བློ་བཟང་ནི་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་དུ་སྐྱེས་པའི་བོད་རིགས་བུ་རྒོད་ཅིག་ཡིན་ལ། བོད་ལྗོངས་ནས་ལས་སྐྲུན་བྱེད་པ་དང་ཆབས་ཅིག ཕ་ཡུལ་གྱི་ཡོད་ཚད་མ་བརྗེད་པར་ཕྱིར་ཕ་ཡུལ་དུ་ལོག་ནས་ལས་སྐྲུན་བྱེད་རྒྱུའི་སེམས་ཐག་བཅད། 2012ལོའི་ཟླ་ལྔ་བར། ཁོས་མཚོ་སྔོན་བློ་བཟང་ཚན་རྩལ་ཚད་ཡོད་ཀུང་ཟི་བཙུགས་པ་མ་ཟད། མཚོ་སྔོན་ཞིང་ཆེན་ཁྲི་ཀ་རྫོང་བཟོ་ལས་ར་བར་གཞིས་ཆགས་ཡོད། གཙོ་བོར་གློག་རྡུལ་ཐོན་རྫས་གསར་སྤེལ་དང་ཐོན་སྐྱེད། ཕྱིར་བཙོང་དེ་མིན་རྩིས་འཁོར་གྱི་མཉེན་ཆས་གསར་སྤེལ་དང་། གློག་རྡུལ་སྲིད་དོན། གློག་རྡུལ་ཚོང་དོན་སྟེགས་བུ་གསར་སྤེལ་དང་འཁོར་སྐྱོད་ཚོང་གཉེར། སྲུང་སྐྱོང་བཅས་བྱེད་བཞིན་ཡོད།
ཉེ་བའི་ལོ་འགའི་རིང་ལ། བློ་བཟང་ཚན་རྩལ་གྱིས་བོད་རྒྱ་ཡིག་གཉིས་ཀྱི་ཉི་ཟེར་སྲིད་དོན་མ་ལག་དང་བོད་རྒྱ་ཡིག་གཉིས་ཀྱི་ཆ་འཕྲིན་འཚོལ་ཞིབ་མ་ལག བོད་རྒྱ་ཡིག་གཉིས་ཀྱི་གསར་འགྱུར་དྲ་བ་སོགས་ཀྱི་མ་ལག་གསར་སྤེལ་བྱས་པ་དང་། རོང་འབྲོག་པ་མཉམ་འབྲེལ་དྲ་རྒྱར་ཞུགས་པ་ཁྲིད་སྟོན་བྱས་ཏེ། འདུ་ཤེས་བསྒྱུར་བ་དང་དབུལ་ཐར་ཕྱུག་བསྒྱུར་བྱས། བོད་ཁམས་ཀྱི་ཆ་འཕྲིན་ལག་རྩལ་དང་གློག་རྡུལ་ཚོང་དོན་འཕེལ་རྒྱས་ལ་ཁ་གཏད་ནས། བློ་བཟང་ཚན་རྩལ་གྱིས་བོད་རྒྱ་ཡིག་གཉིས་ཀྱི་ཚོང་དོན་སྟེགས་བུ་གསར་སྤེལ་བྱས་ཏེ། དྲ་ལམ་དང་ཚོང་ཁང་གཉིས་ནས་ས་གནས་ཀྱི་ཁྱད་ལྡན་ཐོན་རྫས་ཕྱིར་བཙོང་དང་ཁྱབ་གདལ་དུ་བཏང་། ལས་གཞི་དེའི་བོད་ཁམས་ཀྱི་ཚོང་རྫས་ཉོ་འཚོང་ལམ་ཆེན་ཕྱེས་པ་དང་། བོད་ཁམས་ཀྱི་མང་ཚོགས་དབུལ་ཐར་ཕྱུག་བསྒྱུར་ལ་ནུས་པ་བཏོན།
བློ་བཟང་ཚན་རྩལ་གྱིས་ལས་རིགས་ལག་རྩལ་སློབ་གྲྭ་དང་བཟོ་གྲྭ། ཀུང་ཟི། བཟོ་སྐྲུན་ལག་རྩལ་ལྟེ་གནས། ལས་སྐྲུན་ར་བའི་འཕེལ་རྒྱས་འདུ་ཤེས་ལ་ཟུང་འབྲེལ་དམ་པོ་བྱེད་བཞིན་ཡོད། ད་ལོར་མཚོ་སྔོན་རྒྱང་སྒྲོག་བརྙན་འཕྲིན་སློབ་ཆེན་ནས་བོད་ཡིག་རྩིས་འཁོར་ལག་རྩལ་བཀོལ་སྤྱོད་ཀྱི་གསོ་སྦྱོང་རྟེན་གཞི་བཙུགས་པ་མ་ཟད། བོད་ཡིག་རྩིས་འཁོར་ལག་རྩལ་བཀོལ་སྤྱོད་བྱེད་པའི་ཆེད་ལས་སློབ་མ་བསྡུ་ལེན་བྱས་པ་དང་། གཞུང་ལུགས་བེད་སྤྱོད་བཟང་བོ་བྱས་ཏེ། ལག་ལེན་འབུར་དུ་ཐོན་པའི་མི་རིགས་ས་ཁུལ་གྱི་ཁྱད་ལྡན་ལས་རིགས་སློབ་གྲྭ་བཙུགས།
ས་གནས་མང་ཚོགས་ལ་ལས་གནས་འདོན་སྤྲོད་བྱེད་པ་དང་། མཐོ་རིམ་སློབ་གྲྭའི་མཐར་ཕྱིན་སློབ་མ་དང་ལས་སྐྲུན་མཁན་ལ་ལག་ལེན་གྱི་གོ་སྐབས་འདོན་སྤྲོད་བྱ་ཆེད། བློ་བཟང་ཚན་རྩལ་གྱིས་བོད་ཁམས་སུ་བོད་ཡིག་གློག་རྡུལ་ཐོན་རྫས་མཉམ་སྒྲིག་གི་ཐོག་མའི་ཐོན་སྐྱེད་སྒྲུབ་རིམ་ཡོངས་འགྲུབ་བྱས་པ་དང་། བོད་ཁུལ་གྱིས་མཉམ་སྒྲིག་ལག་རྩལ་དང་རྒྱུན་མཐུད་ལས་རིམ་གྱི་བྱ་བའི་འདུ་ཤེས་མངོན་འགྱུར་བྱས་པ་མ་ཟད། ཉོས་རྗེས་ཞབས་ཞུ་ཕན་ནུས་ཡོད་པའི་སྒོ་ནས་ཐག་གཅོད་བྱས།
ཕ་ཡུལ་གྱི་ཡུལ་མིས་ལས་བསྐྲུན་ལ་བརྟེན་ནས་འཕེལ་རྒྱས་བྱུང་ཞིང་རང་སྟེང་གི་འཕེལ་རྒྱས་ནུས་པ་ཇེ་དྲག་ཏུ་འགྲོ་བར་རོགས་རམ་བྱེད་ཆེད། བློ་བཟང་ཚན་རྩལ་གྱིས་ཁེ་ལས་ཀྱིས་ཁེ་ལས་སྐྱོང་བའི་བྱེད་ཐབས་ལ་བརྟེན་ནས། ཁེ་ལས་གསར་སྐྲུན་དང་ཁེ་ལས་ལ་དོ་དམ་བྱེད་པའི་མཉམ་འབྲེལ་དྲ་བའི་གནད་འཁེལ་དབུལ་སྐྱོར་གྱི་ལས་སྐྲུན་ར་བ་བཙུགས་ནས། ལས་སྐྲུན་ཁེ་ལས་ཉེར་དྲུག་ལ་རོགས་འདེགས་བྱས་པ་དང་། རྒྱ་ཆེའི་རོང་འབྲོག་མང་ཚོགས་ལ་ལས་སྐྲུན་ཕྱུག་འགྱུར་གྱི་གོ་སྐབས་བསྐྲུན།
ལོ་མང་བོའི་རིང་འབད་འཐབ་བྱས་པ་བརྒྱུད། ད་ལྟའི་བློ་བཟང་ཚན་རྩལ་དེ་བོད་ཁམས་ཀྱི་གློག་རྡུལ་ཐོན་ལས་ཀྱི་ཁེ་ལས་གཙོ་བོར་གྱུར་ཡོད། བློ་བཟང་གིས་བཤད་པ་ནང་བཞིན། ལས་སྐྲུན་གྱི་ལམ་དུ་ཁ་ཕྱོགས་གདམ་གསེས་བྱེད་པར་གལ་འགངས་ཧ་ཅང་ཆེ་བ་དང་། རྒྱུན་འཁྱོངས་ལྷོད་མེད་བྱེད་པ་དེ་བས་ཀྱང་གལ་ཆེ། རང་ཉིད་ཀྱི་ལས་སྐྲུན་གྱི་ཐོག་མའི་ཕུགས་འདུན་རྒྱུན་འཁྱོངས་བྱས་ན། དགའ་འོས་པའི་གྲུབ་འབྲས་ཐོབ་སྲིད་པ་ཁོ་ཐག་ཡིན་ཟེར།
བློ་བཟང་ཚན་རྩལ་གྱི་མགོ་གཙོ་བློ་བཟང་།
བོད་ཡིག་གློག་རྡུལ་ཐོན་རྫས་སྒྲིག་སྦྱོར་གྱི་ཐོན་སྐྱེད་ལམ་ཐིག
བོད་ཡིག་གློག་རྡུལ་ཐོན་རྫས།
