ཐོག་མར་བརྟག་དཔྱད་བྱ་བ་ལེགས་པོར་བསྒྲུབ་དགོས། མངལ་སྦྲུམ་པའི་དུས་མགོར་བརྟག་དཔྱད་བཏང་བའི་མཇུག་འབྲས་གཞིར་བཟུང་ནས། སྨན་པས་མངལ་གནས་བྱིས་པ་བདེ་ཐང་ཡིན་མིན་དང་སྦྲུམ་མས་ལུས་སྦྱོང་བྱེད་ཆོག་མིན་ཐག་གཅོད་བྱས་ཆོག

མངལ་སྦྲུམ་པའི་དུས་ཡུན་ནང་ལུས་ཕུང་སྦྱོང་བརྡར་བྱེད་སྐབས། སྦྲུམ་མས་ལྭ་བ་ཁོད་ཆེ་བའི་རིགས་དང་། ལྷམ་གྱི་ངོས་སྙོམས་པོ་ཡིན་པ། འགུལ་སྐྱོད་དང་འཚམ་པའི་གྱོན་ཆས་གོན་ནས་ལུས་ཕུང་སྦྱོང་བརྡར་བྱེད་དགོས། མངལ་སྦྲུམ་པའི་སྐབས་སུ་སྦྲུམ་མའི་ལུས་ཀྱི་སྐུལ་རྒྱུ་ལ་འགྱུར་ལྡོག་བྱུང་བའི་དབང་གིས་ཤ་གནད་དང་ལྷུ་ཚིགས་ཅུང་ལྷོད་པོར་སོང་ཡོད། གལ་ཏེ་འགུལ་སྐྱོད་མ་བྱས་པའི་སྔོན་ལ་གྲ་སྒྲིག་ལུས་སྦྱོང་མ་བྱས་ཚེ། འགུལ་སྐྱོད་བྱེད་པའི་གོ་རིམ་ཁྲོད་དུ་ཤ་གནད་དང་ལྷུ་ཚིགས་ལ་རྨས་སྐྱོན་ཐེབས་སླ་བས། འགུལ་སྐྱོད་སྔོན་ལ་གྲ་སྒྲིག་ལུས་སྦྱོང་ཡག་པོ་བྱ་རྒྱུ་ནི་ཤིན་ཏུ་གལ་ཆེ།

འགུལ་སྐྱོད་བྱེད་སའི་གནས་གཙང་ཞིང་ལྷིང་འཇགས་ཡིན་པ་དང་། སྐྱིད་སྣང་དང་ལྡན་དགོས། ངལ་གསོ་བའི་སྐབས་སུ་ངལ་གསོ་ལེགས་པོ་བྱེད་པ་དང་ཆུ་མང་པོ་འཐུང་དགོས།

ལུས་སྦྱོང་རྣམ་གྲངས་འདེམ་དུས་མཉམ་འཇོག་བྱེད་དགོས་ལ། མཆོང་ལྡིང་དང་གཡོ་འགུལ་རང་བཞིན་གྱི་འགུལ་ཚད་ཆེ་བའི་འགུལ་སྐྱོད་རིགས་གཏན་ནས་བྱེད་མི་རུང་། མཆོང་ལྡིང་དང་གཡོ་འགུལ་ཆེ་བའི་འགུལ་སྐྱོད་ཀྱིས་སྦྲུམ་མའི་ལུས་པོ་བརྟན་པོར་ཡོང་དཀའ་བས། ཤུད་པའམ་ཡང་ན་དངོས་པོར་ཐོགས་པའི་སྐབས་སུ་ཐང་ལ་འགྱེལ་བའི་ཉེན་ཁ་ཆེ་བར་མ་ཟད། བུ་སྣོད་ཇེ་ཆུང་དུ་འགྲོ་བའམ་བུ་སྣོད་ནས་ཆུ་ཟགས་པའི་ཉེན་ཁ་ཡོད་ལ། ཐ་ན་མངལ་ཤོར་བའི་ཉེན་ཁའང་ཤིན་ཏུ་ཆེ། རྒྱུན་པར་འགུལ་སྐྱོད་བྱེད་སྐབས་རང་ཉིད་ཀྱི་གཉེན་ཉེ་གྲོགས་པོ་དང་མཉམ་དུ་ལུས་སྦྱོང་རྣམ་གྲངས་ནང་ཞུགས་པར་གོམས་དགོས། རྒྱུན་ལྡན་གྱི་མིས་དུས་ཡུན་སྐར་མ་སུམ་ཅུའི་ཡན་ལ་ལུས་ཕུང་སྦྱོང་བརྡར་བྱེད་པ་དང་། སྦྲུམ་མས་སྐར་མ་བཅོ་ལྔ་ནས་ཉི་ཤུའི་བར་ཚོད་འཛིན་བྱས་ནས་ངལ་གསོ་བྱེད་པ་ལས། བསྟུད་མར་འགུལ་སྐྱོད་བྱེད་པའི་ལས་ལ་ཞུགས་མི་རུང་། འགུལ་སྐྱོད་བྱེད་ཚད་དང་དུས་ཡུན་རིང་དྲགས་ན་ལུས་པོ་ཐང་ཆད་པ་དང་སྙིང་གི་འཕར་ལྡིང་རྒྱུན་ལྡན་མིན་པར་འགྱུར་སླ། དེ་བས་མངལ་སྦྲུམ་པའི་སྐབས་སུ་འགུལ་སྐྱོད་བྱེད་པ་ནི་ལུས་པོའི་ཤ་གནད་ལ་ཕན་པའི་སྦྱོང་བརྡར་ལས་ལུས་པོའི་ཚིལ་སྣ་ཇེ་ཉུང་དུ་གཏོང་ཆེད་མིན་པ་ཤེས་དགོས།

རང་ཉིད་དང་འཚམ་པའི་ལུས་སྦྱོང་བྱེད་དགོས། སྦྲུམ་མས་འགུལ་སྐྱོད་བྱེད་པའི་གོ་རིམ་ཁྲོད་ལུས་པོ་ཐང་ཆད་པ་དང་། ངལ་དུབ་ཀྱིས་མནར་མི་རུང་། སྦྲུམ་མ་ལ་ལས་ལུས་ནས་རྔུལ་ཆུ་ཐོན་པའི་བར་དུ་ལུས་སྦྱོང་བྱས་ན་ཕན་པ་ཆེ་བར་འདོད་པ་ནི་ནོར་འཁྲུལ་ཞིག་རེད། སྤྱིར་བཏང་དུ་མངལ་སྦྲུམ་པའི་བུད་མེད་ཅིག་ལ་མཚོན་ན། ལུས་སྦྱོང་བྱེད་པའི་དམིགས་ཡུལ་ནི་ལུས་སེམས་བདེ་ལ་འབབ་རྒྱུ་དེ་ཡིན།

ཁོག་སྟོང་དུ་ལུས་སྦྱོང་བྱེད་མི་རུང་། ཟ་མ་མ་ཟོས་ན་ལུས་སྟེང་དུ་བཅུད་དམ་མངར་ཆའི་རིགས་འདང་ངེས་ཤིག་མེད་པས། མངལ་གནས་བྱིས་པ་འཚར་ལོངས་འབྱུང་བར་ཕན་པ་མེད། དེའི་ཕྱིར། འགུལ་སྐྱོད་ཀྱི་སྔོན་ལ་མངར་སོབ་བག་ལེབ་དང་ཤིང་ཏོག་གི་ཁུ་བའི་རིགས་འཐུང་དགོས། །

རྩོམ་སྒྲིག་པ། འབྲུག་མོ།