སྟག་འབུམ་རྒྱལ་ནི་སྤྱི་ལོ1966ལོར་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཀོས་ནན་རྫོང་སུམ་མདོ་གྲོང་རྡལ་བན་ཤུལ་སྡེ་བར་སྐྱེས་ཤིང་། རིག་གསར་གྱི་དུས་ངན་རྡུལ་འཚུབ་འཇགས་མ་ཐག་པའི་སྐབས་ཤིག་ལ་སྦྲ་གུར་སློབ་གྲྭར་འགྲིམ་པའི་སྐལ་བ་ཐོབ། དུས་དེར་བསླབ་གཞི་སོགས་ལྟ་ཀློག་དཔེ་དེབ་ཤིན་ཏུ་དཀོན་པའི་དབང་གིས། ལོ་རེའི་དབྱར་གྱི་དུས་ལ་ཐོན་ཚེ་ཉིན་བཅུ་ཙམ་ལ་དཔེ་ཁྲིད་བྱེད་པ་ཙམ་གྱིས་ཆོག་པར་བྱས་ཏེ་ཉི་མ་བསྐྱལ་བ་རེད།

ཡིན་ནའང་ཁོ་ནི་བློ་རིག་ཤིན་ཏུ་སྐྱེན་པོ་ཞིག་ཡིན་པ་དང་། སློབ་བུ་མང་པོའི་ཁྲོད་ཉིན་གཅིག་ལ་ཀ་ཁ་སུམ་ཅུ་ཚེགས་མེད་དུ་བློར་ངེས་སོང་བས། དགེ་རྒན་གྱིས་ཁོ་ལ་བསྟོད་པའི་མཐེ་བོང་མཐོ་རུ་བསྒྲེངས། དེ་ནི་ཁོ་རང་མུ་མཐུད་དུ་ཡི་གེ་འབྲི་ཀློག་གི་ལས་ལ་བློ་སྤོབས་ཆེན་པོས་འཇུག་པའི་རྒྱུ་རུ་གྱུར།
དུས་ཀྱི་འགྱུར་བའི་དབང་གིས་རིམ་གྱིས་«མཚོ་སྔོན་བོད་ཡིག་གསར་འགྱུར་»དང་«མི་རོ་རྩེ་སྒྲུང་»སོགས་དཔེ་ཀློག་གི་བགོ་སྐལ་དུ་སྨིན་པ་དེས་ཁོ་རང་རྨ་བྱས་དབྱར་རྔ་ཐོས་པ་བཞིན་དུ་སྤྲོ་དགའི་དཔལ་དུ་དྲངས། སྐབས་དེའི་རྣམ་པ་གླེང་དུས་ཁོས“ངའི་མདངས་བྲལ་བའི་བྱིས་པའི་རྨི་ལམ་ལ་ཚོན་མདོག་སྣ་ཚོགས་སྤྲས་བྱུང་བ་སྟེ། ལན་རེར་ང་རང་ནགས་རྫུབས་ཁྲོད་དུ་གཅིག་པུར་ནོར་རྫིར་འགྲོ་དུས་འདྲེ་མོ་ལྕགས་ཀྱི་མཆུ་ཏོ་ཅན་དང་འཕྲད་ཨེ་ཡོང་སྙམ་ནས་འཇིགས་སྐྲག་སྐྱེས་མྱོང་ལ། ལན་རེར་རང་ཉིད་ཀྱང་མ་སངས་ཡ་རུ་ཁ་ཁྲ་ལྟ་བུའི་དཔའ་རྒོད་ཅིག་བྱས་ཏེ་མི་ངན་མ་རུངས་པ་དག་འདུལ་གྱིན་པའི་རྨི་ལམ་ཡང་རྨིས་མྱོང”ཟེར་ཞིང་།འདས་པའི་ལོ་ཟླ་དེ་དག་དྲན་ན་ད་དུང་ཡང་དུང་དུང་ཤམ་ཤམ་གྱི་ཚོར་བ་ཞིག་ཐོལ་གྱིས་སྐྱེ་བཞིན་པར་བརྗོད།

རྗེས་སུ་«ཧོར་གླིང་གཡུལ་འགྱེད་»དང་«ལྷ་གླིང་གབ་ཙེ་དགུ་སྐོར» «འཁྲུངས་གླིང་མེ་ཏོག་ར་བ» «རྟ་རྒྱུག་ནོར་བུ་ཆ་བདུན་»སོགས་གཙོ་བྱས་པའི་གེ་སར་སྒྲུང་དཔེ་སྣ་ཚོགས་བྱུང་བ་དེས་ཁོའི་སློབ་སྦྱོང་གི་འཚོ་བར་ཐོན་ཁུངས་ཤིག་བསྩལ་བ་དང་། དེ་དག་གིས་ཁོའི་ཕྱིས་འབྱུང་གི་རྩོམ་འབྲིའི་བྱ་བར་ཤུགས་རྐྱེན་ཟབ་མོ་ཐེབས།

ཁོས་རང་ཉིད་ནི་ལས་ངན་ནང་གི་ལས་ཅན་ཞིག་རེད་བསམས་མྱོང་ཟེར། དེ་དུས་འབྲོག་ཁུལ་དུ་སློབ་མ་སློབ་གྲྭར་སྐྱེལ་མཁན་ཧ་ཅང་ཉུང་ཞིང་། ཁྱིམ་བདག་ཚོའི་སེམས་སུ་བྱིས་པ་སློབ་གྲྭར་བསྐྱལ་ཚེ་ཕ་མ་དང་གཏན་གྱེས་འགྲོ་ངེས་པའི་བསམ་ཚུལ་ཞིག་ཆགས་ཡོད་པས། ཁོ་རང་ཀུང་ཧྲེའི་སློབ་གྲྭར་འགྲོ་འདོད་ཅི་འདྲ་དྲག་ཀྱང་ཕ་མ་གཉིས་ཀྱིས་གཏོང་ག་ལ་ཕོད། འོན་ཀྱང་སྐབས་དེའི་ཀུང་ཧྲེའི་སློབ་གཙོ་ནི་རིག་གསར་སྐབས་གཞི་རིམ་དུ་ཡོང་སྟེ་ཁོ་ཚང་དུ་གཞིས་སྡོད་བྱས་མྱོང་ཞིང་ཁོའི་ཕ་དྲིན་ཆེན་གྱི་གྲོགས་པོ་ཞིག་ཡིན་པས། ཁོས་སྟག་འབུམ་རྒྱལ་གྱི་བོད་ཡིག་གི་ཆུ་ཚད་ལེགས་པ་ཐོས་པས་ཆེད་དུ་ཡོང་སྟེ་ཁོའི་ཕ་རྒན་ལ་སློབ་གསོ་ཡང་ཡང་བཏང་མཐར། 1978ལོའི་དཔྱིད་ཀར་ཁོ་རང་དངོས་གནས་ཚད་ལྡན་གྱི་སློབ་གྲྭ་སྟེ་ཀུང་ཧྲེའི་དར་དམར་ཆ་ཚང་སློབ་གྲྭར་འགྲིམ་པའི་སྐལ་བ་ཐོབ་སོང་། སྟག་འབུམ་རྒྱལ་སྤྱི་ལོ1986ལོར་མཚོ་ལྷོ་མི་རིགས་དགེ་ཐོན་སློབ་གྲྭ་ནས་སློབ་མཐར་ཕྱིན་པ་དང་། སྤྱི་ལོ1988ལོར་ནུབ་བྱང་མི་རིགས་སློབ་གྲྭ་ཆེན་མོའི་གྲངས་ཉུང་མི་རིགས་སྐད་ཡིག་ཚན་ཁག་ཏུ་ཟབ་སྦྱོང་བྱས། སྤྱི་ལོ1986ལོ་ནས་བཟུང་སློབ་གསོའི་བྱ་བའི་ཐོག་ཞུགས།

དུས་རབས་སྔོན་མའི་ལོ་རབས་བརྒྱད་ཅུ་བའི་མཇུག་ཏུ་གསར་རྩོམ་གྱི་ལས་ལ་ཞུགས་ཤིང་། སྔ་གཞུག་ཏུ་«མཚོ་སྔོན་བོད་ཡིག་གསར་འགྱུར་»དང་«སྦྲང་ཆར» «བོད་ཀྱི་རྩོམ་རིག་སྒྱུ་རྩལ» «གངས་རྒྱན་མེ་ཏོག་»སོགས་ཞིང་ཆེན་ཕྱི་ནང་གི་དུས་དེབ་དང་ཚགས་པར་སྟེང་དུ་སྒྲུང་གཏམ་དྲུག་ཅུ་ལྷག་སྤེལ་ཞིང་། དེའི་ཁྲོད་ཀྱི་«ཧཱ་པ་གསོས་པའི་ཟིན་བྲིས» «སྒོ་ཁྱི» «ཁྱི་རྒན» «མི་ཚེའི་གླུ་དབྱངས» «ཁྱི་དང་བདག་པོ། ད་དུང་གཉེན་ཚན་དག་»སོགས་སྒྲུང་གཏམ་སྐོར་ཞིག་རྒྱ་ཡིག་ཏུ་བསྒྱུར་ནས་«མི་རིགས་རྩོམ་རིག་»སོགས་ཀྱི་སྟེང་དུ་བཀོད་ཡོད་ལ། འགའ་རེ་སློབ་གྲྭ་ཆེན་མོ་ཁག་གི་བསླབ་དེབ་ཏུ་བདམས་འདུག
སྔ་གཞུག་ཏུ་སྐབས་གཉིས་པ་དང་བཞི་བ་དང་ལྔ་བའི་སྦྲང་ཆར་བྱ་དགའ་དང་། མཚོ་སྔོན་ཞིང་ཆེན་གྱི་སྐབས་བཞི་བ་དང་ལྔ་བའི་ཕུལ་བྱུང་རྩོམ་རིག་བྱ་དགའ། རྒྱལ་ཡོངས་སྐབས་གཉིས་པའི་གངས་རྒྱན་བུམ་པའི་རྩོམ་རིག་བྱ་དགའ། མཚོ་སྔོན་པོ་རྩོམ་རིག་བྱ་དགའ་(རྒྱ་ཡིག)སོགས་ཐོབ་མྱོང་བ་དང་། ཉེ་ལམ། ཁོང་གི་སྒྲུང་འབྲིང་«ཁ་བ་མེད་པའི་དགུན་ཁ་»ཞེས་པར་ཐེངས་བཅུ་གཅིག་པའི་རྒྱལ་ཡོངས་གྲངས་ཉུང་མི་རིགས་རྩོམ་རིག་གསར་རྩོམ་གྱི“རྟ་མཆོག་བྱ་དགའ”ཐོབ་ཡོད་པ་རེད།

ཁོང་ད་ལྟ་མཚོ་སྔོན་ཞིང་ཆེན་མང་རྫོང་མི་རིགས་སློབ་འབྲིང་གི་དགེ་རྒན་ཡིན་ལ། ཀྲུང་གོའི་རྩོམ་པ་པོ་མཐུན་ཚོགས་ཀྱི་ཚོགས་མི་དང་། མཚོ་ལྷོ་ཁུལ་རྩོམ་པ་པོ་མཐུན་ཚོགས་ཀྱི་རྒྱུན་ལས་ལས་འཛིན་པའི་འགན་ཁུར་ཡོད།
 

རྩོམ་སྒྲིག་པ། སྒྲོལ་མ་སྐྱིད།