གངས་ལྗོངས་མེ་ལོང་ནས་སྤེལ་བའི་གསར་འགྱུར། （གསར་འགོད་པ།  དབང་རྒྱལ་ཚེ་རིང་།  ཚེ་མ་རྒྱལ།  ཐུབ་བསྟན་རྡོ་རྗེ།)  ཟླ5བའི་ཚེས28ཉིན།  ང་ཚོའི་བཅར་འདྲི་ཚན་ཆུང་གནའ་མཁར་ཟི་ལིང་ནས་ལས་ལ་ཆས་ཏེ་བཅར་འདྲིའི་ས་ཚིགས་གཉིས་པ་སྟེ་མཚོ་ཤར་ས་ཁུལ་ཞུན་ཧྭ་རྫོང་བིས་མདོ་བོད་རིགས་ཞང་གི་ཕྱོགས་སུ་ཆས་པ་ཡིན།  བིས་མདོ་ཞང་ན་པཎ་ཆེན་རིན་པོ་ཆེ་སྐུ་ཕྲེང་བཅུ་བས་ཐུགས་བཀོད་ལྟར་བཞེངས་པའི་ཞུན་ཧྭ་བོད་ཡིག་སློབ་འབྲིང་གནས་ལ།  བོད་ཡིག་སློབ་འབྲིང་འདི་ལ་ལོ་རྒྱུས་ཀྱི་རྒྱུན་རིང་ཞིང་།  རིག་གནས་བྱ་གཞག་གི་མཛད་འཕྲིན་དབྱར་མཚོ་བཞིན་རྒྱས་པས། ལྷག་པར་དུ་ཞུན་ཧྭ་ས་ཆའི་སློབ་མ་མང་པོ་ཞིག་གིས་གནས་འདི་ནས་ཤེས་རིག་གི་གདམས་པ་ཉམས་སུ་བླངས་ཏེ་མ་ཡུམ་མེས་རྒྱལ་གྱི་པང་ནས་སློབ་གསོའི་ལས་དོན་ལ་སྔར་མེད་ཀྱི་གྲུབ་འབྲས་ཆེན་པོ་བཞག

ཞུན་ཧྭ་རྫོང་བོད་ཡིག་སློབ་འབྲིང་ནི།  ཀུན་གཟིགས་པཎ་ཆེན་སྐུ་ཕྲེང་བཅུ་བ་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་མཆོག་གི་ཐུགས་བཀོད་ལྟར་ཞིང་ཆེན་དང་ཁུལ།  རྫོང་རིམ་པ་གསུམ་གྱི་ཏང་དང་མི་དམངས་སྲིད་གཞུང་གི་རྒྱབ་སྐྱོར་འོག་བཙུགས་པའི་སྐད་གཉིས་གཞིས་སྡོད་ལམ་ལུགས་ཀྱི་ཆ་ཚང་སློབ་འབྲིང་ཞིག་ཡིན་ལ།  བོད་ཡིག་སློབ་འབྲིང་ཞེས་པའི་མིང་འདི་ཡང་པཎ་ཆེན་མཆོག་གིས་གསོལ་ཞིང་།  ང་ཕོད་ངག་དབང་འཇིགས་མེད་ལགས་ཀྱིས་ཕྱག་བྲིས་གནང་བ་རེད།

སྤྱི་ལོ1985ལོར་སློབ་གྲྭ་བཙུགས་པ་ནས་བཟུང་།   པཎ་ཆེན་ཐམས་ཅད་མཁྱེན་པ་གཙོ་བྱས་པའི་བླ་མ་དང་མཁས་དབང་མང་པོ་ཞབས་ཀྱིས་བཅགས་ཤིང་།   ཀྲུང་དབྱང་དང་ས་གནས་ཀྱི་མགོ་ཁྲིད་རྣམ་པ་དང་།   རྫོང་ཨུ་དང་། རྫོང་མི་དམངས་སྲིད་གཞུང་གི་བླ་མེད་ཐུགས་ཁུར་དང་རྒྱབ་སྐྱོར་ལ་བརྟེན་ནས།   རིམ་བཞིན་སློབ་གྲྭའི་གཞི་རྒྱ་ཇེ་ཆེ་དང་སློབ་སྒྲུབ་ནུས་པ་ཇེ་ལེགས།   སློབ་གྲྭའི་བདག་གཉེར་དོ་དམ་འཐུས་ཚང་དུ་གྱུར་ཏེ།   ད་ལྟ་སློབ་རའི་སྤྱིའི་རྒྱ་ཁྱོན་ལ་སྨི་གྲུ་བཞི་མ102667ལྷག་དང་།   འཛུགས་སྐྲུན་གྱི་རྒྱ་ཁྱོན་ལ་སྨི་གྲུ་བཞི་མ32791.7ལྷག་ཡོད།   སློབ་གྲྭ་ཡོངས་ལ་སློབ་རིམ6དང་འཛིན་གྲྭ32  སློབ་མ1538  དགེ་བཟོ་བ154ཡོད་པ་དང་།   དེའི་ཁྲོད་རབ་འབྱམས་པ5དང་དངོས་གཞི81ཡོད།   མཐོ་འབྲིང་དགེ་རྒན་གྱི་ཚད་ལོངས་ཚད་བརྒྱ་ཆའི་བརྒྱད་ཅུ།   དམའ་འབྲིང་དགེ་རྒན་གྱི་ཚད་ལོངས་ཚད་བརྒྱ་ཆའི་བརྒྱ་ལ་སླེབས་ཡོད།

སློབ་གྲྭ་བཙུགས་ནས་བགྲང་བྱ་སུམ་ཅུ་རྩ་གྲངས་ཀྱི་ཡུན་ལ། སློབ་གྲྭས་ཕྱོགས་ཡོངས་ནས་ཏང་གི་སློབ་གསོའི་ཁ་ཕྱོགས་སྲིད་ཇུས་ལག་བསྟར་བྱས་ཤིང་། སྤུས་ཚད་སློབ་གསོ་ཁག་ཐག་བྱ་ཆེད། མུ་མཐུད་དུ་སློབ་སྒྲུབ་ཀྱི་ཆ་རྐྱེན་ཇེ་ལེགས་དང་དགེ་རྒན་གྱི་དཔུང་སྡེ་འཛུགས་སྐྲུན་ལ་ཤུགས་སྣོན་པ། ཡོད་ཚད་སློབ་གྲྭའི་དངོས་ཡོད་གནས་ཚུལ་ལ་བསྟུན་ཏེ་སྐད་རིགས་གསུམ་གྱི་ཁ་བརྡ་སྦྱོང་བརྡར་དེ་སློབ་ཁྲིད་དངོས་དང་ཟུང་འབྲེལ་བྱས་ཏེ་སློབ་ཁྲིད་ཀྱི་ངོ་བོ་དང་རྣམ་པ་གཉིས་ཀྱི་ཐད་ནས་ཐུན་མོང་མ་ཡིན་པའི་ཁྱད་ཆོས་ཞིག་མངོན་པར་བྱས་ནས་རང་སློབ་གྲྭའི་བགྲང་བྱ་བཅུའི་ཆེ་མཐོ་བའི་དམིགས་འབེན་གཏན་འཁེལ་བྱས་པ་འདི་ལྟ་སྟེ། “ཞོན་ཧྭ་བོད་ཡིག་སློབ་འབྲིང་དེ་བོད་ཁམས་ཡོངས་ཀྱི་རིགས་མཐུན་སློབ་འབྲིང་ཁྲོད་ཕྱིའི་རྨང་གཞི་འཛུགས་སྐྲུན་དང་སློབ་སྒྲུབ་ཀྱི་ཆ་རྐྱེན། ནང་གི་དོ་དམ་དང་སློབ་ཁྲིད་ཀྱི་སྤུས་ཀ་བཅས་ཀྱི་ཐད་ནས་ཆེས་རྩེ་མོར་སོན་པའི་ས་གནས་ཀྱི་ཁྱད་ཆོས་མངའ་ཞིང་དཔེ་སྟོན་རང་བཞིན་ལྡན་པའི་སློབ་གྲྭ་ཞིག་ཏུ་གསར་བཞེངས་བྱ་རྒྱུ་དེ་ཡིན།།”སློབ་གྲྭའི་འགོ་ཁྲིད་ཚན་ཆུང་དང་རྒྱ་ཆེ་བའི་དགེ་རྒན་བྱིངས་ཀྱིས་རྫོང་ཨུ་དང་རྫོང་མི་དམངས་སྲིད་གཞུང་། རྫོང་སློབ་གསོ་ཅུའུ་བཅས་ཀྱི་ཡང་དག་པའི་མཛུབ་སྟོན་ལ་བརྟེན་ནས། མཐུན་སྒྲིལ་དམ་པོ་དང་སྙིང་སྟོབས་ཆེན་པོས་ཞུན་ཧྭ་བོད་ཡིག་སློབ་འབྲིང་གི་འཛུགས་སྐྲུན་དང་འཕེལ་རྒྱས་ལ་ཕྱག་རྗེས་གསར་བ་འཇོག་དང་འཇོག་མུས་སུ་ཡོད།

ལོ་ངོ་སུམ་ཅུ་རྩ་གྲངས་རིང་ལ་རིམ་པ་མི་འདྲ་བའི་སློབ་ཆེན་ཁག་ལ་ཚད་ལྡན་གྱི་སློབ་མ5800ལྷག་བསྐྱལ་བ་དང་།  དེ་ལས་སློབ་མ360 ལྷག་རབ་འབྱམས་པ་དང་།  སློབ་མ38 ལྷག་གིས་འབུམས་རམས་པའི་བསླབ་གནས་བླངས་ཡོད།   ཐེངས་མང་པོར་ཞིང་ཆེན་དང་ཁུལ།   རྫོང་རིམ་པའི་སློབ་གསོའི་སྔོན་ཐོན་སྡེ་ཁག་ཏུ་བདམས་པ་དང་།   མཚོ་ཤར་ས་ཁུལ་གྱི་མི་རིགས་སློབ་གསོའི་མེ་ཏོག་རྐང་གཅིག་ཅེས་པའི་མཚན་སྙན་ཡང་ཐོབ་མྱོང་བ་མ་ཟད།  ཐེངས་དུ་མར་རྫོང་ཨུ་དང་རྫོང་མི་དམངས་སྲིད་གཞུང་གིས་སྔོན་ཐོན་སྡེ་ཁག་དང་དཔལ་ཡོན་གྱི་སློབ་གླིང་སོགས་སུ་བདམས་ཐོན་བྱུང་ལ།   ལྷག་པར་དུ་ལོ་མང་པོར་ཞིང་ཆེན་རིམ་པའི་སློབ་གསོའི་སྡེ་ཁག་གི་བརྟན་བརླིང་སྲུང་སྐྱོབ་ཀྱི་སྔོན་ཐོན་སྡེ་ཁག་གི་མཚན་སྙན་ཐོབ་པ་དང་།  མཚོ་སྔོན་ཞིང་ཆེན་གྱི་བདེ་ཐང་སློབ་གྲྭ།  མཚོ་ཤར་ས་ཁུལ་གྱི་སྔོན་ཐོན་སྡེ་ཁག་སོགས་ཀྱི་མཚན་སྙན་ཐོབ་ཡོད་པས་སྤྱི་ཚོགས་ཀྱིས་གདེང་འཇོག་མཐོ་ཞིང་ཁྱིམ་བདག་གིས་བློ་འཁེལ་ཆོག་པའི་སློབ་གྲྭ་ལེགས་ཤོས་ཤིག་ཏུ་གྱུར་ཡོད།