མཐོ་སྒང་ས་ཁུལ་གྱི་བཟའ་བཏུང་གི་གོམས་སྲོལ་དང་ས་ཁམས་ཁོར་ཡུག་གི་དབང་གིས། སྔོན་ཆད་བུད་མེད་རྣམས་ཀྱིས་བཟའ་བཏུང་གིས་ལུས་ཁམས་ཇི་ལྟར་གསོ་ཚུལ་ལ་བསམ་བློ་གཏོང་མི་སྲིད་ནའང་ད་ལྟ་སྤྱི་ཚོགས་དང་དཔལ་འབྱོར་གོང་འཕེལ་བྱུང་བ་དང་བསྟུན་ནས། མཐོ་སྒང་གི་མི་རྣམས་ཀྱི་འཚོ་བའི་ཆ་རྐྱེན་ཡང་ཇེ་ལེགས་སུ་སོང་ཡོད་ལ། མཐོ་སྒང་ནས་ཀྱང་ས་ཁུལ་གཞན་དུ་ཡོད་པའི་བཟའ་བཏུང་སྣ་ཚོགས་ལོངས་སུ་སྤྱོད་ཐུབ། དེ་བས་མཐོ་སྒང་གི་བུད་མེད་རྣམས་ཀྱིས་བཟའ་བཏུང་རོལ་ཚུལ་ཡང་ཕོ་བ་རྒྱགས་ཆེད་དང་ཁ་ལ་ཞིམ་ཆེད་ཁོ་ན་ཙམ་མ་ཡིན་པར། རང་ཉིད་ཀྱི་ལུས་ཕུང་བདེ་ཐང་དང་བཞིན་མདངས་མཛེས་པར་མཁོ་བའི་འཚོ་བཅུད་བསྡུ་ལེན་ཕྱོགས་སུ་འབད་དགོས་ལ། བཅུད་ཆེ་ཞིང་ཚིལ་ཞག་གི་རིགས་ཇེ་ཉུང་དུ་གཏོང་དགོས། དེ་མིན་ལུས་པོའི་བདེ་ཐང་ལ་ནུས་པ་ཆེ་བའི་དམིགས་བསལ་རང་བཞིན་གྱི་ཟས་བཅུད་ཀྱང་བསྡུ་ལེན་བྱ་དགོས།

དང་པོ། ཚིལ་ཞག་མང་པོ་བསྡུ་ལེན་བྱ་མི་རུང་།

མཐོ་སྒང་ས་ཁུལ་དུ་སྐམ་ལུག་གི་ཤ་མང་པོ་ཡོད་པ་དང་། ཤ་ཟ་བར་དགའ་བའི་གོམས་སྲོལ་གྱི་དབང་གིས་ཚིལ་ཞག་བསྡུ་ལེན་བྱེད་ཚད་དེ་ས་ཁུལ་གཞན་ལས་ཆེ། སྤྱིར་བཏང་དུ་བུད་མེད་རྣམས་ཀྱིས་ཤ་ཟ་ཚད་ལ་ཚོད་འཛིན་བྱས་ཏེ། སྣུམ་ཞག་གི་རིགས་དང་སྣུམ་བཙོས་ཟས་རིགས་ཉུང་ཟ་བྱས་ན། ལུས་ཚོ་རན་པར་ཆགས་པར་མ་ཟད་རྒས་འགོག་གཞོན་ཉམས་རྒྱས་པར་ཡང་ཕན། རྒྱལ་ཁབ་ཕྱི་ནང་གི་ཆེད་མཁས་པས་ཞིབ་འཇུག་བྱས་པ་ལྟར་ན་ཚིལ་ཞག་གི་བསྡུ་ལེན་ཚད་གཞི་ནི་སྤྱིའི་དྲོད་བཅུད་ཀྱི་བརྒྱ་ཆའི་ཉི་ཤུ་ནས་བརྒྱ་ཆའི་ཉེར་ལྔ་ཙམ་ཡིན། འོན་ཀྱང་མིག་སྔའི་མཐོ་སྒང་ས་ཁུལ་གྱི་བུད་མེད་མང་ཤོས་ཤིག་བརྒྱ་ཆའི་སུམ་ཅུ་ལས་བརྒལ་འདུག་པ་རེད། ཚན་རིག་ཞིབ་འཇུག་ལས་བདེན་དཔང་བྱས་པ་ལྟར་ན། བུད་མེད་རྣམས་ཀྱིས་ཚིལ་ཞག་བསྡུ་ལེན་བྱས་པ་ཚད་ལས་བརྒལ་ཚེ། ཚིལ་རྒྱུ་དབྱང་འགྱུར་རྫས་ཞེས་པ་ཞིག་མང་དུ་བསྐྱེད་སླ་བ་དང་། དབྱང་གི་རང་དབང་རྒྱུ་ཟེར་བ་ཞིག་ཀྱང་མང་དུ་བསྐྱེད་དེ། དེས་སྤྱི་པགས་ཀྱི་བཅུད་འཆོར་བར་བྱེད་ཅིང་བསམ་སེའུ་ཡི་བྱེད་ལས་ཉམས་པར་བྱེད། མཚན་མའི་སྐུལ་རྒྱུའི་ལྡིང་ཚད་འཁྲུག་པ་དང་བུད་མེད་ཀྱི་སྐུལ་རྒྱུ་ཇེ་ཉུང་དུ་གཏོང་བ། དེ་མིན་ལུས་ཕུང་གི་འགུལ་སྐྱོད་ནུས་པ་ཇེ་ཞན་དུ་གཏོང་བ་བཅས་ཀྱིས་བྱ་བ་དང་འཚོ་བར་བར་ཆད་བཟོ་བ་ཡིན།

མཐོ་སྒང་གི་བུད་མེད་རྣམས་ལ་མཚོན་ན། ཆ་རྐྱེན་འཛོམས་ན་ཞིང་སྡེ་ནས་གསོས་པའི་བྱ་ཤ་གདུས་ནས་ཁུ་བ་འཐུང་ན་ཤིན་ཏུ་ལེགས། དེ་ལས་མི་ལུས་ལ་འཚོ་བཅུད་ལེགས་པོ་མང་པོ་མཁོ་འདོན་བྱེད་ཐུབ་པར་མ་ཟད། མཐོ་སྒང་གི་བུད་མེད་ལ་ཁྲག་ཤེད་དམའ་བའི་དབང་གིས་ལུས་ཉོབ་ཤིང་སེམས་སྡུག་པའི་སྣང་བ་འབྱུང་དུས། དབྱར་རྩ་དགུན་འབུ་འགའ་རེ་བྱ་ཤ་དང་མཉམ་དུ་གདུས་ནས་འཐུངས་ན། ལུས་ཉོབ་ཤིང་སེམས་སྡུག་པའི་སྣང་བ་དེ་མ་ཐག་སེལ་ཐུབ། གཞན་ཡང་བྱ་ཤའི་ཁུ་བ་དང་ལྷག་པར་ཞིང་སྡེ་ནས་གསོས་པའི་བྱ་ཤའི་ཁུ་བ་འཐུངས་ན། མཐོ་སྒང་ས་ཁུལ་དུ་ཆམ་ནད་དང་ཆམ་རིམས། ཡང་ན་གློ་ཡུའི་གཉན་ཚད་སོགས་འགོག་བཅོས་བྱེད་པར་བྱེད་ནུས་ཁྱད་པར་ཅན་ཐོན་པ་ཡིན། སྐབས་རེར་སྨན་རྫས་ཀྱི་གསོ་བཅོས་ལས་ཀྱང་ལྷག ངོ་མདངས་སེར་པོ་དང་སྨུག་པོར་འགྱུར་བའམ། ཡང་ན་ཁྲག་ཟད་མདངས་སྐྱའི་རྟགས་འབྱུང་བའི་བུད་མེད་རྣམས་ལ་མཚོན་ན། ཀྲོ་མ་ཀྲུ་གཙང་མ་དང་སྐམ་ཤ་གསར་བས་ཚོད་མ་བརྔོས་པ་ལ་བྲོ་ལྡན་མདོག་ཡག་གི་ཁྱད་ཆོས་ལྡན་པར་མ་ཟད། སྤྲི་དཀར་ཕུན་སུམ་ཚོགས་པའི་སྐམ་ཤ་ཀྲོ་མ་ཀྲི་དང་ལེགས་པར་བསྡེབས་ཚེ། འཚོ་བཅུད་མདོག་རྒྱུ་སྣ་མང་གི་ནུས་པ་འཆོར་མི་སྲིད་པས། མཐོ་སྒང་ས་ཁུལ་གྱི་ངོ་མདངས་མི་བཟང་བའི་བུད་མེད་ཀྱིས་བསྟེན་ན་དེས་ངོ་མདངས་ཇེ་ཡག་ཏུ་གཏོང་ཐུབ་པར་མ་ཟད་སྤྱི་པགས་ཀྱི་མཉེན་ཤུགས་ཇེ་བཟང་དུ་གཏོང་ཐུབ་ལ། ལུས་སྟོབས་ཀྱང་རྒྱས་པར་བྱེད་པ་ཡིན།

གཉིས་པ། འཚོ་བཅུད་བསྡུ་ལེན་བྱེད་པར་མཐོང་ཆེན་བྱ་དགོས།

འཚོ་བཅུད་རང་སྟེང་ནས་དྲོད་བཅུད་ཅི་ཡང་བསྐྱེད་མི་སྲིད་ཀྱང་། དེ་ནི་མི་ལུས་ཀྱི་སྐྱེ་ལུགས་བྱེད་ལས་ལ་མེད་དུ་མི་རུང་བའི་གྲུབ་ཆ་གལ་ཆེན་ཞིག་ཡིན། མཐོ་སྒང་གི་མིའི་བཟའ་བཏུང་གོམས་སྲོལ་དང་ཡང་ན་དེང་རབས་གྲོང་ཁྱེར་གྱི་བུད་མེད་རྣམས་བྱ་བར་བྲེལ་འཚུབ་ཆེ་བ། གྲོང་ཁྱེར་དང་ཐག་རིང་བ་བཅས་ཀྱི་རྐྱེན་པས་བཟའ་བཏུང་ནང་གི་འཚོ་བཅུད་ཁ་གསབ་བྱེད་པར་མཐོང་ཆེན་བྱེད་ཀྱིན་མེད། ལྷག་པར་ཀླད་པ་དང་དབང་རྩའི་བརྗེ་ཚབ་དང་འབྲེལ་བའི་འཚོ་བཅུད་དེ། དཔེར་ན་འཚོ་བཅུདB1དངB6སོགས་ལྟ་བུ། མཐོ་སྒང་གི་ལོ་ཏོག་ནས་དང་གྲོ་ཡི་ནང་དུ་འཚོ་བཅུད་དེའི་རིགས་ཕུན་སུམ་ཚོགས་པོ་ཡོད་ལ། རྒྱུན་དུ་གྲོ་ནས་ཟས་རིགས་བསྟེན་ན་ཅུང་བཟང་། ཕྱི་རྒྱལ་གྱི་ཞིབ་འཇུག་ཁ་ཤས་ལྟར་ན། ཞོགས་པར་ཕྱེ་ཐུག་འཐུང་ན་ཡིད་འཛིན་ནུས་པ་དང་ལུས་སྟོབས་གསོ་བར་ཕན་ལ། སློབ་སྦྱོང་གི་ནུས་པ་དང་ལས་སྒྲུབ་ཀྱི་ནུས་པ་ཡང་ཇེ་མཐོར་གཏོང་ཐུབ་པར་བཤད། གཞན་དབྱང་འགྱུར་འགོག་པའི་འཚོ་བཅུད་དེ། དཔེར་ན་འཚོ་བཅུདEདང་འཚོ་བཅུདC སོགས་ལ་རྒས་འགོག་མདངས་རྒྱས་ཀྱི་བྱེད་ནུས་ལྡན་པར་མ་ཟད། ལས་སྒྲུབ་ཀྱི་ནུས་པ་དང་ལས་ཆོད་ཇེ་མཐོར་གཏོང་བའི་བྱེད་ནུས་ཀྱང་ལྡན། འཚོ་རྒྱུ་དེ་རིགས་ཤིང་ཏོག་དང་སྔོ་ཚོད་གསར་བའི་རིགས་ཀྱི་ནང་དུའང་ཕུན་སུམ་ཚོགས་པོ་ཡོད། མཐོ་སྒང་གི་འཚོ་བའི་ཆ་རྐྱེན་གྱི་དབང་གིས་བཟའ་བཏུང་ལས་འཚོ་བཅུད་འདང་ཚད་ཅིག་བསྡུ་ལེན་བྱེད་ཐབས་བྲལ་ན། སྨན་རྫས་དང་ཁམས་གསོའི་རིགས་ཀྱི་འཚོ་བཅུད་ཁ་གསབ་རྫས་སྟེར་ཆོག་ལ། དེས་ཀྱང་ལུས་པོའི་འཚོ་བཅུད་སྙོམས་པར་བྱེད་ནུས་པ་ཡིན།

མཚོ་སྔོན་རྒྱ་གྲམ་དམར་པོ་སྨན་ཁང་གི《མཐོ་སྒང་དང་ལུས་ཁམས་བདེ་ཐང》ཞེས་པའི་དཔེ་དེབ་ལས་བླངས། 

རྩོམ་སྒྲིག་པ། འབྲུག་མོ།