གསར་འགོད་པས་མཚོ་སྔོན་ཞིང་ཆེན་སྨན་བཅོས་འགན་ལེན་ཅུའུ་ནས་ཤེས་རྟོགས་བྱུང་བ་ལྟར་ན། མཚོ་སྔོན་གྱིས་རྒྱལ་ཡོངས་ཀྱི་ཞིང་ཆེན་སུམ་ཅུ་ཡི་སྨན་བཅོས་ལས་ཁུངས་ཁྲི་གཉིས་ལྷག་ཙམ་དང་ཞིང་ཆེན་བརྒལ་ནས་སྨན་ཁང་དུ་བསྡད་ན་སྨན་རིན་ཐད་ཀར་རྩིས་ཞུ་རྒྱག་ཐུབ་པ་དང་ཞིང་ཆེན་གྱི་སྨན་ཁང་སྟོང་གཅིག་དང་བརྒྱད་ཅུ་གྱ་བདུན་རྒྱལ་ཡོངས་ཀྱི་ཡུལ་གཞན་གྱི་སྨན་བཅོས་རྩིས་ཞུ་དྲ་རྒྱའི་ནང་བཅུག་པས་ཉེན་ཚབ་ནང་ཞུགས་མཁན་མང་ཚོགས་རྣམས་ཞིང་ཆེན་བརྒལ་ནས་ཡུལ་གཞན་དུ་སྨན་བཅོས་བྱེད་པར་ཧ་ཅང་སྟབས་བདེ་བསྐྲུན་ཡོད་པ་རེད།
ཞིང་ཆེན་བརྒལ་ནས་ཡུལ་གཞན་དུ་སྨན་བཅོས་བྱེད་པ་དང་། མྱུར་བཅོས་ཀྱི་དགོས་མཁོ་དང་དེ་བཞིན་དུས་ཡུན་རིང་པོའི་ནང་ཞིང་ཆེན་གཞན་དུ་གནས་སྡོད་བྱེད་པའི་མཚོ་སྔོན་གྱི་ཉེན་ཚབ་ནང་ཞུགས་པའི་མི་ཚོགས་དང་འབྲེལ་ཡོད་གཉེར་སྒྲུབ་སྡེ་ཚན་ལ་ཐོ་འགོད་སྙན་སེང་ཞུས་རྗེས་སྤྱི་ཚོགས་ཉེན་ཚབ་བྱང་བུ་ཁྱེར་ནས་ཞིང་ཆེན་ཕྱིའི་གཏན་འཁེལ་གྱི་སྨན་བཅོས་ལས་ཁུངས་སུ་ཐད་ཀར་སྨན་བཅོས་བྱེད་ཆོག་པ་དང་ཉེན་ཚབ་ནང་ཞུགས་ཡུལ་དུ་ཕྱིར་ལོག་ནས་སྨན་རིན་རྩིས་ཞུ་རྒྱག་མི་དགོས།
ཟླ་བཅུ་བའི་ཟླ་མཇུག་བར། ཞིང་ཆེན་བརྒལ་ནས་སྨན་རིན་རྩིས་ཞུ་རྒྱག་པའི་ཞབས་ཞུ་མི་ཐེངས་ཁྲི་གཉིས་དང་སྟོང་བཞི་ལ་སླེབས་པ་དང་། ལོ་སྔོན་མ་དང་བསྡུར་ན་བརྒྱ་ཆའི་རེ་གཉིས་དང་གྲངས་ཆུང་བརྒྱད་གཅིག་གིས་འཕར་ཡོད། སྨན་བཅོས་ཉེན་ཚབ་ཐེབས་རྩ་སྒོར་དུང་ཕྱུར་གསུམ་དང་བྱེ་བ་གསུམ་ས་ཡ་ལྔ་བཀོལ་བ་དང་། ལོ་སྔོན་མ་དང་བསྡུར་ན་བརྒྱ་ཆའི་དྲུག་ཅུ་དང་གྲངས་ཆུང་གཅིག་དགུ་འཕར་ཡོད།
གཞན་ཡང་མཚོ་སྔོན་གྱིས་ད་དུང་ཧྲང་ཧའེ་དང་པེ་ཅིན་སོགས་དང་མཉམ་ལས་བྱས་ཏེ་སྨན་བཅོས་ཉེན་ཚབ་མཉམ་ལས་ཀྱི་ལམ་སྲོལ་གསར་པ་བཙུགས་ནས་མང་ཚོགས་ཡུལ་གཞན་དུ་སྨན་བཅོས་བྱེད་པའི་ཞབས་ཞུ་སྔར་བས་ཇེ་ལེགས་སུ་བཏང་ཡོད།
མཚོ་སྔོན་ཞིང་ཆེན་སྨན་བཅོས་འགན་སྲུང་ཅུའུ་ཡི་འབྲེལ་ཡོད་འགན་ཁུར་བས་བསྟན་དོན། རྗེས་མར་སྨན་བཅོས་འགན་ལེན་གྱི་དབུལ་སྐྱོར་ལས་དོན་སྤེལ་ནས་ཡིག་ཚགས་དང་བྱང་བུ་ལྡན་པའི་དབུལ་ཕོངས་ཁྱིམ་ཚང་ཚང་མ་སྨན་བཅོས་ཉེན་ཚབ་ནང་ཞུགས་ཐུབ་པ་དང་། སྨན་བཅོས་ཉེན་ཚབ་ཀྱི་སྲིད་ཇུས་ལོངས་སུ་སྤྱོད་ཐུབ་པ་བྱུང་ནས་སྨན་ཁང་དུ་བསྡད་རྗེས་སྨན་རིན་གྱི་བརྒྱ་ཆའི་དགུ་བཅུ་ཁ་གསབ་བྱེད་རྒྱུ་ཡིན་ཟེར། །
རྩོམ་སྒྲིག་པ། འབྲུག་མོ།
