གློ་བ་བདེ་ཐང་ཡོང་བའི་བྱེད་ཐབས་ཆེས་བཟང་པོ་ནི་ཐ་མག་ཇེ་ཉུང་དུ་གཏོང་བ་དང་གཞན་བརྒྱུད་ཐ་མག་ལ་འབྲེལ་འདྲིས་བྱེད་ཚད་ཇེ་ཉུང་དུ་གཏོང་རྒྱུ་དེ་རེད། ཐ་མག་ཁྱབ་གདལ་དུ་འགྲོ་བ་ནི་འཛམ་གླིང་འདིར་ད་ལྟ་འཕྲད་པའི་སྤྱི་པའི་འཕྲོད་བསྟེན་གྱི་འཇིགས་སྣང་ཞིག་ཡིན་ལ། ལོ་རེར་འཛམ་གླིང་སྟེང་གི་མི་ས་ཡ་ལྔ་ལྷག་ཐ་མག་དང་འབྲེལ་བའི་ནད་རིགས་ཀྱིས་ཤི་བཞིན་ཡོད་པ་རེད།
ཐ་མག་གི་ནང་དུ་ཤེས་ཟིན་པའི་རྫས་འགྱུར་གྱི་རིགས་སྣ་བདུན་སྟོང་ལྷག་ཡོད་ལ། དེའི་ནང་དུ་གནོད་ལྡན་ཀྱི་རིགས་ཉིས་བརྒྱ་དང་ལྔ་བཅུ་ཡོད་པ་དང་། འབྲས་སྐྲན་འབྱུང་རྐྱེན་དུ་གྱུར་པའི་རྒྱུ་བདུན་ཅུ་ཡོད། དུས་ཡུན་རིང་བོར་ཐ་མག་འཐེན་མཁན་ཁྲོད་ཀྱི་མི་ཕྱེད་ཀ་ནི་སྙིང་ནད་དང་དལ་བའི་རང་བཞིན་གྱི་གློ་ནད། འབྲས་སྐྲན་བཅས་ཐ་མག་འཐེན་པ་ལས་བྱུང་བའི་ནད་རིགས་ཀྱིས་ཤི་བཞིན་ཡོད།
ཐ་མག་འཐེན་ན་གློ་བའི་འབྲས་སྐྲན་དང་ཕོ་བའི་འབྲས་སྐྲན། གྲིབ་སྐྱོན། སྙིང་རྩ་འགགས་པ། དབུགས་འཚང་བ། དལ་བའི་རང་བཞིན་གྱི་དབུགས་འབྱིན་རྔུབ་དཀའ་བ། སོ་མཐའི་ནད། ཁ་སྦུག་གི་འབྲས་སྐྲན་སོགས་ནད་རིགས་མང་པོ་སློང་སྲིད། ཐ་མག་འཐེན་ན་ཀླད་ཁྲག་ཤོར་བ་དང་སྙིང་རྩ་འགགས་པའི་ནད་འབྱུང་ཚད་ཇེ་མཐོར་འགྲོ་བ་དང་། དལ་བའི་རང་བཞིན་དང་འགག་པའི་རང་བཞིན་གྱི་གློ་ནད། ན་གཞོན་ལོ་ཆུང་གི་དབུགས་འཚང་བ། དབུགས་ལམ་ལ་གཉན་ཚད་རྒྱས་བ་བཅས་ཀྱི་ཉེན་ཁ་ཇེ་མཐོར་འགྲོ་བ་རེད། རང་རྒྱལ་གྱི་ཐ་མག་འཐེན་མཁན་ལ་གྲིབ་སྐྱོན་ཕོག་པའི་ཉེན་ཁ་དེ་ཐ་མག་མི་འཐེན་པའི་མི་ལས་ལྡབ་གཉིས་ནས་གསུམ་ལྷག་གིས་མཐོ་བ་དང་། སྐྱེས་པར་གྲིབ་ནད་ཕོག་མཁན་གྱི་ནད་པའི་བརྒྱ་ཆའི་དགུ་བཅུའི་ཡན་ནི་ཐ་མག་འཐེན་མཁན་རེད། ཐ་མག་འཐེན་མཁན་གྱི་ཆ་སྙོམས་ཚེ་ཚད་དེ་ཐ་མག་མི་འཐེན་པའི་མི་ལས་ཉུང་མཐར་ཡང་ལོ་བཅུ་ཇེ་ཐུང་དུ་འགྲོ་བ་རེད།
ཐ་མག་གི་དུ་ཞག་ནི་ཐ་མག་འབར་བའི་བརྒྱུད་རིམ་ཁྲོད་ཁོར་ཡུག་ཏུ་འཐུལ་བའི་དུ་བ་ལ་ཟེར་ཞིང་། དེའི་ནང་དུ་ཐ་མག་འཐེན་མཁན་གྱི་ཁ་ནས་ཕྱིར་བཏོན་པའི་དུ་ཞག་དང་ཐ་མག་འབར་བའི་བརྒྱུད་རིམ་ཁྲོད་ཕྱིའི་མཁའ་དབུགས་ཁྲོད་འཐུལ་བའི་དུ་ཞག་གཉིས་ཀ་འདུ། དུ་ཞག་དང་ཐ་མག་འཐེན་མཁན་གྱིས་རྔུབ་པའི་དུ་ཞག་གཙོ་བོ་གཉིས་ལ་གྲུབ་ཆའི་ཐད་ཀྱི་ཁྱད་པར་མེད།
དུ་ཞག་གིས་མི་ཚོགས་ཀྱི་བདེ་ཐང་ལ་གནོད་སྐྱོན་ཚབས་ཆེན་ཐེབས་སྲིད་དེ། དེས་གློ་བའི་འབྲས་སྐྲན་དང་སྙིང་རྩ་རེངས་པའི་ནད། ཀླད་པར་གཟའ་ཕོག་པ། ནུ་མའི་འབྲས་སྐྲན་དང་སྣ་སྦུག་རུས་ཁུང་འབྲས་སྐྲན་བཅས་སློང་སྲིད་ལ། དུ་ཞག་གིས་ད་དུང་དར་མའི་མྱུར་བའི་རང་བཞིན་དང་དལ་བའི་རང་བཞིན་གྱི་དབུགས་ལམ་ནད་རྟགས་དང་གློ་བའི་ནུས་པ་ཇེ་ཞན་དུ་འགྱུར་བ། གློ་ཡུའི་ཡན་ལག་དབུགས་འཚང་། འགག་པའི་རང་བཞིན་གྱི་གློ་བའི་ནད་རིགས་བཅས་སློང་སྲིད། སྦྲུམ་མས་དུ་ཞག་རྔུབ་ཚེ་ཕྲུ་གུའི་ལྗིད་ཚད་མར་འབབ་པ་དང་། ཕྲུ་གུ་གློ་བུར་རྐྱེན་ལམ་དུ་ཤོར་བའི་ཕྱོགས་འདུས་ནད་འབྱུང་སླ་ཞིང་། ཟླ་ཁ་མ་གང་བར་སྐྱེ་བ། ཕྲུ་གུའི་དབང་རྩ་ཡ་མ་གཟུགས་སུ་འགྱུར་བ་དང་ཁ་ཤོ་ཅན་དུ་འགྱུར་ཡང་སྲིད། དུ་ཞག་གིས་བྱིས་པའི་གློ་ཡུའི་ཡན་ལག་དབུགས་འཚང་གི་ནད་འབྱུང་བ་དང་གློ་བའི་ནུས་པ་ཇེ་ཞན་དུ་འགྱུར་བ་རེད།
ཐ་མག་འཐེན་པ་དང་དུ་ཞག་གཉིས་ཀས་གཅིག་མཚུངས་སུ་མིའི་བདེ་ཐང་ལ་གནོད་སྐྱོན་ཚབས་ཆེན་ཐེབས་སྲིད་ལ། ཐ་མག་གི་དུ་ཞག་ཅུང་ཙམ་རྔུབ་པ་ཡིན་ནའང་དེས་མིའི་ལུས་ཕུང་ལ་གནོད་སྐྱོན་ཐེབས་ངེས། ཁང་པའི་ནང་དུ་ཐ་མག་འཐེན་པ་གཏན་འགོག་བྱེད་རྒྱུ་ནི་གནོད་སྐྱོན་སྔོན་འགོག་བྱེད་པའི་ནུས་ལྡན་གྱི་ཐབས་ལམ་ཉག་གཅིག་ཡིན།
སྐྱེས་པས་ཐ་མག་འཐེན་ན་ཁུ་བ་ཇེ་ཉུང་དུ་འགྲོ་བ་དང་རོ་ཙ་ཉམས་འགྲོ་ལ། དུས་ཡུན་རིང་བོར་ཐ་མག་འཐེན་པ་ནི་སྐྱེས་པའི་དབང་བོའི་ནུས་པ་ཇེ་ཞན་དུ་འགྲོ་བའི་རྒྱུ་རྐྱེན་གཙོ་བོ་རེད།
བུད་མེད་ཀྱིས་ཐ་མག་འཐེན་ན་སྐྱི་པགས་རྩུབ་མོར་འགྱུར་བ་དང་། རྒས་སླ་ཞིང་རུས་སོབ་ནད་འབྱུང་སྲིད། བུད་མེད་ཀྱིས་ཐ་མག་འཐེན་ན་མངལ་སྦྲུམ་ཚད་ཇེ་དམའ་དང་མངལ་ཤོར་བ། མངལ་ནས་ཤི་བ། ཟླ་ཁ་མ་ལོངས་པར་སྐྱེ་བ། ཕྲུ་གུ་སྐྱེ་དུས་སུ་ལྗིད་ཚད་མི་ལོངས་པ། ཕྲུ་གུ་གློ་བུར་རྐྱེན་ལམ་དུ་ཤོར་བ་སོགས་ཕྱོགས་བསྡུས་ནད་འབྱུང་ཉེན་ཇེ་ཆེར་འགྲོ་བ་དང་། ཐ་མག་འཐེན་ན་ད་དུང་གཅིན་སྙི་ཟ་ཁུའི་ནད་འབྱུང་སྲིད་པ་དང་། བསྡོངས་ཟླའི་ནད་འབྱུང་བའི་ཉེན་ཁ་ཇེ་ཆེར་འགྲོ་བ་རེད། །
ཐ་མག་གཅོད་པ་ནི་ཐ་མག་གི་གནོད་པ་ཇེ་ཉུང་དུ་གཏོང་བའི་ཐབས་ལམ་ཉག་ཅིག་ཡིན་པས། ཐ་མག་བཅད་པ་ཇི་ལྟར་སྔ་ན་དེ་ལྟར་བཟང་ལ། ལོ་ཚོད་ནམ་ཡིན་རུང་ཐ་མག་བཅད་ན་ཕན་པ་ཡོད། ཐ་མག་བཅད་ན་ཐ་མག་འཐེན་མཁན་ལ་གློ་བའི་སྐྲན་ནད་དང་ཏོག་དབྱིབས་འཕར་རྩའི་སྙིང་ནད། དལ་བའི་རང་བཞིན་དང་འགག་པའི་རང་བཞིན་གྱི་གློ་ནད་སོགས་ནད་རིགས་མང་པོ་འབྱུང་ཚད་དང་ཤི་ཚད་མངོན་གསལ་གྱིས་ཇེ་དམའ་རུ་བཏང་ནས། གོང་གསལ་གྱི་ནད་རིགས་དེ་དག་འཕར་ཚད་ཇེ་དལ་དུ་གཏོང་བར་མ་ཟད་རྗེས་འབྲས་ལེགས་བསྒྱུར་བྱེད་ཐུབ།
ཐ་མག་བཅད་ནས་ཟླ་ངོ་དྲུག་ཙམ་འགོར་རྗེས་སྙིང་གི་ལྡིང་ཚད་ཇེ་དམའ་རུ་འགྲོ་བ་དང་ཁྲག་ཚད་ཀྱང་ཇེ་དམའ་རུ་འགྲོ་ལ། དུས་ཚོད་བརྒྱད་ཀྱི་རྗེས་སུ་སྣོམ་ཚོར་དང་རོ་ཚོར་ཇེ་ལེགས་སུ་འགྲོ་མགོ་རྩོམ་པ་དང་། ཉིན་ཞག་གསུམ་གྱི་རྗེས་སུ་ཁྲག་ཤེད་རྒྱུན་ལྡན་དུ་འགྱུར་བ་དང་། སྐྱེས་པའི་ཁུ་བའི་གྲངས་ཚད་དང་སྤུས་ཚད་གཉིས་ཀ་རྒྱུན་ལྡན་དུ་སླར་གསོ་འབྱུང་བ་དང་། བུད་མེད་ཀྱི་མངལ་སྦྲུམ་ཚད་ཇེ་མཐོར་འགྲོ་བ་དང་གློ་བའི་ནུས་པ་ཇེ་བཟང་ལ་འགྲོ་བ་ཡིན། ཟླ་ངོ་དྲུག་གི་རྗེས་སུ་གློ་ལུ་བ་དང་སྣ་འཚུབ་པ། དབུགས་འབྱིན་རྔུབ་བྱེད་དཀའ་བ་སོགས་ཀྱི་ནད་རྟགས་ཇེ་ཉུང་དུ་འགྲོ་བ་ཡིན། ལོ་ངོ་གཅིག་གི་རྗེས་སུ་ཐ་མག་འཐེན་པའི་སྐབས་ལས་སྙིང་ནད་འབྱུང་ཚད་ཀྱི་ཉེན་ཁ་མངོན་གསལ་གྱིས་ཇེ་དམའ་རུ་གཏོང་ཐུབ། ལོ་ངོ་བཅུ་ཡི་རྗེས་སུ་གློ་བའི་འབྲས་སྐྲན་འབྱུང་བའི་ཉེན་ཁ་ཇེ་ཉུང་དུ་གཏོང་ཐུབ།
ཐ་མག་འཐེན་མཁན་ལ་ཐ་མག་གཅོད་པའི་གོ་རིམ་ཁྲོད་རྒྱུན་ལྡན་མིན་པའི་སྣང་ཚུལ་སྣ་ཚོགས་འབྱུང་སྲིད་པས། དགོས་ངེས་ཀྱི་སྐབས་སུ་ཆེད་ལས་ཅན་གྱི་ཐ་མག་གཅོད་པའི་གསོ་བཅོས་ལ་བརྟེན་ཆོག ཐ་མག་འཐེན་མཁན་གྱིས་ཧུར་ཐག་གིས་ཐ་མག་གཅོད་པ་དང་། ཐ་མག་འཐེན་མཁན་རང་ཉིད་ཀྱི་འདོད་བློ་ནི་ཐ་མག་ཆོད་དུ་འཇུག་རྒྱུ་དེ་ཡིན་པས། ཐ་མག་གཅོད་པའི་སྒོ་བསྟེན་ཁང་གིས་ཐ་མག་གཅོད་མཁན་ལ་ཆེད་ལས་ཀྱི་ཐ་མག་གཅོད་པའི་གསོ་བཅོས་བྱེད་ཆོག །
རྩོམ་སྒྲིག་པ། འབྲུག་མོ།
