“ཉིན་འདི་དག་ལ་རྨ་ཆེན་དུ་རླུང་ཆེན་པོ་གཡུགས་རུང་། སྲང་ལམ་དུ་གད་སྙིགས་གང་སར་འཁུར་བའི་རྣམ་པ་་མེད།”

“སྔོན་ཆད་གང་སར་དྲི་ངན་གྱིས་ཁྱབ་ཡོད་མོད། ད་ལྟ་དེ་འདྲ་མིན།”

2023ལོའི་ཟླ11པའི་ཚེས24ཉིན། མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་ལ་བརྒྱུད་སྤྲོད་བྱས་པའི་མང་ཚོགས་ཀྱི་ཞུ་གཏུག་ཡི་གེ་ཞིག་འབྱོར་བ་སྟེ། “རྟ་བོ་གྲོང་རྡལ་གྱི་བཟོ་འགོད་རུ་ཁག་རྙིང་པའི་ལམ་འགྲམ་དུ། ཚོང་ཁང་མང་པོ་ཞིག་གིས་ཁྲིམས་དང་མི་མཐུན་པའི་སྒོ་ནས་འཕྲུལ་སྒུལ་རླངས་འཁོར་ཕྱིར་བསྡུ་བ་དང་འཕྲུལ་ཆས་གཏོར་ནས་ཞིབ་བཤེར་བྱེད་པའི་ལས་སྒོ་གཉེར་བཞིན་འདུག་ལ། དེ་ལྟར་བྱེད་དུས་རླངས་སྣུམ་ས་རུ་ཟགས་ཏེ་ཁོར་ཡུག་ལ་འབག་བཙོག་ཚབས་ཆེན་བཟོས་ཡོང་།”  རྨ་ཆེན་རྫོང་གིས་དུས་ཐོག་ཏུ་སྐྱེ་ཁམས་ཁོར་ཡུག་དང་ཁྲོམ་ར་ལྟ་སྐུལ། ཕྱོགས་བསྡུས་ཁྲིམས་སྐྱོང་སོགས་འབྲེལ་ཡོད་ལས་ཁུངས་བརྒྱད་ཀྱི་ཁྲིམས་བསྟར་མི་སྣ་ཡུལ་དངོས་སུ་བཀོད་སྒྲིག་བྱས།

རྨ་ཆེན་རྫོང་སྐྱེ་ཁམས་ཁོར་ཡུག་ཅུའུ་ཡི་ཅུའུ་ཀྲང་བཀྲ་ཤིས་དོན་འགྲུབ་ཀྱིས་གསར་འགོད་པར་ང་ཚོ་ཡུལ་དངོས་སུ་སོང་ནས་ཞིབ་དཔྱད་བྱས་པར་མ་ཟད། དེའི་ཉེ་འཁོར་ལའང་ཞིབ་བཤེར་བྱས་པ་ཡིན། ཞུ་གཏུག་བྱས་པའི་ནང་དོན་ཁ་ཤས་དོན་དངོས་རེད། ད་ལྟ་གནད་དོན་དེའི་རིགས་ཐག་གཅོད་བྱས་ཟིན་ཟེར། ཞུ་གཏུག་ཡི་གེའི་ཁྲོད་བརྗོད་པའི་གནད་དོན་ གྱི་ཁྱབ་ཁོངས་སུ། ཧའོ་ཡུས་སྙིགས་རོ་ཕྱིར་བསྡུ་ས་ཚིགས་ལ་འཕྲུལ་སྒུལ་རླངས་འཁོར་གྱི་ལྷུ་ལག་ཕྱིར་བསྡུ་བའི་གནས་ཚུལ་འདུག ཡུལ་དངོས་སུ་འཕྲུལ་སྒུལ་རླངས་འཁོར་གྱི་ལྷུ་ལག་སར་འཐོར་བ་དང་རླངས་སྣུམ་སར་ཟགས་པའི་གནས་ཚུལ་མཐོང་མོད། འོན་ཀྱང་ཁྲིམས་དང་མི་མཐུན་པའི་སྒོ་ནས་འཕྲུལ་སྒུལ་རླངས་འཁོར་ཕྱིར་བསྡུ་བ་དང་རླངས་འཁོར་གཏོར་ཏེ་ཞིབ་བཤེར་བྱེད་པའི་ལས་སྒོ་སྤེལ་བའི་གནས་ཚུལ་མ་མཐོང་། ཁྲིམས་ལག་བསྟར་པས་ཧའོ་ཡུས་སྙིགས་རོ་ཕྱིར་བསྡུ་ས་ཚིགས་ལ་མྱུར་དུ་དག་ཐེར་བྱེད་དགོས་པའི་བཀའ་ཕབ་པར་མ་ཟད། 《བེད་མེད་འཕྲུལ་སྒུལ་རླངས་འཁོར་ཕྱིར་བསྡུ་དོ་དམ་བྱེད་ཐབས》ཀྱི་འབྲེལ་ཡོད་གཏན་འཁེལ་ལྟར་སྒོར་ཁྲི་ལྔའི་ཆད་པ་བཅད།

ཟླ12པའི་ཚེས28ཉིན། གསར་འགོད་པ་ཡང་བསྐྱར་རྨ་ཆེན་རྫོང་རྟ་བོ་གྲོང་རྡལ་པདྨ་ལམ་གྱི་བཟོ་འགོད་རུ་ཁག་རྙིང་པའི་སྲང་ལམ་དུ་ཡོད་པའི་ཧའོ་ཡུས་སྙིགས་རོ་ཕྱིར་བསྡུ་ས་ཚིགས་སུ་སོང་ནས་བལྟས་པ་ན། མུའུ་གང་ལྷག་ཡོད་པའི་ར་སྐོར་དེར་གཙང་སྦྲ་ཡག་པོ་བྱས་འདུག “ས་རྐོ་རླངས་འཁོར་གྱིས་ས་བརྐོས་རྗེས། དཔྱིད་ཀ་སླེབས་ན་རྩྭ་དང་སྡོང་ཕྲུག་བཙུགས་ཏེ། ར་སྐོར་མེ་ཏོག་ལྡུམ་ར་ཆུང་ཆུང་ཞིག་ཏུ་གཏོང་རྒྱུ་ཡིན།” སྙིགས་རོ་ཕྱིར་བསྡུ་ཁང་གི་ཚོང་གཉེར་པ་ཧུའུ་པིང་ཆང་གིས་སྒོ་རྩིས་ཚོང་ཁང་ཞིག་ཕྱེ་རྩིས་ཡོད་པར་མ་ཟད། རང་མོས་སྒོས་ཁོར་སྲུང་བྱ་བར་འགན་ཁུར་ཏེ། རྨ་ཆེན་རྫོང་གི་ཁོར་ཡུག་སྲུང་སྐྱོབ་ཐད་སྟོབས་ཤུགས་འབུལ་རྩིས་འདུག

སྙིགས་རོ་ཕྱིར་བསྡུ་ས་ཚིགས་ཀྱི་ཉེ་འཁོར་དུ་སྐབས་བསྟུན་སྒོས་བཅར་འདྲི་བྱས་པ་ན། གླ་གཏོང་རླངས་འཁོར་གྱི་ཁ་ལོ་པ་རྡོ་རྗེ་ཚེ་རིང་གིས་གསར་འགོད་པར་བཤད་རྒྱུར། “ད་ལྟ་ལམ་འདི་བརྒྱུད་ནས་འགྲོ་སྐབས་ཀྱང་གཙང་ཞིང་གྲ་དག་པ་ཞིག་འདུག སྲང་ལམ་ལའང་སྲང་ལམ་གྱི་ཚུགས་ཀ་ཡོང་འདུག”ཟེར། ཉེ་འཁོར་དུ་ཁྱིམ་ཆས་ཚོང་ཁང་ཕྱེ་ཡོད་པའི་ཀྲང་ཁྲེང་གིས་ཀྱང “དག་ཐེར་བྱེད་ཚད་ཤིན་ཏུ་མགྱོགས་པོ་འདུག སྲང་ལམ་གྲ་དག་ན། ཉེ་འཁོར་གྱི་ཟ་ཁང་དང་སྒོ་རྩིས་ཚོང་རའི་ཚོང་ལམ་ལའང་གནོད་པ་མི་འདུག”ཅེས་བཤད།

བཀྲ་ཤིས་དོན་འགྲུབ་ཀྱིས་ངོ་སྤྲོད་བྱས་པ་ལྟར་ན། རྨ་ཆེན་རྫོང་གིས་འདྲུད་འཁོར5བསྡུ་རུབ་བྱས་ཏེ། ཉིན་གཉིས་ཀྱི་དུས་ཚོད་སྤྱད་དེ་ཕྱིར་བསྡུ་ས་ཚིགས་ཀྱི་སྙིགས་རོ་དང་གད་སྙིགས་ཐམས་ཅད་གཙང་སེལ་བྱས་པར་མ་ཟད་ས་རྒྱུ་ལ་ཞིབ་བཤེར་བྱས། མཇུག་འབྲས་སུ་མངོན་པ་ལྟར་ན། ཞིབ་བཤེར་གྲངས་ཚད《ས་རྒྱུ་ཁོར་ཡུག་སྤུས་ཚད་འཛུགས་སྐྲུན་ས་བཀོལ་གྱི་ས་རྒྱུའི་སྦགས་བཙོག་ཉེན་ཁའི་དོ་དམ་ཚད་གཞི》ཞེས་པའི་འཚག་འདེམས་ཚད་ཡིག་དང་མཐུན་པས། ས་རྒྱུ་ལ་སྦགས་བཙོག་ཐེབས་མེད། རྨ་ཆེན་རྫོང་གིས་མྱུར་དུ་ལག་བསྟར་དང་མྱུར་དུ་བཅོས་སྐྱོང་བྱས་པ་དང་ལྟ་སྐུལ་བྱེད་ཞོར་དང་བཅོས་སྐྱོང་བྱེད་ཞོར་བྱས་པར་མ་ཟད། དོན་དག་གི་རྗེས་སུའང་མུ་མཐུད་དུ་རྗེས་དེད་དེ། གནད་དོན་རྩ་བ་ནས་ཐག་གཅོད་པར་འགན་སྲུང་བྱས་པ་དང་ཆབས་ཅིག སྐྱེ་ཁམས་ཁོར་ཡུག་སྲུང་སྐྱོབ་ཀྱི་ལྟ་སྐུལ་དོ་དམ་ལ་རྒྱུན་མཐུད་ཀྱིས་ཤུགས་བརྒྱབ་སྟེ། རང་འགུལ་གྱིས་སྤྱི་ཚོགས་ཀྱི་ལྟ་སྐུལ་དང་ལེན་དང་དུས་ལྟར་མང་ཚོགས་ཀྱི་སེམས་ཁུར་ལ་ཨ་ལན་སྤྲད་དེ། ཁོར་ཡུག་གི་ཁྲིམས་འགལ་བྱ་སྤྱོད་སོ་སོ་ཏན་ཏིག་གིས་ཐག་བཅད།

ཡིག་སྒྱུར་བ། ཚེ་རིང་སྒྲོལ་མ།