གཅིག 《ཀྲུང་གོའི་སྡོད་དམངས་ཀྱི་བཟའ་བཏུང་ལམ་སྟོན》གྱི་ནང་དོན་གཙོ་བོ་ནི་ཅི་ཞིག་ཡིན།

ཉིས་སྟོང་བཅུ་དྲུག་ལོའི་ཟླ་ལྔ་བའི་ཚེས་བཅུ་གསུམ་ཉིན། རྒྱལ་ཁབ་འཕྲོད་བསྟེན་དང་འཆར་ལྡན་བུ་སྐྱེ་ཨུ་ཡོན་ལྷན་ཁང་རིམས་ནད་འགོག་སྲུང་ཅུའུ་ཡིས《ཀྲུང་གོའི་སྡོད་དམངས་ཀྱི་བཟའ་བཏུང་ལམ་སྟོན(2016)》འགྲེམ་སྤེལ་བྱས་པ་དང་། ལོ་གཉིས་ཡན་གྱི་བདེ་ཐང་ཡིན་པའི་མི་རྣམས་ལ་ཁ་གཏད་དེ་དོན་ཚན་གཙོ་བོ་དྲུག་བཏོན་ཡོད།

ཟས་སྣ་མང་དུ་བསྟེན་ཞིང་།  འབྲུ་རིགས་གཙོ་བོར་བསྟེན་དགོས།

ཉིན་རེར་བསྟེན་འོས་པའི་བཟའ་བཏུང་གི་རིགས་ལ་ཕྱེ་དང་ཞོག་ཁོག་གི་རིགས་དང་། སྔོ་ཚོད་དང་སིལ་ཏོག་གི་རིགས། ཤ་དང་སྒོ་ང་དང་འོ་མའི་རིགས། སྲན་ཆེན་དང་ཤིང་འབྲས་ཀྱི་རིགས་སོགས་འདུས་ཡོད།

ཆ་སྙོམས་ཀྱིས་ཉིན་རེར་ཟས་སྣ་བཅུ་གཉིས་ཡན་བསྟེན་པ་དང་། གཟའ་འཁོར་རེར་ཟས་སྣ་ཉེར་ལྔའི་ཡན་བསྟེན་དགོས།

ཉིན་རེར་ཕྱེའི་རིགས་དང་ཞོག་ཁོག་རིགས་ཀྱི་ཟས་རིགས་ཁེ250ནས400བར་བསྟེན་པ་དང་། དེའི་ཁྲོད་དུ་འབྲུ་རིགས་དང་སྲན་ཡོས་རིགས་ཀྱི་བསྟེན་ཚད་ཁེ50ནས150བར་ཡིན་པ་དང་། ཞོག་ཁོག་རིགས་ཀྱི་བསྟེན་ཚད་ཁེ50ནས100བར་ཡིན།

ཟས་སྣ་མང་དུ་བསྟེན་ཞིང་། འབྲུ་རིགས་གཙོ་བོར་བསྟེན་པ་ནི་བཟའ་བཏུང་དོ་མཉམ་ཡོང་བའི་ཁྱད་རྟགས་གལ་ཆེན་ཞིག་ཡིན།

བཟའ་བཏུང་དང་འགུལ་སྐྱོད་དོ་མཉམ་ཡོང་བ་དང་། ལུས་པོའི་ལྗིད་ཚད་འོས་འཚམ་ཡིན་དགོས།

ལོ་ཚོད་མི་འདྲ་བའི་མི་ཚང་མས་རྒྱུན་པར་ལུས་སྦྱོང་བྱས་ཏེ། བདེ་ཐང་གི་ལུས་པོའི་ལྗིད་ཚད་སྲུང་འཛིན་བྱེད་དགོས།

ཟས་འགྲངས་དྲག་པ་མི་བཟའ་ཞིང་། ནུས་ཚད་བསྡུ་ལེན་བྱེད་ཚད་ལ་ཚོད་འཛིན་བྱས་ནས་དོ་མཉམ་ཡོང་བ་སྲུང་འཛིན་བྱེད་དགོས།

ཉིན་རྒྱུན་གྱི་ལུས་ཕུང་འགུལ་སྐྱོད་རྒྱུན་འཁྱོངས་སྒོས། གཟའ་འཁོར་རེར་ཆེས་ཉུང་མཐར་ཡང་ཉིན་ལྔའི་རིང་ལ་དྲག་ཚད་འབྲིང་ཤོས་ཀྱི་འགུལ་སྐྱོད་བྱེད་དགོས་ལ། རིམ་བསགས་ཀྱིས་སྐར་མ150ཡན་ལོངས་དགོས། རང་འགུལ་གྱི་ལུས་ཕུང་འགུལ་སྐྱོད་དེ་ཉིན་རེར་གོམ་པ6000རེ་སྐྱོད་ཐུབ་ན་རབ་ཡིན།

ཡུན་རིང་བཙོག་ནས་མི་འདུག་པར། ཆུ་ཚོད་རེའི་རྗེས་སུ་ཡར་མར་ལ་སོང་སྟེ་འགུལ་སྐྱོད་བྱེད་དགོས།

སྔོ་ཚོད་དང་སིལ་ཏོག འོ་མའི་རིགས། སྲན་ཆེན་དང་སྲན་རྫས་བཅས་མང་དུ་བསྟེན་དགོས།

སྔོ་ཚོད་དང་སིལ་ཏོག་གི་རིགས་ནི་བཟའ་བཏུང་དོ་མཉམ་ཡོང་བའི་གྲུབ་ཆ་གལ་ཆེན་ཞིག་ཡིན་ཏེ། འོ་མའི་རིགས་ལ་ཀལ་ཕུན་སུམ་ཚོགས་པོ་འདུས་པ་དང་། སྲན་ཆེན་ལ་སྤུས་དག་སྤྲི་དཀར་ཕུན་སུམ་ཚོགས་པོ་འདུས་ཡོད།

ཟས་ཐུན་རེ་རེར་སྔོ་ཚོད་ཟ་བ་དང་། ཉིན་རེར་སྔོ་ཚོད་ཁེ300ནས500བར་བསྟེན་དགོས།

ཉིན་རྒྱུན་སིལ་ཏོག་ཟ་བ་དང་། ཉིན་རེར་སིལ་ཏོག་ཁེ200ནས350བར་བསྟེན་དགོས་ལ། སིལ་ཁུ་ཡིས་སིལ་ཏོག་གི་ཚབ་བྱེད་མི་རུང་།

འོ་བཟོས་དངོས་རྫས་སྣ་ཚོགས་བསྟེན་པ་སྟེ། ཉིན་རེར་འོ་མ་རློན་པ་ཁེ300ཙམ་བསྟེན་དགོས།

རྒྱུན་པར་སྲན་རྫས་བསྟེན་ཞིང་། འོས་འཚམ་གྱི་ཤིང་འབྲས་ཀྱང་བསྟེན་དགོས།

ཉ་ཤ་དང་བྱ་ཤ སྒོ་ང་། ཤ་སྣག་བཅས་འོས་འཚམ་ངང་བསྟེན་དགོས།

གཟའ་འཁོར་རེར་ཉ་ཤ་ཁེ280ནས525བར་དང་ ཕྱུགས་རིགས་ཀྱི་ཤ་དང་བྱ་ཤ་ཁེ280ནས525བར། སྒོ་ང་ཁེ280ནས350བར་བཅས་ཉིན་རེར་ཆ་སྙོམས་ཀྱིས་སྤྱིའི་ནུས་ཚད་ཁེ120ནས200བསྟེན་དགོས།

སྔོན་ལ་ཉ་ཤ་དང་བྱ་ཤ་འདེམས་དགོས།

སྒོ་ང་ཟ་བར་སྒོང་སྤྲི་འདོར་མི་རུང་།

ཤ་ཚོན་པོ་དང་། དུད་བསྲེགས་དང་ཚྭ་བསྙལ་གྱི་ཤའི་རིགས་ཉུང་དུ་བསྟེན་དགོས།

ཚྭ་དང་སྣུམ་ཞགས་མཐོ་བའི་ཟས་རིགས་ཉུང་ཟ་བྱེད་པ་དང་། ཆང་དང་ཀ་རའི་བཟའ་ཚད་ཚོད་འཛིན་བྱེད་དགོས།

ཕོ་བར་འཇུ་སླ་བའི་ཟས་སྤྱོད་གོམས་པར་བྱས་ཏེ། ཚྭ་མང་བ་དང་སྣུམ་བཙོས་ཟས་རིགས་ཉུང་དུ་བསྟེན་དགོས་ཏེ། མི་དར་མའི་ཉིན་རེའི་ཚྭ་བསྟེན་ཚད་ཁེ་དྲུག་དང་། ཉིན་རེའི་གཡོས་སྦྱོར་སྣུམ་ཁེ་ཉེར་ལྔ་ནས་སུམ་ཅུ་ལས་བརྒལ་མི་རུང་།

མངར་ཆ་བསྲེས་པའི་ཟས་རིགས་བསྟེན་ཚད་ལ་ཚོད་འཛིན་བྱས་ཏེ། ཉིན་རེའི་བསྟེན་ཚད་ཁེ་ལྔ་བཅུ་ལས་མི་བརྒལ་ཞིང་། ཁེ་ཉེར་ལྔའི་མན་དུ་ཚོད་འཛིན་བྱེད་ཐུབ་ན་རབ་ཡིན།

ཆུ་མང་དུ་འཐུང་དགོས་ཏེ། མི་དར་མས་ཉིན་རེར་ཆུ་ཕོར་བ་བདུན་ནས་བརྒྱད་བར་འཐུང་དགོས་པ་དང་། དེའང་ཆུ་ཁོལ་དང་ཇ་འཐུང་ན་བཟང་ཞིང་། མངར་ཆ་འདུས་པའི་སྐོམ་ཆུ་དང་ཐཱན་སྐྱུར་སྐོམ་ཆུ་མི་འཐུང་བའམ་ཉུང་འཐུང་བྱེད་དགོས།

བྱིས་པ་དང་། གཞོན་ནུ། སྦྲུམ་མ། བྱིས་པར་ནུ་མ་ལྡུད་བཞིན་པའི་བུད་མེད་ཀྱིས་ཆང་འཐུང་མི་རུང་། མི་དར་མས་ཆང་འཐུང་བ་ཡིན་ན། སྐྱེས་པ་རྣམས་ཀྱིས་ཉིན་རེར་ཆང་འཐུང་ཚད་ཁེ་ཉེར་ལྔ་དང་། བུད་མེད་ཚོས་ཁེ་བཅོ་ལྔ་ལས་བརྒལ་མི་རུང་། །

རྩོམ་སྒྲིག་པ། འབྲུག་མོ།