ཨ་ཆེན་གངས་རྒྱབ་ཏུ་སྐོར་སྐྱོད་བྱེད་པའི་ཡིད་འགུལ་ཐེབས་པའི་བརྙན་གཟུགས་ཞིག་བརྙན་འཕྲིན་ལམ་ནས་འཆར་སྐབས། གསར་བུ་ཞིག་གིས་རང་ནུས་ཡོད་ཚད་ཀྱིས་འདམ་ནང་དུ་ཟུག་པའི་སྐོར་སྐྱོད་རླངས་འཁོར་ཞིག་གི་རྗེས་ནས་ཡར་གཏོད་བཞིན་ཡོད་པ་དང་། རླངས་འཁོར་གྱི་འཁོར་ལོས་གཏོར་བའི་འདམ་བག་ཁོའི་གདོང་དང་ལུས་ལ་འཆོར་བ་དང་། མི་མེད་ཐང་སྟོང་གི་རྩྭ་ཐང་དུ་གཟུགས་བརྙན་འདིས་མིའི་སེམས་པ་སྐྱུར་མོ་སྐྱུར་མོ་ཞིག་ཏུ་བཏང་འགྲོ། ཁོ་ནི་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་འབྲི་ཆུའི་འགོ་ཁུངས་ཁུལ་ཨ་ཆེན་གངས་རྒྱབ་དོ་དམ་ཁྲུའུ་ཡི་རྗེ་བཟང་བསོད་ནམས་དར་རྒྱས་སྲུང་སྐྱོབ་ས་ཚིགས་ཀྱི་འགོ་གཙོ་གཞོན་པ་ལྷུན་འགྲུབ་ཚེ་རྒྱལ་རེད།
སྐབས་དེའི་ཡུལ་ཤུལ་གནོད་འགོག་རྒུད་སྐྱོབ་སྔོན་ཐོན་མི་སྣ་དང་། ཨ་ཆེན་གངས་རྒྱབ་ཆེད་དོན་སྐོར་སྐྱོད་འགུལ་སྐྱོད་ཀྱི་སྔོན་ཐོན་མི་སྣ། མཚོ་སྔོན་ཞིང་ཆེན་གྱི་ལྔ་བཞིའི་ན་གཞོན་བྱ་དགའ་སོགས་ཀྱི་མཚན་སྙན་ཐོབ་པ་ནས་ད་ལོའི་ཀྲུང་གོའི་ན་གཞོན་ལྔ་བཞིའི་བྱ་དགའ་ཐོབ་པའི་བྱ་དགའ་སོ་སོས་ཁོའི་བྱ་བར་གཟེངས་བསྟོད་བྱེད་བཞིན་འདུག་ལ། དེའི་ནང་དུ་ཨ་ཆེན་གངས་རྒྱབ་ཀྱི་མིས་སྐྱེ་ཁམས་སྲུང་སྐྱོབ་གྱི་ལམ་བུ་སྟེང་གི་རྒྱུན་འཁྱོངས་དང་འགན་ཁུར་དེ་ཡང་མཚོན་ཡོད།
ཡུལ་ཤུལ་བོད་རིགས་རང་སྐྱོང་ཁུལ་ནང་ཆེན་རྫོང་དུ་སྐྱེས་པའི་ལྷུན་འགྲུབ་ཚེ་རྒྱལ་གྱིས་ལོ་ངོ་བཅུ་དྲུག་གི་གཞོན་པའི་ལང་ཚོ་རྒྱས་པའི་དུས་སྐབས་དེར། ཁོས་རང་གི་ཕ་མ་དང་། ཕ་ཡུལ་བསྐྱུར་ནས་ལེ་བར་སྟོང་ཕྲག་གིས་ཆོད་པའི་མཚོ་ནུབ་སོག་བོད་རང་སྐྱོང་ཁུལ་ན་གོར་མོ་གྲོང་ཁྱེར་དུ་ཡོང་ནས་ཨ་ཆེན་གངས་རྒྱབ་ཀྱི་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་མཁན་ཞིག་ཏུ་གྱུར།
མི་མེད་ཁུལ་དང་། མཚོ་ངོས་ལས་མཐོ་བ། ཁོར་ཡུག་གདུག་རྩུབ་ཆེ་བ། ཆ་རྐྱེན་ཞན་པ་སོགས་ནི་མི་མང་པོས་ཨ་ཆེན་གངས་རྒྱབ་ཐད་ཀར་གསལ་བཤད་བྱེད་སྤྱད་ཀྱི་སྐད་ཆར་གྱུར་ཡོད་ནའང་། ལྷུན་འགྲུབ་ཚེ་རྒྱལ་དེ་དག་ལ་སྐྲག་སྣང་མ་སྐྱེས་པར་ལོ་ངོ་བཅུ་ཕྲག་ལྷག་གི་རིང་ལ་གནས་འདིར་བྱ་བ་བསྒྲུབས། ཉིན་ཞག་སྟོང་ཕྲག་གི་རིང་ལ་ཁོ་རང་གཞི་རིམ་གྱི་སྲུང་སྐྱོབ་ས་ཚིགས་སུ་མེད་ཚེ། སྲུང་སྐྱོབ་ཁུལ་གྱི་དཀྱིལ་སྙིང་དུ་སྐོར་སྐྱོད་བྱེད་བཞིན་ཡོད་ལ། ཁོའི་རུ་ཁག་གི་མི་ཚོས་ཁོའི་བྱ་བ་བསྒྲུབས་པ་ཚང་མ་མིག་གིས་གསལ་བོར་མཐོང་ཡོད།
ཁོའི་དྲན་འཛིན་གྱི་མེ་ལོང་ངོས་སུ། དེ་ནི་ཉིས་སྟོང་བཅུ་བཞི་ལོའི་ཟླ་དགུ་བའི་ཉིན་ཞིག་ཡིན་པ་དང་། སྐོར་སྐྱོད་རུ་ཁག་གཙོ་བོ་ཞིག་གིས་སྐོར་སྐྱོད་བྱེད་པའི་སྐབས་སུ་ནམ་ཟླ་ངན་པར་འཕྲད་དེ། སྐོར་སྐྱོད་བྱ་བར་དཀའ་ངལ་ལ་འཕྲད་པ་དང་། དེའི་ཐོག་ལ་ད་དུང་ལམ་གྱི་འདམ་རྫབ་སོགས་ཀྱིས་སྐོར་སྐྱོད་རུ་དཔུང་དེ་ཐང་ཆད་དྲག་པར་བྱས་པ་དང་། ཨ་ཆེན་གངས་རྒྱབ་དོ་དམ་ཁྲུའུ་ཡིས་ཐེངས་དང་པོར་མངགས་པའི་རྒུད་སྐྱོབ་ཚན་ཆུང་དུ་ཐེངས་མང་པོར་སོང་མྱོང་བའི་ལྷུན་འགྲུབ་ཚེ་རྒྱལ་གྱི་གཟུགས་བརྙན་མཐོང་རྒྱུ་ཡོད་པ་དང་། ཁོས་མྱུར་མོར་མི་རྣམས་གཅིག་ཏུ་བསྡུ་རུབ་བྱས་ནས་མྱུར་སྐྱོབ་བྱེད་དུ་འགྲོ་མགོ་བརྩམས་ཏེ། མཐའ་མར་ཉིན་བཅུ་གཉིས་ཀྱི་རིང་ལ་དཀའ་སྡུག་གིས་རྐང་ཐང་ངང་བགྲོད་མཐར། འཐབ་གྲོགས་ཚོར་འཚོ་གནས་གསར་བ་ཞིག་གི་ལམ་བུ་བཏོད།
ལྷུན་འགྲུབ་ཚེ་རྒྱལ་གྱི་དྲན་ངོགས་སུ་ད་དུང་དོན་དག་ཅིག་ཧ་ཅང་བརྗེད་དཀའ་སྟེ། དེ་ནི་ཉིས་སྟོང་བཅུ་དྲུག་ལོར། ཨ་ཆེན་གངས་རྒྱབ་ཤུལ་བཞག་གྲས་སུ་ཡར་ཞུ་བྱེད་པའི་བྱ་བ་དང་རྒྱལ་ཁབ་སྤྱི་གླིང་འཛུགས་སྐྲུན་བྱེད་པར་མཉམ་འབྲེལ་བྱེད་ཆེད། ཨ་ཆེན་གངས་རྒྱབ་ཏུ་ཟླ་ལྔ་བ་ནས་བཟུང་གཞི་ཁྱོན་ཆེས་ཆེ་བ་དང་། གཅིག་བསྡུས་རང་བཞིན་གྱི་ཆེད་དོན་སྐོར་སྐྱོད་འགུལ་བསྐྱོད་བྱ་བ་སྤེལ་བ་དང་། སྐོར་ཐེངས་བཞི་བའི་སྐོར་སྐྱོད་རུ་ཁག་དེ་ཟླ་བརྒྱད་པའི་ཟླ་མཇུག་ལ་ལས་འགན་ཡོངས་འགྲུབ་བྱས་ནས་ཕྱིར་ལོག་སྐབས་དུས་ལྟར་ཕྱིར་ལོག་མ་ཐུབ། ཐེངས་འདིར་ལྷུན་འགྲུབ་ཚེ་རྒྱལ་རྒུད་སྐྱོབ་ཚན་ཆུང་གི་མི་སྣ་ཞིག་ཏུ་གྱུར་བ་དང་། ཁོས་ཚེ་སྲོག་དང་འགྲན་རྒྱུག་བྱེད་པའི་དུས་ཚོད་བཅུ་ལྷག་གི་ནང་དུ། འདབ་རྫབ་དང་འདམ་བག་སོགས་རང་བྱུང་ཆ་རྐྱེན་སྡུག་པོར་ཁ་གཏད་འཇལ་དགོས་པར་མ་ཟད། ད་དུང་རླངས་འཁོར་འདམ་དུ་ལྷུང་བ་དང་རླངས་འཁོར་ཡར་འཐེན་པ་སོགས་ཀྱི་དཀའ་ངལ་ལ་ཁ་གཏད་འཇལ་དགོས་ཤིང་། དར་འཁྱག་ངོས་སུ་གོག་པ་དང་ཁངས་ནང་དུ་ཉལ་བ། རླུང་ལ་ལྗིབ་ནས་ཟས་ཟ་བ་དང་ཐང་དུ་ཉལ་བ་སོགས་བྱས་མཐར་མི་རྣམས་བདེ་འཇགས་ཀྱི་སྒོ་ནས་སྒར་སར་ལོག་ཐུབ་པ་བྱུང་།
ཉིས་སྟོང་བཅུ་བདུན་ལོའི་ལོ་དཀྱིལ་ལ། བཀའ་དྲིན་ཞུ་བའི་ཡི་གེ་ཞིག་བསོད་ནམས་དར་རྒྱས་སྲུང་སྐྱོབ་ས་ཚིགས་སུ་འབྱོར་བ་དང་། མ་གཞི་དེ་ནི་སྔོན་ཆད་བསོད་ནམས་དར་རྒྱས་སྲུང་སྐྱོབ་ས་ཚིགས་ཀྱི་རླངས་འཁོར་ལ་འདུག་མཁན་ཅིག་གིས་བྲིས་ཡོང་བ་ཞིག་རེད། ཁོས་ཡི་གེའི་ནང་འདི་ལྟར་བྲིས་ཡོད་དེ། སྐབས་དེར་ཁོ་ཚོའི་རླངས་འཁོར་ལ་རྒྱལ་ལམ109སྟེང་དུ་འགྲིམ་འགྲུལ་ཆག་སྒོ་བྱུང་བ་དང་། ལྷུན་འགྲུལ་ཚེ་རྒྱལ་དང་ཁོའི་རུ་དཔུང་གི་མི་ཚོས་འགྲམ་རྒྱུད་ནས་རྨས་མ་རྙེད་དེ་སྨན་ཁང་དུ་བསྐྱལ་བ་མ་ཟད། སྐབས་དེར་ཁོ་ཚོར་སྨན་རིན་སྟེར་རྒྱུ་མེད་པའི་གནས་ཚུལ་འོག་ཏུའང་ལྷུན་འགྲུབ་ཚེ་རྒྱལ་གྱིས་སྨན་རིན་ཚང་མ་རྩིས་སྤྲོད་བྱས། ཁྱེད་ཚོས་ང་རང་ལ་འཇིག་རྟེན་འདིའི་སྟེང་གི་དྲོད་ཁོལ་དང་། དྲང་བདེན། ཡིད་ཆེས་སོགས་ཉམས་སུ་མྱངས་སུ་བཅུག བཀའ་དྲིན་ཆེ། འདི་ནི་ཡི་གེའི་ནང་དུ་སྐབས་དེར་རླངས་འཁོར་ལ་བསྡད་ཡོད་པའི་མི་སྣའི་སེམས་གཏམ་ཡིན་ཞིང་། འདི་ནི་སྙིང་ཁོངས་རུས་པའི་གཏིང་ནས་ཕུལ་བའི་བཀའ་དྲིན་ཞུ་ཡིག་ཅིག་རེད།
ཨ་ཆེན་གངས་རྒྱབ་སྟེ། ཆ་སྙོམས་རྒྱ་མཚོའི་ངོས་ལས་མཐོ་ཚད་ལ་མུས་སྟོང་བཞི་དང་ལྔ་བརྒྱ་ཡོད་པའི་དག་ཞིང་འདི་རུ། ལྷུན་འགྲུབ་ཚེ་རྒྱལ་གྱི་གཞོན་པའི་ལང་ཚོ་ཕངས་མེད་དུ་བསྐྱུར་ཡོད།
ལོ་ཙཱ། ཚེ་རིང་སྒྲོལ་མ།
