ཚན་རིག་དང་མཐུན་པའི་བཟང་བཏུང་ནི་མཆིན་པ་ཚིལ་འགྱུར་གྱི་གནས་ཚུལ་ལེགས་སྒྱུར་བྱེད་པའི་གནད་འགག་ཡིན། མཆིན་པ་ཚིལ་འགྱུར་ནད་པས་ངེས་པར་དུ་ཞག་ཚིལ་ཉུང་བ་དང་ཀ་ར་ཉུང་བ་སོགས་ཀྱི་བཟའ་བཏུང་རྩ་དོན་བརྩི་སྲུང་བྱེད་དགོས་ཤིང་། བྱེ་བྲག་གི་བྱེད་ཐབས་ནི་གཤམ་གསལ་ལྟར།
གཅིག ནུས་ཚད་བསྡུ་ལེན་བྱེད་པར་ཚོད་འཛིན་པ། འོས་འཚམ་སྒོས་ནུས་ཚད་བསྡུ་ལེན་བྱེད་པར་ཚོད་འཛིན་བྱེད་དགོས་ཤིང་། ལྷག་པར་དུ་གཟུགས་པོའི་ལྗིད་ཚད་ཚད་ལས་བརྒལ་བའམ་ཡང་ན་མི་ཚོན་པོ་རྣམས་ཀྱིས་ནུས་ཚད་བསྡུ་ལེན་ལ་ཚོད་འཛིན་པའི་ཞོར་དུ། འཚོ་བཅུད་དོ་མཉམ་ཡོང་བར་འབད་དགོས།
གཉིས། སྤྲི་དཀར་འདང་ངེས་བསྡུ་ལེན་བྱེད་པ། སྤྲི་དཀར་འདང་ངེས་ཀྱིས་མཆིན་པའི་བྱེད་ནུས་ལ་སྲུང་སྐྱོབ་དང་མཆིན་པའི་ཕྲ་ཕུང་བསྐྱར་གསོ་དང་སླར་སྐྱེ་ལ་སྐུལ་འདེད་གཏོང་ཐུབ། མཆིན་པ་ཚིལ་འགྱུར་ནད་པས་སྣུམ་བླངས་ཟིན་པའི་འོ་མ་དང་སྒོ་ངའི་སྤྲི་དཀར། ཉ་ཤའི་རིགས། ཤ་སྐྱི་བཤུས་པའི་བྱ་ཤ་དང་བྱ་གག་གི་ཤ སྲན་བཟོས་བཟའ་བཅའ་སོགས་ཟོས་པ་བརྒྱུད་སྤྲི་དཀར་བསྡུ་ལེན་བྱས་ཆོག
གསུམ། ཞག་ཚིལ་བསྡུ་ལེན་བྱེད་ཚད་ལ་ཚོད་འཛིན་བྱེད་པ། སྲོག་ཆགས་ཀྱི་ཞག་ཚིལ་མི་བསྟེན་པ་དང་ཉིན་རེར་རྩི་ཤིང་གི་སྣུམ་ཁེ25ནས30བསྡུ་ལེན་བྱེད་པ། སྲོག་ཆགས་ཀྱི་ནང་ཁྲོལ་སོགས་མཁྲིས་རྒྱུ་གཤེར་རྩི་མཐོ་བའི་བཟའ་བཅའ་བསྟེན་པར་ཚོད་འཛིན་བྱེད་དགོས།
བཞི། ཐཱན་ཆུ་འདྲེས་འགྱུར་རྫས་ཉུང་བཟའ་བྱེད་པ། ཐཱན་ཆུ་འདྲེས་འགྱུར་རྫས་བཟའ་རྒྱུ་མང་དྲག་ན། གཤེར་མའི་ཕུང་རྩི་ཟགས་ཐོན་ལ་ཤུགས་རྐྱེན་ཐེབས་སྲིད་པས། མཆིན་པ་ཚིལ་འགྱུར་གསོ་བཅོས་བྱེད་པ་ལ་གནོད། དེ་བས་ཉིན་རྒྱུན་གྱི་བཟའ་བཅར་སྡེབ་སྒྲིག་ལེགས་པོ་བྱས་ཏེ། འབྲུ་རིགས་ཀྱི་ཟིན་ཚད་ཇེ་ཉུང་དུ་གཏོང་དགོས།
ལྔ། སིལ་ཏོག་དང་སྔོ་ཚལ་གསར་བ་མང་ཙམ་བཟའ་བ། ཉིན་རེའི་སྔོ་ཚལ་གྱི་སྤྱིའི་བཟའ་ཚད་ཁེ400ནས500བར་བྱེད་པ་དང་། དེའི་ཁྲོད་དུ་ལོ་ལྗང་སྔོ་ཚལ་གྱིས་ཉུང་མཐར་ཡང50%ཟིན་དགོས། ཀ་རའི་འདུས་ཚད་ཉུང་བའི་སིལ་ཏོག་ཉིན་རེའི་ཁེ200ནས300བཟའ་དགོས།
དྲུག ལུགས་མཐུན་ངང་གཡོ་སྐོལ་བྱེད་པ། ཚྭ་མང་བའི་བྲོ་རྫས་དང་སྲོག་ཆགས་ཀྱི་ཞག་ཚིལ་སོགས་ལ་འཛེམ་དགོས་པ་དང་། ཉིན་རེར་ཚྭ་བཟའ་ཚད་ཁེ5བྱས་ན་འོས་འཚམ་ཡིན། གཡོ་སྐོལ་བྱེད་སྐབས་རླངས་བཙོས་དང་ཆུ་བཙོས་སོགས་བྱེད་པ་ལས། སྣུམ་བཙོས་དང་སྣུམ་སྲེག་སོགས་བྱེད་མི་རུང་།
བདུན། བཟའ་རུང་ཚི་སྣ་ཇེ་མང་དུ་གཏོང་བ། བཟའ་རུང་ཚི་སྣ་ནི་ཁྲག་ཞག་དང་ཁྲག་ཧྭགས་ཇེ་དམར་གཏོང་བ་ལ་ཕན་པར་མ་ཟད། མཆིན་པར་ཚིལ་གསོག་ཚད་ཇེ་ཉུང་དུ་གཏོང་བར་ཡང་ཕན། དེ་བས་ཉིན་རེར་བཟའ་རུང་ཚི་སྣ་མང་ཙམ་བཟའ་འོས་ཏེ། དཔེར་ན་སྔོ་ཚལ་དང་སིལ་ཏོག འབྲུ་སྣ་ ལྟ་བུ།
བརྒྱད། ཞག་ཚིལ་ཉུང་ཞིང་སྤྲི་དཀར་མང་བའི་བཟའ་བཅའ་བསྟེན་པ། ཞག་ཚིལ་ཉུང་ཞིང་སྤྲི་དཀར་མང་བའི་བཟའ་བཅའ་ནི་གཟུགས་པོའི་ལྗིད་ཚད་ཚོད་འཛིན་བྱེད་པར་ཕན་ཞིང་མཆིན་པ་ཚིལ་འགྱུར་ཇེ་དལ་དུ་གཏོང་ཐུབ་པས། ཤ་སྣག་དང་ཉ་ཤ སྲན་མའི་རིགས་སོགས་ཞག་ཚིལ་ཉུང་ཞིང་སྤྲི་དཀར་མང་བའི་བཟའ་བཅའ་བསྟེན་འོས།
དགུ། ཀ་རའི་བཟའ་ཚད་ལ་ཚོད་འཛིན་པ། ཀ་རའི་བཟའ་ཚད་ཚད་ལས་བརྒལ་ན་མཆིན་པའི་ཁུར་བོ་ཇེ་ལྕིར་གཏོང་བས། ཀ་ར་ཉུང་བཟའ་བྱེད་དགོས་ཤིང་། ཀ་རའི་འདུས་ཚད་མཐོ་བའི་སྐོམ་ཆུ་ཉུང་བསྟེན་བྱེད་དགོས།
བཅུ། འཚོ་བཅུད་རྫས་དང་གཏེར་རྒྱུ་ཁ་གསབ་བྱེད་པ། འཚོ་བཅུད་རྫས་དང་གཏེར་རྒྱུ་ནི་མཆིན་པའི་བྱེད་ནུས་སླར་གསོ་བྱེད་པར་ཧ་ཅང་གལ་ཆེ་ཞིང་། ལྷག་པར་དུ་འཚོ་བཅུད་རྫསEདང་འཚོ་བཅུད་རྫསCསོགས་དབྱང་འགོག་རྫས་ཀྱིས་མཆིན་པའི་དབྱང་འགྱུར་གནོད་སྐྱོན་ཇེ་ཆུང་དུ་བཏང་སྟེ། མཆིན་པའི་ཕྲ་ཕུང་སླར་སྐྱེ་ལ་སྐུལ་འདེད་གཏོང་ཐུབ།
དེ་མིན། དུས་རྒྱུན་གྱི་འཚོ་བའི་ཁྲོད་ང་ཚོས་མཆིན་པར་གནོད་པའི་གོམས་གཤིས་འདི་དག་ལའང་མཉམ་འཇོག་བྱེད་དགོས།
གཅིག དུ་བ་འཐེན་པ་དང་ཆང་འཐུང་བ། དུ་བའི་ནང་གི་ཉི་ཀུའུ་ཏིང་དང་དུ་སྨུག་ནང་གི་གནོད་ལྡན་དངོས་པོ་མང་པོས་མཆིན་པ་སོགས་ཀྱི་དོན་སྣོད་ལ་གནོད་པ་བཟོས་ཏེ་ནད་རིགས་སྣ་ཚོགས་སློང་བར་མ་ཟད། འབྲས་སྐྲན་བསྐྱེད་པའི་ཉེན་ཁའི་རྒྱུ་རྐྱེན་གཙོ་བོ་ཞིག་ཀྱང་ཡིན། ཆང་གི་བརྗེ་ཚབ་ཐོན་དངོས་ཕྲུན་ཁ་པས་མཆིན་པར་ཧ་ཅང་གནོད་ཅིང་། ཆང་གིས་མཆིན་པ་ཚིལ་འགྱུར་དང་ཆང་བཅུད་མཆིན་ནད་འབྱུང་བའི་ཉེན་ཁ་ཇེ་ཆེར་གཏོང་སྲིད།
གཉིས། སྨན་གང་བྱུང་དུ་འཐུང་བ། སྨན་མང་ཆེ་བ་མཆིན་པ་བརྒྱུད་དེ་བརྗེ་ཚབ་བྱེད་པས། ཐེངས་རེར་སྨན་འཐུང་ཚད་ཚད་ལས་བརྒལ་བའམ་ཡང་ན་ཡུན་རིང་ལ་སྨན་འཐུང་ན་མཆིན་པར་རྒྱུན་མཐུད་ངང་ཕོག་ཐུག་བཏང་སྟེ་ཚ་ནད་ཤི་འདྲུལ་འབྱུང་སྲིད།
གསུམ། གཉིད་མི་འདང་བ། ངལ་གསོའི་དུས་ཚོད་ལ་ངལ་གསོ་མ་བྱས་ཚེ། མཆིན་པའི་ཁྲག་རྒྱུན་ལྟོས་བཅས་ཀྱིས་མི་འདང་བ་དང་མཆིན་པའི་ཕྲ་ཕུང་གི་རྒྱུན་ལྡན་གྱི་བརྗེ་ཚབ་ལ་ཤུགས་རྐྱེན་ཐེབས་སྲིད་ལ། གནོད་སྐྱོན་ཐེབས་ཟིན་པའི་མཆིན་པའི་ཕྲ་ཕུང་སླར་གསོ་བྱེད་དཀའ་ཞིང་ནད་བབ་ཇེ་སྡུག་ཏུ་གཏོང་སྲིད།
བཞི། སྣུམ་ཅན་གྱི་ཟས་ལ་དགའ་བ། མཆིན་པ་ནི་ཞག་ཚིལ་འདྲེན་གཏོང་གི་གནས་གཙོ་བོ་ཡིན་པ་དང་། འཇུ་ལེན་བྱས་རྗེས་ཀྱི་ཞག་ཚིལ་ཁག་ཅིག་མཆིན་པར་ཐོན་རྗེས། ལུས་ཀྱི་ཚིལ་དུ་བསྒྱུར་ནས་གསོག་ཉར་བྱེད་པ་དང་། ལྟོགས་པའི་སྐབས་སུ་གསོག་ཉར་བྱས་པའི་ཚིལ་དེ་སྔོན་ལ་མཆིན་པར་བསྐྱལ་ནས་དབྱེ་འབྱེད་བྱེད་པ་ཡིན། དེ་བས། སྣུམ་ཅན་གྱི་ཟས་རིགས་མང་པོ་ཟོས་ན་ཚིལ་གྱི་རྙིང་ཚབ་གསར་བརྗེ་འཁྲུག་པ་དང་། མཆིན་པར་ཚིལ་བསགས་ནས་མཆིན་པ་ཚིལ་འགྱུར་གྱི་ནད་འབྱུང་སྲིད།
རྩོམ་སྒྲིག་པ། ལྷ་མོ་ཚེ་རིང་།
