གཅིག མཆིན་ཚད་ཁ་པ།

མཆིན་པའི་འགོས་ནད་མཆིན་ཚད་ཁ་པ་ལས་སྤྱི་ཚོགས་འཚོ་བ་རུ་མིའི་རིགས་ཀྱི་བདེ་ཐང་དང་ཚེ་སྲོག་ལ་ཚད་མི་འདྲ་བའི་གནོད་པ་རབ་དང་རིམ་པ་ཐེབས་དང་ཐེབས་ཀྱིན་ཡོད། མཆིན་ཚད་ཁ་པ་ཕོག་པའི་རྒྱུ་ནི་མཆིན་ཚད་ཁ་པའི་ནད་དུག(HBV)ཡིན་པ་རེད། མཆིན་ཚད་ཁ་པའི་ནད་དུག་ལ་གསོན་ཤུགས་ནུས་པ་ཧ་ཅང་ཆེ་སྟེ། མིའི་ལུས་དང་བྲལ་ཡང་ཕྱི་རོལ་ཁོར་ཡུག་ཏུ་དུས་ངེས་ཅན་ཞིག་ལ་གནས་ཐུབ། དྲོད་ཚད་གོར་ཐིག་མན་གྱི་ཏུའུ20རུ་ལོ་བཅུ་ལྷག་ལ་གནས་ཐུབ། དྲོད་ཚད་ཏུའུ20-32རུ་ཆེས་ཉུང་མཐའ་ཡང་ཟླ་དྲུག་ལ་གནས་ཐུབ། དྲོད་ཚད་ཏུའུ37ཙམ་དུ་ཉིན་བདུན་ལ་གནས་ཐུབ། དྲོད་ཚད་ཏུའུ56འོག་ཏུ་ཆུ་ཚོད་དྲུག་ལ་གནས་ཐུབ། མཆིན་ཚད་ཁ་པའི་ནད་པ་དང་། ནད་རྟགས་མེད་པའི་མཆིན་ཚད་ཁ་པའི་ནད་དུག་ཅན་གཉིས་ནི་མཆིན་ཚད་ཁ་པའི་ནད་འགོས་མཆེད་ཀྱི་ཁུངས་ཡིན། རང་རྒྱལ་གྱིས་ལོ་རེར་གསར་བྱུང་གི་མཆིན་ཚད་ཁ་པའི་ནད་པ་ཁྲི་ལྔ་བཅུའི་སྙན་ཞུ་འབུལ་གྱིན་ཡོད་པ་དང་། དེས་རྒྱལ་ཡོངས་ཀྱི་འགོས་རིམས་ཀ་པ་དང་ཁ་པའི་ནད་བྱུང་ཚད་སྤྱིའི་བཞི་ཆའི་གཅིག་ཟིན་པ་རེད།

གཉིས། མཆིན་ཚད་ཁ་པའི་འགོ་ལམ།

1.མ་བུ་བརྒྱུད་དེ་འགོ་བ།

མཆིན་ཚད་ཁ་པ་ལ་མ་བུའི་འགོས་ཁྱབ་དང་ཕ་བུའི་འགོས་ཁྱབ་བཅས་རྣམ་པ་གཉིས་ཡོད། སྦྲུམ་མའི་ལུས་ཀྱི་མཆིན་ཚད་ཁ་པའི་ནད་དུག་དེ་མངལ་ཆགས་ནས་བྱིས་པ་སྐྱེ་བ་དང་མའི་ནུ་ཞོ་བསྟེན་པ་བརྒྱུད་དེ་བྱིས་པ་དམར་

འབྱར་ལ་འགོས་པར་མ་བུའི་འགོས་ཁྱབ་ཟེར། བྱིས་པ་དམར་འབྱར་མང་ཆེ་ཤོས་ལ་མའི་མངལ་ལས་བཙའ་དུས་མཆིན་ཚད་ཁ་པའི་ནད་དུག་འགོས་པ་ཡིན་ཏེ། དེ་ཡང་དེའི་དུས་སུ་མའི་མངལ་ཁྲག་གམ་འགོ་ཆུ་དང་། གསང་ལམ་ཟགས་ཐོན་རྫས་སོགས་ཁོང་དུ་སོང་སྟེ་འགོས་པ་ཡིན་ཞིང་། དེ་ལ་བཙའ་བའི་དུས་ཀྱི་འགོས་ཁྱབ་ཟེར། གལ་ཏེ་མ་ཡིས་ནུ་ཞོ་སྣུན་པ་ལས་འགོས་པ་ཡིན་ན། དེ་ལ་བཙས་རྗེས་འགོས་ཁྱབ་ཟེར།

2.ཟུངས་ཁྲག་བརྒྱུད་དེ་འགོ་བ།

ནད་པ་ཟུངས་ཟད་སོགས་ལ་མཆིན་ཚད་ཁ་པའི་ནད་དུག་ཅན་གྱི་ཁྲག་ཧའོ་ཧྲེང0.00004བརྒྱབ་པ་ཙམ་གྱིས་ཀྱང་མཆིན་ཚད་ཁ་པའི་ནད་དུག་འགོ་བ་རེད། དེ་བཞིན་དུ་སྨན་ཁབ་དང་ཁབ་མགོ། དངུལ་ཁབ་བམ་སྐམ་ཁབ། སྐྲ་གྲི། ཁ་སྤུ་བཞར་ཆས་སོགས་ལ་མཆིན་ཚད་ཁ་པའི་ནད་པའི་ནད་ཁྲག་འགོས་པ་ལ་ཚད་ལྡན་གྱི་དུག་སེལ་མ་བྱས་པར། ནད་མེད་ཀྱི་མིས་སྤྱད་ནའང་མཆིན་ཚད་ཁ་པའི་ན་ཚ་འགོ་བར་བྱེད། ད་དུང་དེང་གི་སྐབས་སུ་ལུས་ལ་རི་མོ་བརྐོ་བ་དང་རྣ་ཕུག་པ། སོ་ལ་ཁུང་བུ་བརྟོལ་བ། རྫི་མ་གཤགས་འབྲི། མིག་ལ་ཆ་ག་བཟོ་སོགས་ཀྱི་ངོ་གདོང་མཛེས་བཟོ་བྱེད་བཞིན་ཡོད།   གལ་ཏེ་མཛེས་བཟོའི་ཡོ་བྱད་ལ་དུག་སེལ་བཟང་བོ་མ་བྱས་ནའང་།  ངོ་གདོང་མཛེས་བཟོའི་གོ་རིམ་བརྒྱུད་དེ་མཆིན་ཚད་ཁ་པ་འགོ་བའི་ཉེན་ཁ་ཡོད་པ་ཡིན།

3.ཕོ་མོའི་ལུས་འབྲེལ་བརྒྱུད་དེ་འགོ་བ།

མཆིན་ཚད་ཁ་པ་ནི་ཕོ་མོའི་ལུས་འབྲེལ་བརྒྱུད་དེ་འགོ་བ་ཡིན་ཞིང་། དེ་ཡང་མཆིན་ཚད་ཁ་པ་ཅན་གྱི་ནད་པའི་ཟླ་མཚན་དང་། ཟུངས་ཁྲག གསང་ལམ་ཟགས་ཐོན་རྫས་སོགས་སུ་མཆིན་ཚད་ཁ་པའི་ནད་དུག་མཆིས་ཤིང་། དེ་དག་ལས་ཕོ་མོ་ཕན་ཚུན་ལ་འགོ་བར་བྱེད་པ་ཡིན།

གསུམ། སྔོན་འགོག་བྱེད་ཐབས།

1.ཐོག་མར་སྐྱེས་ཕོ་མོ་སུ་ཡིན་ཡང་ཞོགས་པ་ལྟོ་སྟོང་ལ་སྨན་ཁང་དུ་སོང་སྟེ་ཁྲག་ལ་ཞིབ་བཤེར་བྱེད་པ་བརྒྱུད་དེ་མཆིན་ཚད་ཁ་པའི་ནད་ཡོད་མེད་ལ་བརྟག་དགོས་པ་དང་། གལ་ཏེ་མཆིན་ཚད་ཁ་པ་ལྡན་ན་འབྲེལ་ཡོད་ཀྱི་སྨན་བསྟེན་རྒྱུ་དང་། ནད་མེད་ཡིན་ན་མཆིན་ཚད་ཁ་པ་སྔོན་འགོག་བྱེད་པའི་འགོག་སྨན་དུས་ལྟར་རྒྱག་དགོས། སྔོན་འགོག་སྨན་དུས་བཅད་ལྟར་ཐེངས་གསུམ་ལ་རྒྱག་དགོས་ཀྱང་། ད་ལྟ་ཐེངས་གཅིག་བརྒྱབ་ན་ཆོག་པ་ཞིག་ཀྱང་འདུག་པས། དེ་ནི་ཧ་ཅང་སྟབས་བདེ།

2.སྐྱེས་མ་ཐག་པའི་བྱིས་པ་ལ་ཡང་འགོར་འགྱངས་མེད་པར་སྨན་པའི་མངག་བྱ་ཇི་བཞིན་མཆིན་ཚད་ཁ་པའི་འགོག་སྨན་རྒྱག་དགོས།

3.གཉེན་སྒྲིག་ཟིན་པའི་ཁྱོ་ཤུག་གཉིས་ཀྱི་གང་རུང་ཞིག་ལ་མཆིན་ཚད་ཁ་པ་མཆིས་ཚེ། ནད་མེད་པ་དེས་མཆིན་ཚད་ཁ་པའི་འགོག་སྨན་རྒྱག་པ་སོགས་ཀྱི་ཐབས་ལ་བརྟེན་ཏེ་མཆིན་ཚད་ཁ་པར་དོགས་ཟོན་བྱེད་དགོས་པ་དང་། ནད་དུག་ཡོད་མཁན་དེས་འབྲེལ་ཡོད་ཀྱི་སྨན་བསྟེན་དགོས།

4.གལ་ཏེ་སྦྲུམ་མ་ལ་མཆིན་ཚད་ཁ་པ་མཆིས་ཀྱང་། བྱིས་པ་དམར་འབྱར་བཙས་མ་ཐག་གི་ཁྲག་བཤེར་ལས་མཆིན་ཚད་ཁ་པའི་ནད་དུག་མི་ལྡན་ན། མའི་ནུ་ཞོ་མི་སྣུན་པར་བྱིས་པ་ཁ་གསོ་བྱ་རྒྱུ་ནི་ཤིན་ཏུ་གལ་ཆེ། དེ་ལྟར་བྱས་ཚེ་བྱིས་པ་དམར་འབྱར་ལ་མའི་ནུ་ཞོ་བརྒྱུད་དེ་བཙས་རྗེས་ཀྱི་མཆིན་ཚད་ཁ་པ་འགོ་མི་ཐུབ་པ་ཡིན།

མཆིན་ཚད་ཁ་པས་མིའི་རིགས་ཀྱི་བདེ་ཐང་ལ་གནོད་པ་ཚབས་ཆེན་སྐྱེལ་བཞིན་ཡོད་དེ།  ལོ་ན་ཆུང་ཆུང་གི་སློབ་མ་སློབ་གྲྭར་ཞུགས་པ་དང་། ན་གཞོན་ལས་ཞུགས་བྱེད་པ་སོགས་ཀྱི་ཐད་ལ་ཤུགས་རྐྱེན་ཐེབས་བཞིན་ཡོད་ལ།    ཐ་ན་ཚེ་སྲོག་བདེ་ཐང་ལའང་གནོད་པ་ཐེབས་བཞིན་ཡོད་པས།   དུས་རྒྱུན་གྱི་འཚོ་བའི་ཁྲོད་དུ།  ང་ཚོས་མཆིན་ཚད་ཁ་པའི་སྔོན་འགོག་ལ་མཐོང་ཆེན་བྱ་རྒྱུ་ནི་ཧ་ཅང་གལ་ཆེ།

རྩོམ་སྒྲིག་པ།  ལྷ་མོ་ཚེ་རིང་།