གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་སྐྱེ་ཁམས་གྲུབ་འབྲས།
2024.11.12 ཁུངས། མཚོ་སྔོན་བོད་ཡིག་གསར་འགྱུར། ཀློག་གྲངས། 11

 སྤྱི་ལོ2000ལོའི་ཟླ7པར་གཙང་གསུམ་འབྱུང་ཡུལ་རང་བྱུང་སྲུང་སྐྱོབ་ས་ཁུལ་འཛུགས་སྐྲུན་བྱ་རྒྱུར་ཆོག་མཆན་ཐོབ་ཅིང་།  ས་ཁོངས་ཀྱི་ཁྱབ་རྒྱ་ལ་ཡུས་ཧྲུའུ་དང་མགོ་ལོག མཚོ་ལྷོ། རྨ་ལྷོ་བཅས་བོད་རིགས་རང་སྐྱོང་ཁུལ་བཞིའི་རྫོང16དང་ན་གོར་མོའི་གདང་ལ་ཡུལ་ཚོ་བཅས་ཀྱི་སྲིད་འཛིན་ས་ཁུལ་ས་ཁོངས་ཀྱི95%གཏོགས་ཡོད་ལ། སྤྱིའི་རྒྱ་ཁྱོན་ལ་སྨི་གྲུ་བཞི་མ་འབུམ་གསུམ་ལྷག་དང་། ཆ་སྙོམས་མཚོ་འཕང་ལ་སྨི3500ནས4800བར་ཡོད་ཅིང་། ཀྲུང་གོའི་གཞི་ཁྱོན་ཆེས་ཆེ་བའི་རང་བྱུང་སྲུང་སྐྱོབ་ས་ཁུལ་ཡིན། 2016ལོའི་ཟླ4པའི་ཚེས13ཉིན།  མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་སྒྲིག་སྲོལ་ཚོད་ལྟའི་ས་ཚུགས་ལས་འགོ་བརྩམས་པ་དང་། རང་རྒྱལ་གྱི་ཆེས་ཐོག་མའི་རྒྱལ་ཁབ་སྤྱི་གླིང་གི་སྒྲིག་སྲོལ་ཚོད་ལྟའི་ས་གནས་སུ་གྱུར། སྤྱི་གླིང་གི་ས་ཁོངས་ལ་སྨི་གྲུ་བཞི་མ་འབུམ་གཅིག་ཁྲི་གཉིས་ལྷག་ཡོད་པ་དང་གཙང་གསུམ་འབྱུང་ཡུལ་གྱི་སྤྱིའི་གཞི་ཁྱོན་གྱི31.16%ཟིན་ཡོད། ལོ་ལྔའི་རིང་ལ་ཚོད་ལྟ་དང་འབད་བརྩོན་བྱས་པ་བརྒྱུད། 2021ལོར་ཀྲུང་དབྱང་དང་རྒྱལ་སྲིད་སྤྱི་ཁབ་ཁང་གི་ཆོག་མཆན་ཐོབ་ནས་ཁག་དང་པོའི་རྒྱལ་ཁབ་སྤྱི་གླིང་གི་མིང་ཐོའི་གྲས་སུ་བཞག་སྟེ། གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དངོས་སུ་བཙུགས་པ་དང་།  སྤྱིའི་གཞི་ཁྱོན་ལ་སྨི་གྲུ་བཞི་མ་འབུམ་གཅིག་དང་ཁྲི་དགུ་ལྷག་ལ་སླེབས་ཡོད།

གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་གླིང་ཁུལ་དུ་འཁྱག་རོམ་དང་བརླན་ས། མཚོ་དང་མཚེའུ་མང་བས་བརླན་སའི་གཞི་ཁྱོན་ཆེ་བའི་མཐོ་སྒང་གི་སྣ་མང་རང་བཞིན་ཅན་གྱི་སྐྱེ་དངོས་ཁོར་ཡུག་ཅིག་གྲུབ་ཡོད། དེར་མ་ཟད་རྨ་འབྲི་རྫ་གསུམ་ཆུ་བོའི་འགོ་ཁུངས་ཡིན་ལ། འབྲི་ཆུའི་སྤྱིའི་ཆུ་འབོར་གྱི25%དང་རྨ་ཆུའི་སྤྱིའི་ཆུ་འབོར་གྱི49%། རྫ་ཆུའི་སྤྱིའི་ཆུ་འབོར་གྱི15%དེ་ནས་བཞུར་གྱིན་ཡོད་ལ། དེས་སྨད་རྒྱུད་དུ་ལོ་རེར་ཆུའི་ཐོན་ཁུངས་སྨི་རྒྱ་དཔངས་གྲུ་བཞི་མ་ཁྲག་ཁྲིག་དྲུག་ལས་བརྒལ་བ་མཁོ་འདོན་བྱེད་བཞིན་ཡོད་པས“ཀྲུང་ཧྭའི་ཆུ་མཛོད”ཅེས་པའི་མཚན་སྙན་ཡོད།  གཙང་གསུམ་འབྱུང་ཡུལ་དུ་བསྡོམས་པས་རི་སྐྱེས་སྲོག་ཆགས་རིགས270ཙམ་ཡོད་ལ།  དེའི་ནང་རི་དྭགས་ཀྱི་རིགས62དང་འདབ་ཆགས་ཀྱི་རིགས196ཡོད་ཅིང་། གཙོད་དང་གསའ་སོགས་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་རིགས8དང་། གཡི་དཀར་སོགས་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་རིགས14དང་། ཁྲུང་ཁྲུང་སོགས་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་བྱ་རིགས8བཅས་ཡོད་པ་དང་། བྱ་རྒོད་སོགས་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་བྱ་རིགས27བཅས་ཡོད་པས“སྲོག་ཆགས་ཀྱི་ཕ་ས”ཞེས་པ་ནི་དངོས་ནས་མིང་དོན་མཚུངས་པ་ཞིག་རེད།

2021ལོར་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་དངོས་སུ་བཙུགས་པ་ནས་བཟུང་།  སྤྱི་གླིང་གི་ཁྱབ་ཁོངས་ཡོངས་སུ་སྤྱི་ཕན་ལས་གནས་འདོན་སྤྲོད་བྱས་པ་དེ་ནི་སྤྱི་ཚོགས་ཀྱི་ལས་ཞུགས་གནོན་ཤུགས་ཇེ་ཆུང་དུ་གཏོང་བ་དང་། ས་གནས་ཀྱི་དམངས་འཚོ་ལེགས་སྒྱུར་བྱེད་པའི་དོན་བཟང་ཞིག་ཏུ་གྱུར།  གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གིས་ཁྱིམ་ཚང་རེ་ནས་སྤྱི་ཕན་ལས་གནས་མི་སྣ་རེ་སྐྱེ་ཁམས་ལྟ་སྲུང་པར་བཀོད་སྒྲིག་བྱས་ནས།  མིག་སྔར་མི་གྲངས་ཁྲི་གཉིས་ལྷག་ཡོད། དེས་ས་གནས་མང་ཚོགས་ལ་སྐྱེ་ཁམས་ཀྱི་ཕོར་བ་སྤྲད་ནས་དམངས་འཚོ་ལེགས་བཅོས་བྱས་ཡོད།   རྫ་ཆུའི་གླིང་ཁུལ་གྱི་རྫ་སྟོད་རྫོང་རྣམ་སྲས་ཡུལ་ཚོའི་འབྲོག་ཁྱིམ་གཡང་ཐར་ཚང་ནི་སྔོན་ཆད་ཕྱུགས་ཟོག་འཚོ་བ་ཁོ་ནས་འཚོ་བ་རོལ་བཞིན་ཡོད་ལ། གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་བཙུགས་པ་ནས་བཟུང་ཁོ་རང་སྐྱེ་ཁམས་ལྟ་སྲུང་པ་ཞིག་ཏུ་གྱུར་པ་དང་། དེར་མ་ཟད་ཁོས་སྐྱེ་ཁམས་ཡུལ་སྐོར་གྱི་གོ་སྐབས་དམ་འཛིན་བྱས་ནས་དམངས་སྲོལ་མགྲོན་ཁང་གི་ཚོང་ལས་གཉེར་ཏེ་ལོ་རེའི་ཡོང་འབབ་སྒོར་ཁྲི་གསུམ་ལས་བརྒལ་བཞིན་ཡོད། རི་ཆུ་རང་བྱུང་སྲུང་སྐྱོབ་ལྟེ་གནས་ཀྱི་གསར་གཏོད་པ་པེ་ཅིན་སློབ་གྲྭ་ཆེན་མོའི་དགེ་རྒན་ཆེན་མོ་ལུའི་ཀྲི་ཡིས་གསར་འགོད་པར་བཤད་རྒྱུར།  རྣམ་སྲས་ཡུལ་ཚོའི་རང་བྱུང་མྱོང་རོལ་བྱ་འགུལ་ནི་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་བདག་གཉེར་ལས་ཚན་དང་པོའི་རྒྱལ་ཁའི་གྲུབ་འབྲས་ཡིན་ལ། ཡུལ་སྐོར་པ་འབྲོག་པའི་ཁྱིམ་ཚང་དུ་བསྡད་དེ་རང་བྱུང་ལ་ལྟ་ཞིབ་རོལ་མྱོང་བྱེད་པ་དང་མཉམ་དུ་ས་གནས་མང་ཚོགས་ཀྱི་འཚོ་བ་རོལ་སྟངས་དང་རང་བྱུང་ཁོར་ཡུག་ལ་བཟུང་བའི་སྐྱེ་ཁམས་ལྟ་བ་དང་རྣམ་འགྱུར། སྤྱོད་པ། བྱེད་སྟངས་སོགས་ལ་རོལ་མྱོང་ལྟ་ཞིབ་བྱེད་པ་དང་། ཁོ་ཚོས་ཇི་ལྟར་མི་དང་རང་བྱུང་འཆམ་མཐུན་མཉམ་གནས་ཡོང་བར་རྒྱུས་ལོན་བྱེད་ཆོག་པ་ཡིན། ད་ལྟའི་བར་རང་བྱུང་མྱོང་རོལ་གྱི་བྱ་འགུལ་འདིས་བྲག་རོང་ཟབ་སའི་རི་གྲོང་འདིར་སྒོར་ས་ཡ་གཉིས་ཀྱི་ཡོང་སྒོ་བསྐྲུན་ཡོད་ཟེར།  གོང་གསལ་གྱི་དཔེ་མཚོན་ལས་ང་ཚོས་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གིས་མདོ་དབུས་མཐོ་སྒང་གི་རང་བྱུང་ཁོར་ཡུག་དང་སྐྱེ་ཁམས་མ་ལག་ལ་ཁྲིམས་མཐུན་ལུགས་མཐུན་གྱིས་སྲུང་སྐྱོབ་བྱས་པར་མ་ཟད། ས་གནས་ཀྱི་དམངས་འཚོ་ལེགས་བཅོས་བྱས་ནས་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་བཞིན་ཡོད་པ་རྟོགས་ཐུབ།

2024ལོའི་ཟླ6པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་མཚོ་སྔོན་ལ་རྟོག་ཞིབ་ཏུ་ཕེབས་སྐབས“མཚོ་སྔོན་གྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་ནན་ཏན་བྱེད་པ་དང་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ཞིང་གནད་ལ་འཁེལ་བའི་སྒོ་ནས་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ།  སྐྱེ་ཁམས་སྔོན་ལ་འཇོག་པ་དང་། ལྗང་མདོག་འཕེལ་རྒྱས་གཏོང་རྒྱུ་རྒྱུན་འཁྱོངས་བྱེད་དགོས”ཞེས་གསུངས་པ་དང་།  ཁོང་གིས“མདོ་དབུས་མཐོ་སྒང་གི་སྐྱེ་ཁམས་མ་ལག་ཕུན་སུམ་ཚོགས་པ་དང་སྣ་མང་ཡིན་པར་མ་ཟད་ཧ་ཅང་ཉམས་ཞན་ཡང་ཡིན་པས། སྐྱེ་ཁམས་ཁོར་ཡུག་སྲུང་སྐྱོབ་ལ་ཤུགས་བསྣན་ནས་སྐྱེ་ཁམས་ཀྱི་ནུས་པ་ཆེ་རུ་གཏོང་རྒྱུ་ནི་མཚོ་སྔོན་གྱི་ལས་འགན་གཙོ་བོ་ཡིན”ཞེས་ནན་གྱིས་གསུངས་པ་བཞིན།   གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གིས་ཐོག་མཐའ་བར་གསུམ་དུ་སྤྱི་ཁབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཡིད་ལ་དམ་པོར་བཟུང་ནས་ཐོག་མའི་བསམ་འདུན་མི་བརྗེད་པར《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མདོ་དབུས་མཐོ་སྒང་གི་སྐྱེ་ཁམས་སྲུང་སྐྱོབ་བཅའ་ཁྲིམས》གཞིར་བཟུང་ནས། ཚན་རིག་དང་མཐུན་པའི་ཁྲིམས་འཛུགས་དང་། དམངས་གཙོ་ཁྲིམས་འཛུགས། ཁྲིམས་ལྟར་ཁྲིམས་འཛུགས་བཅས་སྐྱེ་ཁམས་ཁྱབ་ཁོངས་ཀྱི་ཁྲིམས་འཛུགས་གོམ་འགྲོས་ཇེ་མགྱོགས་སུ་བཏང་བ་དང་།  གཙང་གསུམ་འབྱུང་ཡུལ་གྱི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་འགན་འཁྲི་དང་ལེན་བྱས་ཤིང་། བློ་བརྟན་འགྱུར་མེད་ངང་རྒྱལ་ཁབ་ཀྱི་སྐྱེ་ཁམས་བདེ་འཇགས་ལ་ཁག་ཐེག་བྱས་ནས་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་ལེའུ་གསར་པ་བྲིས་དང་འབྲི་བཞིན་ཡོད།

རྩོམ་སྒྲིག་པ། སྒྲོལ་མ་སྐྱིད།