མི་མང་ཆེ་ཤོས་ཀྱིས་ཆམ་ནད་ཅེས་པའི་རྒྱུན་མཐོང་གི་ནད་རིགས་འདི་ལ་གོ་བ་ཟབ་མོ་ཅིག་མ་ལོན་པར། ནོར་འཁྲུལ་གྱི་ལྟ་བ་གང་མང་བཟུང་ཡོད། དོན་དངོས་སུ་ཆམ་ནད་དང་ཆམ་རིམས། དབུགས་ལམ་སྟོད་མའི་རེད་པ་བཅས་ནི་ནད་རིགས་མི་འདྲ་བ་སོ་སོ་ཡིན་པས། དེ་ལ་སྔོན་འགོག་བྱེད་ཐབས་དང་གསོ་བཅོས་བྱེད་ཐབས་ཀྱང་རྩ་བ་ནས་མི་འདྲ། ཆམ་ནད་དང་ཆམ་རིམས་གཉིས་ཀ་ནད་དུག་གིས་དབུགས་ལམ་རེད་པར་རྐྱེན་བྱས་ཏེ་བྱུང་བ་ཡིན་མོད། དེ་གཉིས་ནི་ནད་རིགས་མི་འདྲ་བ་གཉིས་ཡིན།
འགོས་མཆེད་རང་བཞིན་གྱི་ཆམ་ནད་ཀྱི་མིང་ལ་ཆམ་རིམས་ཟེར་ཞིང་། དེ་ནི་ཆམ་རིམས་ཀྱི་ནད་དུག་གིས་བསླངས་པའི་མྱུར་བའི་རང་བཞིན་གྱི་དབུགས་ལམ་གྱི་འགོས་ནད་ཅིག་རེད། དེའི་འབྱུང་ཚད་མཐོ་ཞིང་འགོས་ཚད་ཤིན་ཏུ་ཆེ། ནད་གཞི་དེ་ལ་ཆམ་རིམས་ཀ་པ་དང་ཆམ་རིམས་ཁ་པ། ཆམས་རིམས་ང་པ་བཅས་ཆམ་རིམས་ཀྱི་ནད་དུག་མི་འདྲ་བ་རིགས་གསུམ་དུ་དབྱེ་ཆོག་ཅིང་། གཙོ་བོར་མཁའ་དབུགས་ཁྲོད་དུ་རྒྱུ་བའི་མཆིལ་ཟགས་ལས་འགོས་པ་རེད། ནད་ཐོག་ཏུ་ཚ་རྒྱས་པ་དང་། ཐང་ཆད་པ། ལུས་ཡོངས་ཀྱི་ཤ་གྲིམ་ན་བ། མིག་སྐྱིར་གཉན་ཚད་རྒྱས་པ། དབུགས་ལམ་ཅུང་རེད་པ་བཅས་ཀྱི་རྟགས་འབྱུང་། རྒན་པ་ལ་ལ་དང་དལ་བའི་རང་བཞིན་གྱི་དབུགས་ལམ་གྱི་ནད་ཡོད་པའི་ནད་པ། ད་དུང་སྙིང་ནད་ཅན་བཅས་ལ་དེ་དང་བསྡོངས་ནས་གློ་ཚད་ཀྱི་ནད་ཀྱང་འབྱུང་སླ། ཆམ་རིམས་ཀྱི་ཁྱད་རྟགས་གཙོ་བོ་ནི་འགོས་ཚད་ཆེ་བ་ཡིན་ཏེ། ས་གནས་རང་བཞིན་དང་རྒྱལ་ཡོངས་རང་བཞིན། ཐ་ན་འཛམ་གླིང་རང་བཞིན་གྱིས་འགོས་ཚབས་ཆེན་པོ་འབྱུང་སྲིད། དེ་བས་འགོས་ཚད་ཆེ་བ་དེ་ནི་སྨན་པས་ཆམ་རིམས་ལ་ངོས་བྱེད་ཀྱི་གཞི་འཛིན་ས་གཙོ་བོ་ཡིན། ཆམ་རིམས་ཀྱི་ནད་དུག་དང་ལྷག་པར་དུ་ཆམ་རིམས་ཀྱི་ནད་དུག་ཀ་པར་ནད་འགྱུར་འབྱུང་སླ་བའི་དབང་གིས། ལོ་རེ་རེར་འབྱུང་བཞིན་པའི་ཆམ་རིམས་ཀྱི་ནད་དུག་མི་འདྲ་ཞིང་། སྤྱིར་བཏང་དུ་ལོ་གསུམ་རེའི་ནང་ནད་དུག་མི་འདྲ་བ་རེ་མཆེད་ནས། ནད་པ་མང་པོའི་ལུས་ཀྱི་ནད་རྟགས་ལྗིད་ཅིང་། ལུས་ཕུང་བདེ་ཐང་དང་ངལ་རྩོལ་ནུས་ཤུགས་ལ་ཤུགས་རྐྱེན་ཆེན་པོ་ཐེབས་སྲིད།
སྤྱིར་བཏང་གི་ཆམ་ནད་ལ་ང་ཚོས་ཆམ་ནད་ཟེར་ཞིང་། དེ་ནི་མྱུར་བའི་རང་བཞིན་གྱི་དབུགས་ལམ་སྟོད་མའི་ནད་དུག་རེད་པའི་ཁྲོད་ཀྱི་ཆེས་རྒྱུན་མཐོང་གི་ནད་རིགས་ཤིག་རེད། ཆམ་ནད་དེ་དུས་ཚིགས་བཞི་བོར་འབྱུང་ཞིང་། དེ་ལས་ཀྱང་དགུན་སྟོད་ལ་འབྱུང་ཚད་མཐོ། ཡིན་ནའང་དུས་ཚིགས་མི་འདྲ་བ་རེ་རེའི་ཆམ་ནད་སློང་རྐྱེན་གྱི་ནད་དུག་ཀྱང་མི་འདྲ། དེའི་ནད་གཞི་གཙོ་བོར་སྣའི་ནད་དུག་དང་དེ་ནས་ཆམ་ནད་ཕལ་བའི་ནད་དུག གཤེར་རྨེན་ནད་དུག ཨེ་རྗིབ་ནད་དུག ཁོ་ས་ཁིས་ནད་དུག་དང་དབུགས་ལམ་གྱི་ཕུང་འདྲེས་ནད་དུག་བཅས་ཡོད་ཅིང་། དེ་དག་ཚང་མ་རྒྱུན་པར་དུག་སྲིན་ཕྲ་མོའི་རེད་པ་དང་བསྡོངས་སླ། སྤྱིར་བཏང་གི་ཆམ་ནད་དེའི་འབྱུང་ཚད་ཅུང་མྱུར་ཞིང་ཐོག་མའི་ནད་རྟགས་ལ་མིད་པར་ཚ་རྒྱས་ཤིང་ཟ་འཕྲུག་ལངས་པ། སྣ་སྦྲིད་རྒྱག་པ། སྣ་འཚུབ་པ། སྣ་ཆུ་བཞུར་བ་དང་། དེའི་རྗེས་ནས་མིད་པ་ན་བ། ཚ་ཅུང་ཟད་ལངས་པ། མགོ་ན་བ་སོགས་འབྱུང་། སྤྱིར་བཏང་གི་ཆམ་ནད་དེ་མི་རེ་འགར་འབྱུང་ཞིང་ཕན་ཚུན་མི་བགོ་བ་ཡིན། ཡིན་ནའང་པྲོག་དབྱིབས་ནད་དུག་རེད་པ་ལས་ཆམ་རིམས་རེ་འགའ་སློང་སྲིད་པའང་ཡོད། ཆམ་ནད་དེ་སྤྱིར་བཏང་དུ་ཉིན་ལྔ་ནས་བདུན་གྱི་ནང་དུ་དྲག་འགྲོ་བ་རེད།
ཆམ་རིམས་ཀྱི་སྔོན་འགོག་བྱེད་ཐབས་གཙོ་བོ་ནི།
1.ཆམ་རིམས་ཀྱི་ནད་བྱུང་མ་ཐག་ཏུ་སྔ་མོ་ནས་མི་ཚོགས་དང་ལོགས་སུ་བཀར་ནས་གསོ་བཅོས་བྱེད་དགོས། ཆམ་རིམས་མཆེད་པའི་དུས་སུ་རྣམ་པ་རྒྱ་ཆེ་བའི་འདུ་འཛོམས་དང་ཐུན་མོང་གི་བྱ་འགུལ་སོགས་ཇེ་ཉུང་དུ་གཏོང་དགོས་ཤིང་། རབ་ཡིན་ན་མི་ཚོགས་འདུ་སར་མི་འགྲོ་བ་དང་། གལ་ཏེ་འགྲོ་དགོས་བྱུང་ནའང་ཁ་ཐུམ་རྒྱག་དགོས། ཉིན་རྒྱུན་ཁང་བའི་སྒོ་དང་དྲ་མ་ཕྱེས་ནས་ནང་དུ་མཁའ་དབུགས་གསར་བ་རྒྱུ་རུ་འཇུག་དགོས།
2.སྨན་རྫས་ཀྱིས་སྔོན་འགོག་བྱེད་པ། ཚྭ་སྐྱུར་རྡོ་རྗེ་ཝོན་ཨེན（盐酸金刚烷胺）ཞེས་པ་དེ་བསྟེན་ན་ཆམ་རིམས་ཀ་པར་སྔོན་འགོག་བྱེད་པར་ཕན་འབྲས་ངེས་ཅན་ཞིག་ཡོད་ལ། ཆམ་རིམས་ཁ་པར་གོ་ཅི་ཡང་མི་ཆོད། དེ་བས་ཆམ་རིམས་ཐོག་མར་བྱུང་དུས་རིགས་གང་ཞིག་ཡིན་པར་ངོས་འཛིན་གསལ་བོ་བྱས་ནས་དེ་དང་མཐུན་པའི་གསོ་བཅོས་བྱེད་དགོས།
ཆམ་རིམས་དེ་ཉིན་འགའི་ནང་དྲག་འགྲོ་བའི་ནད་རིགས་ཞིག་ཡིན་ནའང་། སྟབས་མ་ལེགས་ན་དེས་ནད་རིགས་ཚབས་ཆེན་གཞན་དག་ཀྱང་སློང་སྲིད་པས། སྣང་མེད་དུ་གཏན་ནས་བསྐྱུར་མི་རུང་བར་སྔོན་འགོག་བྱེད་རྒྱུ་ནི་ཤིན་ཏུ་གལ་ཆེ། ལོ་རེར་ཆམ་རིམས་ཀྱི་འགོག་སྨན་རྒྱག་རྒྱུ་ནི་ཆམ་རིམས་སྔོན་འགོག་བྱེད་པའི་བྱེད་ཐབས་ཆེས་ལེགས་ཤོས་ཡིན།
ལོ་རེའི་འགོག་སྨན་གྱི་ནད་དུག་རིལ་བུ་དེ་འཛམ་གླིང་འཕྲོད་བསྟེན་རྩ་འཛུགས་དང་རང་རྒྱལ་གྱི་ཆམ་རིམས་ལྟ་ཞིབ་ཚད་ལེན་མ་ལག་གི་མཇུག་འབྲས་ལྟར་བཟོས་པ་རེད། འགོག་སྨན་གྱི་ནང་དུ་འདུས་པའི་ནད་དུག་རིལ་བུ་དེ་ལོ་རེར་གསར་བསྒྱུར་བྱེད་བཞིན་ཡོད། གང་ནུས་ཀྱིས་ལོ་དེར་འབྱུང་སྲིད་པར་སྔོན་དཔག་བྱས་པའི་ཆམ་རིམས་ནད་དུག་དང་བསྟུན་ནས་བཟོ་བཞིན་ཡོད། དེ་བས་ཚད་ངེས་ཅན་ཞིག་གི་སྟེང་ནས་འགོག་སྨན་གྱི་ནང་དུ་འདུས་པའི་ནད་དུག་རིལ་བུ་དང་ཆམ་རིམས་མཆེད་པའི་དུས་ཀྱི་ནད་དུག་གཉིས་ཧ་ལམ་གཅིག་མཚུངས་ཡིན་ན། འགོག་སྨན་གྱི་སྔོན་འགོག་གི་ནུས་པའང་ཆེས་བཟང་བ་ཡིན།།
གོང་གི་ཤེས་བྱ་འདི《མཚོ་སྔོན་ཞིང་ཆེན་བདེ་ཐང་སློབ་གསོ་ཁང》གིས་འདོན་སྤྲོད་བྱས་པ་ཡིན།
ཡིག་སྒྱུར་བ། འབྲུག་མོ།
