ཉིན་གསུམ་གྱི་ཛ་དྲག་གི་འགྲན་སྡུར་བརྒྱུད། མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང་མཚོ་སྔོན་ཞིང་ཆེན་མི་རིགས་སྐད་གློག་བརྙན་འཕྲིན་བསྒྱུར་སྐྲུན་ལྟེ་གནས་གཉིས་ཀྱིས་མཉམ་འབྲེལ་སྒོས་བསྒྲུབས་པའི«སྡེ་ཆེན་རྩེད་ར»རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་བསྐྱར་འགྲན་འཕར་མའི་འགྲན་སྡུར་ཟླ་དགུ་བའི་ཚེས་ཉེར་གཉིས་ཉིན་གྱི་ཕྱི་དྲོའི་ཆུ་ཚོད་དྲུག་གི་སྟེངཡོངས་སུ་མཇུག་སྒྲིལ་བ་དང་། ཐོག་མའི་འགྲན་སྡུར་གྱི་འགྲན་ཁུལ་སོ་སོ་ནས་བདམས་ཐོན་བྱུང་བའི་གླུ་བ་གླུ་མ་ལྔ་བཅུའི་གྲས་སུ་གླུ་བ་ཚེ་སྒྲུབ་རྒྱལ་དང་། རྣམ་རྒྱལ་མགོན། ཨོ་རྒྱན་ཐར། ཚེ་དཔལ་རྒྱལ། དགེ་ལེགས་རྣམ་རྒྱལ། གུར་མགོན། ཚེ་བརྟན་རྡོ་རྗེ། འབྲུག་ལྷ་ཚེ་རིང་། ཨོ་རྒྱན་རྒྱལ། ཚེ་རིང་དཔལ་འབྱོར། རྟ་མགྲིན་ཚེ་བརྟན། རྒྱལ་ཁོ། ཁོན་ཐར་རྒྱལ། བསོད་ནམས་རིན་ཆེན། བསོད་ནམས་དཔལ་འབུམ་བཅས་གླུ་བ་བཅོ་ལྔ་དང་། གླུ་མ་ཕུར་མཚམས་ཚེ་སྐྱིད་དང་། སྐལ་བཟང་སྐྱིད། ཕུར་མཚོ། བཀྲ་ཤིས་མཚོ། ཚེ་རིང་མེ་ཏོག ཤ་བོ་མཚོ། ཕུན་ཚོགས་སྐྱིད། ཆོས་མཚོ་རྒྱལ། ཚེ་རིང་སྒྲོལ་མ། སྒྲོལ་མ་མཚོ། སངས་རྒྱས་སྐྱིད། བདེ་སྐྱིད་འཚོ། གདུགས་ལོ། འཕྲིན་ལས་མཚོ། ཚེ་རིང་སྐྱིད་བཅས་གླུ་མ་བཅོ་ལྔ་བསྡོམས་པས་འགྲན་ཞུགས་པ་སུམ་ཅུ་ཐེངས་འདིའི་འགྲན་སྡུར་གྱི་བསྐྱར་འགྲན་ཁྲོད་བདམས་ཐོན་བྱུང་།
ཟླ་དགུ་བའི་ཚེས་ཉེར་གསུམ་ཉིན་གྱི་སྔ་དྲོའི་ཆུ་ཚོད་བརྒྱད་ནས། «སྡེ་ཆེན་རྩེད་ར»རྟགས་མའི་བོད་ཀྱི་ལ་གཞས་འགྲན་སྡུར་སྐབས་དྲུག་པའི་བསྐྱར་འགྲན་དངོས་སུ་མགོ་རྩོམ་རྒྱུ་རེད།
ང་གཞན་ནས་ཡོང་བའི་ཐང་དཀར་ཡིན། ང་གཞན་གྱི་ཕྱོགས་ནས་ཡོང་དོན་ནི།
ནགས་ཙན་དན་བསམ་ནས་ཡོང་བ་ཡིན། འདིའི་ཡན་གྱི་ཡོང་དོན་ང་ལ་མེད།
རི་ཨུཏྤལ་འདྲ་བའི་ཡར་ནང་ནས། ཆུ་ཤེལ་དཀར་འདྲ་བའི་རོགས་ལོས་ཉོན།
ཆུ་དྭངས་སྙིགས་མེད་ལ་བཞུར་ཟེར་ན། ངས་བདེན་པས་ཐོམ་གསུམ་བཅུ་རྒྱུ་ཡིན།
བོད་ཚོ་ཆེན་ལྷ་སྡེ་དཀར་བོ་ན། ཞེ་སྣང་བ་མཐུན་པའི་རོགས་ཤིག་སྣང་།
རོགས་འདི་ཚོར་ཚིག་གསུམ་བཤད་ཐུབ་ན། གཏམ་མི་ཁས་མི་ཐུབ་ཁས་ལེན་ཡོད།
སྟོད་ཨ་རིག་ལུག་རྒྱའི་ཁྱུ་ནས། ངས་ཚེ་གཅིག་གི་ལྷ་ལུག་བསལ་ཡོད།
ལུག་ཚེར་མོའི་སེམས་རྩ་མ་དམའ་ན། ཚེ་གཅིག་གི་ལུག་བདག་ང་ཉན་ན།
བར་བ་ཡན་ཐང་སྐྱ་གོང་མ་ན། འབྲུག་རི་མོ་བབས་པའི་འདོ་བ་ཡོད།
ས་བྱང་ལམ་རིང་ན་རྐང་ཆད་ཡིན། ལམ་བར་ཆད་བྱུང་རུང་འགྱོད་པ་མེད།
མར་བལྟས་ཀྱི་སྡེ་ཆེན་གྲོང་ནས། ངས་འདང་ཆེན་རོགས་ཤིག་བཙལ་ཡོད།
ཚིག་སྙན་མོ་མགོ་རྐང་བསྒྲིགས་ཡོད། འདང་ཞེ་བརྩེ་སེམས་ལ་བཟུང་ཡོད།
བསྐྱར་འགྲན་ཁྲོད་ཚུད་པའི་གླུ་བ་དག
བསྐྱར་འགྲན་ཁྲོད་ཚུད་པའི་གླུ་མ་དག
གསར་འགོད་པ། ཚེ་མ་རྒྱལ།
