གཅིག ཚགས་སྒོ་དུང་འཁྱིལ་ནར་སྲིན་ལ་སྨན་བཅོས་བྱེད་པ།
ཚགས་སྒོ་དུང་འཁྱིལ་ནར་སྲིན་ནི་ཕོ་བའི་འབྲས་སྐྲན་སློང་བའི་རྒྱུ་རྐྱེན་གཙོ་བོ་ཞིག་ཡིན། ཞིབ་འཇུག་ལས་ཤེས་པ་ལྟར་ན། ཚགས་སྒོ་དུང་འཁྱིལ་ནར་སྲིན་རྩ་མེད་བཏང་ན་ནུས་ལྡན་ངང་ཕོ་བའི་འབྲས་སྐྲན་འབྱུང་བ་སྔོན་འགོག་བྱས་ཏེ། ཕོ་བའི་འབྲས་སྐྲན་འབྱུང་ཚད39%ཡིས་ཇེ་དམའ་རུ་གཏོང་ཐུབ། དེ་བས་ལོ་རེར་ལུས་ཕུང་ལ་བརྟག་དཔྱད་བྱེད་སྐབས་ཚགས་སྒོ་དུང་འཁྱིལ་ནར་སྲིན་བཤེར་འཇལ་བྱས་ཏེ། གལ་ཏེ་མཇུག་འབྲས་གདགས་གཤིས་ཡིན་ན། སྨན་པའི་ངག་བཞིན་སྨན་འཐུང་དགོས།
གཉིས། བདེ་ཐང་གི་འཚོ་བའི་གོམས་གཤིས་ཆགས་སུ་འཇུག་པ།
ཡུན་རིང་ལ་ཟས་སྤྱོད་མི་ལེགས་པ་བསྟེན་ན་ཕོ་བའི་འབྲས་སྐྲན་འབྱུང་བའི་ཉེན་ཁ་ཇེ་ཆེར་གཏོང་ངེས་པས། རྒྱུན་དུ་ཟ་མ་སྣ་མང་ཟོས་ཏེ་འཚོ་བཅུད་དོ་མཉམ་ཡོང་བར་བྱེད་པ་དང་བྱ་ཤ་དང་ཉ་ཤ་སོགས་ཤ་གསར་པ་མང་ཙམ་ཟ་བ། འོས་འཚམ་སྒོས་ལུས་སྦྱོང་བྱས་ནས་བདེ་ཐང་གི་ལུས་པོའི་ལྗིད་ཚད་རྒྱུན་འཁྱོངས་བྱེད་པ། སྔོ་ཚལ་དང་སིལ་ཏོག་གསར་བ་མང་ཙམ་ཟ་བ། དེ་མིན། བཟའ་བཅའ་བསྙལ་མ་དང་བསྲེགས་མའི་རིགས་ཉུང་ཟ་བྱེད་པ། དུ་བ་དང་ཆང་གཅོད་པ་སོགས་བྱས་ནས་བདེ་ཐང་གི་འཚོ་བའི་གོམས་གཤིས་རྒྱུན་འཁྱོངས་བྱེད་དགོས།
གསུམ། དུས་ལྟར་ལུས་ཕུང་བརྟག་དཔྱད་བྱེད་པ་དང་གནད་དོན་ཡོད་ན་དུས་ཐོག་ཏུ་སྨན་བཅོས་བྱེད་པ།
ཕོ་བའི་འབྲས་སྐྲན་ནི་སྤྱིར་བཏང་དུ་དལ་གཤིས་ཕོ་བའི་གཉན་ཚད་ནས་རྒྱུ་མའི་སྟེང་པགས་སྐྱེ་འགྱུར་དང་། དེ་ནས་སྐྲན་འགྱུར་སོགས་ཀྱི་གོ་རིམ་བརྒྱུད་དེ་བྱུང་བ་ཡིན་པས། རབ་ཡིན་ན་དུས་བཅད་ལྟར་ལུས་ཕུང་བརྟག་དཔྱད་བྱེད་པའི་གོམས་གཤིས་ཆགས་དགོས། གལ་ཏེ་ཕོ་བའི་ཤ་ལུ་དང་ཕོ་བའི་རལ་ཟགས། དལ་གཤིས་རྙིད་འཁུམས་ཕོ་ཚད་སོགས་ཀྱི་ནད་ཡོད་པའི་ཁར། ཕོ་བ་ན་བ་སོགས་ཀྱི་ནད་རྟགས་ཡོད་ན། ངེས་པར་དུ་སྨན་བཅོས་ཚད་ལྡན་བྱ་དགོས་པར་མ་ཟད་དུས་བཅད་ལྟར་བརྟག་དཔྱད་བྱེད་དགོས།
རྩོམ་སྒྲིག་པ། ལྷ་མོ་ཚེ་རིང་།
