མཚོ་སྔོན་པོ་ནི་མདོ་དབུས་མཐོ་སྒང་གི་ཤར་བྱང་རྒྱུད་དུ་གནས་པའི་ཀྲུང་གོའི་ཆེས་ཆེ་བའི་སྐམ་སའི་དབུས་ཁུལ་གྱི་མཚོ་མོ་དང་། མཚོ་སྔོན་པོའི་འབབ་རྒྱུད་ནི་མདོ་དབུས་མཐོ་སྒང་ཤར་བྱང་རྒྱུད་ཀྱི་སྐྱེ་ཁམས་བདེ་འཇགས་དང་ཀྲུང་གོའི་ནུབ་བྱང་རྒྱུད་ཀྱི་ཁོར་ཡུག་ཆེན་པོའི་སྐྱེ་ཁམས་དོ་མཉམ་ཡོང་བར་བྱེད་པའི་ཆུ་བོ་གལ་ཆེན་ཡིན་པ་མ་ཟད། ཀྲུང་གོའི་སྐམ་སའི་དབུས་ཁུལ་གྱི་ཆུ་འཁོར་རྒྱུག་དང་ཆུའི་སྐྱེ་ཁམས་གོ་རིམ་ཆ་ཚང་ཁྲོད་ཀྱི་དཔེ་མཚོན་ཁྱབ་ཁོངས་ཡིན་པས་ཁྱད་དུ་ཡོད་པའི“རྩྭ་དང་ཆུ།  མཚོ་དང་ཉ།  བྱ”བཅས་མཉམ་སྡོད་སྐྱེ་ཁམས་ཕྲེང་འབྲེལ་ཆགས་ཡོད།

“མཚོ་སྔོན་པོའི་རྒྱལ་ཁབ་སྤྱི་གླིང་ཇུས་འགོད་ས་ཁུལ་གྱིས་རྒྱལ་ཁབ་ཀྱི་མཚོན་བྱེད་རང་བཞིན་དང་སྐྱེ་ཁམས་ཀྱི་གལ་ཆེན་རང་བཞིན།  དོ་དམ་ལག་བསྟར་རང་བཞིན་མཚོན་ཡོད”ཅེས་མཚོ་སྔོན་པོ་ལྗོངས་ཁུལ་སྲུང་སྐྱོབ་བེད་སྤྱོད་དོ་དམ་ཅུའུ་ཡི་ཅུའུ་ཀྲང་ཏུང་ཧྥུའུ་ཧུའེ་ཡིས་དེ་ལྟར་བཤད།

འབྲེལ་ཡོད་ཇུས་འགོད་ལྟར་ན། མཚོ་སྔོན་པོའི་འབབ་རྒྱུད་འབྱུང་ཡུལ་ཁུལ་ནི་དགོ་བ་སོགས་ཀྱི་རི་སྐྱེས་སྲོག་ཆགས་རྩ་ཆེན་རིགས་ཀྱི་འཚོ་སྡོད་གནས་དང་། མཚོ་སྔོན་པོའི་གསེར་ཉའི་སྤོ་བགྲོད་བགྲོད་ལམ་གལ་ཆེན་དང་འདབ་ཆགས་རིགས་གནས་སྤར་བགྲོད་ལམ་གལ་ཆེན་ཡིན་པས་མཚོ་སྔོན་པོ་རྒྱལ་ཁབ་སྤྱི་གླིང་གི་ལྟེ་གནས་སུ་བཀར་ཡོད། ཁྱབ་རྒྱ་ཆེ་བའི་མཐོ་གྲང་སྤང་ཁུལ་དང་བརླན་ས་སོགས་ཀྱི་སྐྱེ་ཁམས་མ་ལག་གལ་ཆེན་རྒྱལ་ཁབ་སྤྱི་གླིང་གི་སྡོད་དམངས་ཐོན་སྐྱེད་དང་། འཚོ་བ་དང་རིམ་བརྩེགས་ཁྱབ་ཁོངས་སུ་གྱུར་བས་བཟོ་བཀོད་ཐབས་ལམ་བརྒྱུད་དེ་ད་གཟོད་སྐྱེ་ཁམས་སླར་གསོ་ཁྱབ་ཁོངས་སུ་སྒྱུར་ཐུབ། རྒྱལ་ཁབ་སྤྱི་གླིང་ནང་གི་རང་བྱུང་མི་ཆོས་མཛེས་ལྗོངས་གཅིག་སྡུད་ཡིན་པ་དང་སྐྱེ་ཁམས་ཡུལ་སྐོར་གཅིག་སྡུད་ཁུལ། རྨང་གཞིའི་སྒྲིག་བཀོད་འཛུགས་སྐྲུན་གཅིག་སྡུད་ཁྱབ་ཁོངས་དང་སྤྱི་དམངས་ལ་རང་བྱུང་དང་ཉེ་བ་དང་། རང་བྱུང་ཁུལ་ཉམས་སུ་མྱོང་བའི་ཁྱབ་ཁོངས་དེ་སྤྱིར་བཏང་གི་ཚོད་འཛིན་ཁུལ་དུ་བཀར་ནས། གཞིས་ཁུལ་འཆམ་མཐུན་མཉམ་སྐྲུན་ཐད་བར་སྟོང་མཁོ་འདོན་བྱས།

རྒྱལ་ཁབ་སྤྱི་གླིང་འཛུགས་རྒྱུ་ནི་ཡུན་རིང་གི་ལས་དོན་ཞིག་ཡིན་ལ། ལོ་མང་ཤས་རིང་ས་གནས་སྲིད་གཞུང་གིས་མཚོ་སྔོན་པོའི་སྐྱེ་དངོས་སྣ་མང་རང་བཞིན་སྲུང་སྐྱོང་ལ་ཤུགས་བསྣན་ནས་འབབ་རྒྱུད་ཀྱི་སྐྱེ་ཁམས་རྒྱུན་མཐུད་ངང་ཇེ་ལེགས་སུ་ཕྱིན་ཡོད།

གཞི་གྲངས་ལས་མངོན་པ་ལྟར་ན། ཉེ་བའི་ལོ15རིང་ལ་མཚོ་སྔོན་པོའི་ཆུ་བོའི་རྒྱ་ཁྱོན་དང་ཆུ་ཚད་འཕར་བ་དང་། 2020ལོར་མཚོ་སྔོན་པོའི་ཆུ་ཚད་སྨི་སྟོང་གསུམ་ལྷག་ཟིན་ནས2004ལོ་དང་བསྡུར་ན་སྨི་གསུམ་ལྷག་འཕར་ཞིང་། ཆུ་བོའི་རྒྱ་ཁྱོན་སྤྱི་ལེ་གྲུ་བཞི་མ་སྟོང་བཞི་ལྷག་ཟིན་ནས2004ལོ་དང་བསྡུར་ན་སྤྱི་ལེ་གྲུ་བཞི་མ་སུམ་བརྒྱ་ལྷག་ཇེ་ཆེར་ཕྱིན་ནས་དུས་རབས་སྔོན་མའི་ལོ་རབས་དྲུག་ཅུའི་ཆུ་ཚད་ལ་ཐོན་ཡོད།

རྒྱལ་སྤྱིའི་དུས་བྱའི་གནས་སྤར་བགྲོད་ལམ་གལ་ཆེན་ཡིན་པའི་ངོས་ནས། མིག་སྔར་མཚོ་སྔོན་པོའི་འདབ་ཆགས་རིགས་ཀྱི་གྲངས་ཀ288ཟིན་པ་དང་། འཚོ་སྡོད་ཆུ་བྱ་རིགས་འབུམ་དྲུག་ལྷག་ཟིན་ནས་ཀྲུང་གོའི་དུས་བྱ་རིགས་རྒྱུད་སྤེལ་བའི་གྲངས་ཀ་ཆེས་མང་ཞིང་ཁྱུ་ཚོགས་ཆེས་གཅིག་སྡུད་ཅན་གྱི་འཚོ་སྡོད་གནས་སུ་གྱུར། ལོ་རེར་མཚོ་སྔོན་པོ་ནས་རིགས་རྒྱུད་སྤེལ་བའི་ཁྲུང་ཁྲུང་མགོ་ཁྲ་དང་ཆུ་སྐྱུར། སྤྱིར་བཏང་གི་སོ་བྱ་སོགས་ཀྱི་ཁྱུ་ཚོགས་འཛམ་གླིང་ཡོངས་ཀྱི་རིགས་རྒྱུད་སྤེལ་བའི་ཁྱུ་ཚོགས་ཀྱི་བཅུ་ཆའི་གསུམ་ཟིན་ཡོད།

སྔོན་ཆད་མཚོ་སྔོན་པོའི་གསེར་ཉ་ཚོད་བཀག་མེད་པར་འཛིན་བཟུང་བྱས་པས་མཚོ་སྔོན་པོའི་གསེར་ཉའི་ཐོན་ཁུངས་མྱུར་དུ་མར་བབས་པ་དང་། རྒྱུན་མཐུད་སྲུང་སྐྱོང་བརྒྱུད་དེ2002ལོ་ནས2020ལོའི་བར་དུ་མཚོ་སྔོན་པོའི་གསེར་ཉའི་ཐོན་ཁུངས་ཚད་ལྡབ38ཀྱིས་མང་དུ་ཕྱིན། མིག་སྔར་མཚོ་སྔོན་པོའི་གསེར་ཉ་གསོག་ཚད་ཏུན་འབུམ་གཅིག་དང་ཁྲི་གཉིས་སུ་སླར་གསོ་བྱུང་བ་དང་། ལོ་རེའི་ཟླ5བ་ནས་ཟླ7པའི་བར་དུ་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གི་འོམ་ཆུ་ནང་དུ་མཚོ་སྔོན་པོའི་གསེར་ཉ་ཁྲི་འབུམ་མང་པོའི་རིགས་རྒྱུད་སྤེལ་བས།  “ཆུ་བོ་ཕྱེད་ཀ་དང་ཉ་ཕྱེད་ཀའི”གསེར་ཉ་སྤོ་བགྲོད་ངོ་མཚར་རྣམ་པ་མངོན།

“མཚོ་སྔོན་པོ་ཡིས་ཧུར་ཐག་གིས་སྐྱེ་ཁམས་སྲུང་སྐྱོབ་དང་ལྗང་མདོག་འཕེལ་རྒྱས་མཉམ་འདྲེས་བྱེད་པའི་ཐབས་ལམ་གསར་བ་བཏོད་དེ། གཞི་རིམ་བཅོས་སྐྱོང་ལམ་ལུགས་གསར་སྐྲུན་དང་བཅོས་སྐྱོང་ནུས་བ་ཇེ་མཐོར་བཏང་ནས། རྒྱལ་ཁབ་སྤྱི་གླིང་གི་སྐྱེ་ཁམས་སྲུབ་སྐྱོབ་དང་ལྗང་མདོག་འཕེལ་རྒྱས། དམངས་ཚིས་ལེགས་བཅོས་བཅས་ཀྱི་དམིགས་འབེན་གཅིག་གྱུར་གྱིས་མཚོ་སྔོན་པོའི་སྐྱེ་ཁམས་སྲུབ་སྐྱོབ་བྱེད་རྒྱུ་ཡིན”ཞེས་ཏུང་ཧྥུའུ་ཧུའེ་ཡིས་དེ་ལྟར་བཤད།

རྩོམ་སྒྲིག་པ། སྒྲོལ་མ་སྐྱིད།