བགྲང་བྱ་བདུན་ཅུ་འཛུམ་གྱིས་བསུ། དུས་རབས་གསར་བར་འབད་པས་བསྐྱོད།

གངས་ལྗོངས་མེ་ལོང་ནས་སྤེལ་བའི་གསར་འགྱུར། （གསར་འགོད་པ།  དབང་རྒྱལ་ཚེ་རིང་།  ཐུབ་བསྟན། ཐུབ་བསྟན་རྡོ་རྗེ།) ཏང་དང་རྒྱལ་ཁབ་ཀྱིས་དམངས་ཕན་གྱི་སྲིད་ཇུས་རབས་དང་རིམ་པ་སྤེལ་བའི་དགོངས་དོན་ལག་ལེན་དོན་འཁྱོལ་བྱས་ཏེ། སྤྱི་ཚོགས་འཕེལ་རྒྱས་ཀྱི་དུས་རིམ་རེ་རེར་གྲོང་ཁྱེར་དག་གཙོ་བྱས་པའི་གཞི་རིམ་ས་ཁུལ་ལའང་གནམ་ས་བླ་འོག་བརྗེ་བ་ལྟ་བུའི་འཕེལ་རྒྱས་འབྱུང་བཞིན་ཡོད། ཐུན་རིན་རྫོང་རོང་བོ་གྲོང་རྡལ་འཕྲོད་བསྟེན་ཁང་ལ་མཚོན་ནའང་རྒྱལ་ཡོངས་འཕེལ་རྒྱས་འགྲོ་བའི་གོམ་འགྲོས་དང་བསྟུན་ནས་ཕྱིའི་བཀོད་པ་དང་འཛུགས་སྐྲུན། གསོ་རིག་ལག་རྩལ་སོགས་ཀྱི་ཐད་ནས་ཉིན་རེ་བཞིན་ཡར་རྒྱས་སུ་འགྲོ་བཞིན་པའི་ཉམས་དགའི་རྣམ་པ་མངོན་ཡོད།

ཐུན་རིན་རྫོང་རོང་བོ་གྲོང་རྡལ་འཕྲོད་བསྟེན་ཁང་བཙུགས་པ་ནས་ད་ལྟའི་བར་དུ། རྨ་ལྷོ་ཁུལ་ཨུ་དང་ཁུལ་མི་དམངས་སྲིད་གཞུང་། ཐུན་རིན་རྫོང་ཨུ་དང་རྫོང་མི་དམངས་སྲིད་གཞུང་སོགས་རིམ་པ་སོ་སོའི་གོང་རིམ་སྡེ་ཁག་གི་ཡང་དག་པའི་མཛུབ་སྟོན་ལྟར། རོང་བོ་གྲོང་རྡལ་གཙོ་ཡིན་པའི་ཐུན་རིན་ས་ཁུལ་གྱི་ནད་པ་ཇི་སྙེད་ཅིག་མི་འདོད་ནད་ལས་ཐར་དུ་བཅུག་པ་དང་། སྤྱི་ཚོགས་འཕེལ་རྒྱས་ཀྱི་འགྲོས་དང་བསྟུན་ནས་རོང་བོ་གྲོང་རྡལ་འཕྲོད་བསྟེན་ཁང་གིས་སྤྱི་ཚོགས་དང་ནད་པའི་དགོས་མཁོ་ལ་དམིགས་ནས་རང་སྟེང་ནས་བྱང་ཚད་འཕེལ་རྒྱས་སུ་གཏོང་བཞིན་ཡོད་དེ། ད་ལྟ་ལ་མཚོན་ན། འཕྲོད་བསྟེན་ཁང་འདིར་སྒོ་བསྟེན་ཚན་ཁག་དང་སྡོད་བཅོས་ཚན་ཁག་གཉིས་བཙུགས་ཡོད་ལ། དེར་ཁོང་ནད་ཚན་ཁག་དང་མོ་ནད་ཚན་ཁག བྱིས་ནད་ཚན་ཁག རྒྱ་ལུགས་ཚན་ཁག རྩིས་འཐེན་ཚན་ཁག མ་བུ་བདེ་སྲུང་ཚན་ཁག སྤྱི་བའི་འཕྲོད་བསྟེན་ཚན་ཁག ལུས་ཕུང་བརྟག་དཔྱད་ཚན་ཁག ནུས་སྒོའི་ཚན་ཁག་སོགས་ཚན་ཁག་བཅུ་བཙུགས་ཡོད། དེ་ཡང་སྒྲིག་ཆས་གཙོ་བོ་ལ་རང་ནུས་ཅན་གྱི་སྐྱེ་རྫས་དབྱེ་འབྱེད་བྱ་ཆས་དང་ཁྲག་རིགས་དབྱེ་འབྱེད་བྱ་ཆས། གཅིན་པ་དབྱེ་འབྱེད་བྱ་ཆས་སོགས་སྨན་ཁང་ཆེ་གྲས་སོགས་སུ་བཀོལ་བཞིན་པའི་ཚད་ལྡན་གྱི་སྒྲིག་ཆས་བཀོལ་ཏེ་ས་ཁུལ་འདིའི་མི་གྲངས35450ལྷག་ལ་གཞི་རྩའི་སྤྱི་བའི་འཕྲོད་བསྟེན་དང་སྨན་བཅོས་ཀྱི་ཐད་ནས་ཞབས་ཞུ་གང་ལེགས་བསྒྲུབས་དང་སྒྲུབ་བཞིན་ཡོད། 

གཞན་ཡང་འཕྲོད་བསྟེན་ཁང་འདིས་ས་ཁུལ་ཡོངས་ཀྱི་གཞི་རྩའི་གནས་ཚུལ་ལ་དམིགས་ནས་དོ་དམ་ལམ་ལུགས་འཐུས་ཚང་དུ་བཏང་སྟེ། ཆེད་དུ་གཞི་རྩའི་སྤྱི་བའི་འཕྲོད་བསྟེན་ཞབས་ཞུའི་དཔུང་སྡེ་བཙུགས་ཡོད་པ་དང་། གནས་ཚུལ་ལ་བརྟག་དཔྱད་ཞིབ་མོ་བྱས་ཏེ། གྲོང་རྡལ་ཧྲིལ་བོའི་སྡོད་དམངས་ཡོངས་ལ་སྤྱི་བའི་འཕྲོད་བསྟེན་གྱི་ཞབས་ཞུ་ཁེབས་སུ་བཅུག་ཡོད། དེ་ལས་རྒན་པ་དང་བྱིས་པའི་བདེ་ཐང་། འགོས་ནད། བུ་བཙའི་བདེ་ཐང་གི་སྐོར་སོགས་ལ་མུ་མཐུད་ནས་ཤུགས་སྣོན་དང་ལལ་རྩལ་འཕེལ་རྒྱས་སུ་བཏང་སྟེ། ས་ཁུལ་འདིའི་མི་རྣམས་ལ་ཞབས་འདེགས་གང་ལེགས་སྒྲུབ་བཞིན་ཡོད། དེ་མིན་འཕྲོད་བསྟེན་ཁང་འདིས་དུས་ཀྱི་འཕེལ་རྒྱས་དང་བསྟུན་ནས་ལོ་རེ་བཞིན་གསོ་རིག་ཐད་ཀྱི་མི་སྣ་འཇོན་ཐང་ཅན་མང་པོ་བསྡུས་ཏེ་སྔར་ལས་ལྷག་པའི་སྒོ་ནས་གསོ་རིག་གི་གཞུང་ལུགས་དང་ལག་ལེན་གྱི་ཐད་ལ་དངོས་ཤུགས་གང་རུང་ནས་འབད་བརྩོན་བྱས་ནས། ས་གནས་མང་ཚོགས་ཀྱི་ཁ་ཚ་དགོས་གཏུགས་ཀྱི་དགོས་མཁོ་བསྐངས་དང་སྐོང་མུས་སུ་ཡོད།