“ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས”པའི་བརྗོད་དོན་སློབ་གསོའི་བྱ་འགུལ་སྤེལ་བའི་ཚུན་ལ།  མཚོ་ཤར་གྲོང་ཁྱེར་གྱིས་འཚོལ་ཞིབ་དང་དོན་འཁྱོལ་བྱེད་ཞོར་ཕྱོགས་སྡོམ་བྱ་རྒྱུ་རྒྱུན་འཁྱོངས་བྱས་ཏེ། ཕྱོགས་སོ་སོའི་ཏང་ཡོན་གྱི“འགྲོ་ཕྱོགས་ཤེས་དཀའ་བ་དང་། སློབ་གསོ་སྤེལ་དཀའ་བ། བྱེད་སྒོ་སྤེལ་དཀའ་བ། བྱེད་སྒོ་སྒྲིག་འཛུགས་བྱེད་དཀའ་བ། ཏང་ཡོན་དོ་དམ་བྱེད་དཀའ་བ། ནུས་པ་འདོན་སྤེལ་བྱེད་དཀའ་བ”བཅས་ཀྱི་གནད་དོན་ཧུར་ཐག་གིས་ཐག་གཅོད་བྱས་ཏེ། བརྗོད་དོན་སློབ་གསོ་ཁྱོན་ཡོངས་ལ་ཁྱབ་པ་དང་།  ཆད་ལུས་མེད་པ། ཕན་འབྲས་དངོས་ཐོན་པ་བཅས་བྱས་པས། མཚོ་ཤར་གྱི་ཁྱད་ཆོས་ལྡན་པའི་བརྗོད་དོན་སློབ་གསོ་ཁྱོན་ཡོངས་ལ་ཁྱབ་པའི་ལག་ལེན་གྱི་ཉམས་མྱོང་ལེགས་པོ་ཞིག་ཆགས།

གྲོང་ཁྱེར་ཡོངས་སུ་རོང་འབྲོག་པའི་ཏང་ཡོན་མང་བ་དང་། གཞི་རིམ་གྱི་ཏང་ཡོན་མང་བའི་དོན་དངོས་དང་། དེ་མིན་ཏང་ཡོན་ཡོངས་ཀྱི་ཁྲོད་བརྗོད་དོན་སློབ་གསོ་སྤེལ་བར་དངོས་ཡོད་ཀྱི་ཉམས་མྱོང་མེད་པའི་དོན་དངོས་ལ་དམིགས་ཏེ། མཚོ་ཤར་གྲོང་ཁྱེར་གྱིས་ཇུས་འགོད་དང་བཀོད་སྒྲིག་སྔོན་ལ་བྱ་རྒྱུ་རྒྱུན་འཁྱོངས་དང་། བརྗོད་དོན་སློབ་གསོ་ཁྱོན་ཡོངས་ལ་ཁྱབ་པའི་བྱེད་ཐབས་འཚོལ་བ། “འགོ་ཁྲིད་པ་དང་པོས་དམ་འཛིན་བྱ་རྒྱུ་རྒྱུན་འཁྱོངས་བཅས་བྱས་ནས་གོང་གིས་འོག་ལ་དཔེ་སྟོན་སྣེ་ཁྲིད་དང་། ཆེད་དོན་ཏང་གི་སློབ་ཚན་གྱི་ཁྲིད་སྟོན་རྒྱུན་འཁྱོངས་བྱས་ཏེ། ཐོག་མའི་བསམ་འདུན་དང་འགན་འཁྲི་གསལ་སྟོན་གྱིས་ཆབ་སྲིད་ཀྱི་འདུ་ཤེས་བརྟན་པོ་འཛུགས་པ་དང་། སྒོ་ཕྱེ་ནས་སློབ་གསོ་སྤེལ་རྒྱུ་རྒྱུན་འཁྱོངས་བྱས་ཏེ་འབད་བརྩོན་སྒོས་མང་ཚོགས་ཀྱི་ཐོབ་ཚོར་དང་། སྐྱིད་སྣང་། བདེ་འཇགས་ཀྱི་ཚོར་བ་བཅས་ཆེ་རུ་གཏོང་བ། ཡུན་ཕན་རྐྱེན་སྲོལ་འཚོལ་ཞིབ་བྱ་རྒྱུ་རྒྱུན་འཁྱོངས་བྱས་ཏེ་གཞི་རིམ་གྱི་རྨང་གཞི་སྲ་བརྟན་དུ་གཏོང་བར་ལམ་ལུགས་ཀྱི་གཞི་འཛིན་ས་འདོན་སྤོད་བྱས།

མཚོ་ཤར་གྲོང་ཁྱེར་གྱིས་ཚད་མཐོན་པོས་བརྗོད་དོན་སློབ་གསོ་ཁྱོན་ཡོངས་ལ་ཁྱབ་པའི་བྱ་བར་ཇུས་འགོད་བྱས་ཤིང་། བརྗོད་དོན་སློབ་གསོ་གཏིང་ཟབ་ཏུ་གཏོང་བར་སྐུལ་འདེད་བྱེད་དགོས་པའི་བླང་བྱ་ནན་མོ་བཏོན། རིམ་པ་སོ་སོའི་རྩ་འཛུགས་དང་ཏང་ཡོན་ལས་བྱེད་པའི་ཆབ་སྲིད་ཀྱི་འདུ་ཤེས་ཇེ་དྲག་ཏུ་གཏོང་བ་དང་། དམངས་ཆེད་དུ་དོན་དངོས་སྒྲུབ་པ་དང་འགན་འཁྲི་ཕྲག་ཏུ་ལེན་པའི་ཐོག་མའི་བསམ་འདུན་གྱི་འགན་འཁྲི་གཅིག་ཏུ་བསྒྲིལ་བ། “སྔོན་འགྲོ་གཅིག་དང་སྤུས་ལེགས་གཉིས”ཀྱི་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་བྱས་ནས་འབྱོར་ཕྱུག་དང་། དཔལ་ཡོན། འཆམ་མཐུན། མཛེས་སྡུག་བཅས་ཀྱི་མཚོ་ཤར་གསར་པ་འཛུགས་སྐྲུན་བྱེད་པའི་བསམ་པའི་སྒུལ་ཤུགས་སྔར་བས་འཕེལ་བར་བྱས།

མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གིས་བརྗོད་དོན་སློབ་གསོའི་བྱ་འགུལ་སྤེལ་བ་ནས་བཟུང་། དར་ལག་རྫོང་གིས་ཐོག་མཐའ་བར་གསུམ་དུ་མང་ཚོགས་ཀྱི་བསམ་འཆར་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་བྱེད་རྒྱུ་གནད་སར་བཟུང་ནས། འབད་བརྩོན་གྱི་ཁ་ཕྱོགས་དང་དག་ཐེར་བྱེད་ཐབས་གསལ་བོ་བཟོས་ཏེ་དག་ཐེར་བྱ་བ་ཏན་ཏིག་དང་དོན་ཐོག་ཏུ་འཁྱོལ་བར་འགན་ལེན་བྱས་པ་རེད།

རང་ངོས་གསར་བརྗེའི་སྙིང་སྟོབས་ལ་བརྟེན་ནས་ཞིབ་ལྟ་དང་བསམ་གཞིགས་ནན་ཏན་བྱེད་པ་དང་། གནད་དོན་འཚོལ་བ་དང་འབྱུང་རྩ་སྔོག་འདོན་བྱེད་པ། བྱེད་ཐབས་ནན་མོ་སྤྱོད་པ། “གཤིབ་བསྡུར་དྲུག་དང་ཟུང་འབྲེལ་གཅིག” “འགྲིག་མིན18”བཅས་གཞིར་བཟུང་ནས།   མི་འདང་ས་དང་གནད་དོན་འཚོལ་ཞིབ་བྱས་ཏེ། བསམ་འཆར་བསྡུ་ལེན་རེའུ་མིག་སྤྲོད་པ་དང་། བརྟག་དཔྱད་འདྲི་ཤོག་སྤྲོད་པ། བཞུགས་མོལ་ཚོགས་འདུ་འཚོགས་པ་སོགས་ཀྱི་རྣམ་པའི་ཐོག་ནས་གོང་རིམ་ཏང་རྩ་འཛུགས་དང་། གཙོ་སྐྱོང་སྡེ་ཁག རིམ་པ་དཀྱུས་མའི་སྡེ་ཁག ཞང་གྲོང་།  ས་གནས་སྡེ་ཁག  གཞི་རིམ་མང་ཚོགས་སོགས་ཀྱི་བསམ་འཆར་དང་གྲོས་གཞི་ཡོངས་ཁྱབ་ཏུ་བསྡུ་ལེན་བྱས་པར་མ་ཟད།  ཁྱོན་བསྡོམས་སྡེ་ཁག་གི་བསམ་འཆར37དང་རྫོང་རིམ་པའི་ལས་བྱེད་པའི་བསམ་འཆར195བསྡུ་ལེན་བྱས།  ཁོ་ཚོས་བཏོན་པའི་བསམ་འཆར་དང་གྲོས་གཞི་ལེགས་སྒྲིག་དང་ཕྱོགས་བསྡུས་བྱས་ནས་དམངས་གཙོའི་འཚོ་བའི་ཚོགས་འདུ་དང་རྩ་འཛུགས་འཚོ་བའི་ཚོགས་འདུའི་ཐོག་དབྱེ་ཞིབ་དང་ལེགས་སྒྲིག་བྱས་ནས་མང་ཚོགས་ཀྱིས་དོ་ཁུར་བྱེད་པའི་གནད་དོན་ཐག་གཅོད་ལེགས་པོ་བྱས།

བྱེད་ཐབས་གཏན་འཁེལ་དང་འཚོལ་ཞིབ། གཅིག་སྡུད་སྒོས་དག་ཐེར་བྱ་རྒྱུར་སྐུལ་འདེད་གཏོང་བ། ཞིང་ཆེན་དང་ཁུལ་ཏང་ཨུས་བཀོད་སྒྲིག་བྱས་པའི“ཆེད་དོན་བཅོས་སྒྲིག་ཁག་བཅུར”དམིགས་ཏེ། རྣམ་གྲངས་རེ་རེ་བཞིན་ཞིབ་བསྡུར་དང་རང་འགུལ་ངང་ངོས་འཛིན་རྩིས་ལེན་དང་། ཚད་གཞི་མཐོ་བ་དང་བླང་བྱ་ནན་མོ་བཏོན་ནས་གནད་དོན་ཐག་གཅོད་བྱེད་པ་དང་ཆབས་ཅིག གཏན་འཁེལ་བྱས་པའི་བཅོས་སྒྲིག་གནད་དོན་གཞིར་བཟུང་ནས་བཅོས་སྒྲིག་བྱེད་ཤུགས་ཆེ་རུ་གཏོང་བ་དང་། འབད་བརྩོན་གྱི་ཁ་ཕྱོགས་དང་ལེགས་བཅོས་བྱེད་ཐབས་ཁ་གསལ་བཟོ་བ། རྣམ་གྲངས་རེ་རེ་བཞིན་དག་ཐེར་དོན་འཁྱོལ་ལ་སྐུལ་འདེད་གཏོང་བ་བཅས་བྱས། ཀྲུང་དབྱང་གི་དབུལ་ཐར་མཁྲེགས་གཏོར་གྱི་ཆེད་དོན་སྐོར་གཟིགས་དང་། ཁོར་ཡུག་སྲུང་སྐྱོབ་ལྟ་ཞིབ། ནག་འཇོམས་ངན་སེལ་ལྟ་སྐུལ་མཛུབ་ཁྲིད། ཞིང་ཆེན་ཏང་ཨུའི་སྐོར་གཟིགས་ཚུར་ལན་བཅས་ཀྱི་འབུར་ཐོན་གནད་དོན་བཅོས་སྒྲིག་བྱ་བར་དམིགས་ནས“ཕྱིར་མིག་ལྟ་བའི”བྱ་བ་སྤེལ་ནས་གནད་དོན་ཡང་བསྐྱར་འབྱུང་བ་སྔོན་འགོག་བྱས།

ད་ལྟའི་བར་རྫོང་གི་ཚན་ཁག་ཆེན་པོ་བཞི་རུ་དག་ཐེར་ལས་འགན31ཁ་གསལ་བཟོས་བ་དང་། དག་ཐེར25དང་། དག་ཐེར4དག་ཐེར་བྱེད་བཞིན་པ། ཡུན་རིང་དག་ཐེར2བཅས་ཟིན་པ་དང་། སྡེ་ཚན་རང་ངོས་ཀྱི་གནད་དོན28ཐག་གཅོད་བྱས་པ་དང་། མང་ཚོགས་ཀྱི་བསམ་འཆར་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན18ཐག་གཅོད་བྱས་པ། གོང་འོག་མཉམ་འགུལ་གྱིས་གནད་དོན4ཐག་གཅོད་བྱས་པ། གཙོ་གནད་ལས་འགན4དོན་འཁྱོལ་ཡོང་བར་སྐུལ་འདེད་བཏང་།

པད་མ་རྫོང་གིས“ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་པའི”བརྗོད་དོན་སློབ་གསོའི་བྱ་འགུལ་སྤེལ་བ་ནས་བཟུང་།   “དམར་དམག་ལུང་པའི”གསར་བརྗེའི་སློབ་གསོའི་ཐོན་ཁུངས་སྤྱད་དེ། རྒྱ་ཆེའི་ཏང་ཡོན་ལས་བྱེད་པ་ཧུར་ཐག་སྒོས་སྒྲིག་འཛུགས་བྱས་ནས“གནས་མཆོག་ལ་མཇལ་སྐོར་ཐེངས་གཅིག སེམས་ཁམས་ལ་དག་ཁྲུས་ཐེངས་གཅིག བསམ་བློ་སྔོག་འདོན་ཐེངས་གཅིག སྙིང་སྟོབས་བཙོ་སྦྱང་ཐེངས་གཅིག”བཅས་གཙོ་བོར་བྱེད་པའི“གཅིག་ཅན་བཅུ་ཡི”སློབ་ཁྲིད་དང་སྦྱོང་རྡར་བྱེད་ཤུགས་རྒྱ་ཆེ་རུ་གཏང་བ་དང་། ལམ་ཐིག་དང་། འགྱུར་ལྡོག་ལ་ལྟ་བ། ཐོག་མའི་བསམ་འདུན་དྲན་པ། སློབ་གསོ་མྱོང་བ། བརྗོད་དོན་སློབ་གསོའི་ཡིད་དབང་འགུག་ནུས་ཆེ་རུ་གཏོང་བ་བཅས་བྱས་ཏེ་ཐོག་མའི་བསམ་འདུན་གསལ་བཤད་དང་འགན་འཁྲི་ལག་ལེན་བྱེད་པར་གྲུབ་འབྲས་ཐོབ་པར་བྱས།

རྒྱུས་ལོན་བྱུང་བ་ལྟར་ན། པད་མ་རྫོང་གིས་ཚད་གཞི་མཐོ་བའི་ཏང་གཤིས་སློབ་གསོའི་རྟེན་གཞི་བསྐྲུན་རྒྱུ་དེ། “ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་པའི”བརྗོད་དོན་སློབ་གསོར་སྐུལ་འདེད་གཏོང་བའི་ལག་ལེན་གྱི་གཞི་རྟེན་དུ་བརྩི་བ་དང་། གསར་བརྗེའི་སློབ་གསོའི་ལྟེ་གནས་དང་། “མདོག་གསུམ”གྱི་རིག་གནས་ཐོན་ལས་གླིང་། གསར་བརྗེའི་གློག་བརྙན་ཁང་། རྒྱང་སྐྱོད་སྙིང་སྟོབས་རིག་གནས་ལོ་རྒྱུས་ཁང་སོགས་རྨང་གཞིའི་སློབ་ཁྲིད་སྒྲིག་བཀོད་ལ་བརྟེན་ནས། སློབ་ཁྲིད་དང་། ལྟ་སྐོར། སྡོད་གནས་བཅས་གཞི་གཅིག་ཏུ་འདུས་པའི་གསར་བརྗེའི་སློབ་གསོའི་ཟས་རིགས་སྤུས་དག་བཏོན་པ་དང་། ཏང་གི་སློབ་གྲྭས་གཅིག་སྡུད་སློབ་གསོ་དང་། རྒྱང་སྐྱོད་དྲན་གསོ་ཁང་ལ་གཟིགས་སྐོར།  ཆེད་དོན་ཏང་གི་སློབ་ཚན་ཉན་པ། གསར་བརྗེའི་གླུ་གཞས་སྐད་གསང་མཐོན་པོས་ལེན་པ། ཏང་ཞུགས་དམ་བཅའ་བསྐྱར་དྲན་བྱེད་པ། མཉམ་སྡེབ་རྒྱ་སྐྱེད་སྦྱོང་བརྡར་སོགས་བརྗོད་དོན་སློབ་གསོའི་ཐོན་ཁུངས་གསར་པ་བསྣན།

དེ་དང་ཆབས་ཅིག པད་མ་རྫོང་གིས“ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་དམ་པོར་བཅངས་པའི”བརྗོད་དོན་སློབ་གསོ་དང་ཟུང་འབྲེལ་སྒོས་གསར་བརྗེའི་དྲན་ཤེས་ཟབ་མོ་དང་། ངོ་མཚར་བའི་གསར་བརྗེའི་གཏམ་རྒྱུད། གསར་བརྗེའི་ལོ་རྒྱུས་བཅས་ཞིང་ཆེན་ཡོངས་དང་ཐ་ན་རྒྱལ་ཡོངས་སུ་དྲིལ་སྒྲོག་དང་འོས་སྦྱོར་བྱས་ཏེ། ཞིང་ཆེན་ཕྱི་ནང་གི་ཏང་ཡོན་ལས་བྱེད་པ་བརྗོད་དོན་སློབ་གསོའི་ནང་ཞུགས་པའི་ཡིད་དབང་བཀུག  བསྡོམས་རྩིས་བྱས་པ་ལྟར་ན། 2019ལོའི་ལོ་སྟོད་ནས་ད་བར་པད་མ་རྫོང་གི“དམར་དམག་ལུང་པ”ཡིས་ཞིང་ཆེན་ཕྱི་ནང་དུ་བརྗོད་དོན་སློབ་གསོའི་གསོ་སྦྱོང་འཛིན་གྲྭ་སྐོར་ཐེངས113སྒྲུབ་པ་དང་ཏང་ཡོན་ལས་བྱེད་པ་མི་ཐེངས་ཆིག་སྟོང་བརྒྱད་བརྒྱ་ང་བཞི་ཞུགས་པ་རེད།

རྨ་ལྷོ་བོད་རིགས་རང་སྐྱོང་ཁུལ་ཧི་ནན་རྫོང་གིས་བརྗོད་དོན་སློབ་གསོའི་བྱ་འགུལ་སྤེལ་བ་ནས་བཟུང་།  གཞི་རྩའི་ལས་འགན་ལ་དམིགས་ནས། གནད་དོན་གྱི་ཁྲིད་ཕྱོགས་དང་དམིགས་འབེན་གྱི་ཁྲིད་ཕྱོགས་རྒྱུན་འཁྱོངས་བྱས་པ་དང་། མང་ཚོགས་ཡིད་ཚིམ་པར་བྱེད་རྒྱུ་དེ་ཚད་གཞི་རུ་བཟུང་ནས།   དག་ཐེར་ལེགས་བཅོས་བྱེད་པར་མུ་མཐུད་དུ་ཤུགས་སྣོན་བྱེད་པ་དང་།  དག་ཐེར་ལེགས་བཅོས་ཀྱི་གྲུབ་འབྲས་སྲ་བརྟན་དུ་གཏོང་བའི་ཐད་བློ་འདོན་ཇུས་འགོད་བྱས།

རྫོང་ཡོངས་ཀྱི་རིམ་པ་སོ་སོའི་ལས་བྱེད་པས་དམིགས་འབེན་བཞི་སྣེ་ཁྲིད་དུ་བྱས་པ་དང་། འགན་འཁྲི་ལས་འགན་དང་ཟུང་འབྲེལ་བྱས་པ། དྲོད་འདོན་དང་གཟན་རྩྭ་ཉར་གསོག་སོགས་མང་ཚོགས་ལ་སེམས་ཁུར་ཆེ་བའི་གནད་དོན་དང་དཀའ་གནད་ལ་དམིགས་ནས། རང་འགུལ་སྒོས་ཐབས་ཇུས་བཏོན་པ་དང་། བསམ་བློ་བརྗེ་རེས་དང་མཐུན་སྦྱོར་བྱས། རྫོང་གི་ཁྲུའུ་རིམ་པའི་ཏང་ཡོན་འགོ་ཁྲིད་ལས་བྱེད་པ28ཀྱིས་གཞི་རིམ་གྱི་འབྲེལ་འདྲིས་བྱེད་ས79བཙུགས་པ་དང་། རང་འགུལ་སྒོས་འབྲེལ་འདྲིས་བྱེད་ས་རུ་སོང་ནས་ལྟ་སྐུལ་མཛུབ་སྟོན་ཐེངས51བྱས་ནས། དངོས་ཡོད་གནད་དོན35ཐག་བཅད་པ་དང་། རྟོག་ཞིབ་ཚན་ཆུང72ཀྱིས་རྟོག་ཞིབ་ཁྲོད་རྙེད་པའི་གནད་དོན་དག་ཡུལ་དངོས་ནས་ཐག་གཅོད་བྱས་པ་དང་།  གནད་དོན་གཙོ་བོ་དག་ཆེད་བསྐོས་འགོ་ཁྲིད་ཀྱིས་མཐུན་སྦྱོར་ཐག་གཅོད་བྱས་ནས། མང་ཚོགས་ཀྱི་དངོས་ཡོད་དཀའ་ཁག་ཐག་བཅད།

རྫོང་དབུལ་སྐྱོར་གསར་སྤེལ་ཅུའུ་ཡིས་ཆེད་སྤྱོད་མ་དངུལ་སྒོར་འབུམ་གསུམ་དང་ཁྲི་དྲུག་བྱིན་པ་དང་ལས་བྱེད་པ180ལ་གསོ་སྦྱོང་བྱེད་པའི་འཆར་གཞི་བཀོད་དེ། མང་ཚོགས་ཕྱུག་བསྒྱུར་གྱི་ལམ་བུ་གསར་བ་རྒྱ་སྐྱེད། རྫོང་སྡོད་ཁང་མཁར་གྲོང་འཛུགས་སྐྲུན་ཅུའུ་ཡིས་བཟོ་སྐྲུན་ལས་ཁུངས་ལ་མཐུན་སྦྱོར་བྱས་ནས། དུས་ཐོག་ཏུ་དྲོད་འདོན་སྦུག་ལམ་གཙང་དག་བྱས་པ་དང་སྦུག་ལམ་རྙིང་བ་བརྗེ་སྤོར་བྱས་ཤིང་། དྲོད་འདོན་གྱི་རིམ་སྤོར་བསྒྱུར་བཀོད་ཡོངས་འགྲུབ་བྱས་པ་མ་ཟད་ལག་བསྟར་བྱས།

རྫོང་ཡོངས་སུ་སྡེ་ཁག་སོ་བདུན་གྱིས་རང་འགུལ་ངང་ཁས་ལེན་ལག་བསྟར་གྱི་བྱེད་སྒོ་སྤེལ་ནས་ཁས་ལེན་བྱས་པའི་དོན་ཚན་ཆིག་བརྒྱ་རེ་གཅིག་ཡོངས་བསྒྲགས་བཅོས་སྒྲིག་བྱས་པ་དང་། ཏང་ཀྲི་པུའུ་ཆིག་བརྒྱ་བཅུ་བཞི་ཡིས་ཁྱོན་བསྡོམས་གནད་དོན་དྲུག་བརྒྱ་གྱ་བདུན་ཞིབ་བཤེར་བྱས་ཤིང་། དག་ཐེར་ཡོ་བསྲང་གི་ཁས་ལེན་དོན་ཚན་སུམ་བརྒྱ་བཅུ་བདུན་བཏོན་པ། ཁས་ལེན་ཁག་ཉིས་བརྒྱ་ཉེར་གསུམ་ལག་ལེན་བྱས་ནས་དངོས་ཡོད་གནད་དོན་ཆིག་བརྒྱ་རེ་གསུམ་ཐག་གཅོད་བྱས་པ། ཏང་ཡོན་སྟོང་གཉིས་དང་བཞི་བརྒྱ་བཅུ་དྲུག་གིས་ཁྱོན་སྡོམ་གནད་དོན་སྟོང་དགུ་དང་དྲུག་བརྒྱ་རེ་བཞི་ལ་ཞིབ་དཔྱད་བྱས་པ་དང་། དག་ཐེར་ཡོ་བསྲང་གི་ཁས་ལེན་དོན་ཚན་སྟོང་ལྔ་དང་བདུན་བརྒྱ་སོ་བཞི་བཏོན་པར་མ་ཟད། ཁས་ལེན་དོན་ཚན་སྟོང་གསུམ་་དང་བཞི་བརྒྱ་ཞེ་བཞི་ལག་ལེན་བྱས་ལ། དངོས་ཡོད་གནད་དོན་སྟོང་གཉིས་དང་རེ་དྲུག་ཐག་གཅོད་བྱས། རྫོང་གི་སྡེ་ཁག་ཆེན་པོ་བཞི་རུ་དག་ཐེར་ལས་འགན་ཞེ་གཉིས་བཏོན་པ་དང་། དག་ཐེར་བཅོས་སྒྲིག་བྱ་བ་བཅུ་དགུ་ལེགས་འགྲུབ་བྱུང་བ་དང་། དག་ཐེར་བཅོས་སྒྲིག་བྱ་བ་བཅུ་ཐག་གཅོད་ལེགས་པོ་བྱེད་བཞིན་ཡོད། ཡུན་རིང་དག་ཐེར་ལེགས་བཅོས་བཅུ་གསུམ་བྱས་པ་དང་། ཚན་པ་རང་ངོས་ཀྱི་གནད་དོན་ཉེར་བརྒྱད་ཐག་གཅོད་བྱས། མ་དངུལ་སྒོར་འབུམ་དྲུག་དང་ཁྲི་བདུན་སྟོང་གཉིས་ཉིས་བརྒྱ་བཏང་ནས་མང་ཚོགས་ཀྱི་དཀའ་ངལ་དང་སེམས་ཁྲལ་གནད་དོན་བདུན་ཐག་གཅོད་བྱས་པ་དང་། གོང་འོག་མཉམ་འགུལ་གྱིས་གནད་དོན་དགུ་ཐག་གཅོད་བྱས་པ། གཙོ་གནད་ལས་འགན་ལྔ་དོན་འཁྱོལ་བྱེད་རྒྱུར་སྐུལ་འདེད་བཏང་བ་རེད།

རྩོམ་སྒྲིག་པ། སྒྲོལ་མ་སྐྱིད།