ཁྲག་ཤེད་མཐོ་ན་སྙིང་ནད་ཁྲག་གཟེར་དང་གཟའ་གྲིབ་སོགས་ཀྱི་ནད་རིགས་མང་པོ་འབྱུང་སྲིད་པས། དེར་མི་རྣམས་ཀྱིས“ཁུ་སིམ་གྱི་གཤེད་མ”ཞེས་འབོད་ཀྱིན་ཡོད། ཁྲག་ཤེད་མཐོ་བར་འཚོ་བའི་རྒྱུ་རྐྱེན་མང་པོའི་ཤུགས་རྐྱེན་ཐེབས་བཞིན་ཡོད། དེ་ཡང་ཁྱིམ་རྒྱུད་ཀྱི་རྒྱུ་རྐྱེན་ལས་གཞན།  ལུས་ཤ་རྒྱགས་པ་དང་། ཡུན་རིང་བོར་ཆང་འཐུང་བ་དང་ཐ་མག་འཐེན་པ། སེམས་ཚེགས་ཆེ་བ།  གཉིད་མི་ཁུག་པ། འགུལ་སྐྱོད་མི་འདང་བ། ཚྭ་མང་བཟའ་བཏུང་བསྟེན་པ་སོགས་ནི་ད་ལྟའི་ལོ་གཞོན་ཚོར་ཁྲག་ཤེད་མཐོ་བའི་ནད་འབྱུང་བའི་རྒྱུ་རྐྱེན་གཙོ་བོ་རེད།

གཅིག གོམས་གཤིས་འདི་དག་ཁྲག་ཤེད་མཐོ་བའི་རྒྱུ་ཡིན།

1.ཙོག་ཡུན་རིང་ན་ཁྲག་ཤེད་མཐོ་རུ་འགྲོ་སྲིད། ཙོག་ཡུན་རིང་ན་ཁྲག་རྩའི་ནང་པགས་ཀྱི་བྱེད་ལས་རྒྱུན་ལྡན་མིན་པར་གྱུར་ཏེ་ཁྲག་རྩ་འཁུམ་པ་དང་ཁྲག་ཤེད་ཇེ་མཐོར་འགྲོ་བཞིན་ཡོད་ལ། ཁྲག་འཁོར་རྒྱུག་བྱེད་མི་ཐུབ་པ་དང་། ཁྲག་ལ་དྭངས་སྙིགས་འབྱེད་མི་ཐུབ་པར་ཁྲག་ཤེད་མཐོ་རུ་འགྲོ་བཞིན་ཡོད།

2.སྔུར་བ་ཚབས་ཆེ་ན་ལྐོག་འཇབ་རང་བཞིན་གྱི་ཁྲག་ཤེད་མཐོ་བར་གཟབ་དགོས། སྨན་པས་དྲན་སྐུལ་བྱས་པ་ལྟར་ན། མཚན་མོར་གཉིད་ལོག་པའི་སྐབས་སུ་སྔུར་བ་ཚབས་ཆེ་བ་དང་། རྒྱུན་དུ་གཉིད་མི་ཁུག་པ་དང་གནོན་ཤུགས་ཆེ་བ་སོགས་ཀྱི་མི་ཚོགས་ཀྱིས་ཁྲག་ཤེད་ཀྱི་གནས་ཚུལ་ལ་དོ་སྣང་བྱེད་དགོས། གལ་ཏེ་བརྟག་དཔྱད་བྱས་རྗེས། མིག་གཏིང་ལ་གནོད་པ་དང་གཅིན་པར་སྤྲི་དཀར་ཉུང་ཙམ་ཡོད་པ་སོགས་ཤེས་ན། ཁྲག་ཤེད་མཐོ་བའི་ནད་བྱུང་ཡོད་མེད་ལ་བསམ་བློ་གཏོང་དགོས།

གཉིས། ཁྲག་ཤེད་མཐོ་ན་གོམས་གཤིས་འདི་དག་སྤོང་དགོས།

1.ཁྲག་ཤེད་ཇེ་དམའ་རུ་གཏོང་བའི་སྨན་ལ་ཞོར་སྐྱོན་ཡོད་པར་བསམ་ནས་སྨན་མི་འཐུང་བ། ཡུན་རིང་པོར་ཁྲག་ཤེད་གཅོག་པའི་སྨན་བསྟེན་ན་ལུས་པོར་ཞོར་སྐྱོན་ངེས་ཅན་ཞིག་ཡོད་མོད། འོན་ཀྱང་དེའི་རྐྱེན་གྱིས་སྨན་མ་བསྟེན་ན་ཁྲག་ཤེད་གཅོག་མི་ཐུབ་པར་མ་ཟད་གནོད་འཚེ་དེ་བས་ཆེན་པོ་ཡོད།

2.ཁྲག་ཤེད་མཐོ་ཡང་ནད་རྟགས་མེད་པས་སྨན་བཅོས་མི་བྱེད་པ། ཁྲག་ཤེད་མཐོ་བའི་ནད་པ་མང་པོ་ཞིག་ལ་འཚོ་བའི་ཁྲོད་དཔེ་མཚོན་ཅན་དང་མངོན་གསལ་རང་བཞིན་གྱི་ནད་རྟགས་མེད་མོད། འོན་ཀྱང་ཁྲག་ཤེད་མཐོ་ན་དུས་རྒྱུན་ལུས་ཕུང་ལ་གནོད་པས། སྔར་བཞིན་སྨན་པའི་ངག་ལྟར་དུས་ཐོག་ཏུ་ཁྲག་ཤེད་གཅོག་པའི་སྨན་བསྟེན་རྒྱུ་གལ་ཆེ།

3.ཁྲག་ཤེད་རྒྱུན་ལྡན་དུ་གྱུར་རྗེས་སྨན་འཐུང་མཚམས་འཇོག་པ། ཁྲག་ཤེད་སྐབས་རེར་མཐོ་ཞིང་སྐབས་རེར་དམའ་བ་དེས་ལུས་པོར་ཧ་ཅང་གནོད་ཀྱིན་ཡོད་པས། ཁྲག་ཤེད་རྒྱུན་ལྡན་དུ་གྱུར་ནའང་སྨན་འཐུང་མཚམས་འཇོག་མི་རུང་ཞིང་། ངེས་པར་དུ་སྨན་པའི་ངག་བཞིན་ཁྲག་ཤེད་གཅོག་པའི་སྨན་བཅོས་བྱེད་དགོས་པ་དང་། ཡང་བསྐྱར་བརྟག་དཔྱད་བྱེད་པར་མཐོང་ཆེན་བྱེད་དགོས།

གསུམ། ཁྲག་ཤེད་མཐོ་བའི་ནད་ཀྱི་ཟས་སྤྱོད་བླང་བྱ།

1.ཁྲག་ཤེད་མཐོ་བ་འགོག་བཅོས་བྱེད་པའི་ཟས་རིགས།

ཟས་རིགས་ནང་ནཱ་ཚྭ་འདྲེས་ཚད་འོས་འཚམ་ངང་ཉུང་དུ་གཏོང་དགོས་པ་དང་། ཅཱ་ཚྭ་འདྲེས་ཚད་མང་དུ་བཏང་ན་ཁྲག་ཤེད་ནུས་ལྡན་ངང་ཇེ་དམའ་རུ་གཏོང་ཐུབ། མི་དར་མར་མཚོན་ན། ཉིན་རེར་བཟའ་ཚྭ་འཇུ་ཚད་རིམ་བཞིན་ཁེ5མན་ཉུང་དུ་གཏོང་དགོས་ཤིང་། ཞག་ཚིལ་ཆེ་བ་དང་མཁྲིས་རྒྱུ་གཤེར་རྩི་མཐོ་བའི་ཟས་རིགས་ཉུང་ཙམ་ཟ་དགོས་ལ། སྔོ་ཚལ་གསར་པ་དང་། ཤིང་འབྲས་དང་འབྲུ་རིགས་སྣ་འཛོམས་ཀྱི་ཟས་རིགས་མང་ཙམ་ཟ་དགོས། ཞག་ཚིལ་ཉུང་བའམ་ཡང་ན་ཞག་ཚིལ་མེད་པའི་འོ་མའི་ཐོན་རྫས་དང་། བྱ་ཤ། ཉ་ཤ། སྲན་ཆེན། སྲ་ཤུན་ཤིང་ཏོག་བཅས་མང་ཙམ་ཟ་དགོས་པ་དང་། མངར་ཆ་མང་བའི་བཟའ་བཏུང་ལ་འཛེམ་དགོས། ཞིབ་འཇུག་ལས་ཤེས་རྟོགས་བྱུང་བ་ལྟར་ན། དུས་རྒྱུན་དུ་ཀུ་ཤུ་དང་ངང་ལག་ཟོས་ན་ཁྲག་ཤེད་མཐོ་བའི་དབང་གིས་ཤི་བའི་ཉེན་ཁ40%ཇེ་དམའ་རུ་འགྲོ་ཐུབ། གཞན་ ད་དུང་ནམ་རྒྱུན་འཚོ་བའི་ནང་ཇ་དམར་སོགས་ཇའི་རིགས་འཐུང་ནའང་ཁྲག་ཤེད་མཐོ་བའི་ཉེན་ཁ6%ནས26%ཇེ་ཆུང་དུ་འགྲོ་ཐུབ།

2.ཁྲག་ཤེད་མཐོ་བ་འགོག་བཅོས་བྱེད་པའི་ལུས་སྦྱོང་།

རང་ངོས་ཀྱི་ལུས་པོའི་ཆ་རྐྱེན་དང་མཐུན་ན། གཟའ་འཁོར་རེར་ཉིན4ནས7བར་ཉིན་རེར་སྐར་མ30ནས60བར་གྱི་ལུས་སྦྱོང་ཚད་དང་རན་པོ་བྱེད་དགོས། དཔེར་ན། མྱུར་བགྲོད་དང་དལ་བགྲོད། ཆུར་རྐྱལ་བ་སོགས་དབྱང་ལྡན་ལུས་སྦྱོང་གཙོ་བོ་བྱེད་དགོས།

3.ཐའེ་ཅི་དྲག་རྩལ་སོགས་ཀྱིས་ཀྱང་སེམས་ཀྱི་གནོན་ཤུགས་ཇེ་ཆུང་དུ་བཏང་ནས་ཁྲག་ཤེད་ལ་དགེ་མཚན་ལྡན་པའི་ནུས་པ་ཐོན་གྱིན་ཡོད།

དེ་མིན། དུས་བཅད་ལྟར་ལུས་པོར་བརྟག་དཔྱད་བྱ་དགོས། དེ་ནི་ཁྲག་ཤེད་མཐོ་བ་སྔོན་འགོག་བྱེད་པའི་གནད་འགག་གལ་ཆེན་ཞིག་ཡིན།

རྩོམ་སྒྲིག་པ།  ལྷ་མོ་ཚེ་རིང་།