སྤེལ་དུས།2018.12.24 ཡོང་ཁུངས།མཚ་སྔོན་བོད་ཡིག་གསར་འགྱུར།
0
0

ཐ་མག་གི་ནང་དུ་དུག་ལྡན་དངོས་པོའི་རིགས་བཞི་སྟོང་བརྒྱད་བརྒྱ་ལྷག་འདུས་པས། ཐ་མག་འཐེན་ན་རང་ཉིད་ཀྱི་བདེ་ཐང་ལ་གནོད་འཚེ་ཆེན་པོ་ཐེབས་པར་མ་ཟད། ཉེ་འགྲམ་གྱི་ཁྱིམ་མི་ལའང་དུ་བའི་གནོད་འཚེ་ཐེབས་ཀྱིན་ཡོད་པ་རེད། ཐ་མག་བཅད་ན་ལུས་པོར་བཟང་ཕྱོགས་ཀྱི་འགྱུར་ལྡོག་ཆེན་པོ་འབྱུང་སྲིད་ལ། ཉེ་ཆར་ཨ་མེ་རི་ཁའི《ཀློག་པ་པོའི་རྩོམ་ཡིག》ཅེས་པའི་དུས་དེབ་སྟེང་དུ་དེའི་ཐད་ཀྱི་ཕྱོགས་སྡོམ་ཞིག་བྱས་ཡོད་པ་སྟེ།

ཐ་མག་མ་འཐེན་པར་སྐར་མ་ཉི་ཤུ་ཙམ་འགོར་རྗེས། རྐང་ལག་སྟེང་གི་ཁྲག་གི་འཁོར་རྒྱུག་བྱེད་ནུས་ཇེ་ལེགས་སུ་འགྲོ་བ་རེད།

ཐ་མག་མ་འཐེན་པར་དུས་ཚོད་གཉིས་ཙམ་འགོར་རྗེས། འཕར་རྩ་དང་སྙིང་གི་ལྡིང་ཚད། ཁྲག་ཤེད་སོགས་རྒྱུན་ལྡན་དུ་འགྱུར་བ་དང་། གལ་ཏེ་སྦྲུམ་མ་ཡིན་ན། མངལ་གནས་ཕྲུ་གུའི་སྙིང་གི་ལྡིང་ཚད་ཡང་རྒྱུན་ལྡན་དུ་འགྱུར་སྲིད།

དེ་ནས་དུས་ཚོད་བརྒྱད་ཙམ་འགོར་རྗེས། ལུས་སྟེང་གི་དབྱང་གཅིག་ཐཱན་འགྱུར་ཇེ་ཉུང་དུ་སོང་ནས། དེས་དབྱང་རླུང་ཁྲག་གི་ཕྲ་ཕུང་དུ་ཞུགས་པར་བཀག་འགོག་བྱེད་མི་ཐུབ་པས། ཕྲ་ཕུང་ནང་གི་དབྱང་རླུང་མི་འདང་བ་གསོ་ཐུབ། སྦྲུམ་མར་མཚོན་ནའང་མངལ་གནས་བྱིས་པར་དབྱང་རླུང་སྔར་ལས་མང་པོ་འདོན་ཐུབ།

དུས་ཚོད་ཉེར་བཞི་འགོར་རྗེས། སྙིང་ནད་སློང་བའི་ཉེན་ཁ་ཇེ་ཆུང་དུ་འགྲོ་བ་དང་དེ་ནས་

ཉིན་གཉིས་འགོར་རྗེས་ཐ་མག་གི་བ་ཚྭ་ལུས་སྟེང་ནས་ཡོངས་སུ་རྒྱང་ཕུད་དུ་གཏོང་ཐུབ།

ཉིན་གསུམ་འགོར་རྗེས། དབུགས་ལེན་པའི་བྱེད་ནུས་མངོན་གསལ་གྱིས་ཇེ་ལེགས་སུ་འགྲོ་བ་དང་། གློ་བའི་སྟེང་གི་ཉག་སྤུ་སླར་གསོ་འབྱུང་བ་རེད། དེ་ནི་བ་སྤུ་དང་འདྲ་བའི་དངོས་པོ་ཞིག་ཡིན་པས། ས་རྡུལ་དང་བསླད་རྫས་བཙགས་པའི་ནུས་པ་ལྡན། དེ་ལས་ཀྱང་སྣང་ཚུལ་བཟང་པོ་ཞིག་འབྱུང་བ་ནི། གློ་ལུ་བའི་ཚད་ཇེ་མང་དུ་འགྲོ་བ་ཡིན་ལ། དེ་ནི་དུག་ལྡན་དངོས་པོ་སོགས་ཀྱི་མི་གཙང་བ་རྣམས་གློ་བ་ལས་གཙང་ཕུད་བྱེད་ཀྱིན་པའི་རྟགས་རེད།

གཟའ་འཁོར་གཅིག་འགོར་རྗེས། ཁྲག་ཤེད་མཐོ་བ་མར་འབབ་ཐུབ།

ཟླ་གསུམ་འགོར་རྗེས། གློ་དབུགས་ཀྱི་ཤོང་ཚད་བརྒྱ་ཆའི་སོ་དགུ་ཇེ་མཐོར་འགྲོ་བ་དང་། དབུགས་འཚང་བའི་སྣང་ཚུལ་ཇེ་ཉུང་དུ་སོང་སྟེ། ངོ་མདངས་ཀྱང་ཇེ་ཡག་ལ་འགྲོ་བ་རེད།

ཟླ་གསུམ་ནས་དགུ་འགོར་རྗེས། ཐ་མག་འཐེན་སྐབས་ཀྱི་གློ་ལུ་བ་དང་རེད་པ་སོགས་ཀྱི་སྣང་ཚུལ་ཇེ་དམའ་རུ་འགྲོ་བ་རེད། རྒྱུ་མཚན་ནི་གློ་བས་རང་སྟེང་ནས་གཙང་སྦྲ་བྱེད་མགོ་བརྩམས་པས་རེད།

ཟླ་བཅུ་གཉིས་འགོར་རྗེས། སྙིང་དང་ཁྲག་རྩའི་ནད་འབྱུང་བའི་ཉེན་ཁ་ཇེ་ཆུང་དུ་འགྲོ་བ་རེད།

ལོ་ལྔ་འགོར་རྗེས། ཕོ་བའི་འབྲས་སྐྲན་དང་ཁ་སྦུག་གི་འབྲས་སྐྲན། དབུགས་ལམ་འབྲས་སྐྲན། མིད་པའི་འབྲས་སྐྲན། གློ་བའི་འབྲས་སྐྲན་སོགས་ཀྱི་འབྱུང་ཚད་ཇེ་དམའ་རུ་འགྲོ་བ་དང་།

ལོ་ལྔ་ནས་བཅུ་ཙམ་འགོར་རྗེས། སྙིང་དང་ཁྲག་རྩའི་ནད་དང་ཡང་ན་གྲིབ་ནད་ཕོག་པའི་ཉེན་ཁ་ཐ་མག་མི་འཐེན་པའི་མི་དང་གཅིག་མཚུངས་ཀྱི་ཆུ་ཚད་དུ་སླེབས་ཐུབ།

དེ་ནས་ལོ་བཅུ་ཡི་རྗེས་སུ། འབྲས་སྐྲན་འབྱུང་བའི་ཉེན་ཁ་ཐ་མག་མི་འཐེན་པའི་མི་དང་གཅིག་མཚུངས་ཀྱི་ཆུ་ཚད་དུ་སླེབས་ཐུབ་པ་བཅས་སོ། །

རྩོམ་སྒྲིག་པ། འབྲུག་མོ། 

འོས་སྦྱོར།
  • གུང་ཁྲན་ཏང་གི་གསར་འགྱུར།
  • བོད་ཀྱི་རིག་མཛོད།
  • ཀྲུང་གོའི་བོད་ཀྱི་སློབ་འབྲིང་དྲ་བ།
  • མཚོ་སྔོན་བོད་རིགས་དྲ་བ།
  • མཚོ་སྔོན་བོད་རིགས་དྲ་བ།
  • ཀྲུང་གོ་བོད་སྐད་རླུང་འཕྲིན།
  • བོད་ལྗོངས་འཕྲིན་དྲ།
  • ཁམས་པའི་བརྙན་འཕྲིན།
  • ནོར་ནོར་བརྙན་འཕྲིན།
  • ཡོངས་འཛིན་འཚོལ་བཤེར།