ཉིན་གསུམ་གྱི་འགྲན་སྡུར་བརྒྱུད། མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང་མཚོ་སྔོན་ཞིང་ཆེན་མི་རིགས་སྐད་གློག་བརྙན་འཕྲིན་བསྒྱུར་སྐྲུན་ལྟེ་གནས་གཉིས་ཀྱིས་མཉམ་འབྲེལ་སྒོས་བསྒྲུབས་པའི«སྡེ་ཆེན་རྩེད་ར»རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་ཐོག་མའི་འགྲན་སྡུར་ལས་རྨ་ལྷོ་འགྲན་ཁུལ་གྱི་འགྲན་སྡུར་ཟླ་བདུན་པའི་ཚེས་ཉེར་དགུ་ཉིན་ཡོངས་སུ་མཇུག་སྒྲིལ་བ་དང་། འགྲན་ཞུགས་པ་ཉེར་བརྒྱད་ཀྱི་གྲས་སུ་གླུ་བ་དཔལ་མགོན་སྐྱབས་དང་། ཚེ་སྒྲུབ་རྒྱལ། དགེ་ལེགས་རྣམ་རྒྱལ། ཚེ་དཔལ་སྐྱབས། རྒྱ་ཁོ། གླུ་མ་ཤ་བོ་འཚོ་དང་། གདུགས་དཀར་སྐྱིད། ཚེ་དཔལ་འཚོ། བདེ་སྐྱིད་འཚོ། ཀུན་དགའ་འཚོ། སྐལ་བཟང་སྐྱིད་བཅས་གླུ་བ་གླུ་མ་བཅུ་བསྐྱར་འགྲན་ཐོག་མའི་འགྲན་སྡུར་ཁྲོད་བདམས་ཐོན་བྱུང་།
རྨ་ལྷོ་འགྲན་ཁུལ་གྱི་འགྲན་སྡུར་མཇུག་སྒྲིལ་བ་དང་ཆབས་ཅིག«སྡེ་ཆེན་རྩེད་ར»རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་ཐོག་མའི་འགྲན་སྡུར་གྱི་འགྲན་རིམ་ཡོངས་སུ་མཇུག་རྫོགས་ལ། བསྐྱར་འགྲན་དང་རྟིང་རྩོད་འགྲན་སྡུར་དེ། ད་ལོའི་ཟླ8པའི་ཟླ་མཇུག་གམ་ཟླ9པའི་ཟླ་སྟོད་དུ་མཚོ་ལྷོ་བོད་རིགས་རང་སྐྱོང་ཁུལ་གྱི་ཁྲི་ཀ་རྫོང་ནས་སྤེལ་རྒྱུ་རེད། འདིར་སྡེ་ཆེན་རྩེད་ར་རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་ཐོག་མའི་འགྲན་སྡུར་གྱི་མཚོ་ལྷོ་འགྲན་ཁུལ་དང་། མཚོ་ནུབ་འགྲན་ཁུལ། མགོ་ལོག་འགྲན་ཁུལ། མཚོ་བྱང་འགྲན་ཁུལ། རྨ་ལྷོ་འགྲན་ཁུལ་བཅས་ཀྱི་རོགས་སྒྲུབ་ལས་ཁུངས་དག་གིས་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཞུ།
གསེར་ལ་རི་ཡི་མགོ་ནས། གསེར་ཏོག་འདྲ་བའི་འདོ་བ། གསེར་སེར་བོའི་སྒ་ཞིག་བསྟད་ན།
དངུལ་དཀར་པོའི་སྲབ་ཅིག་བསྐོན་ན། རྒྱུག་མི་རྒྱུག་མེད་ནི་ཨེ་ཡིན།
རྨ་ཕ་རིའི་གཅན་ཚའི་ཐང་ན། སྤྱང་དར་མ་འགྲོ་སྡོད་རྒོད་གི
ཕོ་སྙིང་སྟོབས་ཅན་ཞིག་མིན་ན། རྭ་ཐང་ལ་འཛུགས་ཁ་དཀའ་གི
རོགས་ང་ཚོའི་གངས་དཀར་སེམས་ལ། ཚིག་སྙན་མོ་གཅིག་བཤད་གཉིས་བཤད།
ཚིག་སྙན་མོར་ཡོ་གཟུར་མེད་ན། མ་ང་ཚོར་ཡོ་གཟུར་ཅི་ཡོད།
ས་སྡེ་ཆེན་རོགས་ལོ་རྩོད་དུས། ཡུལ་ཕ་མ་འདྲ་བའི་སེམས་དགོས།
ནང་བུ་ཕྲུག་འདྲ་བའི་འདང་དགོས། དེ་ཡོད་ན་རྩོད་ཁ་བདེ་གི
བཀྲ་ཤིས་པའི་སྡེ་ཆེན་དཀྱིལ་ནས། དོན་འགྲུབ་གི་ཞི་མོ་ང་ཡིན།
ཕྱི་མོ་སྒོ་ལྟ་ས་མེད་རུང་། ཞེ་སྣང་བ་མཐུན་པའི་རོགས་ཡིན།
ངས་གངས་རི་དཀར་པོར་དཔེ་ལེན། དགུང་གི་ཉི་མ་ཆགས་འཇོག
ལོ་ཕར་བཏབ་སྐྱེས་པས་མ་ཚད། ལོ་ལྗང་མོ་འབྲས་བུ་ཐོགས་ཡོད། ངས་ད་རུང་རོགས་ལོ་བརྗེད་མེད།
རོགས་ཆུང་ལོ་སོང་གི་ཕྱི་ཉིན་ནས། ང་སྡེ་ཆེན་དཀྱིལ་ནས་མི་སྐྱིད་གི
ཚིག་སྙན་མོ་བཤད་ན་མི་འདོད་གི རོགས་དྲན་ནས་ཉི་མ་མི་ཆོད་གི
རོགས་ཡག་པ་མེ་ཏོག་འདྲ་བོ། གེ་སར་འབྲུག་མོའི་མན་ཆད་ན། ཆགས་འཇོག་སའི་རོགས་ཤིག་མེད་གི
དུས་ད་རེབ་རྩེད་ཁོམ་མེད་རུང། ཕྱིར་འཁོར་ནས་རྩེད་རག་ཞིག་ལ། ཁྱེད་གསེར་ལུས་རིན་ཆེན་བདེ་མོ།
རྨ་ལྷོ་འགྲན་ཁུལ་ནས་བསྐྱར་འགྲན་དུ་ཚུད་པའི་གླུ་བ་དག
རྨ་ལྷོ་འགྲན་ཁུལ་ནས་བསྐྱར་འགྲན་དུ་ཚུད་པའི་གླུ་མ་དག
