བོད་ལྗོངས་ཀྱི་ལས་བྱེད་པ་དང་མང་ཚོགས་ཀྱིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་ལ་གྲོས་བསྡུར་ལེགས་པོ་བྱས།

ལྗོངས་ཏང་ཨུའི་རྩ་འཛུགས་པུས་ཚོགས་འདུ་འཚོགས་ཏེ་དུས་ཐོག་ཏུ་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་བརྒྱུད་བསྒྲགས་བྱས།

དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཁྱོན་ཡོངས་ནས་ལག་བསྟར་བྱས་ཏེ་མཐུན་སྒྲིལ་དང་། འབྱོར་ཕྱུག དཔལ་ཡོན། འཆམ་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་ལེགས་པོ་བྱེད་དགོས།     ཟླ8ཚེས28ནས་ཚེས29ཉིན་བར། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་པེ་ཅིན་དུ་འཚོགས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསུང་བཤད་གལ་ཆེན་གནང་སྟེ་ཀྲུང་དབྱང་གི་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་འཚོགས་ཚུན་གྱི་བྱ་བའི་གྲུབ་འབྲས་དང་ཉམས་མྱོང་ལ་ཡོངས་ཁྱབ་ཏུ་ཕྱོགས་སྡོམ་གནང་བ་དང་། མིག་སྔའི་བོད་ལྗོངས་ཀྱི་ལས་དོན་ལ་འཕྲད་པའི་དུས་བབ་ལ་དབྱེ་ཞིབ་གཏིང་ཟབ་གནང་བ། དུས་རབས་གསར་པའི་ཏང་གི་བོད་སྐྱོང་ཐབས་ཇུས་དང་བོད་ལྗོངས་ཀྱི་ལས་དོན་ཡག་པོ་བསྒྲུབས་པའི་མཛུབ་སྟོན་བསམ་བློར་དགོངས་འགྲེལ་གནང་བ། མིག་སྔར་དང་སླད་ཕྱིན་དུས་སྐབས་ཤིག་གི་བོད་ལྗོངས་ཀྱི་ལས་དོན་གྱི་དམིགས་ཚད་ལས་འགན་དང་། འཐབ་ཕྱོགས་སྲིད་ཇུས། འཐབ་ཇུས་བྱེད་ཐབས་བཅས་གསལ་བོར་བཏོན་ཡོད། དེ་ནི་དུས་རབས་གསར་པར་བོད་ལྗོངས་ལས་དོན་ལ་མཛུབ་སྟོན་བྱེད་པའི་རྩ་འཛིན་རང་བཞིན་གྱི་ཚད་ལྡན་ཡིག་ཆ་ཞིག་ཡིན།

ཚོགས་འདུའི་གནས་ཚུལ་ཁྱབ་བསྒྲགས་བྱས་རྗེས་རང་སྐྱོང་ལྗོངས་ཀྱི་རྒྱ་ཆེའི་ལས་བྱེད་པ་དང་ལས་བཟོ་བ། མི་རིགས་ཁག་གི་མི་དམངས་མང་ཚོགས་ཀྱིས་མགྱོགས་མྱུར་ངང་དྲ་རྒྱ་དང་། བརྙན་འཕྲིན། རླུང་འཕྲིན་སོགས་ཀྱི་ཐོག་ནས་རྒྱུས་ལོན་ཞིབ་མོ་བྱས་ཏེ་ཚོགས་འདུའི་དགོངས་དོན་ནན་ཏན་སྒོས་སློབ་སྦྱོང་བྱས་པས་གངས་ལྗོངས་ས་གཞི་ཆེན་པོར་སློབ་སྦྱོང་གི་ཚ་རླབས་ཤིག་དྲག་ཏུ་འཕྱུར།

ཚང་མས་ཀྲུང་དབྱང་གི་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ནི་བོད་ལྗོངས་མི་དམངས་ཀྱི་ཆབ་སྲིད་འཚོ་བའི་ཁྲོད་ཀྱི་དགེ་མཚན་ལྡན་པའི་བྱ་བ་ཞིག་ཡིན་ལ། དོན་ཆེན་ཞིག་དེ་བས་ཀྱང་ཡིན། ས་མཐོའི་མི་དམངས་ཀྱིས་སྤྱི་ཁྱབ་ཧྲུའུ་ཅིའི་བརྩེ་སེམས་མཚོ་ལས་ཟབ་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ས་མཐོར་དམིགས་བསལ་ཐུགས་ཁུར་དང་གཟིགས་སྐྱོང་གནང་བ་སེམས་ལ་བརྟན་པོར་འཆང་བ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་འགྲན་ཟླ་བྲལ་བའི་ཁྱད་འཕགས་སེམས་ལ་བརྟན་པོར་འཆང་རྒྱུ་ཡིན་ཞེས་འཕྲོ་རིམ་འཕྲོར་བརྗོད་བྱུང་། ཚང་མས་རླབས་ཆེན་གྱི་ཀྲུང་གོ་གུང་ཁྲན་ཏང་ནི་ནམ་ཡང་བོད་ལྗོངས་མི་རིགས་ཁག་གི་མི་དམངས་ཀྱི་བློ་གཏད་ས་དང་། རླབས་ཆེན་མེས་རྒྱལ་ནི་ནམ་ཡང་ང་ཚོའི་སྲ་ཞིང་བརྟན་པའི་རྒྱབ་རྟེན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ནི་ང་ཚོ་དཔའ་མཛངས་རྟུལ་ཕོད་ཀྱིས་རྒྱང་སྐྱོད་ལམ་བུ་གསར་པར་བསྐྱོད་རྒྱུར་མཛུབ་སྟོན་བྱེད་པའི་རླབས་ཆེན་གྱི་དར་ཆ། དུས་རབས་གསར་པའི་ཏང་གི་བོད་སྐྱོང་ཐབས་ཇུས་ནི་ང་ཚོས་བོད་ལྗོངས་ཀྱི་ལས་དོན་ཡག་པོ་སྒྲུབ་པར་མཛུབ་སྟོན་བྱེད་པའི་རྩ་བའི་གཞི་འཛིན་ས་བཅས་ཡིན། ང་ཚོས་ངེས་པར་དུ་འདུ་ཤེས་བཞི་ཇེ་ཟབ་ཏུ་གཏོང་བ་དང་། ཡིད་རྟོན་བཞི་ཇེ་བརྟན་དུ་གཏོང་བ། སྲུང་སྐྱོབ་གཉིས་སྒྲུབ་ཐུབ་པ་བཅས་བྱས་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ཟབ་སྦྱོང་མཐིལ་རྟོགས་བྱ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ལ་བརྩིས་ཏེ།  དོན་སྙིང་གཙོ་བོ་དང་དགོངས་དོན་གྱི་ངོ་བོ་ཁོང་དུ་ཆུད་པར་བྱས་ནས་ལས་ཀར་སྐུལ་འདེད་གཏོང་བའི་སྒུལ་ཤུགས་ཆེན་པོར་འགྱུར་བར་བྱས་ཏེ་མཐུན་སྒྲིལ་དང་། འབྱོར་ཕྱུག དཔལ་ཡོན།  འཆམ་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་བ་འཛུགས་སྐྲུན་ཏན་ཏིག་བྱེད་པ་དང་།  དུས་དང་རྣམ་པ་ཀུན་ཏུ་བྱ་སྤྱོད་དངོས་ཀྱི་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་ལ་ལྷག་བསམ་རྣམ་དག་བྱེད་དགོས་པའི་ངོས་འཛིན་མགྲིན་གཅིག་ཏུ་བྱས་པ་རེད།

ཟླ8ཚེས29ཉིན་གྱི་ཕྱི་དྲོར། བོད་རང་སྐྱོང་ལྗོངས་ནོར་སྲིད་ཐིན་གྱི་ལས་བྱེད་པ་དང་ལས་བཟོ་བ་དག་ཚོགས་ཁང་དུ་འཛོམས་ནས་མཉམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་གི་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་བྱ་རྒྱུར་དམིགས་ནས་གྲོས་བསྡུར་ལེགས་པོ་བྱས། ལྗོངས་ནོར་སྲིད་ཐིན་གྱི་ཏང་ཙུའུ་ཧྲུའུ་ཅིའམ་ཐིན་ཀྲང་ཡོན་ཏན་གྱིས་གོམ་སྟབས་རྗེས་མར། ང་ཚོས་མར་ཁེ་སི་རིང་ལུགས་ཀྱི་བདེན་དོན་གྱི་འོད་སྣང་འཕྲོ་བའི་རྩ་འཛིན་རང་བཞིན་གྱི་ཚད་ལྡན་ཡིག་ཆ་འདི་རང་འགུལ་ངང་སློབ་སྦྱོང་དང་ཟབ་སྦྱོང་མཐིལ་ཕྱིན་བྱེད་པའི་རྨང་གཞིའི་ཐོག རིགས་པའི་གཞུང་ལུགས་ལྟེ་བའི་ཚོགས་ཆུང་གི་སློབ་སྦྱོང་དང་། ཚོགས་འདུ་གསུམ་དང་སློབ་ཚན་གཅིག ཆེད་དོན་ཟུར་ཁྲིད། བརྗེ་རེས་དང་བགྲོ་གླེང་སོགས་བྱ་ཐབས་སྣ་ཚོགས་བརྒྱུད་དེ། ཚོགས་འདུའི་ཐོག་གཏན་འཁེལ་བྱས་པའི་ནོར་སྲིད་དང་འབྲེལ་བའི་ལས་དོན་གྱི་ལས་འགན་དང་བཀོད་སྒྲིག་རེ་རེར་ གསལ་འགྲེལ་ཞིབ་ཚགས་བྱས་ཏེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་སྣ་ཚོགས་དོན་ཐོག་ཏུ་འཁྱོལ་བར་འགན་ལེན་བྱ་དགོས་ཞེས་དེ་ལྟར་བཤད།

ཟླ8ཚེས29ཉིན་གྱི་དགོང་མོར། གློག་འོད་ཆེམ་ཆེམ་དུ་འཕྲོ་བའི་ཡུལ་སྨད་གྲོང་ཚོ་ནས་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་ཡང་ཡང་གྲགས། དུས་རབས་ཀྱི་མིག་དཔེ་སྒྲོལ་དཀར་དང་གཡང་འཛོམས་གཅེན་གཅུང་གཉིས་ཀྱིས་ཡུལ་མི་ཚོ་དང་མཉམ་དུ་གསར་འགྱུར་མཉམ་བསྒྲགས་ལེ་ཚན་ལ་བལྟས་པ་རེད། སྤྱི་ཁྱབ་ཧྲུའུ་ཅིས་ང་ཚོའི་ཐོན་སྐྱེད་དང་འཚོ་བར་ཐུགས་ཁུར་ཆེན་པོ་གནང་གི་ཡོད། ཏང་དང་སྲིད་གཞུང་གི་ཐུགས་ཁུར་དང་བྱམས་སྐྱོང་འོག་ཡུལ་སྨད་འདི་ཉིད་མཐའ་མཚམས་འབྱོར་འབྲིང་དཔེ་སྟོན་ཡུལ་ཚོར་བསྐྲུན་པ་དང་། ཏང་གི་འོད་ཟེར་གངས་ལྗོངས་ས་མཐོའི་རི་ཀླུང་ཀུན་ཏུ་ཁྱབ་པ་དང་དུས་དང་རྣམ་པ་ཀུན་ཏུ་ང་ཚོའི་སེམས་ལ་དྲོད་ཁོལ་སྦྱིན་བཞིན་ཡོད། ཐེངས་འདིའི་ཚོགས་འདུའི་ཐོག་སླད་ཕྱིན་བོད་ལྗོངས་འཕེལ་རྒྱས་གཏོང་བའི་འཆར་གཞི་སླར་ཡང་བཀོད་སྒྲིག་གནང་ནས་བོད་ལྗོངས་ཀྱི་ལས་བྱེད་པ་དང་མང་ཚོགས་ལ་གཟིགས་སྐྱོང་སྲིད་ཇུས་གསར་པ་རབ་དང་རིམ་པ་བཟོས་པས་ང་ཚོར་སེམས་འགུལ་ཆེན་པོ་ཐེབས་བྱུང་ལ། མི་སེམས་ལ་སྐུལ་མ་ཐེབས་པ་ཞིག་ཀྱང་རེད།  ང་ཚོས་ངེས་པར་དུ་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བྱས་ནས། ཡིད་ཆེས་བརྟན་པོས་ཏང་གི་རྗེས་སུ་འབྲང་བ་དང་། སྐལ་བཟང་མེ་ཏོག་ཇི་བཞིན་གངས་ལྗོངས་ཀྱི་མཐའ་མཚམས་སུ་རྩ་བ་བརྟན་པོ་ཚུགས་པ། བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱེད་པ། མེས་རྒྱལ་མཐའ་མཚམས་ཀྱི་རྩྭ་རྩི་ཤིང་ཚུན་ཆད་ལ་སྲུང་སྐྱོབ་ཡག་པོ་བྱེད་པ། མཐའ་མཚམས་དེ་བས་བདེ་འཇགས་དང་བརྟན་ལྷིང་ཞིག་ཏུ་འཛུགས་སྐྲུན་བཅས་བྱས་ཏེ་གཡུར་དུ་ཟ་བའི་གྲུབ་འབྲས་ཐོག་ནས་སྤྱི་ཁྱབ་ཧྲུའུ་ཅིས་བོད་ཀྱི་མི་རིགས་ཁག་གི་མང་ཚོགས་ལ་ཐུགས་ཁུར་དང་བྱམས་སྐྱོང་གནང་བར་བཀའ་དྲིན་འཇལ་དགོས་ཞེས་སྒྲོལ་དཀར་གྱིས་དེ་ལྟར་བཤད།

སྤྱི་ཁྱབ་ཧྲུའུ་ཅིས། བོད་ལྗོངས་རྒྱུན་མཐུད་བརྟན་ལྷིང་དང་འཕེལ་རྒྱས་མགྱོགས་པོ་མངོན་འགྱུར་བྱུང་བ་ནི་ཏང་དང་རྒྱལ་ཁབ་ཀྱི་ལས་དོན་སྤྱི་ཡོངས་ལ་ལེགས་སྐྱེས་གལ་ཆེན་ཕུལ་བ་ཞིག་རེད་ཅེས་གསུངས་ཡོད། སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་གི་ཁས་ལེན་གང་ལེགས་ཐོབ་པས་དེ་ནི་ང་ཚོའི་གཟི་བརྗིད་ཆེན་པོ་ཞིག་ཡིན་ལ་ངར་ཤུགས་ཆེན་པོ་འཕེལ་བ་དང་སྐུལ་ལྕག་ཆེན་པོ་ཐེབས་པ་ཞིག་ཀྱང་རེད་ཅེས་བོད་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཡི་ཁོངས་མི་ཀྲུའུ་ཞི་གཞོན་པ་པ་སངས་རྡོ་རྗེས་སེམས་འགུལ་ཚད་མེད་ཐེབས་བཞིན་དུ་དེ་ལྟར་བརྗོད་ཅིང་།  ཁོས་བོད་ལྗོངས་ལས་དོན་སྐོར་གྱི་ཏང་ཀྲུང་དབྱང་གི་འཐབ་ཕྱོགས་སྲིད་ཇུས་ནི་རྦད་དེ་ཡང་དག་པ་ཞིག་ཡིན་པ་ལག་ལེན་གྱི་ཐོག་ནས་ར་སྤྲོད་བྱུང་ཡོད། བོད་ལྗོངས་ལ་གྲུབ་འབྲས་ཆེན་པོ་འདི་དག་ཐོབ་དོན་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁ་ཕྱོགས་གཏན་འཁེལ་དང་རྒྱལ་ཁ་ཕུ་ཐག་བཅད་པ་ཡིན་པས་རེད། སྤྱི་ཁྱབ་ཧྲུའུ་ཅིའི་གསུང་བཤད་ནང་གསལ་པོར་བཏོན་པའི་འགན་ལེན་བཞི་དང་ངེས་པར་བཅུའི་ནང་ཏང་གིས་མི་དམངས་ཀྱི་འགོ་ཁྲིད་དེ་བོད་སྐྱོང་དང་། བོད་བརྟན་ལྷིང་། བོད་དར་རྒྱས་བཅས་ཀྱི་གྲུབ་འབྲས་ཐོབ་པའི་ཉམས་མྱོང་ལ་ཕྱོགས་སྡོམ་གནང་བ་མ་ཟད། རང་རེའི་ཏང་གིས་བོད་ལྗོངས་ལས་དོན་ལ་འཛིན་པའི་ཆོས་ཉིད་རང་བཞིན་གྱི་ངོས་འཛིན་ཇེ་ཟབ་ཏུ་ཕྱིན་ཡོད། ང་ཚོས་སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱི་དགོངས་དོན་དང་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས་རྒྱ་ཆེའི་དམངས་གཉེར་དཔལ་འབྱོར་མི་སྣས་སེམས་ཤུགས་གཅིག་སྒྲིལ་དང་བློ་གཅིག་སེམས་གཅིག་བྱ་རྒྱུའི་སློབ་གསོ་བཏང་ནས་དུས་རབས་གསར་པའི་ནང་བོད་ལྗོངས་ཡུན་རིང་བདེ་འགོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ཞེས་དེ་ལྟར་བཤད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་ཐོག་མཐའ་བར་གསུམ་དུ་མཚོ་བོད་ས་མཐོའི་སྐྱེ་ཁམས་སྲུང་སྐྱོབ་ལ་ཚད་མཐོའི་མཐོང་ཆེན་གནང་གི་ཡོད། ཀྲུང་དབྱང་གི་བོད་ལྗོངས་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་བོད་ས་མཐོའི་སྐྱེ་ཁམས་སྲུང་སྐྱོབ་ཡག་པོ་བྱེད་པ་ནི་ཀྲུང་ཧྭ་མི་རིགས་ཀྱི་འཚོ་གནས་དང་འཕེལ་རྒྱས་ལ་ལེགས་སྐྱེས་ཆེན་པོ་ཕུལ་བ་ཡིན་ཞེས་ནན་གྱིས་བསྟན་ཡོད།   འབྲི་རུ་རྫོང་འབྲི་རུ་གྲོང་རྡལ་གྱི་སྡེ་མི་སྒྲོལ་མས་བཤད་རྒྱུར། ངས་དྲ་ཐོག་ནས་སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་ལ་སློབ་སྦྱོང་བྱས་པ་ཡིན་པས་མྱོང་ཚོར་ཧ་ཅང་ཟབ་མོ་བྱུང་། ངས་ངེས་པར་དུ་སྤྱི་ཁྱབ་ཧྲུའུ་ཅིའི་བླང་བྱ་གལ་ཆེན་དང་མངག་བཅོལ་ཆེན་པོ་ཡིད་ལ་བརྟན་པོར་འཆང་བ་དང་རང་ཉིད་ནས་འགོ་བརྩམས་ཏེ་ཁོར་ཡུག་སྲུང་སྐྱོབ་ཀྱི་འདུ་ཤེས་ཇེ་ཟབ་ཏུ་བཏང་ནས། ཚང་མ་དང་མཉམ་དུ་རང་ཉིད་ཀྱི་མིག་ལ་གཅེས་སྤྲས་བྱེད་པ་ཇི་བཞིན་ང་ཚོའི་སྐྱེ་ཁམས་ཁོར་ཡུག་ལ་སྲུང་སྐྱོབ་ལེགས་པོ་བྱ་རྒྱུ་ཡིན་ཟེར།

རྩོམ་སྒྲིག་པ། སྒྲོལ་མ་སྐྱིད།