རྒྱང་སྒྲིབ་མིག་ནད་འབྱུང་བ་ལ་རྒྱུད་རྒྱུ་དང་འཚོ་བའི་གོམས་གཤིས། ཁོར་ཡུག་སོགས་ཀྱི་རྒྱུ་རྐྱེན་སྣ་ཚོགས་ཡོད་པ་དང་། རྒྱུ་རྐྱེན་དེ་དག་རེ་རེ་ཡིས་མིག་གི་མཐོང་ནུས་ལ་ངན་ཤུགས་ཐེབས་སྲིད། དེ་ལས་ཀྱང་ང་ཚོས་རྒྱུན་དུ་དོ་སྣང་མི་བྱེད་པ་ཞིག་ནི་ཁོར་ཡུག་གི་རྒྱུ་རྐྱེན་ཡིན། གལ་ཏེ་ཁོར་ཡུག་ལ་བཀོད་སྒྲིག་ལེགས་པོ་བྱེད་ཐུབ་ན། བྱིས་པའི་མཐོང་ནུས་ལ་སྲུང་སྐྱོབ་བཟང་བོ་བྱེད་ཐུབ།
གཅིག ཉི་མར་མང་ཙམ་ལྡེ་ན་ལེགས་ཤིང་། ལྷག་པར་དུ་ཉིན་མོའི་རང་བྱུང་འོད་དེ་རྒྱང་སྒྲིབ་མིག་ནད་སྔོན་འགོག་བྱེད་པར་ཕན་ཐོགས་ཆེན་པོ་ཡོད་པས། སྡོང་བོའི་གྲིབ་བསིལ་འོག་བསྡད་ནའང་ཕན་ནུས་ཆེན་པོ་ཐོན་ངེས། དེ་བས་བྱིས་པ་ཕྱི་རོལ་དུ་མང་ཙམ་ཁྲིད་ན་བཟང་བ་ཡིན།
གཉིས། སློབ་གྲྭའི་ནང་དུ། བྱིས་པ་རྣམས་སློབ་ཁང་དུ་སྡོད་པའི་དུས་ཡུན་ཆེས་རིང་བ་ཡིན། དེ་བས་སློབ་ཁང་གི་འོད་འཕྲོ་ཧ་ཅང་གལ་ཆེ། རབ་ཡིན་ན་སློབ་ཁང་ནི་ལྷོ་ནས་བྱང་དུ་འཁོར་ཡོད་ཚེ་བཟང་ཞིང་། དེ་ལྟར་བྱས་ཚེ་གཞོགས་གཉིས་ཀར་རང་བྱུང་འོད་འདང་ངེས་ཡོད། དེའི་སྟེང་ལ་འོས་འཚམ་གྱི་སྒེའུ་ཡོལ་དང་ལུགས་མཐུན་གྱི་གློག་འོད་སོགས་བཀོད་སྒྲིག་བྱས་ན། བྱིས་པའི་མཐོང་ནུས་ལ་སྲུང་སྐྱོབ་བཟང་བོ་བྱེད་ཐུབ།
རང་ཁྱིམ་དུ་སློབ་སྦྱོང་བྱེད་སྐབས་ཀྱང་འོད་འཕྲོའི་གནད་དོན་སྣང་མེད་དུ་འཇོག་མི་རུང་། རབ་ཡིན་ན་དཔེ་ཅོག་ཉི་འོད་ཐད་ཀར་མི་འཕྲོ་བའི་གནས་ཤིག་ལ་འཇོག་དགོས། ས་རུབ་ལ་ཉེ་སྐབས། འོས་ཤིང་འཚམ་པའི་གློག་འོད་ཅིག་ཁ་གསབ་བྱས་ན་བཟང་།
གཉིད་བཟང་བོ་ཞིག་ལོག་པ་དེ་མཐོང་ནུས་བདེ་ཐང་ལ་སྲུང་སྐྱོབ་བྱེད་པར་ཕན་ཐོགས་ཆེན་པོ་ཡོད ། མཚན་མོར་ནུས་ཚོད་ཀྱིས་གློག་རྡུལ་ཐོན་རྫས་ལ་ཉུང་ཙམ་ལྟ་བ་སོགས་བྱས་ཏེ་མིག་གིས་ཡོངས་སུ་བག་ལྷོད་ནས་གཉིད་སྐྱིད་པོ་རོལ་ཐུབ་པ་བྱ་དགོས། དེ་ལྟར་བྱས་ཚེ་གཉིད་ཀྱི་སྤུས་ཚད་མཐོར་འདེགས་གཏོང་ཐུབ་པར་མ་ཟད། རྒྱང་སྒྲིབ་མིག་ནད་འབྱུང་བའི་ཉེན་ཁ་ཡང་ཇེ་དམའ་རུ་གཏོང་ཐུབ།
བྱིས་པའི་མིག་ལ་སྲུང་སྐྱོབ་བྱེད་པ་ནི་མེ་ཏོག་ཅིག་གསོ་བ་བཞིན་སེམས་ཞིབ་མོས་བདག་སྐྱོང་བྱ་དགོས་ཤིང་། ཕྱི་རོལ་ནས་ཁང་ཁྱིམ་དང་སློབ་སྦྱོང་ནས་ངལ་གསོ་སོགས་བར་གྱི་རིམ་པ་རེ་རེ་ཧ་ཅང་གལ་ཆེན་ཡིན། དེ་བས། བྱིས་པའི་མིག་ལ་ཕན་པའི་ཁོར་ཡུག་ལེགས་པོ་ཞིག་བསྐྲུན་ནས། ཁོ་ཚོའི་མིག་ཟུང་ནམ་ཡང་དྭངས་གསལ་ཡོང་བར་བྱ་དགོས།
རྩོམ་སྒྲིག་པ། ལྷ་མོ་ཚེ་རིང་།
