མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་མཚོ་འཁྱིལ་ཞང་གི་ཉིན་ཞ་སྡེ་བ་ནི་མཚོ་སྔོན་པོའི་བྱང་རྒྱུད་དུ་ཆགས་པའི་ཕྱུགས་ལས་རྐྱང་རྐྱང་གཉེར་བའི་འབྲོག་སྡེ་ཞིག་ཡིན་ལ། སྡེ་བ་དེར་བསྡོམས་པས་ཁྱིམ་ཚང་གོ་གཅིག་དང་རྩྭ་སའི་རྒྱ་ཁྱོན་ལ་མུའུ་འབུམ་གཉིས་དང་ཁྲི་གཅིག་ལྷག་ཡོད། སྡེ་བས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“སྔོ་ལྗང་རི་ཆུ་ནི་གསེར་རི་དངུལ་རི་ཡིན”ཞེས་པའི་དགོངས་དོན་གལ་ཆེན་མཛུབ་སྟོན་དུ་བཟུང་ཞིང་། མཚོ་སྔོན་པོའི་ཉེ་འགྲམ་དུ་ཆགས་པའི་ས་ཁོངས་ཀྱི་ཁྱད་སྟོབས་ལ་བརྟེན་པ། གཞན་ཏང་དང་རྒྱལ་ཁབ་ཀྱི་སྲིད་ཇུས་བཟང་པོའི་སྣེ་ཁྲིད་དང་ས་གནས་སྲིད་གཞུང་གི་རྒྱབ་སྐྱོར་དང་རོགས་འདེགས་སོགས་ལ་བརྟེན་ནས། སྡེ་དམངས་ཡོངས་ཀྱི་འཚོ་བའི་མཐུན་རྐྱེན་དང་སྐྱེ་ཁམས་ཁོར་ཡུག སྡེ་བའི་རྨང་གཞིའི་སྒྲིག་བཀོད་དང་མང་ཚོགས་ཀྱི་བསམ་བློའི་གོ་རྟོགས་སོགས་ཕྱོགས་གང་ཅིའི་ཐད་ནས་ཀྱང་འགྱུར་ལྡོག་སྔ་ན་མེད་པ་ཞིག་བྱུང་ཡོད།

སྐྱེ་ཁམས་ཁོར་ཡུག་ཀུན་གྱིས་སྲུང་།

“སྔོན་ཆད་ང་རང་བྱིས་པ་ཡིན་དུས། སྐྱེ་ཁམས་འདིའི་ཁུར་བོ་ཧ་ཅང་ལྕི་ལ། སྡེ་དམངས་ཡོངས་ཀྱི་ནོར་ལུག་བཟུང་བའི་གྲངས་ཀ་ཚད་ལས་བརྒལ་ཏེ་རྩྭ་སར་གནོད་སྐྱོན་ཆེན་པོ་ཐེབས་པར་མ་ཟད། ནམ་རྒྱུན་རླུང་འཚུབ་གཡུགས་ཏེ་མཁའ་དབུགས་ཀྱི་སྤུས་ཚད་ཞན་ལ་དབྱར་ཐོན་པའང་ད་ལྟ་ལས་ཧ་ཅང་འཕྱི། དེ་མིན་ནོར་ལུག་གི་ཤི་ཚད་མཐོ་བས་མང་ཚོགས་ཀྱི་ཡོང་སྒོ་ཤིན་ཏུ་དམའ ”ཞེས་ཉིན་ཞ་སྡེ་བའི་ཏང་ཀྲི་པུའུ་ཧྲུའུ་ཅི་ཚེ་བྷོ་ཡིས་ཅུང་གཟབ་ནན་ཡིན་པའི་ཉམས་འགྱུར་དང་བཅས་གསར་འགོད་པར་དེ་ལྟར་བཤད། སྐབས་དེར་སྡེ་བའི་ལོ་ལོན་ཚོས་དུས་རྒྱུན་གྱི་གླེང་བྱ་གཙོ་བོ་ནི་རྩྭ་ས་ཞན་འགྱུར་གྱི་གནད་དོན་དེ་ཡིན་ལ། དེ་སྔོན་ཁོ་ཚོས་ཤེས་དུས་ཀྱི་རྩྭ་ས་ནི་དབྱར་གཞུང་དུ་རྟར་བཞོན་ནས་རྩྭ་ཐང་བརྒལ་ན་རྟ་སྒའི་ཡོབ་ཆེན་རྩྭ་མགོར་ཐོགས་ཚུལ་བཤད། དག་དག་རྩྭ་སའི་གནད་དོན་ཐག་གཅོད་བྱེད་རྒྱུ་དེ་ཁ་ཚ་དགོས་གཏུག་གི་གནས་སུ་གྱུར་པའི་སྐབས་དེར། སྡེ་དམངས་ཨུ་ཡོན་ལྷན་ཁང་གི་ཀྲུའུ་རིན་གྱི་འགན་བཞེས་ཡོད་པའི་ཚེ་བྷོ་སྡེ་བའི་འཐུས་ཚབ་བྱས་ཏེ་མཚོ་བྱང་ཁུལ་ཏང་ཨུ་དང་ཁུལ་མི་དམངས་སྲིད་གཞུང་གཉིས་ཀྱིས་བཀོད་སྒྲིག་བྱས་པའི་ནང་སོག་ས་ཆའི་ཕྱུགས་ལས་གསོ་སྦྱོང་ཞིག་གི་གྲས་སུ་ཞུགས་ཤིང་། ས་དེ་གའི་སྐྱེ་ཁམས་སྲུང་སྐྱོབ་བྱེད་ཐབས་དང་ཕྱུགས་ལས་ཐད་ཀྱི་སྔོན་ཐོན་ཤེས་བྱ་སློབ་སྦྱོང་དང་ལྷུར་ལེན་བྱས་ནས། 2008ལོར་ཕྱིར་རང་ཡུལ་ལ་ལ་ལོག་རྗེས་སྡེ་བའི་ནང་གི་ཏང་ཡོན་དང་འགོ་ཁྲིད་སོགས་ཀྱི་ཁྱིམ་ཁ་བཅུ་ལྷག་རྩ་འཛུགས་བྱས་ཏེ་མཉམ་ལས་ཁང་ཞིག་བཙུགས་ནས་རྩྭ་ཕྱུགས་དོ་མཉམ་བྱེད་པའི་མགོ་བརྩམས། སྐབས་དེ་དུས་སུ་ལུག་རེར་ཆ་སྙོམས་ཀྱིས་རྩྭ་ས་མུའུ་གསུམ་རེ་ལས་མེད་པའི་རྩྭ་སའི་ཁུར་བོ་ལྕི་བའི་གནས་བབ་བསྒྱུར་ཆེད། ཐོག་མར་ཟོག་ལུག་གི་གྲངས་ཀ་ཇེ་ཉུང་དུ་བཏང་སྟེ་ལུག་གཅིག་ལ་རྩྭ་ས་མུའུ་ལྔ་རེ་ཡོད་པར་བྱས་པ་དང་། ལོ་གཉིས་ཙམ་མ་འགོར་བར་མཉམ་ལས་ཁང་དུ་ཞུགས་ཡོད་པའི་ཁྱིམ་ཚང་ཚོའི་རྩྭ་ས་དང་ཁྱིམ་ཚང་གཞན་རྣམས་གྱི་རྩྭ་ས་ལ་ཁྱད་པར་ཆེན་པོ་བྱུང་བ་སྡེ་དམངས་ཡོངས་ཀྱིས་ཚོར་བས། སྡེ་བ་ཡོངས་རྩྭ་ཕྱུགས་དོ་མཉམ་ཡོང་བའི་ལམ་ཁར་ཕྱོགས་ཏེ་ལུག་བརྒྱ་ཆའི་བཞི་བཅུ་ཡས་མས་ཕྱིར་བཙོངས་པས། རྩྭ་ས་ནི་ཉིན་རེ་བཞིན་ཇེ་བཟང་དུ་འགྲོ་བཞིན་པ་མིག་མཐོང་ལག་ཟིན་དུ་སྣང་མོད། ཡིན་ཡང་མང་ཚོགས་ཀྱི་ཡོང་སྒོ་སྔོན་དང་བསྡུར་ན་ཇེ་དམའ་རུ་གྱུར་བའང་དོན་དངོས་རེད། དེའི་ཕྱིར་སྐྱེ་ཁམས་སྲུང་སྐྱོབ་དང་སྡེ་དམངས་ཀྱི་ཡོང་སྒོ་གཉིས་ཀར་ཁག་ཐེག་བྱ་ཆེད། སྡེ་བ་ཡོངས་གྲོས་གཅིག་ཏུ་མཐུན་ནས་མོ་ཕྱུགས་ཀྱི་བསྡུར་ཚད་དེ་སྔོན་གྱི་བརྒྱ་ཆའི་བཞི་བཅུ་ཡས་མས་ནས་བརྒྱ་ཆའི་བརྒྱད་ཅུ་རུ་མཐོར་འདེགས་བཏང་སྟེ་ལུག་གི་གྲངས་ཀ་འཕེལ་བར་ཤུགས་བསྣན་ལ། ཕྱིར་བཙོང་བའི་ལུག་གི་གྲངས་ཀ་ཇེ་མང་དུ་སོང་བ་དང་བསྟུན་ནས་མང་ཚོགས་ཀྱི་ཡོང་སྒོའང་རིམ་གྱིས་འཕར་ཞིང་། སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པའི་ཞོར་དུ་སྡེ་དམངས་ཀྱི་དཔལ་འབྱོར་ཆུ་ཚད་ཀྱང་མངོན་སུམ་གྱིས་ཇེ་མཐོར་སོང་བས། སྡེ་དམངས་ཡོངས་ཀྱིས་མཉམ་ལས་ཁང་གི་བྱེད་སྟངས་ལ་ཁས་ལེན་དང་ཡིད་ཆེས་བརྟན་པོ་བྱས།

དེ་མིན་ཉེ་བའི་ལོ་འགའི་རིང་ས་ཁྱབ་རྡོ་ཁྱབ་ཏུ་འགྲོ་བཞིན་པའི་སྐད་འཕྲིན་ཚོམས་ལ་བརྟེན་ནས། སྡེ་དམངས་ཡོངས་ཀྱིས་རང་རང་གི་མཐོང་ཡུལ་དུ་གྱུར་བའི་སྐྱེ་ཁམས་ཁོར་ཡུག་གི་གནད་དོན་དུས་ཐོག་ཏུ་འཕྲིན་ལམ་བརྒྱུད་ནས་དྲ་ཚོམས་སུ་བསྐུར་ཏེ་མང་ཚོགས་ཀྱི་མིག་ལམ་དུ་བཤམས་པ་དང་། གོང་རིམ་འགོ་ཁྲིད་ཀྱིས་དུས་ལྟར་སྡེ་མི་འགའ་རེ་རྩ་འཛུགས་བྱས་ཏེ་ཐག་གཅོད་བྱེད་བཞིན་ཡོད་པས། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཐད་ལ་གྲུབ་འབྲས་མངོན་གསལ་བླངས་ཡོད། ཉིན་ཞ་སྡེ་བ་ནི་རྐང་ཚ་རྫོང་གིས་ཁོངས་ཡོངས་སུ་གད་སྙིགས་མེད་པའི་ལས་གཞིའི་འཛུགས་སྐྲུན་ཁྲོད་ཀྱི་དཔེ་མཚོན་སྡེ་བའང་རེད། ཉིན་ཞ་སྡེ་བར་དེ་རིང་གི་གོས་ལྗང་ཐང་ལ་བཏིངས་འདྲའི་རྩྭ་ཐང་འདི་ལྟ་བུ་དང་མཁའ་དབུགས་གཙང་མ་འདི་འདྲ་ལེགས་པོ་ཞིག་མཆིས་པའང་བློ་མིག་ཡངས་པའི་འགོ་ཁྲིད་ཞིག་གི་ཡང་དག་པའི་སྣེ་ཁྲིད་དང་། ལས་ལ་བརྩོན་པའི་མང་ཚོགས་ཡོངས་ཀྱིས་འབད་བརྩོན་ལྷོད་མེད་བྱས་པའི་འབྲས་བུ་མ་ཡིན་ནམ།

མཐུན་སྒྲིལ་ཨ་ལོང་དམ་དུ་སྦྲེལ།

ཉིན་ཞ་སྡེ་བས་དུས་དང་རྣམ་པ་ཀུན་དུ་མི་རིགས་མཐུན་སྒྲིལ་གྱི་དབྱངས་རྟ་གཙོ་བོ་མཉམ་དུ་གྱེར་བཞིན་ཡོད་ལ། 2018ལོར་སྡེ་བ་རིམ་པའི་མི་རིགས་མཐུན་སྒྲིལ་རྟགས་མའི་ལུས་རྩལ་འགྲན་ཚོགས་སྐབས་ལྔ་བ་བསྡུས་ཏེ། མི་རིགས་མཐུན་སྒྲིལ་གྱི་སྔོན་ཐོན་ཏང་ཡོན་དང་སྔོན་ཐོན་ན་གཞོན་ལ་གཟེངས་བསྟོད་བྱས་པར་མ་ཟད། ཁྱིམ་མཚེས་སྡེ་བའི་འགོ་ཁྲིད་སོགས་ཀྱང་ཚོགས་ཐོག་ཏུ་གདན་དྲངས་ཏེ་སྡེ་བའི་བར་གྱི་མཐུན་སྒྲིལ་ལ་ཤུགས་བསྣན།“ཆུང་ས་ནས་ཁྱིམ་ཚང་ནང་ཁུལ་གྱི་མཐུན་སྒྲིལ་དང་སྡེ་བའི་ཁྱིམ་ཚང་བར་གྱི་མཐུན་སྒྲིལ། དེ་ནས་ཁྱིམ་མཚེས་སྡེ་བ་བར་གྱི་མཐུན་སྒྲིལ་དམ་པོར་འཛིན་དགོས་ལ། ཆེ་ས་ནས་མི་རིགས་བར་གྱི་མཐུན་སྒྲིལ་དང་རྒྱལ་ཁབ་བར་གྱི་མཐུན་སྒྲིལ་བསྲུང་དགོས། མཐུན་སྒྲིལ་ཡོང་ན་ད་གཟོད་འཕེལ་རྒྱས་བཤད་ཆོག མཐུན་སྒྲིལ་ཡོང་ན་ད་གཟོད་བདེ་འཇགས་གླེང་ཆོག”ཅེས་ཏང་ཀྲི་པུའུ་ཧྲུའུ་ཅི་ཚེ་བྷོས་དེ་ལྟར་བཤད།

སྤྱིར་ཉིན་ཞ་སྡེ་བ་ནི་གོང་རིམ་ནས་གཏན་འཁེལ་བྱས་པའི་དབུལ་ཕོངས་སྡེ་བ་ཞིག་མིན་མོད། སྡེ་བའི་འགོ་ཁྲིད་དང་རྒན་པོ་ཚོས་དུས་རྒྱུན་དུ“དབུལ་ཐར་བྱེད་རྒྱུ་རང་རང་ཚོའི་འགན་དབང་ཡིན་ལ། དབུལ་ཕོངས་ཁྱིམ་ཚང་ཡང་རང་སྡེ་བའི་མང་ཚོགས་དང་སྡེ་བ་གཅིག་གི་ཕུ་ནུ་ཡིན་པས། གཙོ་བོ་མཐུན་སྒྲིལ་བྱུང་སོང་ན་སྡེ་བའི་ནང་དུ་དབུལ་ཕོངས་ཁྱིམ་ཚང་འགའ་ཞིག་ཡོད་པ་དེ་གནད་དོན་ཆེན་པོ་ཞིག་མ་རེད”ཅེས་བཤད་ཀྱིན་ཡོད་ཟེར། 2013ལོར་སྡེ་བའི་ཏང་ཀྲི་པུའུ་ཡིས་གྲོས་མགོ་བཏོན་ནས་སྡེ་བ་གཞུང་གིས་མ་དངུལ་བཏང་སྟེ་དབུལ་སྐྱོར་འཁོར་རྒྱུག་གི་མ་མོ་སུམ་བརྒྱ་ལྷག་ཉོས་ཏེ་དབུལ་ཕོངས་ཁྱིམ་ཚང་ཚོར་གཡར་ནས་འཚོ་རུ་བཅུག་སྟེ། མ་མོའི་རྗེས་ཀྱི་ལུ་གུ་རིན་མེད་དུ་རང་ཁྱིམ་གྱིས་བླངས་ཏེ་ཕྱིར་བཙོང་ཆོག་ལ། 2019ལོའི་བར་ཧ་ལམ་ལུ་གུ་སྟོང་གཅིག་དང་བརྒྱད་བརྒྱ་ལྷག་སྐྱེ་འཕེལ་བྱུང་ཟིན་པས། བྱེད་ཐབས་འདིས་དབུལ་ཕོངས་ཁྱིམ་ཚང་རྣམས་དབུལ་ཐར་བྱེད་པར་ནུས་པ་གལ་ཆེན་ཐོན།

ད་ལོར་ལོ་ང་བརྒྱད་ཡིན་པའི་ཨ་ནེ་ཀླུ་མོ་མཚོ་ནི་ཉིན་ཞ་སྡེ་བའི་དབུལ་ཕོངས་ཁྱིམ་ཚང་བཅུ་གསུམ་གྲས་ཀྱི་གཅིག་ཡིན་ལ། སྔོན་ཆད་རི་ཁ་རུ་ཟོག་ལུག་ཉུང་ཙམ་འཚོས་ནས་འཚོ་བ་སྐྱེལ་བཞིན་ཡོད་ཀྱང་། རྗེས་སུ་གཉེན་འཐོར་བྱུང་བས་རི་ཁར་འདུག་ས་མེད་པས་རྒྱལ་ཁབ་ཀྱི་དབུལ་སྐྱོར་གནས་སྤོར་ལས་གཞིར་བརྟེན་ནས་ཞང་ཐོག་གི་ཁང་ཁྱིམ་གསར་པ་ཞིག་ཏུ་གནས་སྤར། མོའི་བུ་བུ་མོ་རྣམས་ཀྱང་གཉེན་བསྒྲིགས་ཏེ་རང་རང་སར་ཕྱིན་པས་ད་ལྟ་ཁྱིམ་ན་མོ་དང་ཚ་མོ་ཞིག་ལས་མེད། མོ་རང་ཁྱིམ་གསར་དུ་སྤར་ནས་ཡུན་རིང་མ་འགོར་པར་ལོ་སར་ལ་ཉེ་སྐབས། སྡེ་བའི་ཏང་ཀྲི་པུའུ་དང་སྡེ་དམངས་ཨུ་ཡོན་ལྷན་ཁང་གིས་སྡེ་བ་ཡོངས་རྩ་འཛུགས་བྱས་ཏེ། ཨོང་བ་རླངས་འཁོར་ཆེན་པོ་གང་བཏུས་ཏེ་མོ་ཚང་ལ་བྱིན་མྱོང་བ་ད་ལྟའང་མོའི་སེམས་སུ་ཉར་ཡོད་པ་དང་། མིག་ལ་མཆི་མ་འཁོར་བཞིན་ང་ཚོར་བཤད་རྒྱུར།“ཏང་དང་རྒྱལ་ཁབ་ཀྱི་སྲིད་ཇུས་བཟང་པོའི་བཀའ་དྲིན་དང་སྡེ་བ་དྲིན་ཅན་འདིའི་བཀའ་དྲིན་ལ་བརྟེན་ནས། ད་ལྟའི་སྡོད་ཁང་འདི་འདྲའི་གྲལ་དག་ཅིག་དང་ཅ་ལག་ཡོ་བྱད་ཚང་མ་བྱིན་པས་འཚོ་བར་སྡུག་མི་དགོས། འདིའི་ཡན་གྱི་སྐྱོང་སྲོལ་ཞིག་རང་གི་ཤ་ལས་མཆེད་པའི་བུ་ཕྲུག་ཡིན་ཡང་དཀའ་ནི་རེད། འདི་འདྲའི་སྐྱིད་ཅིག་སྔོན་ཆད་ཡིད་ལའང་ཤར་མ་མྱོང་། རྒྱལ་ཁབ་ཕ་མ་འདྲ་བོ་ངོ་མ་བཀའ་དྲིན་ཆེ”ཟེར། དངོས་གནས་ཉིན་ཞ་སྡེ་བའི་མཐུན་སྒྲིལ་ནི་ཁ་ནས་བཤད་པ་ཙམ་མིན་པར་ངེས་པ་དོན་གྱིས་སྡེ་དམངས་ཡོངས་ཀྱི་སེམས་སུ་གསལ་བོར་ཤེས་ཡོད།

བདེ་སྐྱིད་འཚོ་བ་མཉམ་དུ་རོལ།

སྐྱེ་ཁམས་སྲུང་སྐྱོབ་བྱེད་པ་རྨང་གཞི་དང་མཐུན་སྒྲིལ་དམ་པོ་སྤྱིའི་བྱེད་ཕྱོགས་སུ་བཟུང་བའི་སྟེང་། རྒྱུན་མཐུད་ངང་འཕེལ་རྒྱས་སུ་འགྲོ་བའི་གཞི་རྩའི་དགོངས་དོན་ལག་ལེན་དུ་བསྟར་ནས་སྡེ་དམངས་ཀྱི་འཚོ་བའང་དབྱར་གྱི་མཚོ་མོ་རྒྱས་པ་ཇི་བཞིན་ཇེ་རྒྱས་ཇེ་ལེགས་སུ་འགྲོ་བཞིན་ཡོད། ལོ་འདི་དག་གི་རིང་ལ་མཚོ་བྱང་ཁུལ་ཞིང་ཕྱུགས་ལས་ཅུའུ་དང་ས་གནས་སྲིད་གཞུང་གིས་རྒྱབ་སྐྱོར་རབ་དང་རིམ་པ་བྱས་པས། ད་ལྟ་སྡེ་བར་ཆུ་གློག་ལམ་གསུམ་གྱི་ཁེབས་ཚད་བརྒྱ་ཆའི་བརྒྱ་ལ་སླེབས་ཡོད་པ་དང་། རྩྭ་ས་རེས་སྤོར་རྟེན་གཞིའི་སྡོད་ཁང་དང་ཉེན་ཁང་བསྒྱུར་བཀོད་བྱེད་པ་སོགས་བསྡོམས་པས་ཁང་པ་གྱ་བདུན་གསར་དུ་ལས་པར་མ་ཟད། སྡེ་བར་ཏང་ཡོན་བྱ་འགུལ་ཁང་དང་རྒྱང་བསྟེན་སློབ་གསོའི་སྒྲིག་ཆས་ཆ་ཚང་ལྡན་ལ། 2018ལོར་སྡེ་བའི་དབུལ་ཕོངས་ཁྱིམ་ཚང་ཡོངས་རྫོགས་དབུལ་ཐར་བྱས་པ་རེད།

སྡེ་བ་གཞུང་ལ་རྫོང་ཐོག་ཏུ་ཐོག་བརྩེགས་ཅན་གྱི་མགྲོན་ཁང་དང་ཟ་ཁང་། ཚོང་ཁང་སོགས་ཧ་ལམ་མ་རྩ་སྒོར་བྱེ་བ་གཅིག་ཡས་མས་ཀྱི་ཐུན་མོང་དཔལ་འབྱོར་ཡོད་པར་མ་ཟད། 2018ལོར་སྡེ་བའི་མི་རེའི་ཆ་སྙོམས་ཀྱི་ཡོང་སྒོ་སྒོར་ཁྲི་གཉིས་ལ་སླེབས་ཡོད་ཅིང་། སྡེ་བའི་སྤྱི་གཞུང་གི་ཡོང་སྒོ་ལས་སྡེ་དམངས་ཡོངས་ཀྱི་མཉམ་ལས་སྨན་བཅོས་འགན་སྲུང་ཁྲོད་ཞུགས་པའི་དངུལ་ཡང་སྤྲོད་རོགས་བྱེད་ཀྱིན་ཡོད་དེ། 2019ལོར་མི་རེས་ཆ་སྙོམས་ཀྱིས་སྒོར་བཞི་བརྒྱ་རེ་སྤྲད་པས་རྐང་ཚ་རྫོང་ཡོངས་སུ་མཉམ་ལས་སྨན་བཅོས་འགན་སྲུང་གི་དངུལ་སྤྲོད་ཚད་ཆེས་མཐོ་བའི་སྡེ་བར་གྱུར།“ང་ཚོའི་སྡེ་བར་ད་སྔ་ཁྱིམ་རེ་ལ་རླངས་འཁོར་རེ་མེད་པའི་ཁྱིམ་ཚང་ཞིག་མེད། ང་རང་གིས་བསམ་ན་སྡེ་དམངས་ཡོངས་ཕལ་ཆེར་འབྱོར་འབྲིང་སྤྱི་ཚོགས་ཀྱི་དུས་སྐབས་མགོ་མ་ཞིག་ཏུ་སླེབས་ཡོད་ཟེར་ནའང་མི་ཆོག་རྒྱུ་མེད། མ་འོངས་པ་ན་ང་ཚོས་མཚོ་སྔོན་པོའི་མཐའ་འཁོར་དུ་ཆགས་པའི་ཁྱད་སྟོབས་ལ་བརྟེན་ནས། སྐྱེ་ཁམས་ཡུལ་སྐོར་གྱི་ཕྱོགས་ལ་ཤུགས་རྒྱག་རྩིས་ཡོད་ལ། ཁྱིམ་ཚང་རེ་རེར་ཐོག་ཁང་རེ་ལས་ཐུབ་པའི་དམིགས་འབེན་མངོན་འགྱུར་བྱེད་པར་བརྩོན་ལེན་བྱ་རྒྱུ་ཡིན”ཞེས་སྡེ་བའི་ཏང་ཀྲི་པུའུ་ཧྲུའུ་ཅི་ཚེ་བྷོས་སྐད་གདངས་མཐོན་པོས་སྡེ་བའི་མ་འོངས་པའི་དམིགས་འབེན་གླེང་བྱུང་།

རྩོམ་སྒྲིག་པ། ཤ་བོ་རིན་མཚོ།