གངས་ལྗོངས་མེ་ལོང་ནས་སྤེལ་བའི་གསར་འགྱུར། （གསར་འགོད་པ། ཐུབ་བསྟན། སྲས་མོ་སྒྲོལ་མ།)སྤྱི་ཟླ་བདུན་པའི་ཚེས་ཉེར་གཅིག་ཉིན། མཚོ་སྔོན་ཞིང་ཆེན་རྒྱང་སྒྲོག་བརྙན་འཕྲིན་ཅུའུ་དང་མཚོ་སྔོན་རྒྱང་སྒྲོག་བརྙན་འཕྲིན་ཁང་། ཀྲུང་གུང་རྩེ་ཁོག་རྫོང་ཨུ། རྫོང་མི་དམངས་སྲིད་གཞུང་བཅས་ཀྱིས་གཙོ་སྒྲུབ་བྱས་ཤིང་། མཚོ་སྔོན་ཞིང་ཆེན་མི་རིགས་སྐད་གློག་བརྙན་འཕྲིན་སྒྱུར་སྐྲུན་ལྟེ་གནས་དང་མཚོ་སྔོན་བོད་སྐད་རླུང་འཕྲིན། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། རྩེ་ཁོག་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ། རྩེ་ཁོག་རྫོང་སྲིད་པ་རྒད་པོ་སྲོལ་རྒྱུན་རིག་གནས་དར་སྤེལ་ཚད་ཡོད་ཀུང་ཟི་བཅས་ཀྱིས་འགན་སྒྲུབ་བྱས་པའི་སྲིད་པ་རྒད་པོ་རྟགས་མའི་བོད་ཀྱི་གཏམ་དཔེ་གདན་ཞུའི་འགྲན་སྡུར་སྐབས་གཉིས་པའི་ཐོག་མའི་འགྲན་སྡུར་གྱི་ཉིན་གཉིས་པའི་འགྲན་སྡུར་དེ་རྩེ་ཁོག་རྫོང་ནས་མུ་མཐུད་དུ་སྤེལ་བ་དང་། འགྲན་སྡུར་གྱི་ཐོག་མཐའ་བར་གསུམ་དུ་འགྲན་ཞུགས་པ་རྣམས་ཀྱིས་སྔར་བཞིན་གླེང་གཞི་དང་འབྲེལ་ཏེ་གསལ་དག་སྙན་གསུམ་དང་བདེན་དགེ་མཛེས་གསུམ་ཚང་བ། སྨྲ་བརྗོད་བདེ་ཞིང་དོན་འདུས་པ། སྨྲ་ལྕེ་དག་ཅིང་གནད་ལ་འཁེལ་བའི་ངང་ནས་བོད་ཀྱི་སྲོལ་རྒྱུན་གཏམ་དཔེ་སྣ་ཚོགས་ངག་ལ་བརྒྱུས་ཤིང་། དཔྱད་འདེམས་པ་རྣམས་ཀྱིས་ཀྱང་དྲང་བདེན་དང་འདྲ་མཉམ་གྱི་རྩ་དོན་གཞིར་བཟུང་ནས་ཡུལ་དངོས་ནས་སྐར་མ་བརྒྱབ་མཐར། རྨ་ལྷོའི་འགྲན་ཞུགས་པ་གཡང་སྐྱབས་རྒྱལ་དང་སྐར་མ། མགོན་པོ་རྒྱལ། གཡང་འབུམ་རྒྱལ། དཔལ་ལྡན་དབང་ཕྱུག ཀན་ལྷོའི་འགྲན་ཞུགས་པ་ཕུར་བ་སྐྱབས་དང་ལྷ་དཔལ་སྐྱབས། མཚོ་བྱང་གི་འགྲན་ཞུགས་པ་ལྷ་ཐར་འབུམ། མཚོ་ལྷོའི་འགྲན་ཞུགས་པ་མགོན་པོ་སྐྱབས། མགོ་ལོག་གི་འགྲན་ཞུགས་པ་དཔལ་སྲུང་དང་དགའ་ཡ་ཇོ་རུ། རིག་ལྡན། ཐུབ་རྡོར། ཆོས་བསམ་བཅས་འགྲན་ཞུགས་པ་བཅུ་བཞི་བསྐྱར་འགྲན་དུ་ཚུད། བསྐྱར་འགྲན་དུ་ཚུད་པའི་འགྲན་ཞུགས་པ་དག་གིས་བསྐྱར་འགྲན་སྐབས་ཀྱི་འགྲན་རིམ་རྒྱན་ལེན་པ་དང་གླེང་གཞི་གདམ་པའི་ལས་རིམ་ཡང་བདེ་བླག་ངང་སྤེལ། མཇུག་མཐར་གདན་ཞུའི་དཔྱད་བརྗོད་པ་རོང་བོ་ཚེ་དཔལ་ལགས་ཀྱིས་གཏམ་དཔེའི་བཤད་སྟངས་དང་སྤྱོད་སྟངས་སོགས་ཀྱི་ཐད་ལ་དཔྱད་བརྗོད་གནད་ཐིངས་བ་སྤེལ་བ་དང་། དཔྱད་འདེམས་པའི་འཐུས་ཚབ་པ་ཚེ་རིང་དོན་ལགས་ཀྱིས་ཐེངས་འདིའི་གཏམ་དཔེ་འགྲན་བསྡུར་གྱི་བརྗོད་གཞིའི་ནང་དོན་ནི་དེང་སྐབས་ཀྱི་སྤྱི་ཚོགས་སྟེང་དངོས་སུ་འབྱུང་བཞིན་པ་དག་ཡིན་པས་ངེས་པར་མཁོ་ཞིང་ཁ་ཚ་དགོས་གཏུགས་སུ་གྱུར་ཡོད་པ་མ་ཟད། བོད་ཀྱི་སྲོལ་རྒྱུན་རིག་གནས་འདིས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ལའང་ནུས་པ་མི་དམན་པ་ཐོན་བཞིན་འདུག་ཅེས་གདེང་འཇོག་གནང་མཐར་ཐོག་མའི་འགྲན་སྡུར་གྱི་གོ་རིམ་ཆ་ཚང་དེ་རིང་ཕྱི་དྲོར་ཡོངས་སུ་མཇུག་སྒྲིལ།
སང་ཉིན་ཏེ་ཚེས་ཉེར་གཅིག་ཉིན་ཐེངས་འདིའི་འགྲན་སྡུར་གྱི་བསྐྱར་འགྲན་རིམ་པ་མུ་མཐུད་དུ་སྤེལ་རྒྱུ་ཡིན་ཞིང་། བསྐྱར་འགྲན་གྱི་གོ་རིམ་ཆ་ཚང་གངས་ལྗོངས་མེ་ལོང་དྲ་བ་ནས་ཐད་གཏོང་བྱ་རྒྱུ་ཡིན་པ་མ་ཟད། འགྲན་སྡུར་གྱི་ཞིབ་ཕྲའི་ནང་དོན་དག་གངས་ལྗོངས་མེ་ལོང་དྲ་ངོས་དང་མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་གི་གཞུང་ཕྱོགས་སྐད་འཕྲིན་སྤྱི་སྟེགས། མཚོ་སྔོན་བོད་སྐད་རླུང་འཕྲིན་གྱི་གཞུང་ཕྱོགས་སྤྱི་སྟེགས་བཅས་ནས་ཉིན་རེ་བཞིན་སྤེལ་རྒྱུ་ཡིན།
