ཉེ་ལམ། 2017ལོའི་མཚོ་སྔོན་པོའི་ལྗོངས་ཁུལ་ཡུལ་སྐོར་མཉམ་འབྲེལ་ཆིངས་ཡིག་གི་གྲོས་མཐུན་འཇོག་པའི་ཚོགས་འདུ་ཟི་ལིང་གྲོང་ཁྱེར་དང་ལན་ཀྲིག་གྲོང་ཁྱེར་།དབྱིན་ཁྲིན་བཅས་ས་ཁུལ་གསུམ་ནས་བསྡུས་པ་དང་།མཚོ་སྔོན་པོའི་ལྗོངས་ཁུལ་གྱིས་ས་ཁུལ་གསུམ་གྱི་ཡུལ་སྐོར་ལས་དོན་ཁང313ལ2017ལོའི་ཡུལ་སྐོར་མཉམ་འབྲེལ་ཆིངས་ཡིག་གི་གྲོས་མཐུན་བཀོད་པ་རེད།

རྒྱུས་ལོན་པ་ལྟར་ན། ད་ལོའི་གྲོས་མཐུན་གྱི་ཆིངས་ཡིག་ལ་གཞིགས་ན། མཚོ་སྔོན་པོའི་ལྗོངས་ཁུལ་གཙོ་བོ་རང་རྒྱལ་གྱི་བྱང་ཕྱོགས་ས་ཁུལ་ལ་རྒྱ་བསྐྱེད་ཡོད་པ་དང་། ལོ་སྔོན་མ་དང་སྡུར་ན་གྲོས་མཐུན་བཀོད་པའི་ཡུལ་སྐོར་ལས་དོན་ཁང43གྱིས་ཇེ་མང་དུ་སོང་ཡོད།

རང་རྒྱལ་ནུབ་བྱང་དུ་ཡོད་པའི་མཚོ་སྔོན་ཞིང་ཆེན་གྱི་རི་སྒང་དང་རྩྭ་ཐང་ཆེན་པོའི་དཀྱིལ་དབུས་སུ་ཕྲ་བཏབ་པ་ལྟ་བུའི་ཡངས་ཤིང་རྒྱ་ཆེ་བའི་རིན་པོ་ཆེའི་མེ་ལོང་ཞིག་ཡོད་དེ་ནི། ཀྲུང་གོའི་ཆེས་ཆེ་བའི་སྐམ་སའི་དབུས་ཁུལ་གྱི་མཚེའུ་འམ། ཡང་ན་ཀྲུང་གོའི་ཆེས་ཆེ་བའི་ཚྭ་ལྡན་མཚེའུ་སྟེ་མཚོ་སྔོན་པོ་རེད། གནའ་དུས་སུ་རྒྱ་རིགས་ཀྱིས་མཚོ་སྔོན་པོ་ལ་ནུབ་མཚོ་དང་སོག་སྐད་དུ་ཁུའུ་ཁུའུ་ནོ་ཨེར་ཞེས་འབོད། མཚོ་འདིའི་རྒྱ་ཁྱོན་ལ་སྟོང་སྨི་གྲུ་བཞི་མ4583དང་། ཆ་སྙོམས་ཀྱི་གཏིང་ཚད་ལ་སྨི་བཅུ་དགུ་ལྷག་ཡོད། མཚོའི་མཐའ་སྐོར་གྱི་རིང་ཚད་ལ་སྟོང་སྨི་སུམ་བརྒྱ་དྲུག་ཅུ་ཡས་མས་ཡོད། རྒྱང་རིང་ནས་བལྟས་ན་ཤར་ནུབ་རིང་ཞིང་ལྷོ་བྱང་དོག་པའི་མཚོ་སྔོན་པོའི་ཆགས་དབྱིབས་ནི་སྡོང་ལོ་ཆེན་པོ་ཞིག་དང་ཀུན་ནས་མཚུངས། མཚོ་འདིའི་ཤར་ཕྱོགས་སུ་ཨ་མ་ཟོར་དགུ་དང་། ལྷོ་ཕྱོགས་སུ་བློན་པོ་གསེར་ཆེན་དང་ནུབ་ཕྱོགས་སུ་བྲག་དཀར་ཐེམ་ཆེན། བྱང་ཕྱོགས་སུ་རྐང་ཚའི་རྫ་དམར་བཅས་རྫ་རི་མཐོན་པོ་དག་གིས་མཐའ་ནས་བསྐོར་ཞིང་། མཚོའི་འགྲམ་རྒྱུད་ནི་མུ་མཐའ་མི་མངོན་པའི་རྩྭ་ཐང་ཆེན་པོ་ཡིན་པས་མཛེས་ཤིང་ཡིད་དུ་འོང་བའི་རི་ཆུའི་མཛེས་ལྗོངས་ལྷུན་གྱིས་གྲུབ་ཡོད།

མཚོ་སྔོན་པོའམ་མཚོ་ཆེན་ཁྲི་ཤོར་རྒྱལ་མོ་ནི་བོད་སྟོད་སྨད་བར་གསུམ་ལས་སྨད་ཨ་མདོ་ཙོང་ཁའི་ཡུལ་ཁམས་ཀྱི་སའི་ཆར་བཻཌཱུརྱའི་ཞུན་མའི་མདངས་ལྡན་འཆི་མེད་ལྷ་ཡི་ལམ་བཟང་ས་རུ་འཕོས་བ་བཞིན་ལྟ་བས་མཐའ་མི་དཔོག་པར་མེར་གྱིས་འཁྱིལ་ཡོད། མཚོ་སྔོན་པོ་ཞེས་ཐོགས་དོན་ནི་མཚོ་འདི་ཆགས་སའི་ཁོར་ཡུག་ལས་ཕལ་ཆེར་སྤང་རི་སྤང་ལྗོངས་ཀྱིས་བསྐོར་བས་ཆར་ཆུ་སོགས་ཅི་ལྟར་རྒོད་ཀྱང་རྙོག་པའི་དྲི་མས་མི་ཟིན་པར་ཟབ་ལ་དྭངས་པ་དང་སྔོ་ཡུག་སེ་ཡོད་པའི་ཆ་ནས་མཚོ་སྔོན་པོ་ཞེས་བཏགས་པ་དང་། མིང་གི་ཐོགས་སྟངས་ལ། དང་ཐོག་ཡུལ་འདི་མཐའ་ཡས་པའི་སྤང་ལྗོངས་ཡིན་ཞིང་ད་ལྟའི་མཚོ་སྙིང་གི་ཁ་འོག་ཏུ་ཡུལ་དེའི་ཚོ་བ་ཞིག་གི་འཐུང་ཆུ་ལེན་སའི་དོང་ཆུའམ་ཆུ་མིག་གཅིག་ཡོད། དེར་སུས་ཆུ་བླངས་རྗེས་ངེས་པར་དུ་དོང་ཁ་རྡོ་ལེབ་ཅིག་གིས་འགེབ་དགོས་ཤིང་མ་བཀབ་ན་ཆུ་འཕྱུར་ནས་ཡུལ་ཁམས་འཇིག་འགྲོ་བའི་ཉེན་ཁ་ཡོད་པར་བཤད། ཉིན་གཅིག་ཆུ་ལེན་གཅིག་གིས་ཆུ་བླངས་རྗེས་དོང་ཁ་འགེབ་རྒྱུ་བརྗེད་སྟབས་ཆུ་དེ་དྲག་ཏུ་འཕྱུར་ནས་ཐང་ཆེན་པོ་དེར་གཞིས་ཆགས་པའི་འབྲོག་ཁྱིམ་ཤིན་ཏུ་མང་བོའི་རྒྱུུ་ནོར་དང་ཚེ་སྲོག་ཤོར་བས་ཁྲི་ཤོར་རྒྱལ་མོ་ཞེས་ཐོགས་པར་གྲགས།

དེང་རབས་ས་ཁམས་ཚན་རིག་པ་དག་གིས་མཚོ་སྔོན་པོ་འདི་མི་ལོ་འབུམ་ཕྲག་མང་བོའི་གོང་རོལ་ནས་སྐམ་སའི་གཡོ་འགུལ་སོགས་ཀྱི་གོ་རིམ་ཁྲོད་དུ་ས་འོག་གི་ཆུ་གྱེན་དུ་བརྡོལ་ཅིང་། ཕྱོགས་ཀྱི་ཆུ་སྣ་མང་བོ་གཅིག་ཏུ་བབ་པ་ལས་བྱུང་བར་དཔྱད་ལ་སྐབས་དེའི་ཁྲི་ཤོར་རྒྱལ་མོ་ནི་ད་ལྟ་ང་ཚོའི་མཐོང་ལམ་གྱི་ཁྲི་ཤོར་རྒྱལ་མོ་འདིའི་གསུམ་ཆ་གཅིག་གིས་ཡངས་ལ་ཟབ་པར་བཤད། ཚན་རིག་པ་དང་ས་ཁམས་ཞིབ་འཇུག་ཆེད་ལས་སོགས་ཀྱིས་ཞིབ་འཇུག་ཡང་ཡང་བྱས་རུང་དོན་དངོས་སུ་མཚོ་འདིའི་ཆགས་ལུགས་དང་གནས་སྟངས་སོགས་གང་ཅིའི་ཐད་ནས་རང་རེའི་ལོ་རྒྱུས་དེབ་ཐེར་སྔོན་མ་དག་ལས་བཤད་པའི་བོད་ཡུལ་གྱི་ས་གཤིས་ཆགས་རིམ་གྱི་བྱུང་བརྗོད་དང་ཡུན་རིང་འཕོ་འགྱུར་གྱི་དགོངས་དོན་དག་ལས་མ་འདས་སོ། །

མཚོ་སྔོན་པོའི་མཐའི་རིང་ཚད་ལ་སྤྱི་ལེ360ཡོད་པ་དང་ཤར་ནས་ནུབ་བར་དུ་སྤྱི་ལེ106། ལྷོ་ནས་བྱང་གི་བར་དུ་སྤྱི་ལེ63ཡོད། ཆེས་ཟབ་སར་སྨི 32.8དང་ཆ་སྙོམས་ཀྱི་ཟབ་ཚད་ལ་སྨི18ལྷག་ཟིན། ཆུ་སྣ་བརྒྱ་དང་སུམ་ཅུ་ཡས་མས་ཤིག་མཚོ་འདིར་འབབ་པར་བཤད་ལ། སྔོན་ཆད་མཚོ་ཆུ་བྲི་བའི་གནས་བབ་ལ་འགྱུར་བ་ཐེབས་ནས་ཉེ་ལམ་གྱི་ལོ་ཤས་རིང་ལ་མཚོ་རིམ་གྱིས་རྒྱས་བཞིན་ཡོད་པར་བཤད། ཁྲི་ཤོར་རྒྱལ་མོའི་ཕྱོགས་བཞིར་རི་མཐོ་པོ་བཞི་ཤར་ན་གཉན་ཆེན་ཞལ་དཀར། ལྷོ་ན་བློན་པོ་གསེར་ཆེན། ནུབ་ན་རྐང་ཚའི་རྫ་དམར། བྱང་ན་མོ་བློན་མཐོན་པོ་དང་མཚོ་ལ་གླིང་ཕྲན་ཆེ་ཆུང་བཞི། མཚོ་མགོའི་གླིང་ཕྲན་དང་མཚོ་མཇུག་གི་མཚེར་བ་རི། འདྲེ་མོ་བྲག་དཀར། མཚོ་སྙིང་མ་ཧཱ་དེ་བ། ད་དུང་མཚོའི་བྱང་མཐའི་བྱེ་མ་དགྲ་ལྷའམ་བྱེ་མ་རྔ་རྡུང་གི་ཁོར་ཡུག་ཏུ་མཚོ་ཆུང་ཕྱུག་མོའམ་མཚོ་ཆུང་ནོར་བུ། མཚོ་རྣ་ལོང་། འབྲུག་མོའི་སླ་ང་། དགྲ་ལྷའི་མཚོ་ནག མཚོ་ལྗང་ཁྲ། མཚོ་ཏ་ལེན། མཚོ་མེ་ལོང་སོགས་མཚེའུ་མང་བོས་བསྐོར་ཡོད།

མདོར་ན་ཡུལ་འདིའི་གླིང་ཕྲན་དང་མཚེའུ། རི་མཐོན་པོ་དང་གནས་འགང་ཆེན་སོགས་རེ་རེ་ལའང་ངོ་མཚར་བའི་གཏམ་རྒྱུད་དང་དངོས་བྱུང་གི་ལོ་རྒྱུས། སྐྱེས་ཆེན་གྱི་ལུང་བསྟན་དང་སྨྲ་བསམ་བརྗོད་འདས་ཀྱི་ཐུན་མོང་བའི་མཐོང་སྣང་སོགས་ཡུལ་འདིའི་སྣོད་བཅུད་ཀུན་ལ་མ་ཁྱབ་པ་མེད་པས། དེ་འབྲེལ་གྱི་ལོ་རྒྱུས་དང་གནས་ཡིག་དག་མཚོ་སྙིང་མ་ཧཱ་དེ་ཝའི་གནས་ཡིག་དང་མཚོ་སྔོན་ལོ་རྒྱུས་ཚངས་གླུ་གསར་སྙན། ཁྲི་ཤོར་རྒྱལ་མོ་དང་དེའི་ཉེ་འཁོར་དུ་གདོད་མ་ནས་གནས་བཅོས་པའི་ཉ་རིགས་མང་བོ་དང་རི་དྭགས་སྣ་ཚོགས། གཞན་རྒྱལ་ཁབ་དང་གླིང་གླིང་ཕྲན་དུ་མ་ལས་ལོ་དུས་ལྟར་འཕུར་ཡོང་བའི་བྱ་རིགས་ཧ་ཅང་མང་བོ་འདུ་ཞིང་འཚོག་པ་སོགས་གནས་འདི་ནི་རི་སྐྱེས་ཁྲི་འབུམ་གྱི་གཞིས་ཁྱིམ་དང་འཛད་མེད་ལོངས་སྤྱོད་ཀྱི་བང་མཛོད་ཆེན་པོ་ལྟ་བུ་ཡིན་ཞིང་། འཛམ་གླིང་དང་རྒྱལ་ཁབ་རིམ་པའི་རི་སྐྱེས་སྲོག་ཆགས་རྩ་ཆེན་ཁ་ཤས་སྲུང་སྐྱོབ་ཀྱི་ཁོར་ཡུག་གལ་ཆེན་ཞིག་ཏུ་གྱུར་ཡོད།

བོད་མི་རིགས་ཀྱིས་མཚོ་ཆེན་རི་ཆེན་དང་གནས་ཆེན་ཆུ་ཆེན་སོགས་སྐོར་བའམ་བརྒྱུད་ཚེ་ལུས་ཀྱི་སྡིག་སྒྲིབ་དག་ནས་བསོད་ནམས་ཀྱི་ཚོགས་རྒྱ་ཆེན་པོ་འགྲུབ་པར་ཡིད་ཆེས་ཤིང་། རྒྱལ་དབང་ལྔ་བ་ཆེན་མོ་དང་ཤར་སྐལ་ལྡན་རྒྱ་མཚོ། ཞབས་དཀར་ཚོགས་དྲུག་རང་གྲོལ། པན་ཆེན་སྐུ་ཕྲེང་བཅུ་བ། ལ་མོ་ཡོངས་འཛིན་སོགས་བོད་ཀྱི་སྐྱེས་ཆེན་དུ་མས་དངོས་སུ་གནས་སྒོ་འདིར་ཞབས་ཀྱིས་བཅགས་ཤིང་བྱིན་གྱིས་བརླབས་པར་མ་ཟད། ཐུགས་འདུན་རྒྱ་ཆེན་པོས་མཚོ་མཆོད་བགྱིས་ཤིང་དང་མཚོ་གཏེར་ཕུལ་ཏེ་རིགས་དྲུག་ཕན་བདེའི་སྨོན་ལམ་ཡང་ཡང་བཏབ་མྱོང་སའི་ཡུལ་ཁྱད་པར་བ་དང་། སྔོན་སློབ་དཔོན་པདྨ་འབྱུང་གནས་ཀྱིས་གྲགས་པའི་མཚོ་ཆེན་བཞི་ལ་ཞབས་བཞག་ཅེས་པའི་མཚོ་ཆེན་གཅིག་ཁྲི་ཤོར་རྒྱལ་མོ་འདི་ཡིན་ལ། ད་དུང་སློབ་དཔོན་དངོས་ཀྱིས་བསྟན་འགྲོའི་ཕན་བདེ་ལ་དགོངས་ནས་ཁྲི་ཤོར་རྒྱལ་མོའི་སྣོད་བཅུད་དུ་གཏེར་རིགས་མང་བོ་སྦས་བར་བཞེད་སྟབས་གནས་འདི་ནི་དམ་པའི་ཆོས་ཀྱི་སྒྲོམ་བུ་ཡང་དག་ཅིག་ཏུ་འདོད་པ་དང་། མཚོའི་མཐའ་དབུས་ཀུན་ན་གནས་བརྟན་བཅུ་དྲུག་དང་རྗེ་བཙུན་སྒྲོལ་མ། ནག་པོ་ཆེན་པོ་སོགས་ཡི་དམ་དགྲ་བཅོམ་པའི་ཚོགས་ཀྱི་སྒྲུབ་གནས་མཇལ་དུ་ཡོད་པ་དང་། མཚོའི་དཀྱིལ་འཁོར་ནི་ཨ་ནེ་གུང་སྨན་རྒྱལ་མོ་དང་ཀླུ་རྒྱལ་བྱང་ཆུབ་སེམས་དཔའ་སོགས་འཇིག་རྟེན་དཀར་ཕྱོགས་ལ་མོས་པའི་མཐུ་བོ་ཆེ་དུ་མའི་རྟེན་གཞི་རུ་གྱུར་བ་སོགས་ཀྱི་གཏམ་དག་ནི་ཞབས་དཀར་ཚོགས་དྲུག་རང་གྲོལ་སོགས་སྐྱེས་ཆེན་མང་བོའི་ལུང་ན་གསལ་བ་ཇི་བཞིན་ཡིན་པས་ཆོས་ལུགས་དད་མོས་ཀྱི་རིན་ཐང་ལྡན་པ་དང་། བོད་སྟོད་སྨད་བར་གསུམ་གྱི་ཕོ་མོ་རྒན་གཞོན་ཐམས་ཅད་མཚོ་སྐོར་ལ་འགྲོ་བའི་གོམས་སྲོལ་དེ་གནའ་ནས་ད་བར་ཆགས་ཡོད། དེ་ལས་ཀྱང་རབ་བྱུང་ངམ་ལོ་རྒན་དྲུག་ཅུའི་ནང་ཐེངས་གཅིག་ལས་མི་འབྱུང་བའི་ཆུ་མོ་ལུག་གི་ལོ་ནི་གནས་འདུས་ཆེན་མོ་ཞེས་ལུག་ལོ་གཞན་ལས་མཆོག་ཏུ་འཛིན་པའོ། །

རྩོམ་སྒྲིག་པ། སྒྲོལ་མ་སྐྱིད།