བྱིས་པས་མིག་ཡང་ཡང་རྡེབ་པ་ལ་གནོད་པ་གང་དག་ཡོད་དམ།
གཅིག མིག་ཡང་ཡང་རྡེབ་པ་ཡིས་མིག་ལ་མི་བདེ་བ་བཟོ་སྲིད། མིག་ཡང་ཡང་རྡེབ་པ་ཡིས་མིག་ཐང་ཆད་པ་དང་སྐམ་པ་ཚབས་ཆེར་གཏོང་བར་མ་ཟད། མིག་སྐམ་པའི་ནད་དང་མིག་ལྕིབས་གཤེར་རྨེན་སོགས་གཉན་ཚད་བསྐྱེད་དེ། བྱིས་པའི་མིག་གི་བདེ་ཐང་ལ་ཤུགས་རྐྱེན་ངན་པ་ཐེབས་སྲིད།
གཉིས། མིག་ཡང་ཡང་རྡེབ་པ་ཡིས་བྱིས་པའི་སློབ་སྦྱོང་ལ་ཤུགས་རྐྱེན་ཐེབས་སྲིད། རྒྱུན་ཆད་མེད་པར་མིག་བརྡབས་ན་བྱིས་པའི་སེམས་གཡེང་ནས། བློ་རིག་སྒྲིམ་པའི་ནུས་པ་ཇེ་ཞན་དུ་འགྲོ་ངེས་ལ། དེས་ཁོ་ཚོས་སློབ་སྦྱོང་གི་གོ་རིམ་ཁྲོད་བློ་རྩེ་གཅིག་སྒྲིམ་བྱེད་མི་ཐུབ་པར་གྱུར་ནས། སྦྱང་འབྲས་སོགས་ལ་གནོད་སྲིད།
གསུམ། མིག་ཡང་ཡང་རྡེབ་པ་ཡིས་སེམས་ཁམས་བདེ་ཐང་ལ་ཤུགས་རྐྱེན་ཐེབས་སྲིད། མིག་ཡང་ཡང་རྡེབ་པ་ལ་རྐྱེན་བྱས་ཏེ་མི་གཞན་གྱི་དོ་སྣང་དང་འཕྱ་སྨོད་མྱོང་བའི་བྱིས་པར་རང་དམན་གྱི་བསམ་པ་སྐྱེས་ནས། དུས་རྒྱུན་སེམས་ཁྲལ་བྱེད་པ་དང་། ཐ་ན་སྤྱི་ཚོགས་འབྲེལ་འདྲིས་ཀྱི་འགལ་རྐྱེན་དང་ཁོར་ཡུག་ལ་འདྲེས་མི་ཐུབ་པ་སོགས་ཀྱི་གནད་དོན་འབྱུང་ངེས།
དེས་ན། མིག་ཡང་ཡང་རྡེབ་པའི་གནད་དོན་ལ་ཁ་གཏད་ཇི་ལྟར་འཇལ་དགོས་སམ།
གཅིག མིག་གི་འཕྲོད་བསྟེན་རྒྱུན་འཁྱོངས་བྱེད་དགོས། དུས་བཅད་ལྟར་མིག་ལ་གཙང་སྦྲ་བྱེད་པ་དང་། ལག་པས་མིག་ལ་མི་རེག་པར། མིག་རེད་པའི་ཉེན་ཁ་ཇེ་ཆུང་དུ་གཏོང་དགོས། བྱིས་པར་མི་གཞན་ལ་ལག་ཕྱིས་དང་ཀ་ཏོ་ར་སོགས་འཕྲོད་བསྟེན་ཡོ་བྱད་མཉམ་སྤྱོད་བྱེད་མི་རུང་བའི་སློབ་གསོ་བཏང་ནས། ཕྲ་སྲིན་འགོ་བ་སྔོན་འགོག་བྱ་དགོས།
གཉིས། འོས་འཚམ་སྒོས་མིག་ལ་ངལ་གསོ་བྱེད་དུ་བཅུག་ན། བྱིས་པའི་མིག་གི་ངལ་དུབ་སེལ་ཐུབ་པ་དང་། མིག་སྐམ་པ་སོགས་མི་བདེ་བ་སྔོན་འགོག་བྱེད་ཐུབ།
གསུམ། འཚོ་བཅུད་ཁ་གསབ་བྱེད་པ། བྱིས་པར་འཚོ་རྒྱུAདང་འཚོ་རྒྱུC འཚོ་རྒྱུE སོགས་ཕུན་སུམ་ཚོགས་པའི་བཟའ་བཅའ་ཟ་རུ་འཇུག་དགོས་ཏེ། དཔེར་ན་ལ་ཕུག་དང་ཚོད་སྣག འབྲུ་སེའུ་སྔོན་པོ་སོགས་ལྟ་བུའོ། ། བཟའ་བཅའ་འདི་དག་གིས་མིག་གི་བདེ་ཐང་ལ་སྲུང་སྐྱོབ་བྱས་ཏེ། མཐོང་ནུས་མར་ཆག་པ་སྔོན་འགོག་བྱེད་ཐུབ།
བཞི། ཆེད་ལས་ཀྱི་བརྟག་དཔྱད་དང་གསོ་བཅོས་བྱེད་པ། བྱིས་པར་མིག་ཡང་ཡང་རྡེབ་པའི་སྣང་ཚུལ་ཡོད་ཚེ། ལམ་སང་ཆེད་ལས་ཀྱི་བརྟག་དཔྱད་དང་གསོ་བཅོས་བྱ་དགོས་ཤིང་། སྨན་པས་བྱིས་པའི་གནས་ཚུལ་བྱེ་བྲག་པར་གཞིགས་ཏེ་དེར་མཐུན་གྱི་གསོ་བཅོས་བྱེད་ཐབས་གཏན་འཁེལ་བྱ་ངེས་ཡིན།
ལྔ། སེམས་ཁམས་ཁྲིད་སྟོན་བྱེད་པ། སེམས་ཁམས་ཀྱི་དབང་གིས་མིག་རྡེབ་པའི་བྱིས་པར་ཁྱིམ་བདག་གིས་རྒྱུས་ལོན་འདང་ངེས་བྱེད་པ་དང་། དུས་མཚུངས་སུ་དེའི་སེམས་ཁམས་ཀྱི་དགོས་མཁོ་དང་འགྱུར་ལྡོག་ལ་དོ་ཁུར་བྱ་དགོས། ཁོ་ཚོར་སྣེ་ཁྲིད་ལེགས་པོ་བྱས་ཏེ། ཧུར་བརྩོན་ཡར་སྐྱེད་ཀྱི་སྣང་བརྙན་དང་རང་རྟོན་གྱི་བསམ་པ་སྐྲུན་རོགས་བྱ་དགོས། དགོས་ངེས་བྱུང་ན་ཆེད་ལས་ཀྱི་སེམས་ཁམས་བློ་འདྲིའི་རོགས་རམ་ལ་བརྟེན་དགོས།
དྲུག སློབ་གསོ་དང་སྣེ་ཁྲིད་བྱེད་པ། གཞན་ལ་ལད་མོ་བྱེད་པ་དང་གོམས་གཤིས་རང་བཞིན་གྱིས་མིག་རྡེབ་པའི་བྱིས་པར་ཁྱིམ་བདག་གིས་ངང་རྒྱུད་རིང་བོས་ཁྲིད་སྟོན་བྱས་ཏེ། ཁོ་ཚོར་ཡང་དག་པའི་མིག་སྤྱོད་གོམས་གཤིས་ཆགས་སུ་འཇུག་དགོས་པ་དང་། དུས་མཚུངས་སུ་བྱིས་པར་མིག་ལ་སྐྱོན་ཡོད་པའི་སློབ་གྲོགས་དང་གྲོགས་པོ་གཞན་ལ་འཕྱ་སྨོད་བྱ་མི་རུང་བའི་སློབ་གསོ་གཏོང་དགོས།
རྩོམ་སྒྲིག་པ། ལྷ་མོ་ཚེ་རིང་།
