གནམ་གཤིས་ཚ་བ་ཆེ་བ་དང་རྔུལ་ཆུ་ཡང་ཡང་བཞུར་བས། མི་མང་པོ་ཞིག་ལ་ཆུ་གྲང་མོ་འཐུང་བ་དང་ཆུ་མགྱོགས་པོར་འཐུང་བའི་གོམས་གཤིས་ཡོད། དུས་ནམ་ཡིན་རུང་ཆུ་འཐུང་བ་ནི་ཤིན་ཏུ་གལ་ཆེ་མོད། འོན་ཀྱང་མགྱོགས་པོར་འཐུང་མི་རུང་། ཐེངས་རེར་ཧའོ་ཧྲེང100ནས150བར་འཐུང་ཚེ་འཚམ་པོ་ཡིན་ལ། ཆུ་དྲོད་འཇམ་འཐུང་ན་གྲང་མོ་འཐུང་པ་ལས་སྐོམ་པ་སེལ་སླ་བ་དང་ལུས་པོར་ཡང་ཕན་པ་ཆེ་བ་ཡིན།
མཇིང་ཚིགས་མི་འཁྱག་པ་བྱེད་དགོས།
དབྱར་དུས་ཚ་བ་ཆེ་བའི་དུས་སུ་མི་ཁ་ཤས་ལ་དྲོད་སྙོམས་འཕྲུལ་ཆས་ཀྱི་འགྲམ་དུ་འདུག་པའི་གོམས་གཤིས་ཡོད། གལ་སྲིད་དྲོད་སྙོམས་འཕྲུལ་ཆས་དང་བར་ཐག་ཉེ་དྲགས་ཚེ། མཇིང་པའི་རྩ་འཁུམ་པ་དང་སྒལ་བ་སོགས་ན་སྟེ། མཇིང་ཚིགས་ཀྱི་ནད་ཕོག་ཉེན་ཆེན་པོ་ཡོད། དེར་བརྟེན། དྲོད་སྙོམས་འཕྲུལ་ཆས་དང་བར་ཐག་ཉེ་སར་འདུག་མི་རུང་ལ། དྲོད་ཚད་ཧྲེ་ཧྲི་ཏུའུ26ལས་དམའ་མི་རུང་། རབ་ཡིན་ན་སྟོད་ཐུང་གྱོན་ནས་འདུག་དགོས།
ཁྱིམ་ལ་གཙང་སྦྲ་བྱེད་དགོས།
དྲོད་གཤེར་ལྡན་པའི་སྐབས་ནི་འབུ་ཕྲ་དང་ནད་དུག་མང་ཤོས་ཐོན་པའི་དུས་ཤིག་ཡིན། མི་མང་ཆེ་བས་དེ་དག་ཕྱི་ནས་བྱུང་བ་རེད་སྙམ་མོད། དོན་དངོས་སུ་ཁྱིམ་དུའང་ཐབ་ངོས་ཀྱི་ཐལ་རྡུལ་དང་མེ་ཏོག་གི་རྡུལ་སོགས་ཀྱིས་ཀྱང་མིར་གནོད་འཚེ་བཟོ་བའི་ཉེན་ཁ་ཆེན་པོ་ཡོད། དེར་བརྟེན། དབྱར་དུས་སུ་ཁྱིམ་ལ་ཉུང་མཐར་ཡང་ཉིན་གཉིས་ནང་གཙང་སྦྲ་ཐེངས་རེ་བྱེད་དགོས།
མིག་ལ་ཉི་ཟེར་ཕོག་པར་དོགས་ཟོན་བྱེད་དགོས།
དབྱར་དུས་ཉི་མའི་འོག་ཏུ་འདུག་ཡུན་རིང་བའམ་ལས་ཀ་བྱས་ཚེ་རྒས་སླ་བ་དང་མིག་ནད་སོགས་ཀྱང་ཕོག་སླ་བ་རེད། དེར་བརྟེན། གལ་སྲིད་སྔ་དྲོའི་དུས་ཚོད10ནས་ཕྱི་དྲོའི་དུས་ཚོད4ཡི་གཡས་གཡོན་ལ་ཕྱི་ནས་བསྡད་ཚེ། ཞྭ་མོ་གྱོན་པ་དང་། ཉི་གདུགས་དང་མདོག་ལྡན་མིག་ཤེལ་སོགས་བརྒྱབ་ན་མིག་ལ་སྲུང་སྐྱོབ་ཡག་པོ་བྱེད་ཐུབ། དབྱར་དུས་འབུ་ཕྲ་དང་ནད་དུག་མང་པོ་ཡོད་པས། ལག་པའི་གཙང་སྦྲར་དེ་བས་དོ་སྣང་བྱེད་དགོས་པར་མ་ཟད། ལག་པས་གང་བྱུང་དུ་མིག་ལ་འཕུར་འཕུར་གཏོང་མི་རུང་།
ཕོ་བ་མི་འཁྱག་པ་བྱེད་དགོས།
དབྱར་དུས་ནི་རྒྱུ་མའི་གཉན་ཚད་འབྱུང་སླ་བའི་དུས་ཤིག་ཡིན་ལ། འབུ་ཕྲ་དང་ནད་དུག་སོགས་ཀྱི་དབང་གིས་ཕོ་བ་དང་རྒྱུ་མའི་ནད་ཕོག་སླ་བའི་དུས་སྐབས་ཤིག་ཀྱང་རེད། མི་རྣམས་ཀྱིས་འཁྱག་ཟས་དང་ལྷག་པར་དུ་སིལ་ཏོག་སོགས་མ་བཀྲུས་པར་ཟོས་ན། ཕོ་རྒྱུའི་གཉན་ཚད་ཕོག་པའི་ཉེན་ཁ་ཤིན་ཏུ་ཆེན་པོ་ཡོད། དེར་བརྟེན། ནམ་རྒྱུན་འཁྱག་ཟས་ཀྱི་རིགས་ཉུང་ཙམ་བཟའ་དགོས་པར་མ་ཟད། ཞོགས་པར་ལངས་མ་ཐག་དང་དགོང་མོ་ཉལ་ཁར་བཏུང་བྱ་གྲང་མོའི་རིགས་ཉུང་ཙམ་འཐུང་དགོས།
རྩོམ་སྒྲིག་པ། ལྷ་མོ་ཚེ་རིང་།
