2014ལོའི་ཟླ6པ་ནས་བཟུང་ཞིང་ལས་པུའུ་ཡིས་རང་ཞིང་དུ་རྒྱལ་ཡོངས་ཀྱི་ཆེས་ཐོག་མའི་རྒྱལ་ཡོངས་ཀྱི་རྩྭ་སའི་སྐྱེ་ཁམས་ཕྱུགས་ལས་ཚོད་ལྟའི་ཁུལ་གསར་འཛུགས་བྱས་ཤིང་། རང་ཞིང་གིས་གོ་སྐབས་དམ་འཛིན་དང་དོན་དངོས་གསར་གཏོད་ཀྱིས་སྐྱེ་ཁམས་ཕྱུགས་ལས་མ་རྐང་མཉམ་ལས་ལམ་ལུགས་ཀྱི་མཉམ་ལས་ཁང་འཛུགས་བསྐྲུན་བྱེད་རྒྱུ་དེ་གཙོ་གནད་དུ་བཟུང་ཞིང་། མིག་སྔར་སྐས་རིམ་རང་བཞིན་གྱི་གྲུབ་འབྲས་བླངས་བ་མ་ཟད། ཤུགས་ཆེན་པོས་སྲོལ་རྒྱུན་རྩྭ་སའི་ཕྱུགས་ལས་དེ་རིམ་འཕར་བྱེད་པར་སྐུལ་འདེད་བྱས་ཡོད།

ལོ་གཉིས་ལྷག་གི་རིང་ལ། རང་ཞིང་གིས་བཅོས་སྒྱུར་གསར་གཏོད་དེ་སྒུལ་ཤུགས་དུ་བཟུང་ནས། རྩྭ་སའི་ཕྱུགས་ལས་འཕེལ་རྒྱས་ཀྱི་བྱེད་ཐབས་གཙོ་བོའི་བླང་བྱ་ལྟར། རྩྭ་སའི་སྐྱེ་ཁམས་ཕྱུགས་ལས་འཕེལ་རྒྱས་ལམ་ལུགས་དེ་གཙོ་གནད་དུ་བཟུང་བ་དང་རྩྭ་སར་སྲུང་སྐྱོབ་བྱེད་པ་མངོན་འགྱུར་དང་ཕྱུགས་ལས་ཀྱི་ཕན་ནུས་མཐོར་འདེགས། མང་ཚོགས་ཀྱི་ཡོང་སྒོ་འཕར་སྣོན་བཅས་དམིགས་འབེན་དུ་བཟུང་ནས། རྩྭ་སའི་ཕྱུགས་ལས་རིམ་འཕར་གྱི་ནུས་ལྡན་བྱེད་ཐབས་འཚོལ་ཞིབ་བྱས་ཤིང་། སྔོན་ལ་ཚོད་ལྟ་དང་དེ་ནས་དཔེར་མཚོན་ཅན་དར་སྤེལ། ཁྱོན་ཡོངས་ནས་མཐོར་འདེགས་སུ་གཏོང་བ་བཅས་གཞིར་བཟུང་ནས་འཕེལ་རྒྱས་ཀྱི་འཐབ་ཇུས་ལྟར། གོང་འོག་བར་གསུམ་ཚང་མས་སྐྱེ་ཁམས་ཕྱུགས་ལས་མ་རྐང་མཉམ་ལས་ལམ་ལུགས་ཀྱི་མཉམ་ལས་ཁང་གསར་འཛུགས་དང་འཕེལ་རྒྱས་ལ་སྐུལ་འདེད་བྱས།

ཞིང་ཆེན་ཞིང་ཕྱུགས་ཐིན་གྱི་ཐིན་ཀྲང་ཏུའུ་མའོ་ཐེན་གྱིས་བཤད་རྒྱུར། ཚོད་ལྟའི་ཁུལ་གསར་འཛུགས་བྱས་པ་ནས་བཟུང་། རྒྱལ་སྲིད་སྤྱི་ཁྱབ་ཁང་དང་ཞིང་ལས་པུའུ། དེ་མིན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་བཅས་ཀྱིས་དེ་ལ་མཐོང་ཆེན་ཚད་མཐོན་གནང་བར་མ་ཟད། ཆེས་མཐོ་ས་ནས་ཇུས་འགོད་བྱས་ཞིང་། དཔེར་ན་ཞིང་ལས་པུའུ་ཡིས་མཚོ་སྔོན་ཞིང་ཆེན་གྱི་རྩྭ་སའི་སྐྱེ་ཁམས་ཕྱུགས་ལས་ཚོད་ལྟའི་ཁུལ་འཛུགས་བསྐྲུན་བྱེད་པའི་སྤྱིའི་སྒྲིག་སྲོལ་ལ་ཆོག་མཆན་ཐོབ་པ་མ་ཟད། ཞིང་ཆེན་སྲིད་གཞུང་གིས་རྒྱལ་ཡོངས་ཀྱི་རྩྭ་སའི་སྐྱེ་ཁམས་ཕྱུགས་ལས་ཚོད་ལྟའི་ཁུལ་འཛུགས་བསྐྲུན་བྱེད་པའི་འབྲེལ་ཡོད་བསམ་འཆར་འགྲེམས་སྤེལ་བྱས་ཤིང་། ཞིང་ཆེན་ཏང་ཨུའི་ཞིང་ཕྱུགས་གཞུང་སྒྲུབ་ཁང་གིས་ལས་བགོས་བསམ་འཆར་འགྲེམས་སྤེལ་དང་། ཞིང་ཆེན་ཞིང་ཕྱུགས་ཐིན་གྱིས་བྱ་བའི་ཇུས་འགོད་གཏན་འབེབས་བྱས་པ་མ་ཟད། ཕན་འབྲས་ཞིབ་བཤེར་སོགས་ཀྱི་བྱེད་ཐབས་སྒྲིག་གཞི་རབས་དང་རིམ་པ་གཏན་འབེབས་བྱས།

དུས་མཚུངས་སུ་ཞིང་ལས་པུའུ་ཡིས་རྩྭ་སའི་སྐྱེ་ཁམས་ཐད་ཀྱི་ཁ་གསབ་བྱ་དགའི་རོགས་དངུལ་དངོས་འབེབས་བྱས་ནས། རྩྭ་སའི་ཕྱུགས་ལས་ཚོད་ལྟ་སོགས་ཀྱི་ཐད་ལ་རྒྱབ་སྐྱོར་ཆེན་པོ་གནང་། 2015ལོར་ཕྱོགས་སོ་སོའི་ཐད་མ་དངུལ་སྒོར་དུང་ཕྱུར་གཅིག་བྱེ་བ་གཉིས་ས་ཡ་དྲུག་ལྷག་བཏང་བ་དང་། ཞིང་ཆེན་རིམ་པའི་ནོར་སྲིད་གྱིས་སྤྱིའི་མ་དངུལ་གཏོང་ཚད་སྒོར་དུང་ཕྱུར་གཅིག་བྱེ་བ་དགུ་ས་ཡ་དྲུག་ཏུ་བསླེབས། དེ་མིན2016ལོ་ནས་བཟུང་ལོ་རེར་སྒོར་དུང་ཕྱུར་གཅིག་ལྷག་གི་ཚོད་ལྟའི་ཁུལ་གསར་འཛུགས་ཆེད་སྤྱོད་མ་དངུལ་བཏང་ཞིང་། ཁུལ་སོ་སོ་དང་རྫོང་སོ་སོས་ནོར་སྲིད་མ་དངུལ་ཞིང་ལས་ཐད་བཏང་བ་མ་ཟད། ཞིང་ཆེན་གཞན་པའི་རོགས་སྐྱོར་འཛུགས་བསྐྲུན་མ་དངུལ་སོགས་སྒོར་དུང་ཕྱུར་གཉིས་དང་ས་ཡ་དྲུག་ལྷག་གི་ཡན་ལ་སླེབས་པས། མང་ཚོགས་མང་པོས་རང་སྟེང་ནས་མ་དངུལ་བསྡུ་བ་དང་དངུལ་ཁང་དུ་དངུལ་བུན་བསྐྱི་བའི་ཐད་བཏང་ཡོད།

ཞིང་ཆེན་རིམ་པའི་ངོས་ཐད་ནས་བཤད་ན། ཞིང་ཆེན་ཡོངས་ཀྱིས་ཤུགས་ཆེན་པོས་མ་དངུལ་བསྡུ་རུབ་ལ་སྐུལ་འདེད་བྱས་ཤིང་། སྐུལ་སློང་ཚོགས་འདུ་དང་སྐུལ་འདེད་ཚོགས་འདུ། ལྟ་སྐོར་ཚོགས་འདུ་སོགས་ཀྱི་བྱེད་ཐབས་སྤྱད་དེ། རིམ་པ་སོ་སོའི་གནོན་ཤུགས་ཇེ་ཡང་ལ་བཏང་ཞིང་། ཞིང་ཆེན་རིམ་པའི་ཞིང་ལས་ཚན་རྩལ་ཞིབ་འཇུག་སློབ་གསོའི་ལས་ཁུངས6གིས་ཁུལ6གི་འཛུགས་བསྐྲུན་དང་ཟུང་འབྲེལ་བྱས་ཏེ། རིམ་པ་སོ་སོའི་ལས་བྱེད་པ་དང་ལག་རྩལ་པ། སློབ་ཆེན་མཐར་ཕྱིན་སྡེ་དཔོན་སོགས་མི་གྲངས380ལ་རོགས་རམ་བྱས་ཏེ་མཉམ་ལས་ཁང་འཕེལ་རྒྱས་སུ་བཏང་།

མིག་སྔར། རང་ཞིང་གིས་ཚོད་ལྟའི་ཁུལ་འཛུགས་བསྐྲུན་ཁྲོད་ཀྱི་གསར་གཏོད་འཛུགས་བསྐྲུན་འདུ་ཤེས་གཞིར་བཟུང་ནས། འགན་འཁྲི་གཙོ་བོ་དང་དོན་དངོས་ལ་གཞོལ་བ། གསར་གཏོད་ལ་འབད་པ་བཅས་གཙོ་གནད་གསུམ་ལ་ཕྱོགས་སྡོམ་བྱས་ཤིང་། རྩྭ་སའི་སྐྱེ་ཁམས་ཕྱུགས་ལས་ཀྱི་འཕེལ་རྒྱས་ཁ་ཕྱོགས་རྒྱུན་འཁྱོངས་དང་། ཁྱོན་ཡོངས་ནས་སྐྱེ་ཁམས་ཕྱུགས་ལས་འཛུགས་བསྐྲུན་གྱི་ཆོད་སེམས་རྒྱུན་འཁྱོངས། མཛུབ་སྟོན་བསམ་བློ་དང་དམིགས་འབེན། བརྒྱུད་རིམ། བྱེད་ཐབས་བཅས་རྒྱུན་འཁྱོངས། ཁུལ་དང་རྫོང་། སྡེ་བ་བཅས་ཀྱི་མི་དམངས་སྲིད་གཞུང་གིས་འགན་འཁྲི་དང་ལེན་གྱིས་ཐུན་མོང་གི་འཕེལ་རྒྱས་དེ་གཞི་རྩ་ཡིན་པ་རྒྱུན་འཁྱོངས་བཅས་ཀྱི་རྒྱུན་འཁྱོངས་ལྔའི་ཚོད་ལྟའི་ཁུལ་གྱི་བྱ་བའི་འདུ་ཤེས་ལྟར། ཕན་འབྲས་ལ་ཞིབ་བཤེར་དང་དཔྱད་འཇོག་ལ་སྐུལ་འདེད་ཀྱིས་ཞིང་ཆེན་ནས་ཁུལ་རིམ་པ་དང་། སྡེ་བ་རིམ་པ་ནས་མཉམ་ལས་ཁང་བཅས་ལ་སྐར་ལྔའི་ཞིབ་བཤེར་མ་ལག་སྤྲད་དེ་ཚོད་ལྟའི་མཉམ་ལས་ཁང100ལ་ཆེས་མཐོའི་གསོ་སྤེལ་སོགས་ཀྱི་ལག་རྩལ་སྒྲིག་ཆས་དང་སྐྱེ་ལྡན་གྲགས་ཅན་འཛུགས་བསྐྲུན། ཕྱུགས་ལས་ཉེན་སྲུང་ཚོད་ལྟ། དངུལ་རྩའི་སྟེགས་བུར་འགན་སྲུང་། གནམ་གཤིས་ཆུ་བེད་ཞབས་ཞུ་སོགས་ཀྱི་ཐད་ལ་ཁྱོན་ཡོངས་ནས་རོགས་སྐྱོར་ཆེན་པོ་བྱས།

ཞིང་ཆེན་ཞིང་ཕྱུགས་ཐིན་གྱི་ཕྱུགས་ལས་ཆེད་མཁས་པ་ཝང་ཧའེ་ལིན་གྱིས་བཤད་རྒྱུར། ཚོད་ལྟའི་ཁུལ་འཛུགས་བསྐྲུན་ལ་སྐུལ་འདེད་བྱེད་པར་གཙོ་བོ་ཚོད་ལྟ་རང་བཞིན་གྱི་མ་རྐང་ལམ་ལུགས་བཅོས་སྒྱུར་བྱས་ཏེ། དེང་རབས་ཅན་གྱི་ཚོང་གཉེར་རྣམ་པ་ཆགས་པར་བྱེད་དགོས། ལོ་ངོ་གཉིས་ལྷག་གི་ཧུར་བརྩོན་བརྒྱུད། མིག་སྔར་ཚོད་ལྟ་རང་བཞིན་གྱི་མ་རྐང་ལམ་ལུགས100ལ་དངོས་ཤུགས་རང་བཞིན་གྱི་འཕེལ་རྒྱས་བྱུང་བ་དང་། མཉམ་ལས་ཁང54ཡིས་མ་རྐང་ལམ་ལུགས་ལ་བཅོས་སྒྱུར་བྱེད་པ་ལེགས་འགྲུབ་བྱུང་ཤིང་། རྩྭ་ས་དང་ནོར་ལུག་མ་རྐང་དུ་བཞག་ནས་ཕྱུགས་ཁྱུ་བཀར་སྟེ་གསོ་སྤེལ་བྱེད་པ་དང་། རྩྭ་སར་རིགས་བཀར་ནས་ཕྱུགས་འཚོ་བ། མཉམ་ལས་ཁང་གི་ལས་བཟོ་བར་ལས་ཀ་བགོ་བ། མ་རྐང་ལྟར་ཁེ་ཕན་བགོ་བཤའ་རྒྱག་པ། ངལ་རྩོལ་ལྟར་ལས་ཕོགས་སྟེར་བ་སོགས་ཀྱིས་མ་རྐང་མཉམ་ལས་ལམ་ལུགས་ཀྱི་ཚོང་གཉེར་རྣམ་པའི་གོམ་སྟབས་ཇེ་མགྱོགས་སུ་བཏང་བ་དང་། རྩེ་ཁོག་རྫོང་སྦྲ་དཀར་མཉམ་ལས་ཁང་དང་ཐེམ་ཆེན་རྫོང་མེ་ལོང་མཉམ་ལས་ཁང་སོགས་ཀྱིས་རིམ་པ་དང་པོའི་མ་རྐང་ལམ་ལུགས་བཅོས་སྒྱུར་བྱེད་པ་གནད་དུ་ཁེལ་ཞིང་། ནང་གནས་སྟོབས་ཤུགས་ལ་ཤུགས་བསྣན་ནས་ཚོང་གཉེར་རྩ་འཛུགས་ལ་བྱེད་ཐབས་ལྡན་པ། མང་ཚོགས་ཀྱིས་ཡོང་སྒོ་འཕར་སྣོན་ལ་དཔེར་མཚོན་རང་བཞིན་གྱི་ཕན་ནུས་ཐོན་ཡོད་ཟེར།

ཁོངས་མིའི་འཐུས་ཚབ་ཀྱི་འཐུས་མི་དང་སྤྱི་ཁྱབ་འགན་འཛིན་པ། ལྟ་སྐུལ་ཚོགས་འདུ་བཅས་ཚོགས་ཆེན་གསུམ་གྱི་ལམ་ལུགས་བརྒྱུད་དེ། ལས་མི་དག་གི་དོ་དམ་ལམ་ལུགས་སྒྲིག་སྲོལ་ཅན་དུ་བཏང་བ་མ་ཟད། ནོར་དོན་དོ་དམ་ལམ་ལུགས་སོགས་སྒྲིག་སྲོལ་ལམ་ལུགས་རིམ་པ་བཞིན་གཏན་ལ་ཕབ་ཞིང་། གཟབ་ནན་སྒོས་མཉམ་ལས་ཁང་གི་ལས་དོན་དང་ནོར་དོན་ཁྲོམ་བསྒྲགས་བྱས་ཏེ། ཉེན་ཁ་མཉམ་ཁུར་དང་ཁེ་ཕན་མཉམ་སྤྱོད་བཅས་ཀྱི་ཐུན་མོང་གི་ངོ་བོ་གཅིག་གྱུར་བྱས། དཔེར་ན་ཐེམ་ཆེན་རྫོང་གི་མེ་ལོང་མཉམ་ལས་ཁང་གིས་བདག་གཉེར་གྱི་བརྒྱུད་རིམ་ཁྲོད་དོན་དག་གལ་ཆེན་ལ་གྲོས་ཚོགས་བཞི་དང་གྲོས་སྡུར་གཉིས་བརྒྱུད་པའི་ལམ་ལུགས་ལག་བསྟར་བྱས་ཤིང་། མཉམ་ལས་ཁང་གི་ཁོངས་མིའི་དམངས་གཙོའི་ཁེ་ཕན་ལ་འགན་སྲུང་དང་མཉམ་ལས་ཁང་གི་ཕྱོགས་བསྡུས་སྟོབས་ཤུགས་གཙོ་བོ་ཆེས་ཆེར་བཏང་།

ཚོད་ལྟའི་ཁུལ་འཛུགས་བསྐྲུན་གྱི་ཆུ་ཚད་མཐོར་འདེགས་སུ་གཏོང་ཆེད། རང་ཞིང་གིས་གཟན་རྩྭའི་ཐོན་ལས་འཕེལ་རྒྱས་སུ་བཏང་ཞིང་། ཚན་རྩལ་གྱི་རྒྱབ་སྐྱོར་ཆུ་ཚད་མཐོར་འདེགས་སུ་བཏང་ནས་ཁྱད་ལྡན་ཚོང་རྫས་གྲགས་ཅན་གསར་བཟོ་དང་སྐྱེ་ཁམས་ཁ་གསབ་རོགས་དངུལ་གྱི་སྲིད་ཇུས་ལག་བསྟར་བྱས། མིག་སྔར་ཞིང་ཆེན་ཡོངས་སུ་མིས་བཟོས་གཟན་རྩྭའི་རྟེན་གཞི་རྒྱ་ཁྱོན་སྤྱི་ཆིང་འབུམ་ལྔ་ཁྲི་གཅིག་ལྷག་དང་། སྐྱེ་ལྡན་ངོས་ལེན་ཐོབ་པའི་རྩྭ་སའི་རྒྱ་ཁྱོན་སྤྱི་ཆིང་ས་ཡ་བཞི་ལྷག་ཡོད། བོད་ལུག་དང་ནོར་གནག་གི་ཆེས་མཐོའི་གསོ་སྤེལ་སོགས་ཀྱི་ལག་རྩལ་ལ་སྐུལ་འདེད་ཆེན་པོ་ཐོབ་པ་མ་ཟད། ནོར་གནག་ལ་ཤ་ཤེད་རྒྱས་པ་དང་བོད་ལུག་རྒྱུད་སྤེལ་ལ་ཡང་གོ་རིམ་ཡོད་པའི་ངང་ནས་འཕེལ་རྒྱས་སུ་གཏོང་བ་དང་། གཞི་རིམ་མཉམ་ལས་ཁང་གིས་གཅིག་གྱུར་གྱིས་ཐོན་སྐྱེད་ཡིག་ཚགས་དང་གཅིག་གྱུར་གྱིས་བདག་གཉེར་དོ་དམ། གཅིག་གྱུར་གྱིས་ལག་རྩལ་ཞབས་ཞུ། གཅིག་གྱུར་གྱིས་ནུས་རྩལ་གསབ་སྦྱོང་བཅས་ལག་བསྟར་བྱས།

ཞིང་ཆེན་ཡོངས་སུ་གཟན་རྩ་གསོག་འཇོག་དང་གཟན་རྩྭའི་དོ་དམ་དེ་ལས་འགན་གཙོ་བོར་བཟུང་ནས་ཕྱུགས་ཟོག་གི་ཤེད་ལྷུང་བའི་ཚད་གཞི་གཏན་འགོག་བྱེད་དགོས་པ་མ་ཟད། རྒྱལ་ཡོངས་སུ་རྩྭ་སའི་སྐྱེ་ཁམས་ཁ་གསབ་རོགས་དངུལ་ཐད་ཕན་འབྲས་ཞིབ་བཤེར་གྱི་དོ་དམ་ལྟར། རྩྭ་སའི་སྐྱེ་ཁམས་ལ་སྲུང་སྐྱོབ་ངེས་ཅན་དང་སྐྱེ་ཁམས་ཕྱུགས་ལས་ཀྱི་གསོན་ཤུགས་དེ་འཕེལ་རྒྱས་ཀྱི་ཁྲོད་དུ་འཇོག་དགོས་ཤིང་། ནང་སྒོས་སུ་འཛམ་གླིང་གི་ནོར་གནག་ཞིང་ཁམས་དང་ཀྲུང་གོའི་བོད་ལུག་གསོ་སྤེལ་དེ་རང་ཞིང་གི་ཁྱད་ལྡན་སྐྱེ་ཁམས་གྲགས་ཅན་ལ་འགྱུར་དུ་འཇུག་དགོས།

རྩོམ་སྒྲིག་པ།སྒྲོལ་མ་སྐྱིད།