—ཁྲི་ཀ་རྫོང་རྨ་ནུབ་གྲོང་རྡལ་མཐུན་སྒྲིལ་སྡེ་བའི་མཐོང་ཐོས།

གཞིས་གསར་དུ་དགའ་སྤྲོའི་དགོད་སྒྲ་སྒྲོག་ཅིང་སྡོད་ཁང་གི་མདུན་རྒྱབ་ཏུ་སིལ་ཏོག་གི་དྲི་བསུང་གང་སར་ཐུལ་འདུག་ལ། སྡེ་བའི་ནང་དུ་ངོས་སྙོམས་པའི་གཞུང་ལམ་གང་སར་འཐེན་ཞིང་། ག་ས་གང་དུ་འདབ་ཆགས་ཀྱིས་སྐད་སྙན་འབྱིན་ལ་མེ་ཏོག་གི་དྲི་ཞིམ་འཐུལ་ཡོད།

ཉེ་ལམ། གསར་འགོད་པ་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་རྨ་ནུབ་གྲོང་རྡལ་མཐུན་སྒྲིལ་སྡེ་བར་སོང་བ་ན། ཡུལ་དེའི་གྲོང་གསེབ་ཡུལ་སྐོར་འཕེལ་རྒྱས་ཀྱི་ལམ་ཁར་ཕྱིན་ཡོད་པས་རི་བོ་དང་ཆུ་བོའི་མཛེས་ལྗོངས་ལྟ་ན་སྡུག

“ཐོན་ལས་ཆེན་པོ་དང་ཡུལ་སྐོར་ཆེན་མོ”ཡི་རིག་ལམ་ལ་བརྟེན་ནས་ཐོན་ཁུངས་ཀྱི་གྲུབ་ཆ་སྡེབ་སྒྲིག་བྱས་པ་དང་། ཁྱད་ལྡན་ཐོན་ལས་དེ་གྲོང་གསེབ་ཡུལ་སྐོར་གྱི་ལས་རིགས་ཁྲོད་དུ་བསྡུས་པས་རང་ཡུལ་གྱི་ཁྱད་ཆོས་ལྡན་པའི་སྐྱེ་ཁམས་ལྟད་མོའི་ཞིང་ལས་དང་སྤྲོ་གསེང་ཉམས་ལེན་ཞིང་ལས། ཁམས་གསོ་སྤྲོ་གསེང་ཐོན་ལས་བཅས་ནུས་ཤུགས་ཡོད་རྒུས་འཕེལ་རྒྱས་སུ་བཏང་། མཐུན་སྒྲིལ་སྡེ་བས་ཐོན་ཁུངས་ཀྱི་ལེགས་ཆ་དང་ཐོན་ལས་ཀྱི་ལེགས་ཆར་བརྟེན་ནས་གྲོང་གསེབ་ཡུལ་སྐོར་འཕེལ་རྒྱས་སུ་བཏང་བ་དང་། ཞིང་སྡེའི་གཞིས་ཆགས་ཁོར་ཡུག་ནུས་ཤུགས་ཡོད་རྒུས་ཇེ་ལེགས་སུ་བཏང་ཞིང་། ཞིང་ལས་ཞིང་སྡེ་འཕེལ་རྒྱས་ཀྱི་ཞན་ཆ་ཁ་གསབ་བྱས་ཏེ་སྡེ་བའི་ཏང་ཀྲི་པུའུ་སྲོག་ཤིང་ཡིན་ཞིང་ཞིང་ལས་ཀྱི་ཁེ་ཕན་ཐོབ་པ། ཞིང་པའི་ཡོང་སྒོ་འཕར་བ། ཞིང་སྡེ་ཇེ་མཛེས་ཡིན་པ་བཅས་ཀྱི་གྲོང་གསེབ་དར་སྤེལ་གྱི་མཚར་སྡུག་གི་ལམ་བུ་ཞིག་ཏུ་བསྐྱོད།

མཐུན་སྒྲིལ་སྡེ་བ་ཆེ་རྒྱུ་མེད་པས་ཁྱིམ་ཚང་ང་བརྒྱད་དང་སྡེ་མི་ཉིས་བརྒྱ་སོ་བརྒྱད་ལས་མེད། ཉིན་དཀར་ཉི་འོད་ལམ་ལམ་དུ་འཕྲོ་ཞིང་མཚན་མོ་སྟོང་བའི་མཁའ་དབྱིངས་སུ་སྐར་ཚོགས་རྣམ་པར་བཀྲ། ཆུ་མོ་དྭངས་ལ་ཞིང་ཁ་སྔོ་ལྗང་ལྗང་དུ་གནས། འདི་ལྟ་བུའི་ཞིང་རའི་མཛེས་ལྗོངས་ཡག་པོ་མཐོང་རྗེས། མཛེས་པའི་མེ་ཏོག་གི་ཞིང་ཁ་གསར་གཏོད་བྱེད་མཁན་གྱིས་སྔ་གཞུག་ཏུ་སྒོར་བྱེ་བ་བརྒྱད་དང་ས་ཡ་དྲུག་བཏང་ནས་སྐྱེ་ཁམས་འདེམས་གསོ་ཉམས་ལེན་ཁུལ་དང་སྤྲོ་གསེང་ཞིང་ལས་ལྟད་མོ་ཉམས་ལེན་ཁུལ། འགྲུལ་ཁང་བཟའ་བཏུང་སྤྲོ་གསེང་ཁུལ། ཕ་བུ་སློབ་སྦྱོང་སྤྲོ་གསེང་ཁུལ། སྤྲོ་གསེང་རྩེད་འཇོ་ཁུལ་བཅས་བྱེད་ནུས་ཆེན་པོ་ལྔ་ཡི་ལྟད་མོ་ཉམས་ལེན་ལས་གཞི་བཅུ་བདུན་གསར་སྤེལ་བྱས།

མཐུན་སྒྲིལ་སྡེ་བའི་བགྲོད་ལམ་དུ་སོང་ན་འགྲམ་ངོགས་གཉིས་ཀྱི་ཁོར་ཡུག་ཤིན་ཏུ་གཙང་། སྡོད་ཁང་གི་མདུན་རྒྱབ་དང་སྡེ་ལམ་གྱི་འགྲམ་ངོགས་ཡོད་ཚད་གཡུ་ལོ་ཐགས་སུ་བཀྲ་ཞིང་། ར་སྐོར་གྱི་ཕྱི་རོལ་ནི་མིག་དབང་འཕྲོག་པའི་རིག་གནས་གྱང་ལྡེབས་རེད། གསར་དུ་ལས་པའི་སྒོ་དང་འཐུས་སྒོ་ཚང་བའི་བཙོག་ཆུའི་སྦུག་ལམ་སོགས་རིག་ན་མིར་སྤྲོ་བ་བསྐྱེད་པ་ཞིག་རེད།

མཐུན་སྒྲིལ་སྡེ་བའི་ཏང་ཀྲི་པུའུ་ཧྲུའུ་ཅི་གཡང་དྲུང་ཐར་གྱི་སེམས་སུ་གཞིས་ཆགས་པར་འཚམ་པའི་གྲོང་གསེབ་བསྐྲུན་ན་མཐུན་སྒྲིལ་སྡེ་བའི་ཁོག་དཔུང་ཟིན་ཡོད་ལ་གོ་ཆོད་ཅིག་ཀྱང་ཡིན་པར་འདོད་ཡོད། གྲོང་གསེབ་ཡུལ་སྐོར་དབུལ་སྐྱོར་ནི་ཐོན་ལས་དབུལ་སྐྱོར་གྱི་གྲུབ་ཆ་གལ་ཆེན་ཞིག་ཡིན་པས། ཡུལ་སྐོར་གྱི་ཐོན་ཁུངས་ཅུང་ལེགས་པའི་མཐུན་སྒྲིལ་སྡེ་བས་ས་བབ་དང་བསྟུན་ནས་གྲོང་གསེབ་ཡུལ་སྐོར་འཕེལ་རྒྱས་སུ་བཏང་བ་རེད། དེ་གྲོང་གསེབ་དར་སྤེལ་གྱི་སྣེ་འདྲེན་གལ་ཆེན་དུ་འགྱུར་ཐུབ་པར་མ་ཟད། ཞིང་པ་རྣམས་ཀྱི་ཡོང་སྒོའི་ཆུ་ཚད་ཇེ་མཐོར་བཏང་སྟེ་ཞིང་ལས་འཕེལ་རྒྱས་ཀྱི་སྤུས་འདེགས་ཕན་འཕར་ལ་ཡར་སྐུལ་བྱེད་ཐུབ། དེ་མ་ཟད་ཞིང་སྡེའི་སྐྱེ་ཁམས་ཁོར་ཡུག་དང་འཚོ་བའི་ངང་ཚུལ་ཇེ་ལེགས་སུ་གཏོང་བར་ཕན་པས་གྲོང་གསེབ་དར་སྤེལ་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན།

སྲིད་ཇུས་ཀྱིས་རོགས་སྐྱོར་བྱེད་པ་དང་མ་རྐང་གི་ཁེ་སྤོགས་བགོ་བ། ཚོང་ཁང་ཉོ་བ། ཐོན་ཁུངས་གླ་བ་སོགས་ཀྱི་རྣམ་པས་སྡེ་བ་ཐུན་མོང་གི་དཔལ་འབྱོར་འཕེལ་རྒྱས་དང་རྒྱ་ཆེར་བཏང་བས། མཐུན་སྒྲིལ་སྡེ་བར“ཀྲུང་གོའི་མཛེས་པའི་གྲོང་གསེབ”ཀྱི་མཚན་སྙན་ཐོབ་པ་དང་། སྡེ་བ་ཐུན་མོང་གི་དཔལ་འབྱོར་ཡོང་སྒོའི་སྤྱི་འབོར་སྒོར་ཁྲི་དྲུག་དང་སྟོང་བདུན་དྲུག་བརྒྱ་ལས་བརྒལ་ནས་མི་རེའི་ཆ་སྙོམས་ཡོང་སྒོ་སྒོར་ཁྲི་གཅིག་དང་སྟོང་བཞི་དྲུག་བརྒྱ་ལ་སླེབས། “བལྟས་ནས་འདུག་པ”ནས“འགྲན་ནས་ལས་པ”ཡི་གྲོང་གསེབ་ཡུལ་སྐོར་འཕེལ་རྒྱས་ཀྱིས་སྡེ་མི་རྣམས་ལ་འགྱུར་ལྡོག་བྱུང་དུ་བཅུག་པར་མ་ཟད་དཔལ་འབྱོར་གྱི་ཡོང་སྒོའང་ཇེ་མང་དུ་འགྲོ་རུ་བཅུག ད་རུང་སྐྱེ་ཁམས་ཁོར་ཡུག་སྲུང་སྐྱོབ་ཀྱི་བསམ་བློ་དང་འདུ་ཤེས་ལའང་འགྱུར་ལྡོག་བྱུང་། “སྔོན་ཆད་ལམ་འགྲམ་དུ་གད་སྙིགས་གཡུགས་ན་སེམས་ལ་མི་བདེ་བའི་ཚོར་བ་མེད་ལ། ད་ལྟ་སྡེ་བའི་ནང་དུ་སྙིགས་སྒམ་བཞག་ཡོད་པས་གད་སྙིགས་གང་འདོད་དུ་འཕེན་མཁན་གཅིག་ཀྱང་མེད། ཡུལ་སྐོར་པ་རྣམས་ཀྱིས་མཐུན་སྒྲིལ་སྡེ་བ་གཙང་མ་རེད་ཅེས་བཤད་པ་དེ་ནི་ང་ཚོས་ཀྱང་གཟི་བརྗིད་ཅིག་ཏུ་རློམ་ཡོད”ཅེས་ཞིང་པའི་སྤྲོ་སྐྱིད་ཁང་ཕྱེ་ཡོད་པའི་པདྨ་འཚོས་སེམས་འགུལ་ཐེབས་བཞིན་དེ་ལྟར་བཤད།

ད་ལྟ། མཐུན་སྒྲིལ་སྡེ་བས“ལྗང་མདོག་ར་སྐོར”དང“ཆེས་མཛེས་པའི་ར་སྐོར”“གཙང་དག་དཔེ་སྟོན་ཁྱིམ་ཚང”གི་དཔྱད་འདེམས་བྱ་འགུལ་ཧུར་བརྩོན་གྱིས་སྤེལ་བཞིན་ཡོད། ཞིང་སྡེའི་སྤྱི་པའི་རིག་གནས་ཞབས་ཞུའི་མ་ལག་རྒྱུན་ཆད་མེད་པར་འཐུས་ཚང་དུ་བཏང་སྟེ། དཔལ་ཡོན་ཡུལ་སྲོལ་དང་ཁྱིམ་སྲོལ་ལེགས་པོ། བབ་ཆགས་དམངས་སྲོལ་སོགས་སྐྱེད་སྲིང་བྱས་ནས་ཞིང་སྡེ་གསར་པའི་གཞི་རིམ་བཅོས་སྐྱོང་གི་ལམ་བུ་གསར་པ་ཞིག་འཚོལ་སྙེག་བྱས་ཡོད།

རྩོམ་སྒྲིག་པ། ཤ་བོ་རིན་མཚོ།