མཚོ་སྔོན་བོད་རིགས་ས་ཁུལ་གྱི་འབྲོག་པ་་མ་རྐང་ནང་ཞུགས་པའི་གནས་ཚུལ་བཀོད་པ།

སྦྲ་དཀར་གྲོང་ཚོར། འབྲོག་ཁྱིམ181མཉམ་ལས་ཁང་གི་མ་རྐང་དུ་ཞུགས་ཡོད་ཅིང་། ལོར་ཁེ་སྤོགས་སྒོར་ས་ཡ་གཅིག་འབུམ་དྲུག་ཁྲི་ལྔ་སྟོང་ལྔ་བགོས་ཡོད། མི་རེར་ལོ་རེར་མཉམ་ལས་ཁང་ནས་སྒོར་ཁྲི་གཅིག་དང་སྟོང་ལྔ་ཙམ་གྱི་ཡོང་འབབ་ཡོད་པ་རེད།

མཚོ་སྔོན་དུ་ཕྱུགས་ལས་ཆེད་ལས་མཉམ་ལས་ཁང་961ཡོད་པ་དང་། མང་ཚོགས་མཉམ་ལས་ཁང་དུ་ཞུགས་ཚད་72.5%ཟིན་ཡོད།

མཉམ་ལས་ཁང་གི་སྣེ་ཁྲིད་འོག་མཚོ་སྔོན་ཞིང་ཆེན་གྱི་ཁྱིམ་ཚང་ཁྲི་དྲུག་དང་སྟོང་ལྔ་ཡི་མི་གྲངས་དབུལ་པོ་འབུམ་གཅིག་དང་ཁྲི་དགུ་སྟོང་དྲུག་དབུལ་ཕོངས་ལས་ཐར་ཡོད།

མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་རྩེ་ཁོག་རྫོང་ནི་བོད་རིགས་གཙོ་བོར་ཡིན་པའི་ཕྱུགས་ལས་རྐྱང་པའི་རྫོང་ཞིག་ཡིན་པ་དང་། རྫོང་དེ་ནི་ཀྲུང་གོའི་ཞིང་ཆེན་བཞིའི་བོད་རིགས་ས་ཁུལ་གྱི་གཅིག་སྡུད་མུ་སྦྲེལ་གྱི་དམིགས་བསལ་དཀའ་ཁག་ཡོད་པའི་ས་ཁུལ་གྲས་སུ་གཏོགས་ལ། རྒྱལ་ཁབ་ཀྱི་དབུལ་སྐྱོར་གསར་སྤེལ་ལས་དོན་གྱི་གཙོ་གནད་རྫོང་དང་མཚོ་སྔོན་ཞིང་ཆེན་གྱི་ཤིན་ཏུ་དབུལ་བའི་རྫོང་དབུལ་པོ་ཡང་ཡིན་པ་རེད།

སྦྲ་དཀར་གྲོང་ཚོའི་ཕྱུགས་རིགས་ཀྱི་རྒྱུད་ཇེ་ཞན་དུ་སོང་བ་དང་། སྒེར་གྱི་ཐོན་སྐྱེད་ནུས་པ་དམའ་བ། གྲུབ་ཆ་ལུགས་དང་མི་མཐུན་པ། རྒྱུད་འཕེལ་གྱི་ཚད་དང་ཚོང་ཟོག་ཏུ་འགྱུར་ཚད་དམའ་བ། ཐོན་སྐྱེད་ཉུང་ལ་ཚོང་རའི་དགོས་མཁོ་ཆེ་བ་ལ་སོགས་པའི་གནད་དོན་ཐག་གཅོད་བྱ་ཆེད། གྲོང་ཚོའི་མཉམ་ལས་ཁང་གཉིས་པའི་དེ་སྔའི་ལས་འཛིན་པ་འུ་རྡོས་མཉམ་ལས་ཁང་ཆུང་ཆུང་ཞིག་བཙུགས་པ་རེད།

དེའི་རྗེས་ཀྱི་ལོ་ཤས་ནང་། སྦྲ་དཀར་གྲོང་ཚོའི་འབྲོག་པ་རྣམས་རྒྱུན་ཆད་མེད་པར་མཉམ་ལས་ཁང་ནང་ཞུགས་པ་དང་། མཉམ་ལས་ཁང་གི་གཞི་ཁྱོན་ཡང་ལོ་རེ་བཞིན་ཆེ་རུ་སོང་ཡོད། འབྲོག་པ་བྱམས་པས་མཉམ་ལས་ཁང་བཙུགས་མ་ཐག་རྩྭ་ས་དང་སྒོ་ཕྱུགས་མཉམ་ལས་ཁང་གི་མ་རྐང་ལ་བཞག་པ་དང་། ཁོ་བཟའ་ཟླ་གཉིས་ལས་གཅིག་གིས་མཉམ་ལས་ཁང་གི་ཕྱུགས་འཚོ་བ་དང་གཅིག་གིས་མཉམ་ལས་ཁང་གི་འོ་མ་བཞོ་མཁན་བྱས་ཡོད། བྱམས་པས་བཤད་རྒྱུར། “ངེད་གཉིས་མཉམ་ལས་ཁང་དུ་ལས་ཀ་བྱས་པར་ལོ་རེར་གླ་ཕོགས་སྒོར་ཁྲི་གཉིས་ཙམ་ཡོད་ལ་དེའི་ཁར་ད་དུང་མཉམ་ལས་ཁང་གི་བགོ་བཤའ་ཡོད། ན་ནིང་བགོ་འགྲེམས་ལ་སྒོར་ཁྲི་ལྔ་ཙམ་ཐོབ་བྱུང” ཟེར།

ངོ་སྤྲོད་བྱས་པར་གཞིགས་ན། “སྦྲ་དཀར”སྐྱེ་ཁམས་ཕྱུགས་ལས་མཉམ་ལས་ཁང་གིས་རྩྭ་ཕྱུགས་དོ་སྙོམས་ཀྱི་གཞི་གྲངས་གཞིར་བཟུང་ནས་མ་རྐང་འཇོག་ཏུ་བཅུག་པ་དང་། ཆ་སྙོམས་རྩྭ་ས་མུའུ་བཅུ་དྲུག་རེར་འབྲི་གཡག་གཅིག་མ་རྐང་ལ་འཇོག་ཏུ་བཅུག་ཡོད། དེ་དང་ཆབས་ཅིག་རྩྭ་ས་ཚོགས་ཆུང་ཉི་ཤུ་ལ་བགོས་པ་དང་།  ཆ་སྙོམས་ཚོགས་ཆུང་རེར་རྩྭ་ས་མུའུ་སྟོང་བཞི་བཞི་བརྒྱ་དང་འབྲི་གཡག་མགོ་གྲངས་ཉིས་བརྒྱ་ཡོད། ཕྱུགས་འཚོ་བའི་གོ་རིམ་དང་ཕྱུགས་འཚོ་བའི་དུས་འཁོར། ཕྱུགས་འཚོ་བའི་དུས་ཚོད་བཅས་ཀྱང་གཏན་འཁེལ་བྱས་པར་མ་ཟད། རྩྭ་ར་རེས་སྐོར་བརྒྱབ་ནས་བེད་སྤྱོད་བྱས་པས་སྐྱེ་ཁམས་ཁོར་ཡུག་ལ་སྲུང་སྐྱོབ་ཐོབ་པ་དང་དབུལ་སྐྱོར་ཐོན་ལས་ཀྱང་འཕེལ་རྒྱས་སུ་ཕྱིན་ཡོད།

སྦྲ་དཀར་གྲོང་ཚོའི་སྐྱེ་ཁམས་ཕྱུགས་ལས་ཆེད་ལས་མཉམ་ལས་ཁང་གི་འཁོར་རྒྱུག་བྱེད་སྟངས་ཚད་ལྡན་དུ་གཏོང་ཆེད། མཉམ་ལས་ཁང་གིས་ཚན་རྩལ་ལ་བརྟེན་ནས་ཕྱུགས་ལས་འཕེལ་རྒྱས་གཏོང་བ་དེ་སྐྱེ་ཁམས་ཕྱུགས་ལས་འཛུགས་སྐྱོང་གི་ཕྱོགས་གང་སར་ཁྱབ་པར་བྱས་ནས། མཉམ་ལས་ཁང་གིས་རང་བྱུང་རྩྭ་སའི་ཕྱུགས་འཚོ་ཚོགས་ཆུང་དང་། རྒྱུད་བཟང་འབྲི་གཡག་རྒྱུད་འཕེལ་ཚོགས་ཆུང་། ས་གནས་དེ་གའི་ལུག་གི་ནུས་ཆེའི་གསོ་ཚགས་ཚོགས་ཆུང་། ཚོང་ལས་གཉེར་སྐྱོང་ཚོགས་ཆུང་བཅས་ཚོགས་ཆུང་བཞི་ལ་ཕྱེ་ནས་དོ་དམ་བྱས། གཅིག་གྱུར་ཐོག་རེས་སྐོར་ཕྱུགས་འཚོ་དང་། གཅིག་གྱུར་ཐོག་རྒྱུད་སྤེལ། གཅིག་གྱུར་ཐོག་གསོ་ཚགས། གཅིག་གྱུར་ཐོག་ལས་སྣོན། གཅིག་གྱུར་ཐོག་ཕྱིར་ཚོང་། ཁྱུ་བགོས་ནས་འཚོ་གསོ་བཅས་ཀྱི“གཅིག་གྱུར་ལྔ་དང་བགོ་བ་གཅིག”གི་གཉེར་སྐྱོང་དོ་དམ་བྱེད་ཐབས་སྤྱད་པས་ལས་བགོས་ཁ་གསལ་བྱེད་པ་དང་། ཐོན་སྐྱེད་ཀྱི་དམིགས་ཚད་བཟོ་བ། མི་སྤྱོད་རྩོལ་བསྟུན་ལ་གཞིགས་ནས་གླ་ཆ་སྤྲོད་པ། ཁེ་བཟང་མ་རྐང་འཇོག་ཚད་ལ་བལྟས་ནས་བགོ་བ་སོགས་གཙོ་བོར་བྱེད་པའི་སྐྱེ་ཁམས་ཕྱུགས་ལས་མཉམ་ལས་ཁང་གི་མིག་དཔེར་གྱུར་ཡོད།

ན་ནིང་བར། སྦྲ་དཀར་གྲོང་ཚོའི་འབྲོག་ཁྱིམ181གིས་མཉམ་ལས་ཁང་ལ་མ་རྐང་བཞག་པས།་ལོ་དེར་ཁེ་སྤོགས་སྒོར་ས་ཡ་ལྔ་འབུམ་དྲུག་ཁྲི་ལྔ་སྟོང་ལྔ་བགོ་འགྲེམ་བྱས་པ་དང་མི་རེར་ལོ་རེར་མཉམ་ལས་ཁང་ནས་ཡོང་འབབ་སྒོར་ཁྲི་གཅིག་སྟོང་ལྔ་ཙམ་ཐོབ་ཡོད།

སྦྲ་དཀར་སྐྱེ་ཁམས་ཕྱུགས་ལས་མཉམ་ལས་ཁང་གི་དཔེ་སྟོན་སྣེ་ཁྲོད་འོག མཚོ་སྔོན་ཞིང་ཆེན་དུ་ཕྱུགས་ལས་ཆེད་ལས་མཉམ་ལས་ཁང་961བཙུགས་པ་དང་། མང་ཚོགས་ཞུགས་ཚད་72.5%ཟིན་པ། འབྲོག་པ་མི་རེའི་ལོ་རེའི་ཆ་སྙོམས་ཡོང་འབབ་འཕར་ཚད་13%ཡན་ཟིན་ཡོད། མཉམ་ལས་ཁང་གི་སྣེ་ཁྲིད་འོག་ཞིང་ཆེན་ཡོངས་ཀྱི་ཁྱིམ་ཚང་ཁྲི་དྲུག་དང་སྟོང་ལྔ་ཡི་མི་གྲངས་དབུལ་པོ་འབུམ་གཅིག་དང་ཁྲི་དགུ་སྟོང་དྲུག་དབུལ་ཕོངས་ལས་ཐར་ཡོད།

རྩོམ་སྒྲིག་པ། སྒྲོལ་མ་སྐྱིད།