རང་རེའི་ལས་ཁུངས་ཀྱི་གསར་འགོད་པ་ཚེ་མ་རྒྱལ་ནས་བཀོད་པའི་གསར་འགྱུར།
ཉིན་གསུམ་གྱི་འགྲན་སྡུར་བརྒྱུད། མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང་མཚོ་སྔོན་ཞིང་ཆེན་མི་རིགས་སྐད་གློག་བརྙན་འཕྲིན་བསྒྱུར་སྐྲུན་ལྟེ་གནས་གཉིས་ཀྱིས་མཉམ་འབྲེལ་སྒོས་བསྒྲུབས་པའི«སྡེ་ཆེན་རྩེད་ར»རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་ཐོག་མའི་འགྲན་སྡུར་ལས་མཚོ་ནུབ་འགྲན་ཁུལ་གྱི་འགྲན་སྡུར་ཟླ་བདུན་པའི་ཚེས་གསུམ་ཉིན་གྱི་ཕྱི་དྲོའི་ཆུ་ཚོད་ལྔའི་སྟེང་ཡོངས་སུ་མཇུག་སྒྲིལ་བ་དང་། འགྲན་ཞུགས་པ་སོ་གཅིག་གི་གྲས་སུ་གླུ་བ་འབྲུག་ལྷ་ཚེ་རིང་དང་། ཨོ་རྒྱན་ཐར། བསོད་ནམས་དཔལ་འབར། དཔལ་འབྲུག་རྒྱལ། དཔལ་འབྱོར་དང་། གླུ་མ་རྡོ་རྗེ་སྐྱིད། སྐལ་བཟང་མཚོ་མོ། སྟག་སྒྲོན་ལྷ་མོ། ལྕགས་རིས་འཚོ། དངོས་གྲུབ་དབང་མོ་བཅས་གླུ་བ་གླུ་མ་བཅུ་བསྐྱར་འགྲན་ཐོག་མའི་འགྲན་སྡུར་ཁྲོད་བདམས་ཐོན་བྱུང་།
སྟེང་ལྷ་ཡུལ་འདྲ་བའི་གྲོང་ནས། ནང་ལྷ་ཕྲུག་འདྲ་བའི་རྩེད་རོགས།
ཚིག་སྙན་མོ་རྗེ་བཙུན་མགུར་མ། རྩེད་མཁས་པ་ཀུན་ལ་གསལ་གི
རི་མགོ་ལྷ་རིའི་མཆོད་རྟེན་རེད། ལྷ་མཇལ་དགོས་བསམ་ནས་ཡོང་ནི་ཡིན།
ས་སྡེ་ཆེན་རྩེད་རའི་ནང་ནས། རོགས་ཆུང་ལོ་ཁ་ཚིག་རང་བྱོན་ཅན།
ཚིག་དོན་ཆེན་རྣ་ལ་སྙན་གི གཟུགས་སྐྱེ་ལུས་མིག་ལ་མཛེས་གི
སོས་དལ་བའི་ཉག་ཕྲན་མདའ་མོ། སོས་དལ་ནས་ཡོད་དུས་མཐུན་གི
སོས་དལ་ནས་ཡོད་དུས་ལོས་མཐུན། སྨྱུག་ཚིགས་དྲུག་མཚམས་ནས་བཅད་ནི་རེད།
རྟ་འདོ་བ་སྙིང་ལ་རྗེ་བོ། སྙིང་རྗེ་བའི་དོན་དེ་བཤད་ན།
ཟླ་དྲུག་པ་མ་ལོན་མི་དབང་། ས་བྱང་ལམ་མིན་ན་མི་རྒྱུག
རོགས་ན་ཟླ་ཞེ་འདང་ཅན་པོ། གཏམ་མི་ཁའི་བར་ནས་འགལ་ཡོད།
འགལ་ཡོད་པ་སྡེ་བར་གསང་ཡོད། ཞེ་མཐུན་རབས་བཤད་ནས་ངོམ་ཡོད།
མཚོ་ནུབ་འགྲན་ཁུལ་ནས་བསྐྱར་འགྲན་ཐོག་མ་རུ་ཚུད་པའི་གླུ་བ་དག
མཚོ་ནུབ་འགྲན་ཁུལ་ནས་བསྐྱར་འགྲན་ཐོག་མ་རུ་ཚུད་པའི་གླུ་མ་དག
བསྐྱར་འགྲན་ཐོག་མ་རུ་ཚུད་པའི་གླུ་བ་གླུ་མ་ཡོངས།
