འཚོ་བའི་གནོན་ཤུགས་ཇེ་ཆུང་དུ་གཏོང་ཆེད། གཞོན་སྐྱེས་མང་པོས་ཞོགས་པར་ཁོ་ཧྥེ་འཐུང་ནས་རྣམ་རིག་གྲུང་པོ་ཡོང་ཐབས་བྱེད་ལ། དགོང་ཁར་ཆང་འཐུང་ནས་གཉིད་སྐྱིད་པོ་འགུག་ཐབས་བྱེད། ཡིན་ནའང་། འཐུང་མ་ཤེས་ན་ཁོ་ཧྥེ་དང་ཆང་བཅུད་ལྡན་པའི་བཏུང་བྱ་ཡིས་མཁལ་མ་ལ་གནོད་ཀྱང་སྲིད།
ཞིབ་འཇུག་ལས་ཤེས་རྟོགས་བྱུང་བ་ལྟར་ན། ཁོ་ཧྥེ་ལ་མཁལ་མར་སྲུང་སྐྱོབ་བྱེད་པ་དང་མཁལ་འགྲམས་ལ་ཕན་པ། མཁལ་སྐྲན་འགོག་པ་བཅས་ཀྱི་བྱེད་ནུས་ལྡན། རེད་དེ། དེ་ནི་ཁོ་ཧྥེ་འཕྲོད་པའི་མི་དང་འཐུང་ཚད་ཤེས་པའི་མི་ལ་བལྟས་ནས་བཤད་པ་རེད། གལ་ཏེ་ཁོ་ཧྥེ་འཐུང་ཚད་མང་དྲགས་ན་མཁལ་རྡོ་འབྱུང་ཚད་ཇེ་མཐོར་འགྲོ་བ་ཡིན། སྙིང་ལ་ངར་ཤུགས་བསྐྱེད་པ་དང་ཁྲག་ཤེད་ཇེ་མཐོར་སོང་ནའང་སྙིང་དང་མཁལ་མའི་ཁུར་ཚེགས་ཇེ་ལྕིར་འགྲོ་བ་ཡིན། དེ་བས། རབ་ཡིན་ན་ཁོ་ཧྥེ་བསྟེན་པ་རྣམས་ཀྱིས་ཉིན་རེར་ཕོར་བ་དོ་ལས་མ་འཐུང་ན་བཟང་ལ། མཁལ་ནད་ཅན་རྣམས་ཀྱིས་ཁོ་ཧྥེ་འཐུང་ཚད་ལྷག་པར་ཚོད་བཟུང་ན་ལེགས། ཁོ་ཧྥེའི་བྲོ་བ་བསྐྱེད་བྱེད་ཀྱི་རྫས་ལ་སྐྱེ་མེད་ལིན་མང་པོ་འདུ་བས། མཁལ་མའི་ཁྲག་ལིན་མཐོ་བའི་ནད་པས་ཁོ་ཧྥེ་མ་བསྟེན་ལ་བཟང་། མཁལ་ནད་ཅན་ལ་ཁྲག་ཅཱ་མཐོན་པོ་བྱུང་ཚེ་ནད་པས་ཁོ་ཧྥེ་ལ་ལྷག་པར་མཉམ་འཇོག་དགོས།
ཆང་འཐུང་ན་མཁལ་མར་གནོད་པ་ཀུན་ལ་གསལ་ཡང་། ཆང་འཐུང་ནས་མཁལ་འགྲམས་བྱུང་བའི་སྣང་ཚུལ་དེར་ཀུན་གྱིས་དོ་སྣང་མི་བྱེད། མིའི་ལུས་ཕུང་གི་ཆང་བཅུད10％ཙམ་ནི་མཁལ་མ་དང་གློ་བས་འདོར་བ་ཡིན་ལ། ཆང་བཅུད་ཀྱིས་སྤྲི་དཀར་རྫས་ཀྱི་དྭངས་སྙིགས་ཕྱེ་བའི་ཐོན་དངོས་ཇེ་མང་དུ་གཏོང་བས། མཁལ་མའི་ཁུར་ཚེགས་ཇེ་ལྕིར་གཏོང་བ་ཡིན། དེ་མིན་ཆང་བཅུད་ཀྱི་དྭངས་སྙིགས་འབྱེད་པ་ལ་ཆུ་དགོས་ཤིང་། ཆང་འཐུང་རྗེས་ལུས་པོར་ཆུ་ཡིས་མ་འདང་ན། ཁྲག་རྒྱུན་གྱི་འཁོར་རྒྱུག་ལ་ཚོར་བ་སྐྱེན་པའི་མཁལ་མ་ལ་འཁོར་རྒྱུག་གིས་མི་འདང་བའི་སྣང་ཚུལ་འབྱུང་།
དེ་བས། མ་གཞི་ནས་མཁལ་མའི་ནད་ཡོད་པ་དང་། སྒོས་སུ་ཁྲག་ཤེད་མཐོ་བའི་ནད་དང་གཅིན་སྙི་ཟ་ཁུའི་ནད། གཅིན་སྐྱུར་མཐོ་བའི་ཁྲག་ནད་སོགས་ཀྱི་བླ་གཉན་ཡང་ཡོད་ན། ཆང་འཐུང་མ་འཐུང་ན་བཟང་།
རྩོམ་སྒྲིག་པ། ལྷ་མོ་ཚེ་རིང་།
