ཀྲུང་དབྱང་ནག་འཇོམས་ངན་སེལ་ལྟ་སྐུལ་མཛུབ་སྟོན་ཚན་ཆུང་བཅོ་བརྒྱད་པས་མཚོ་སྔོན་ཞིང་ཆེན་གྱི་བྱ་བར་ལྟ་སྐུལ་མཛུབ་སྟོན་བྱེད་པའི་སྐུལ་སློང་གྲོས་ཚོགས་ཟླ་དྲུག་པའི་ཚེས་གཅིག་ཉིན་ཟི་ལིང་ནས་ཚོགས་རྗེས། ཞིང་ཆེན་ཡོངས་ཀྱི་གོང་འོག་ཀུན་གྱིས་སྐུལ་སློང་གྲོས་ཚོགས་ཀྱི་དགོངས་དོན་སློབ་སྦྱོང་ནན་མོ་བྱས་པ་དང་མྱུར་དུ་འགུལ་སྐྱོད་བྱས། གཞི་རིམ་གྱི་རྒྱ་ཆེའི་ལས་བྱེད་པ་དང་མང་ཚོགས་ཀྱིས། ནག་འཇོམས་ངན་སེལ་ཆེད་དོན་འཐབ་རྩོད་ནི། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གིས་བཏོན་པའི་ཇུས་ཆོད་བཀོད་སྒྲིག་གལ་ཆེན་ཡིན། ནག་འཇོམས་ངན་སེལ་གྱིས་ནག་ངན་སྟོབས་ཤུགས་འཇོམས་སེལ་བྱེད་པ་དང་སྤྱི་ཚོགས་ཀྱི་དར་སྲོལ་བཟང་བོ་བསྐྲུན་པ། ཆབ་སྲིད་ཀྱི་སྐྱེ་ཁམས་ཇེ་གཙང་དུ་གཏོང་བ། ཏང་སེམས་དམངས་སེམས་འགུག་པ་དང་སྲིད་འཛིན་གྱི་རྨང་གཞི་ཇེ་བརྟན་དུ་གཏོང་ཐུབ་ལ། མི་དམངས་གཙོར་འཛིན་པའི་འཕེལ་རྒྱས་ཀྱི་བསམ་བློ་ལག་བསྟར་ནན་མོ་བྱེད་པའི་ལག་ལེན་གལ་ཆེན་ཡིན་པ་དང་། མི་དམངས་མང་ཚོགས་ཀྱི་བདེ་སྡོད་ལས་བརྩོན་དང་སྤྱི་ཚོགས་གཏན་འཇགས་དང་སྒྲིག་ལམ་ཡོད་པ། རྒྱལ་ཁབ་ཡུན་སྐྱོང་བདེ་འགོད་ལ་འགན་སྲུང་བྱེད་པའི་ཐད་དོན་སྙིང་གལ་ཆེན་ལྡན་པའི་ཚུལ་བསྟན།
བསྟུད་མར་ཉིན་འགའི་རིང་ལ། མཚོ་ཤར་གྲོང་ཁྱེར་གྱི་ཆུའུ་དང་རྫོང་སོ་སོའི་སྲང་ལམ་སོགས་ག་ས་གང་དུ་ནག་འཇོམས་ངན་སེལ་གྱི་བསྒྲགས་ཡིག་མཐོང་ཐུབ། མིན་ཧི་ཧོས་རིགས་ཧོར་རིགས་རང་སྐྱོང་རྫོང་ཁྲོན་ཁུག་གྲོང་རྡལ་གྱི་ཏང་ཨུའི་ཧྲུའུ་ཅི་ཐེན་ལིན་ཧེའི་ཡིས་བཤད་རྒྱུར། གཞི་རིམ་ཏང་རྩ་འཛུགས་ཡིན་པའི་ཆ་ནས། ང་ཚོས་ངེས་པར་དུ་སྐུལ་སློང་གྲོས་ཚོགས་ཀྱི་རེ་བ་ལྟར། སྤྱི་བདེ་ལས་ཁུངས་དང་གཞོགས་འདེགས་བྱས་ནས་རྒྱ་ཆེའི་མང་ཚོགས་དང་མཉམ་དུ་ཆེད་དོན་འཐབ་རྩོད་ཁྲོད་ཞུགས་ནས། མཉམ་འཛུགས་མཉམ་སྐྱོང་དང་མཉམ་སྤྱོད་ཀྱི་ནག་འཇོམས་ངན་སེལ་གྱི་སྣང་ཚུལ་བཟང་བོ་བསྐྲུན་རྒྱུར་སྐུལ་སློང་བྱེད་དགོས། ཞོན་ཧྭ་ཟ་ལར་རིགས་རང་སྐྱོང་རྫོང་བིས་མདོ་བོད་རིགས་ཞང་གིས་ནག་འཇོམས་ངན་སེལ་ཆེད་དོན་འཐབ་རྩོད་དེ་གཞི་རིམ་ཏང་རྩ་འཛུགས་འཛུགས་སྐྲུན་དང་ཞིང་སྡེའི་ཆུ་དཔོན་ལམ་ལུགས་ཀྱི་བྱ་བ་དང་ཟུང་འབྲེལ་བྱས་ནས། ཏང་ཡོན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ནག་འཇོམས་ངན་སེལ་ཆེད་དོན་འཐབ་རྩོད་སྐོར་གྱི་མཆན་བཀོད་མཛུབ་སྟོན་གལ་ཆེན་སློབ་སྦྱོང་གཏིང་ཟབ་བྱེད་པར་རྩ་འཛུགས་བྱེད་པ་དང། ནག་འཇོམས་ངན་སེལ་ཆེད་དོན་འཐབ་རྩོད་བྱ་བའི་ཁ་གསལ་བྱང་བུ་དང་ཤེས་དགོས་པའི་ནང་དོན་ལ་ཡང་བསྐྱར་སློབ་སྦྱོང་བྱེད་པ། སྡེ་བ་དང་ཁྱིམ་ཚང་གཅིག་ཀྱང་མ་ལུས་པར་དྲིལ་སྒྲོག་བཟང་བོ་བྱེད་པ་དམིགས་འབེན་དུ་བྱས་ཏེ། ཁོངས་གཏོགས་ས་ཁུལ་དུ་སོང་ནས་འཚམས་འདྲི་དྲིལ་སྒྲོག་དང་ཁུངས་སྣེ་འཚོལ་ཞིབ་ཀྱི་བྱ་བ་སྤེལ་རྒྱུ་རེད།
མཚོ་ལྷོ་བོད་རིགས་རང་སྐྱོང་ཁུལ་སློབ་གསོ་ཅུའུ་དང་སྤྱི་བདེ་ཅུའུ། ཞིབ་བཤེར་ལས་ཁུངས་བཅས་ཀྱིས་མཉམ་འབྲེལ་སྒོས་ཁྲིམས་ལུགས་སློབ་གྲྭར་བསྐྱོད་པ་སོགས་ཀྱི་རྣམ་པ་བརྒྱུད་དེ་བདེ་འཇགས་སློབ་ར་མཉམ་འཛུགས་བྱེད་པའི་བྱ་འགུལ་སྤེལ་ནས། དགེ་སློབ་ཚོས་སྒྲིག་ཁྲིམས་བརྩི་སྲུང་དང་ནག་ངན་སྟོབས་ཤུགས་ལ་ངོ་རྒོལ་བྱེད་པར་སྐུལ་སློང་བྱས་པ་དང་། དགེ་སློབ་ཚོའི་ཁེ་དབང་དང་མི་ཚེའི་བདེ་འཇགས་ལ་འགན་སྲུང་བྱས།
མཚོ་བྱང་བོད་རིགས་རང་སྐྱོང་ཁུལ་རིག་གནས་ལུས་རྩལ་གནས་སྐོར་རྒྱང་སྒྲོག་བརྙན་འཕྲིན་ཅུའུ་ཡི་ཅུའུ་ཀྲང་ལིས་ཁྲིན་ཞང་གིས་བསྟན་དོན། སྐུལ་སློང་གྲོས་ཚོགས་བསྡུས་པ་དེས་ནག་འཇོམས་ངན་སེལ་ཆེད་དོན་འཐབ་རྩོད་གཏིང་ཟབ་ཏུ་སྤེལ་བའི་དོན་སྙིང་གལ་ཆེན་མཚོན་པར་བྱས་ཡོད་པས། ང་ཚོས་དེ་གོ་སྐབས་སུ་བརྩིས་ནས། ལས་རིགས་ཀྱི་ཁྱད་ཆོས་དང་ཟུང་འབྲེལ་བྱེད་པ་དང་། གནད་དོན་གྱི་ཁྲིད་ཕྱོགས་རྒྱུན་འཁྱོངས་བྱེད་པ། གཙོ་གནད་འབུར་དུ་ཐོན་པར་བྱེད་པ། གནས་སྐོར་ཚོང་རའི་སྒྲིག་ལམ་ཚད་ལྡན་དུ་བསྒྱུར་བ། གནས་སྐོར་འཕེལ་རྒྱས་ཀྱི་ཁོར་ཡུག་ཇེ་ལེགས་སུ་གཏོང་བ། ཁེ་ལས་ཀྱི་གཙོ་གཞི་འགན་འཁྲི་ལག་བསྟར་ནན་མོ་བྱས་ཏེ། གནས་སྐོར་ཚོང་རའི་ནག་འཇོམས་ངན་སེལ་བྱ་བ་གཏིང་ཟབ་ཏུ་སྤེལ་དགོས་ཟེར།
སྐུལ་སློང་གྲོས་ཚོགས་བསྡུས་རྗེས། རྨ་ལྷོ་བོད་རིགས་རང་སྐྱོང་ཁུལ་ཐུན་རིན་རྫོང་མི་དམངས་ཁྲིམས་ཁང་གིས་མྱུར་དུ་བཀོད་སྒྲིག་བཟང་བོ་བྱས་ནས། ཁྲིམས་ཁང་གི་ཉེན་རྟོག་པ་ཡོངས་མྱུར་དུ་འགུལ་སྐྱོད་བྱེད་པ་དང་། ནག་འཇོམས་ངན་སེལ་ཆེད་དོན་འཐབ་རྩོད་བྱ་བ་གཏིང་ཟབ་ཏུ་སྤེལ་བར་སྐུལ་འདེད་གཏོང་བ། བློ་རྩ་བརྟན་པོ་དང་འགུལ་སྐྱོད་བརྟན་པོས་ནག་འཇོམས་ངན་སེལ་འཐབ་རྩོད་ཀྱི་གཙོ་ཤུགས་དམག་དཔུང་བྱེད་དགོས་པའི་རེ་བ་བཏོན།
སྐུལ་སློང་གྲོས་ཚོགས་བསྡུས་རྗེས། མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱི་སྡེ་ཁག་སོ་སོས་ལས་བྱེད་པ་རྩ་འཛུགས་བྱས་ནས་ནག་འཇོམས་ངན་སེལ་ཆེད་དོན་འཐབ་རྩོད་བརྗོད་དོན་ཏང་གི་ཉིན་མོའི་བྱ་འགུལ་སྤེལ་ནས། ཏང་ཡོན་གྱི་ངོས་ཟིན་མཐོར་འདེགས་གཏོང་བ་དང་། བསམ་བློ་གཅིག་གྱུར་བྱེད་པ། རང་འགུལ་གྱིས་བྱ་བ་བསྒྲུབ་པ། ཁག་ཁུར་བྱེད་ཕོད་པར་བྱེད་དགོས་པའི་རེ་བ་བཏོན།
ཡུས་ཧྲུའུ་བོད་རིགས་རང་སྐྱོང་ཁུལ་འབྲི་སྟོད་རྫོང་ནག་འཇོམས་ངན་སེལ་ཆེད་དོན་འཐབ་རྩོད་བྱ་བའི་འགོ་ཁྲིད་ཚན་ཆུང་གཞུང་སྒྲུབ་ཁང་གི་ཀྲུའུ་རིན་ལེང་ཝེ་ཡིས་བཤད་རྒྱུར། ཀྲུང་དབྱང་ལྟ་སྐུལ་མཛུབ་སྟོན་ཚན་ཆུང་མཚོ་སྔོན་དུ་ཡོང་ནས་མཁྲེགས་གཏོར་ལྟ་སྐུལ་མཛུབ་སྟོན་སྤེལ་བ་དེས། ཏང་ཀྲུང་དབྱང་གིས་ཆེད་དོན་འཐབ་རྩོད་སྤེལ་བའི་ཆོད་སེམས་བརྟན་པོ་མཚོན་པར་བྱས་ཡོད་པ་དང་། དེ་ནི་ནག་འཇོམས་ངན་སེལ་བྱ་བའི་ཐད་ཀྱི་ཁྱོན་ཡོངས་ཀྱི་བརྟག་བཤེར་ཐེངས་གཅིག་དང་གནད་ལ་འཁེལ་བའི་ལྟ་སྐུལ་མཛུབ་སྟོན་བྱེད་ཐེངས་ཤིག་ཡིན། སྤྱི་ཚོགས་ཁོར་ཡུག་གི་འཆམ་མཐུན་གཏན་འཇགས་ལ་སྲུང་སྐྱོབ་བྱེད་པ་དང་། ནག་འཇོམས་ངན་སེལ་ཆེད་དོན་འཐབ་རྩོད་གཏིང་ཟབ་ཏུ་སྤེལ་ཆེད། འབྲི་སྟོད་རྫོང་གིས་རོང་འབྲོག་ཁུལ་གྱི་ཉེན་ཟོན་སྐོར་ཞིབ་རུ་ཁག་བཙུགས་ནས། གོང་རིམ་གྱི་བཀོད་སྒྲིག་ལྟར། ཞང་དང་གྲོང་རྡལ་གྱི་ཚོང་ར་དང་སྡོད་ཁུལ་དུ་ཡོངས་ཁེབས་ཉེན་ཟོན་སྐོར་ཞིབ་དང་ཁྱོན་ཡོངས་བརྟག་བཤེར་བྱས་པས། ཉེས་ཅན་ལ་འཇིགས་སྣང་བསྐྱེད་པ་དང་། ཞང་ཡོངས་ཀྱི་སྤྱི་ཚོགས་བདེ་སྐྱོང་སྒྲིག་ལམ་ལ་སྲུང་སྐྱོབ་བྱས། སྐོར་ཞིབ་རུ་ཁག་གིས་དུས་མཉམ་དུ་ནག་འཇོམས་ངན་སེལ་ཆེད་དོན་འཐབ་རྩོད་ཤེས་བྱ་དྲིལ་སྒྲོག་བྱས་པ་དང་། ནག་ངན་སྟོབས་ཤུགས་ཀྱི་ཁུངས་སྣེ་བསྡུ་རུབ་དང་འཚོལ་བཤེར་བྱས་ཏེ། ནག་འཇོམས་ངན་སེལ་ཆེད་དོན་འཐབ་རྩོད་བརྟན་བརླིང་ངང་སྤེལ་བར་ཁག་ཐེག་བྱས་པ་དང་། མང་ཚོགས་ཀྱིས་མཐོང་ཐུབ་པར་བྱས།
མགོ་ལོག་བོད་རིགས་རང་སྐྱོང་ཁུལ་པད་མ་རྫོང་གིས་རྫོང་ཡོངས་ཀྱི་ཁྱབ་ཁོངས་ནས་སྐུལ་སློང་གྲོས་ཚོགས་ཀྱི་དགོངས་དོན་སློབ་སྦྱོང་བྱེད་པའི་ཚ་རླབས་འཕྱུར་བར་བྱས་པ་དང་། ལས་ཁུངས་ཀྱི་ལས་བྱེད་པ་རྩ་འཛུགས་བྱས་ནས་འགལ་རྩོད་དོན་རྐྱེན་བྱུང་ཚད་མང་བའི་ས་ཆར་མངག་སྟེ། རྒྱ་ཆེའི་འབྲོག་པ་མང་ཚོགས་ལ་ནག་འཇོམས་ངན་སེལ་ཆེད་དོན་འཐབ་རྩོད་ཀྱི་ཤེས་བྱ་དྲིལ་སྒྲོག་དང་ཁྱབ་གདལ་དུ་བཏང་། རྫོང་སྤྱི་བདེ་ཅུའུ་གཞུང་སྒྲུབ་ཁང་གི་ཀྲུའུ་རིན་གཞོན་པ་ཀྲང་ཅི་པེན་གྱིས་བཤད་རྒྱུར། གཅིག་བསྡུས་སྒྲོག་འགྲེལ་དང་ཁ་གཏད་འགྲེལ་བཤད་བྱས་པ་བརྒྱུད་དེ། འབྲོག་པ་མང་ཚོགས་ཀྱིས་ཁུངས་སྣེ་འཚོལ་བ་དང་ཞུ་གཏུག་བྱེད་པར་སྐུལ་སློང་བྱས་པ་དང་། དེ་དང་མཉམ་དུ་འབྲོག་ཁུལ་གྱི་དབྱར་རྩྭ་དགུན་འབུ་ཉོ་ཚོང་ཚོང་ར་སོགས་ནས་ཆེད་དོན་བཅོས་སྐྱོང་བྱ་འགུལ་སྤེལ་ནས། ནག་ངན་སྟོབས་ཤུགས་འཚར་ལོངས་འབྱུང་བར་གཏན་འགོག་བྱས་ཟེར།
ལོ་ཙཱ་བ། རིན་ཆེན་མཚོ།
