་ཧྥིན། ལིག་ཀུ་ཕིང་། ཝང་ལིས་མིང་བཅས་ཀྱིས་སོ་སོར་ཏང་ནང་གི་གཟི་བརྗིད་མཚན་སྙན་ཐོབ་པའི་ཏང་ཡོན་ཏུང་ཧྲུའུ་མའེ་དང་ལུའུ་ཧུང་དབྱིན། ཁྲིན་ཧྥིན་ལེན། ཡན་ཀའོ་ཀྲུའུ། མཱ་ཅན་མིང་། སུན་ལན་བཅས་དང་། འཚོ་བར་དཀའ་ཁག་ཡོད་པའི་ཏང་ཡོན་ལིས་ཧུའེ་ཧྥུའུ་དང་ལིས་ཅི་ལེ། ལིས་ཧྥུའུ་ཁྲིན། ཞེ་ཅ་ཆིང་། དབྱི་ཁང་མེང་། ཝང་ཀུའེ་ཧོང་། ཡོན་ཕིང་། ལུའུ་ལིན་ཀྲིན་བཅས་དང་། ཏང་ཡོན་རྒན་པ་དང་ལས་བྱེད་རྒན་པ་ལུའུ་ཞིན་ཀའོ་དང་ལ་པིན་ལིས། དབྱང་ཅིན་ཧྥུའུ། ལིས་ཧྲིན་ཆི། ཧྥང་ཀྲིན་ཚེ། མཱ་ཞའོ་ཧྥེ། ཏུའུ་པའོ་ཞང་། ཝང་ཞོན་ཞང་བཅས་དང་། སྔོན་གཤེགས་དཔའ་བོའི་ཁྱིམ་མི་ཀྲང་ཡུས་ཧྥང་དང་དབྱང་ཧྥིན་ཀྲིན། ལིག་ཀུའེ་ཧྥང་། ཀྲང་ཚུའེ་ཀྲི་བཅས་དང་། གཞུང་དོན་གྱི་ཆེད་དུ་རང་སྲོག་བློས་བཏང་བའི་ཏང་ཡོན་ལས་བྱེད་པ་རྒན་པའི་ཁྱིམ་མི་ཀའོ་ཧྲིན་ཧྭ་དང་ལི་ཅིན། ཁྲང་ཧུའེ་ལི། ལིས་ཡུས་ལན་བཅས་ལ་འཚམས་འདྲི་བྱས་པའམ་ཡང་ན་འཚམས་འདྲི་བྱེད་པར་མངགས་བཅོལ་བྱས། འཚམས་འདྲི་བྱེད་སྐབས། ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གིས་ཁོ་ཚོར་ཏང་རྩ་འཛུགས་ཀྱི་ཐུགས་ཁུར་དང་བརྩེ་སེམས་བསྐྱལ་བ་དང་། ཁོ་ཚོ་ལ་བརྩེ་བའི་འཚམས་འདྲི་དང་གུས་སེམས་བསྟན་པར་མ་ཟད། ཏང་ནང་དུ་ཞུགས་ནས་ལོ་ལྔ་བཅུ་འགོར་བའི་ཏང་ཡོན་རྒན་པ་དག་ལ་དྲན་གསོའི་རྟགས་མ་བྱིན་པ་དང་། ཁོ་ཚོའི་འཚོ་བ་དང་བྱ་བ། ཁྱིམ་ཚང་གི་གནས་ཚུལ་ཞིབ་འདྲི་བྱས་ལ། ཁོ་ཚོར་རང་གི་ལུས་ཕུང་ལ་གཅེས་སྤྲས་བྱེད་དགོས་པའི་བཅོལ་གདམས་བྱས་པར་མ་ཟད། ཁོ་ཚོ་དང་མཉམ་དུ་ཏང་གི་ལོ་བརྒྱའི་འོད་སྟོང་འབར་བའི་ལོ་རྒྱུས་ལ་ཕྱིར་དྲན་དང་། མཚོ་སྔོན་གྱི་མཛེས་པའི་མ་འོངས་པར་འཆར་འགོད་བྱས།
ལྷ་མོ་ཚེ་རིང་གིས་བསྒྱུར།
