གཅིག  པྲོག་གསར་རིམས་ནད་ཀྱི་འགོག་ཁབ་ངེས་པར་དུ་རྒྱག་དགོས་སམ།

དེ་ནི་ངེས་པར་དུ་རྒྱག་དགོས་ཏེ། ཧ་ལམ་རང་རྒྱལ་གྱི་མི་ཚང་མར་པྲོག་གསར་རིམས་ནད་ལས་ཐར་བའི་རིམས་འགོག་ནུས་པ་མེད་པས་ནད་དུག་དེ་འགོ་སླ་བ་རེད། ནད་དུག་འགོས་རྗེས། མི་ལ་ལར་ད་དུང་ནད་བབ་ཚབས་ཆེན་དུ་གྱུར་ཏེ་འཆི་བའི་ཉེན་ཁའང་འབྱུང་སྲིད། འགོག་ཁབ་བརྒྱབ་རྗེས། ཕྱོགས་གཅིག་ནས་མི་མང་ཆེ་བར་རིམས་འགོག་ནུས་པ་ཐོན་ཐུབ་པ་དང་། ཕྱོགས་གཞན་ཞིག་ནས་འགོག་ཁབ་བརྒྱབ་རྗེས། ནད་དུག་ཕན་ཚུན་བར་འགོས་མཆེད་འབྱུང་བར་སྔོན་འགོག་གང་ལེགས་བྱེད་ཐུབ།

གཉིས། པྲོག་གསར་ནད་དུག་གི་འགོག་ཁབ་ཇི་ལྟར་རྒྱག་པ་དང་གང་ནས་རྒྱག་དགོས་པ་ཡིན།

པྲོག་གསར་ནད་དུག་གི་འགོག་ཁབ་དེ་ས་གནས་རང་གི་འཕྲོད་བསྟེན་བདེ་ཐང་སྲིད་འཛིན་སྡེ་ཁག་གིས་ཆོག་མཆན་ཐོབ་པའི་འགོག་ཁབ་རྒྱག་སའི་གནས་སུ་སོང་ནས་རྒྱག་དགོས། སྤྱིར་བཏང་གི་གནས་ཚུལ་འོག འགོག་ཁབ་རྒྱག་ས་དེ་ས་གནས་རང་གི་འཕྲོད་བསྟེན་ཞབས་ཞུ་ལྟེ་གནས་སམ་ཡུལ་ཚོ་དང་གྲོང་བརྡལ་འཕྲོད་བསྟེན་ཁང་ངམ་ཕྱོགས་བསྡུས་སྨན་ཁང་དུ་བཙུགས་ཡོད་པ་རེད།

གསུམ། གལ་ཏེ་པྲོག་གསར་ནད་དུག་གི་འགོག་ཁབ་རྒྱག་འདོད་ཚེ། ད་ལྟ་ཚང་མས་མིང་ཐོ་བཀོད་ནས་འགོག་ཁབ་རྒྱག་ཆོག་གམ། རང་ཞིང་གི་མིག་སྔའི་འགོག་ཁབ་རྒྱག་པའི་ཐབས་ཇུས་ལ་གོམ་རིམ་གཉིས་ཡོད་དེ། གོམ་རིམ་དང་པོ་ནི་ཐོག་མར་དམིགས་བསལ་མི་སྣར་འགོག་ཁབ་རྒྱག་དགོས། དམིགས་བསལ་མི་སྣའི་སྡེ་ཁག་གིས་གནས་ཚུལ་ལ་རྒྱུས་ལོན་དང་ཁ་ཆད་བྱེད་དགོས་པར་མ་ཟད། འགོག་ཁབ་རྒྱག་པར་རམ་འདེགས་བྱེད་དགོས། གོམ་རིམ་གཉིས་པ་ནི་འགོག་ཁབ་གྱི་ཐོན་ཚད་རིམ་གྱིས་ཇེ་མང་དུ་གྱུར་བ་དང་བསྟུན་ནས་འགོག་ཁབ་དེ་ལས་མང་པོ་བཀོལ་སྤྱོད་བྱེད་ཐུབ་པས། གོ་རིམ་ཡོད་པའི་སྒོ་ནས་འགོག་ཁབ་རྒྱག་དགོས། གོམ་རིམ་རྗེས་མར་རྒྱག་དགོས་པའི་མི་རྣམས་ཀྱིས་གྲ་སྒྲིག་གང་ལེགས་བྱས་ནས་དུས་ལྟར་རྒྱག་དགོས། མང་ཚོགས་རྣམས་ལ་མཚོན་ན། གནས་སྐབས་སུ་ད་དུང་འགོག་ཁབ་རྒྱག་མ་ཐུབ་ཀྱང་། སྔར་བཞིན་ཕན་ནུས་ལྡན་པའི་འགོག་སྲུང་གི་བྱེད་ཐབས་མང་པོ་སྤྱོད་དགོས་ཏེ། དཔེར་ན། ཁ་ཐུམ་རྒྱག་པ་དང་། ལག་པ་བཀྲུ་བ། ཕན་ཚུན་བར་གྱི་འགྲོ་འོང་ཇེ་ཉུང་དུ་གཏོང་བ། ཁང་བའི་སྒོ་དང་དྲ་མ་ཕྱེས་ནས་རྒྱུན་པར་ཁང་བའི་ནང་གི་ཁ་དབུགས་བརྗེ་གསོར་བྱེད་དགོས།

བཞི། པྲོག་གསར་རིམས་ནད་ཀྱི་འགོག་ཁབ་དེ་བདེ་འཇགས་ཡིན་ནམ།

རྒྱལ་ཁབ་ཀྱིས་འགོག་ཁབ་ཀྱི་བརྒྱུད་རིམ་ཧྲིལ་བོ་གློག་རྡུལ་གྱིས་ཁུངས་འདེད་གསལ་བོ་བྱེད་པའི་ལམ་ལུགས་ལག་བསྟར་བྱས་ཡོད། འགོག་ཁབ་ཁྲོམ་འགྲེམ་བྱས་རྗེས། དེའི་ཐོན་སྐྱེད་དང་སྐྱེལ་འདྲེན། གསོག་འདྲེན། བཀོལ་སྤྱོད་སོགས་གོ་རིམ་རེ་རེ་ཚང་མ་ཡང་དག་དང་ཚད་ལྡན་གྱི་སྒོ་ནས་ཐོ་འགོད་བྱས་ཡོད། གོ་རིམ་ཧྲིལ་བོར་རྗེས་འདེད་ཐོ་འགོད་བྱས་ཡོད་དེ། དཔེར་ན་རིགས་སྣ་དང་འགོག་ཁབ་ཐོན་སྐྱེད་བྱེད་པའི་ཁེ་ལས། སྨན་གྱི་བཟོ་དབྱིབས། ཐོན་རྫས་ཀྱི་ཨང་གྲངས། ནུས་ཡུན་སོགས་ཡོད་ཚད་ཐོ་འགོད་གསལ་བོ་བྱས་ནས། འགོག་ཁབ་འཁོར་རྒྱུག་དང་བཀོལ་སྤྱོད་བྱེད་པའི་བརྒྱུད་རིམ་ཧྲིལ་བོ་ཁུངས་འདེད་གསལ་བོ་བྱས་ཡོད་པས། རིམ་འགོག་གོ་རིམ་དང་འགོག་ཁབ་རྒྱག་ཐབས་ཚང་མ་སྤྱིའི་ཆ་ནས་བཤད་ན་བདེ་འཇགས་དང་ཕན་ནུས་ལྡན་པ་ཞིག་ཡིན།

གོང་གི་ཤེས་བྱ་འདི《མཚོ་སྔོན་ཞིང་ཆེན་བདེ་ཐང་སློབ་གསོ་ཁང》གིས་འདོན་སྤྲོད་བྱས་པ་ཡིན། ། 

ཡིག་སྒྱུར་བ། འབྲུག་མོ།