ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དུས་རབས་གསར་བར་ཞུགས་ཤིང་རང་རྒྱལ་སྤྱི་ཚོགས་ཀྱི་འགལ་བ་གཙོ་བོ་དེ་མི་དམངས་ཀྱི་ཉིན་རེར་གོང་དུ་འཕེལ་བཞིན་པའི་མཛེས་སྡུག་འཚོ་བའི་དགོས་པ་དང་དོ་མི་མཉམ་ལ་ཕུན་སུམ་ཚོགས་པ་མིན་པའི་འཕེལ་རྒྱས་བར་གྱི་འགལ་བ་རུ་གྱུར་ཡོད་པ་གསལ་བོར་བསྟན།

ཅི་ལྟར་འཕེལ་རྒྱས་དོ་མཉམ་མིན་པ་དང་ཕུན་སུམ་ཚོགས་པ་མིན་པར་དམིགས་ཏེ་དམངས་ཚིས་ཐད་ཀྱི་མི་འདང་ས་ཁ་གསབ་བྱས་ནས་བཅོས་སྒྱུར་འཕེལ་རྒྱས་ཀྱི་གྲུབ་འབྲས་སྔར་ལས་མང་པོ་མི་དམངས་ཡོངས་ལ་འདྲ་མཉམ་གྱི་ཕན་ཐོགས་པར་བྱེད་དགོས། ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་བཏོན་པའི་དམངས་ཚིས་ཀྱི་བྱེད་ཐབས་གསར་བར་འཐུས་མི་དང་མང་ཚོགས་ཀྱིས་དོ་སྣང་བྱས།

ཡོང་འབབ་འབྲིང་ཙམ་གྱི་མི་ཚོགས་ཇེ་མང་དུ་གཏོང་བ། 

ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་བསྟན་དོན། ཡོང་འབབ་འབྲིང་ཙམ་གྱི་མི་ཚོགས་ཇེ་མང་དུ་གཏོང་དགོས། ཉེ་བའི་ལོ་འགའི་རིང་། མང་ཚོགས་ཀྱི་ཡོང་འབབ་འཕར་སྣོན་འབྱུང་བའི་མགྱོགས་ཚད་དེ་རྒྱལ་དམངས་དཔལ་འབྱོར་གྱི་འཕེལ་ཚད་ལས་མགྱོགས་ཤིང་། ཡོང་འབབ་འབྲིང་ཙམ་གྱི་མི་ཚོགས་ཀྱི་གཞི་ཁྱོན་རྒྱུན་མཐུད་སྒོས་ཇེ་ཆེར་གྱུར། 

ཡོང་འབབ་འབྲིང་ཙམ་གྱི་མི་ཚོགས་ཇེ་མང་དུ་གཏོང་བ་ནི་ཡོང་འབབ་ཉུང་བ་དང་མང་བ་བལྟོས་བཅས་ཀྱིས་ཉུང་ཞིང་ཡོང་འབབ་འབྲིང་ཙམ་གྱིས་མང་པོ་ཟིན་པའི་བགོ་བྱའི་གྲུབ་ཚུལ་གྱི་གནད་འགག་ཡིན་ལ། ཁྱོན་ཡོངས་ནས་འབྱོར་འབྲིང་སྤྱི་ཚོགས་འགྲུབ་པར་བྱེད་པར་འབྲེལ་བ་ཡོད། 

ཀྲུང་གོ་ངལ་རྩོལ་ཚོགས་པའི་ཚོགས་གཙོ་གཞོན་པ་སའོ་ཧའེ་ནན་གྱིས་བཤད་རྒྱུར། དཔལ་འབྱོར་རྒྱུན་མཐུད་ནས་འཕར་སྣོན་བརྟན་པོ་ཡོང་བར་ཁག་ཐེག་དང་ཡོང་འབབ་འབྲིང་ཙམ་གྱི་མི་ཚོགས་ཇེ་མང་དུ་གཏོང་བའི་དཔལ་འབྱོར་གྱི་རྨང་གཞི་སྲ་བརྟན་དུ་གཏོང་དགོས། དཔལ་འབྱོར་གྲུབ་ཚུལ་དང་ཐོན་ལས་གྲུབ་ཚུལ། ལས་རིགས་གྲུབ་ཚུལ། ལས་རྐང་གྲུབ་ཚུལ་ལེགས་སྒྲིག་བྱེད་པ་བཅས་གནད་འགག་ཏུ་བརྩི་བ་དང་། མི་ཤུགས་ཐོན་ཁུངས་ཀྱི་ངོ་བོའི་གྲུབ་ཚུལ་ལེགས་བཅོས་བྱེད་པ་དེ་ཐབས་ལམ་གལ་ཆེན་དུ་བརྩི་བ། འབྲེལ་ཡོད་ཀྱི་ཡོང་སྒོའི་རྒྱུ་ནོར་བགོ་བཤའི་ལམ་ལུགས་འཐུས་ཚང་དུ་གཏོང་བ་དེ་ཐད་ཀའི་བྱེད་ཐབས་སུ་བརྩིས་ནས་མཉམ་དུ་ཡོང་སྒོ་དམའ་བའི་མི་ཚོགས་སྔར་ལས་མང་པོ་ཡོང་འབབ་འབྲིང་ཙམ་གྱི་མི་ཚོགས་སུ་འགྱུར་བར་སྣེ་ཁྲིད་བྱེད་དགོས་ཟེར། 

ཞིང་པ་ཞོར་ལས་པ་དག་ཐབས་ལམ་སྣ་ཚོགས་ཀྱིས་ལས་ཞུགས་བྱེད་པར་སྐུལ་འདེད་བྱེད་དགོས། 

ལས་ཞུགས་ནི་དམངས་ཚིས་ཀྱི་ལས་དོན་གལ་ཆེན་ཞིག་ཡིན། ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་ཞིང་པ་ཞོར་ལས་པ་ཐབས་ལམ་སྣ་ཚོགས་ཀྱིས་ལས་ཞུགས་བྱེད་པར་སྐུལ་འདེད་གཏོང་དགོས་ཞེས་ནན་གྱིས་བསྟན།

ཉེ་བའི་ལོ་འདི་འགར། ཞིང་སྡེའི་ངལ་རྩོལ་པའི་ལས་ཞུགས་ཀྱི་རྣམ་པ་དེ་འཕེལ་ཚུལ་བརྟན་པོའི་ངང་ཇེ་མཐོར་འགྲོ་གྱིན་ཡོད་པ་དང་། རྒྱལ་ཡོངས་ཀྱི་ཞིང་པ་ཞོར་ལས་པ་དེ་ཉིས་སྟོང་བཅུ་གཉིས་ལོའི་ལོ་མཇུག་གི་མི་གྲངས་དུང་ཕྱུར་གཉིས་དང་བྱེ་བ་དྲུག་ས་ཡ་གསུམ་ནས་ཉིས་སྟོང་བཅུ་དྲུག་ལོའི་ལོ་མཇུག་གི་མི་གྲངས་དུང་ཕྱུར་གཉིས་དང་བྱེ་བ་བརྒྱད་ས་ཡ་གཉིས་ལ་འཕར་ཡོད། རབས་གསར་བའི་ཞིང་པ་ཞོར་ལས་པས་དེའི་ཁྲོད་ཀྱི་བརྒྱ་ཆའི་ལྔ་བཅུ་ཟིན་ཡོད། ཀྲུང་གོའི་ལྕགས་ལམ་གློག་ཤུགས་སྡེ་ཚོགས་ཀྱི་བཟོ་བཀོད་པའམ། འཐུས་མི་ཅིས་ཞོ་ལིན་གྱིས་བསྟན་དོན། ཞིང་པ་ཞོར་ལས་པའི་ལས་ཞུགས་གནད་དོན་ལ་དོ་སྣང་བྱེད་པ་དེས་མཉམ་དུ་འབྱོར་ཕྱུགས་ཀྱི་ལམ་དུ་བསྐྱོད་པར་སྐུལ་འདེད་བྱེད་པའི་ཁ་ཕྱོགས་མཚོན་ཡོད་ཅིང་། མིག་སྔར། ཞིང་པ་ཞོར་ལས་པས་ལས་ཞུགས་ལ་དོ་སྣང་བྱེད་པ་དེ་བྱ་བ་འཚོལ་བ་རྐྱང་རྐྱང་མིན་པར་ད་དུང་ཅི་ལྟར་གྲོང་ཁྱེར་ནང་ནས་རྐང་འཛུགས་དགོས་པ་དང་། སློབ་གསོ་དང་སྨན་བཅོས་ཀྱི་ཆ་རྐྱེན་ཅི་ལྟར་ལོངས་སྤྱོད་ཡག་པོ་བྱེད་རྒྱུ། རིག་གནས་དང་ལག་རྩལ་ཡོད་པའི་ཞིང་པ་ཞོར་ལས་པ་དག་ད་དུང་ལས་སྒོ་གསར་སྤེལ་གྱི་ལམ་དུ་ཡང་ཅི་ལྟར་ཞུགས་དགོས་པ་དེ་རེད། 

མྱུར་དུ་རྒན་གསོའི་ཉེན་ཚབ་མ་དངུལ་རྒྱལ་ཡོངས་དང་གཅིག་གྱུར་ཡོང་བ་མངོན་འགྱུར་བྱེད་དགོས། 

གཞི་གྲངས་ལས་མངོན་པ་ལྟར་ན། ཉིས་སྟོང་བཅོ་ལྔ་ལོའི་ལོ་མཇུག་ཏུ། རང་རྒྱལ་གྱི་ལོ་དྲུག་ཅུ་ཡན་གྱི་རྒན་པོའི་མི་གྲངས་དེ་དུང་ཕྱུར་གཉིས་དང་བྱེ་བ་གཉིས་ས་ཡ་གཉིས་སུ་སླེབས་ཏེ། མི་གྲངས་སྤྱིའི་བརྒྱ་ཆའི་བཅུ་དྲུག་དང་གྲངས་ཆུང་གཅིག་ཟིན་ཡོད། སྐྲ་དཀར་གྱི་རྒན་པའི་ཚོགས་ཇེ་མང་ལ་སོང་བ་དེས་རྒན་གསོའི་ཉེན་ཚབ་ཀྱི་ཐེབས་རྩའི་གཏོང་སྤྲོད་དོ་མཉམ་ལ་ཤུགས་རྐྱེན་ཆེན་པོ་བཟོས། ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་གང་མགྱོགས་སྒོས་རྒན་གསོའི་ཉེན་ཚབ་དེ་རྒྱལ་ཡོངས་སུ་གཅིག་གྱུར་ཡོང་བ་མངོན་འགྱུར་བྱེད་དགོས་ཞེས་བསྟན། 

ཀྲུང་དབྱང་ནོར་སྲིད་དཔལ་འབྱོར་སློབ་ཆེན་སྤྱི་ཚོགས་འགན་སྲུང་ཞིབ་འཇུག་ལྟེ་གནས་ཀྱི་ཀྲུའུ་རིན་ཀྲའོ་ཧྥོ་ལིན་གྱིས་བཤད་རྒྱུར། རྒྱལ་ཡོངས་ཀྱི་གཅིག་གྱུར་འཆར་འགོད་ལག་བསྟར་བྱས་རྗེས། རྒྱལ་ཡོངས་ཀྱི་ཁྱབ་ཁོངས་ནས་ཆད་ལྷག་སྙོམས་སྒྲིག་དང་ཐ་ཐོར་གྱི་ཉེན་ཁ་སྙོམས་སྒྲིག་བྱེད་ཐུབ་པ་དང་། གཞི་རྩའི་རྒན་གསོ་ཉེན་ཚབ་ཀྱི་རྒྱལ་ཡོངས་གཅིག་གྱུར་འཆར་འགོད་ནི་མ་ལག་བཟོ་སྐྲུན་ཞིག་ཡིན་པས། ཐེབས་རྩ་གཅིག་གྱུར་འཆར་འགོད་དང་། ལམ་ལུགས་ཚད་ལྡན། དོ་དམ་འཐུས་ཚང་། ལག་རྩལ་ཚད་ལྡན་བཅས་གཅིག་གྱུར་ཡོང་བ་མངོན་འགྱུར་བྱེད་དགོས། 

ཁྱོན་ཡོངས་ནས་སྨན་ལ་བརྟེན་ནས་སྨན་ཁང་སྐྱོང་བ་མེད་པར་བྱ་རྒྱུ།

ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་བསྟན་དོན། ཁྱོན་ཡོངས་ནས་སྨན་ལ་བརྟེན་ནས་སྨན་ཁང་སྐྱོང་བ་མེད་པར་བྱེད་པ་དང་། སྨན་རྫས་མཁོ་སྤྲོད་ཀྱི་འགན་སྲུང་ལམ་ལུགས་འཐུས་ཚང་དུ་གཏོང་དགོས། མིག་སྔར། ལོ་ངོ་དྲུག་ཅུ་ལྷག་གི་སྨན་རྫས་ཀྱི་ཁེ་སྤོགས་ལེན་པའི་སྲིད་ཇུས་མེད་པར་བྱས་ཤིང་། སྡོད་དམངས་མི་སྒེར་གྱི་འཕྲོད་བསྟེན་འགྲོ་སྒོ་ཡིས་འཕྲོད་བསྟེན་སྤྱིའི་འགྲོ་སྒོ་ཟིན་པའི་སྡུར་ཚད་དེ་བརྒྱ་ཆའི་སུམ་ཅུའི་མན་དུ་ཇེ་དམའ་རུ་སོང་ཡོད། 

ཧའོ་པེ་ཧོང་ཧུའུ་ཉ་གསོ་རྭ་བར་ལོ་ངོ་ཉི་ཤུ་ལྷག་ལ་སྨན་པ་བྱས་པའི་འཐུས་མི་ཞེ་འེ་འུག་གིས་བཤད་རྒྱུར། ད་ལྟ་ཁོ་མོ་ཡོད་སའི་ཉ་གསོ་ར་བའི་ཉ་བ་དྲུག་བརྒྱ་ཚང་མ་རྣམ་པ་གསར་བའི་ཞིང་སྡེ་མཉམ་ལས་སྨན་བཅོས་ཁྲོད་ཞུགས་ཡོད་པ་དང་། གཞི་རྩའི་སྨན་རྫས་ཁྱབ་སྤེལ་བྱས་པར་བརྟེན། གཞི་རིམ་སྨན་པའི་ཡོང་སྒོ་དེ་སྨན་བཙོངས་པར་བརྟེན་མི་དགོས་པ་རེད། སྔོན་ཆད་གཞི་རིམ་ནས་ནད་ལ་སྟོན་དཀའ་བ་དང་སྨན་རིན་མཐོ་བའི་རྣམ་པ་དེར་འགྱུར་ལྡོག་བྱུང་བཞིན་ཡོད། 

དེ་དང་ལྷན་དུ། སྨན་བཅོས་ཀྱི་ཆེད་མཁས་པ་མང་པོས་བཤད་རྒྱུར། སྨན་རྫས་ཀྱི་ཁེ་སྤོགས་ལེན་པ་མེད་པར་བྱས་པ་དེས་སྨན་ཁང་སྐོར་ཞིག་གིས་ཚོད་ལྟའི་སྨན་རྫས་དང་སྨན་བཅོས་རྒྱུ་ཆ་སོགས་ཀྱི་སྟེང་ནས་ཁེ་སྤོགས་ལེན་སྲིད་མོད། སྨན་ལ་བརྟེན་ནས་སྨན་ཁང་སྐྱོང་བའི་སྲིད་ཇུས་དོན་ངོ་མའི་ཐོག་ནས་ལག་བསྟར་བྱས་རྗེས་ད་རུང་འགག་སྒོ་མང་པོ་ཞིག་བརྒལ་དགོས་པ་རེད། 

མཁར་གྲོང་གི་གསར་དུ་འཕར་སྣོན་བྱུང་བའི་ངལ་རྩོལ་པ་མང་ཆེ་བར་མཐོ་འབྲིང་དུས་རིམ་གྱི་སློབ་གསོ་མྱངས་སུ་འཇུག་དགོས།

ཏང་གི་ཚོགས་ཆེན་ཐེངས་བཅུ་དགུ་པའི་སྙན་ཞུའི་ནང་བསྟན་དོན། མཁར་གྲོང་གི་གསར་དུ་འཕར་སྣོན་བྱུང་བའི་ངལ་རྩོལ་པ་མང་ཆེ་བར་མཐོ་འབྲིང་དུས་རིམ་གྱི་སློབ་གསོ་མྱོང་དུ་འཇུག་པ་དང་། མི་སྔར་ལས་མང་ཞིག་ལ་མཐོ་རིམ་སློབ་གསོ་མྱངས་སུ་འཇུག་དགོས། 

མིག་སྔར། རང་རྒྱལ་གྱི་གསར་དུ་འཕར་སྣོན་བྱུང་བའི་ངལ་རྩོལ་པའི་ཆ་སྙོམས་ཀྱི་སློབ་གསོ་མྱངས་ཚད་དེ་ལོ་བཅུ་གསུམ་དང་གྲངས་ཆུང་གསུམ་ལས་བརྒལ་ཡོད་ལ། དེ་སློབ་ཆེན་གྱི་ལོ་རིམ་དང་པོའི་ཆུ་ཚད་དང་མཚུངས་མོད། ཡིན་ན་ཡང་། རྒྱལ་ཡོངས་ཀྱི་འཕེལ་རྒྱས་ཆུ་ཚད་དང་དོ་མཉམ་མིན་པ་དང་། ལྷག་པར་དུ་དབུས་རྒྱུད་དང་ནུབ་རྒྱུད་གྱི་དབུལ་ཕུངས་ས་ཁུལ་དུ་སློབ་གསོའི་ཐོན་ཁུངས་མི་འདང་བར་བརྟེན། མཐོ་འབྲིང་དུས་རིམ་གྱི་སློབ་གསོ་ཁྱབ་བརྡལ་བྱེད་ཚད་དམའ་བ་རེད།