རྒན་པ་རྣམས་ནི་ཟུངས་ཁྲག་ཉམས་སླ་བའི་མི་ཚོགས་ཡིན་ལ། ལྷག་པར་དུ་འཚོ་བཅུད་རང་བཞིན་གྱི་ཟུངས་ཁྲག་ཉམས་པའི་ནད་ཀྱི་འབྱུང་ཚད་ཧ་ཅང་མཐོ། ནད་རྙིང་མང་བ་དང་དོན་སྣོད་ཡོངས་ཀྱི་བྱེད་ནུས་ཉམས་པ། འགུལ་སྐྱོད་མང་པོ་མི་བྱེད་པ་སོགས་ཀྱི་དབང་གིས། རྒན་པ་མང་པོ་ཞིག་ལ་ཟུངས་ཁྲག་ཉམས་པའི་ནད་བྱུང་ཡོད་ནའང་ཤེས་ཀྱིན་མེད་པ་རེད།

རྒན་པ་རྣམས་ལ་ཟུངས་ཁྲག་ཉམས་པའི་ནད་བྱུང་དོན་ཅི་ཡིན་ནམ།

ཟུངས་ཁྲག་ཉམས་པ་ཞེས་པ་ནི་ཁྲག་དམར་སྤྲི་དཀར་གྱི་གར་ཚད་དེ་རྒྱུན་ལྡན་གྱི་ཚད་ལས་དམའ་བའམ་ཡང་ན་ཕྲ་ཕུང་དམར་པོའི་གསོག་ཚད་ཇེ་ཉུང་དུ་སོང་བ་ལ་གོ ཟུངས་ཁྲག་ཉམས་པ་ནི་ནད་རྟགས་ཤིག་ཡིན་ལ། ནད་རིགས་གཞན་པའི་མངོན་རྟགས་ཤིག་ཀྱང་ཡིན་སྲིད། ཟུངས་ཁྲག་ཉམས་པའི་ནད་ཀྱི་འབྱུང་རྐྱེན་ལ་གཤམ་གྱི་འདི་དག་ཡོད་པ་སྟེ།

ཁྲག་བཟོ་བྱེད་ནུས་ཉམས་པ། རུས་རྐང་ནི་ཁྲག་བཟོ་དབང་པོ་གལ་ཆེན་ཞིག་ཡིན་ལ། རྒན་པ་རྣམས་ཀྱི་རུས་རྐང་གི་ཁྲག་བཟོ་བྱེད་ནུས་དེ་དབང་པོ་གཞན་པ་དང་མཉམ་དུ་རིམ་གྱིས་ཉམས་ཞན་དུ་སོང་ནས། ཚིལ་སྣ་དང་འབྲེལ་སྐྱོང་ཕུང་གྲུབ་ཀྱིས་དེའི་ཚབ་བྱས་པས། ཚབ་འབྱིན་ནུས་པའང་དེ་དང་བསྟུན་ནས་མངོན་གསལ་གྱིས་ཇེ་དམའ་རུ་སོང་ཡོད།

རྩབས་ཀྱི་གྲུང་གཤིས་མར་བབས་པ། རྒན་པ་རྣམས་ཀྱི་ལུས་སྟེང་གི་རྙིང་ཚབ་གསར་བརྗེ་རྩབས་ཀྱི་གྲུང་གཤིས་མར་བབས་པ་དང་བསྟུན་ནས། ཕྲ་ཕུང་དམར་པོའི་སྐྱི་མོ་གསར་བརྗེ་བྱེད་པར་མཁོ་བའི་རྩབས་ལ་དེ་བཞིན་དུ་འགྱུར་ལྡོག་བྱུང་བས། ཕྲ་ཕུང་དམར་པོའི་ཚེ་ཐག་ཇེ་ཐུང་དུ་སོང་ཡོད།

སྐུལ་རྩའི་འབྱུང་ཚད་ཇེ་ཉུང་དུ་སོང་བ། རྒན་པ་རྣམས་ཀྱི་སྐུལ་རྩི་ཟགས་ཐོན་བྱེད་ཚད་ཇེ་ཉུང་དུ་སོང་བས། སྐུལ་རྩིས་ཁྲག་བཟོ་ལ་ཕོག་ཐུག་གཏོང་བའི་ནུས་པའང་དེ་དང་བསྟུན་ནས་ཇེ་དམའ་རུ་སོང་ཡོད།

འཚོ་བཅུད་ཀྱིས་མི་འདང་བ། རྒན་པ་རྣམས་ཀྱི་འཇུ་ནུས་ཉམས་པ་དང་། སོ་ལྷུང་བ། ལྡད་ནུས་ཞན་པ། སྡུད་ལེན་ནུས་པ་ཞན་པ་སོགས་ཀྱི་དབང་གིས་ཟུངས་ཁྲག་ཉམས་པའི་ནད་འབྱུང་སླ། ད་རུང་རྒན་པ་ཁ་ཤས་ཀྱིས་དུས་ཡུན་རིང་པོར་སྲོག་ཆགས་ལས་ཐོན་པའི་ཟས་རིགས་མི་ཟ་བས། ལྕགས་དང་ལོ་མའི་སྐྱུར། འཚོ་རྒྱུB12སོགས་ཁྲག་བཟོ་རྒྱུ་ཆས་མ་འདང་བར། ཟུངས་ཁྲག་ཉམས་པའི་ནད་བྱུང་བ་རེད།

དལ་བའི་རང་བཞིན་གྱི་ནད་རིགས་མང་པོ་ཡོད་པ། རྒན་པ་རྣམས་ལ་རྒྱུན་དུ་དལ་བའི་རང་བཞིན་གྱི་ནད་རིགས་མང་པོ་བྱུང་ཡོད་པ་སྟེ། དཔེར་ན་དལ་བའི་རང་བཞིན་གྱི་མཁལ་མའི་ནད་རིགས་ཡོད་ན། ཕྲ་ཕུང་དམར་པོ་ཟགས་ཐོན་བྱེད་པའི་ཚད་ཇེ་དམའ་རུ་འགྲོ་བས་ཕྲ་ཕུང་དམར་པོས་མི་འདང་བའི་གནས་ཚུལ་འབྱུང་ལ། རང་སྟེང་གི་རིམས་ཐར་ནད་རིགས་ཀྱིས་ཟུངས་ཁྲག་ཉམས་པའི་གནས་ཚུལ་སྣ་ཚོགས་བཟོ་ཞིང་། དལ་བའི་རང་བཞིན་གྱི་རེད་ནད་སྣ་ཚོགས་ཀྱིས་ལྕགས་ཀྱི་རྙིང་ཚབ་གསར་བརྗེ་དཀྲུགས་པ་དང་། སྐྲན་ནག་དང་སྦྲགས་ནས་རྒྱུན་དུ་ཟུངས་ཁྲག་ཉམས་པའི་ནད་འབྱུང་བ་སོགས་ལྟ་བུ། དལ་བའི་རང་བཞིན་གྱི་ནད་རིགས་གསོ་བའི་སྨན་རྫས་ཀྱིས་ཀྱང་ཕྲ་ཕུང་དམར་པོ་འབྱུང་བར་བཀག་རྐྱེན་ཐེབས་ཏེ་ཟུངས་ཁྲག་ཉམས་པའི་གནས་ཚུལ་བཟོ་བ་རེད།

ཟུངས་ཁྲག་ཉམས་ན་ཇི་ལྟར་བྱེད་དགོས་སམ།

རྒན་པ་རྣམས་ཀྱིས་ཟུངས་ཁྲག་ཉམས་པའི་ནད་སྔོན་འགོག་བྱེད་དགོས་ན། འབྲས་སྐྲན་དང་རེད་ནད། མཁལ་མའི་བྱེད་ནུས་ཉམས་པ་སོགས་ཀྱི་གདོད་འབྱུང་ནད་གསོ་བཅོས་བྱེད་པར་འབད་དགོས་པ་དང་། དུས་མཚུངས་སུ་ལུས་སྦྱོང་འོས་འཚམ་བྱས་ཏེ། ལུས་སྟེང་གི་དབྱང་ཟད་ཚད་ཇེ་མང་དུ་གཏོང་བ་དང་། ཁྲག་བཟོ་བྱེད་ནུས་རྒས་འགྱུར་འབྱུང་བའི་ཚད་ཇེ་དལ་དུ་གཏོང་དགོས།

རྒན་པའི་ཁྲོད་དུ། འཚོ་བཅུད་རང་བཞིན་གྱི་ཟུང་ཁྲག་ཉམས་པའི་ནད་འབྱུང་ཚད་ཧ་ཅང་མཐོ། དེའི་རྒྱུ་རྐྱེན་གཙོ་བོ་ནི་ལུས་སྟེང་དུ་ལྕགས་དང་ལོ་མའི་སྐྱུར། འཚོ་རྒྱུB12སོགས་མ་འདང་བ་་ཡིན་པས། བཟའ་བཏུང་ལུགས་མཐུན་ངང་བསྟེན་ནས་གསོ་བཅོས་བྱེད་དགོས།

རྒན་པ་རྣམས་ཀྱིས་སྤུས་ལེགས་སྤྲི་དཀར་མང་དུ་ཟོས་ནས། ལུས་སྟེང་གི་རིམས་ཐར་མ་ལག་གི་ཕྲ་ཕུང་ལ་ཕོག་ཐུག་གཏོང་བ་དང་། ནད་འགོག་ནུས་པ་ཇེ་མཐོར་གཏོང་དགོས་ལ། ཚིལ་སྣ་འོས་འཚམ་བསྟེན་ཏེ་ནུས་དྲོ་ཇེ་མང་དུ་གཏོང་དགོས། འཚོ་རྒྱུ(ལྷག་པར་དུ་འཚོ་རྒྱུCདངBརིགས)དང་ལོ་མའི་སྐྱུར་མང་དུ་ཟོས་ནས། ཕྲ་ཕུང་དམར་པོ་འབྱུང་བར་སྐུལ་འདེད་གཏོང་དགོས། ལྕགས་རྒྱུ་ཟས་རིགས་མང་དུ་བསྟེན་ཏེ་ཁྲག་དམར་སྤྲི་དཀར་འབྱུང་བར་སྐུལ་འདེད་གཏོང་དགོས་ལ། ཟས་རིགས་འདེམ་པ་དང་དཀར་ཟས་ཟ་བ་སོགས་བཟའ་བཏུང་སྤྱོད་པའི་གོམས་སྲོལ་ངན་པ་བསྒྱུར་དགོས། བྱེ་བྲག་གིས་བཤད་ན། སིལ་ཏོག་དང་སྔོ་ཚོད། ཤའི་རིགས། སྲོག་ཆགས་ཀྱི་ནང་ཁྲོལ་སོགས་ཀྱི་ནང་དུ་ལོ་མའི་སྐྱུར་གྱི་འདུས་ཚད་མཐོ་བ་དང་། ཤའི་རིགས་དང་སྒོ་ང་། འོ་མ་སོགས་ཀྱི་ནང་དུ་འཚོ་རྒྱུB12ཡི་འདུས་ཚད་མཐོ་ལ། ཚ་ལུ་མ་དང་ཉིན་མིང་། སུར་པན། ཀྲོ་མ་ཀྲི། པད་ཁ། ལོ་སྒོར་པད་ཚལ་སོགས་ཀྱི་ནང་དུ་འཚོ་རྒྱུCཡི་འདུས་ཚད་ཧ་ཅང་མཐོ། སྲོག་ཆགས་ཀྱི་ཁྲག་དང་སྐམས་ཤ ཉ་ཤ། མཆིན་པ། སྒོ་ང་སོགས་སྲོག་ཆགས་ལས་བྱུང་བའི་ཟས་རིགས་དང་། ཏིལ་དང་མོག་རོ། ཚོད་སྣག  སྲན་ཆེན། འབྲུ་རིགས། ཁམ་བུ། རྒུན་འབྲུམ་སོགས་རྩི་ཤིང་ལས་བྱུང་བའི་ཟས་རིགས་ཀྱི་ནང་དུ་ལྕགས་ཀྱི་འདུས་ཚད་མཐོ་བར་མ་ཟད་སྡུད་ལེན་བྱེད་སླ་བ་རེད།

དྲན་སྐུལ་བྱེད་དགོས་པ་ཞིག་ནི། རྒན་པ་རྣམས་ཀྱི་ཟུངས་ཁྲག་ཉམས་པ་ལ་ཁ་སུར་དམར་པོ་དང་ཨ་སྤྱིན་སོགས་བཅུད་ལྡན་ཟས་རིགས་མང་དུ་ཟོས་པ་ཙམ་གྱིས་ཐག་གཅོད་བྱེད་མི་ཐུབ། དོན་དངོས་སུ་འཚོ་བཅུད་རང་བཞིན་གྱི་ཟུངས་ཁྲག་ཉམས་པ་ལའང་ཟས་རིགས་ཁོ་ནར་བརྟེན་ནས་གསོ་བཅོས་བྱེད་དཀའ། རྒན་པར་ཟུངས་ཁྲག་ཉམས་པའི་ནད་བྱུང་ན་ཉེན་ཁ་ཆེན་པོ་ཡོད་པས། སྔ་མོ་ནས་བརྟག་དཔྱད་དང་གསོ་བཅོས་བྱས་ཏེ། དེ་བས་ཀྱང་ཚབས་ཆེ་བའི་བསྡོངས་ཟླའི་ནད་འབྱུང་བ་སྔོན་འགོག་བྱེད་དགོས།།

ཟུངས་ཁྲག་ཉམས་པའི་སྔ་དུས་ཀྱི་ནད་རྟགས།

ཟུངས་ཁྲག་ཉམས་པ་ནི་རྒན་པའི་རྒྱུན་མཐོང་གི་ནད་རིགས་ཤིག་ཡིན་ལ། སྔ་དུས་སུ་ནད་རྟགས་གསལ་བོ་མེད་པར། མགོ་ཡོམ་འཁོར་བ་དང་ཐང་ཆད་པ། སེམས་འཚབ་པ། འགུལ་སྐྱོད་བྱེད་མི་འདོད་པ་སོགས་ཀྱི་ནད་རྟགས་ཡང་མོ་འབྱུང་བས། ཀླད་སྙིང་ཁྲག་རྩའི་ནད་རིགས་ལ་འཁྲུལ་ཉེན་ཆེ་ཞིང་། ཡང་ནད་པ་ཁ་ཤས་ལ་སྤྲོ་སེམས་མེད་པ་དང་ཁོང་ཁྲོ་ལངས་སླ་བ། འཕྲུལ་སྣང་འབྱུང་བ་སོགས་དཀྱིལ་སྙིང་དབང་རྩའི་མ་ལག་གི་ནད་རྟགས་འབྱུང་བ་དང་། གློ་བུར་ཤ་རིད་པ་སོགས་འཇུ་བྱེད་མ་ལག་གི་ནད་རྟགས་ཀྱང་འབྱུང་བ་རེད། གོང་གི་ནད་རྟགས་དེ་དག་ནི་ཟུངས་ཁྲག་ཉམས་པའི་ནད་རྟགས་ཡིན་སྲིད།

ཟླ་མཚན་ཆད་པའི་བུད་མེད་དང་ལྕགས་རྒྱུའི་ཟུངས་ཁྲག་ཉམས་པའི་སྐྱེས་པ། ཉེ་ཆར་རྒྱུ་རྐྱེན་གང་ཡང་མེད་པར་གློ་བུར་ཤ་རིད་པའི་རྒན་པ་དང་། རྒྱུན་དུ་རྩ་སྐམ་པའི་རྒན་པ་སོགས་ལ། གལ་ཏེ་རྒྱུ་རྐྱེན་མི་གསལ་བར་ཟུངས་ཁྲག་ཉམས་པའི་ནད་བྱུང་ན། དོ་སྣང་ཆེན་པོ་བྱས་འབྲས་སྐྲན་བྱུང་ཡོད་མེད་ལ་བརྟག་དགོས་སོ། །

རྩོམ་སྒྲིག་པ། འབྲུག་མོ།