ལིས་ཁི་ཆང་གིས་ཚན་རྩལ་མཐུན་ཚོགས་དང་ཚན་རྩལ་ལས་རིགས་ཀྱི་སྲིད་གྲོས་ཨུ་ཡོན་དག་དང་མཉམ་དུ་རྒྱལ་དོན་ལ་གྲོས་མོལ་མཛད།
ཀྲུང་གུང་ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་ཚན་རྩལ་མཐུན་ཚོགས་དང་ཚན་རྩལ་ལས་རིགས་ཀྱི་ཨུ་ཡོན་གྱི་ཚན་ཆུང་གྲོས་བསྡུར་ལ་ཞུགས། ཨུ་ཡོན་དག་གི་གཏམ་བཤད་ལ་གསན་རྗེས་ལིས་ཁི་ཆང་གིས་གསུང་དོན། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཀྲུང་གུང་ཀྲུང་དབྱང་གི་མགོ་ཁྲིད་བརྟན་པོའི་འོག རྒྱལ་ཡོངས་གོང་འོག་ཚང་མས་སེམས་ཤུགས་གཅིག་སྒྲིལ་བྱས་ཏེ་རིམས་ནད་ལ་ཕན་ནུས་ལྡན་པར་ཚོད་འཛིན་ཐུབ་པ་བྱུང་ཞིང་། དཔལ་འབྱོར་དང་སྤྱི་ཚོགས་འཕེལ་རྒྱས་ཐད་གྲུབ་འབྲས་གསར་བ་ཐོབ་ཡོད་ལ། ཚན་རྩལ་བྱ་བ་བྱེད་མཁན་དག་གིས་དེའི་ཕྱོགས་ལ་བྱས་རྗེས་བསུབ་ཏུ་མེད་པ་བཞག་ཡོད་པ་དང་། སྲིད་གྲོས་ཀྱི་ཨུ་ཡོན་དག་གིས་བྱས་རྗེས་གལ་ཆེན་བཞག་ཡོད། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བྱེད་པ་རྒྱུན་འཁྱོངས་བྱས་ཤིང་། རིམས་ནད་འགོག་སྲུང་དང་དཔལ་འབྱོར་དང་སྤྱི་ཚོགས་ཀྱི་འཕེལ་རྒྱས་བྱ་བར་གཅིག་གྱུར་བཀོད་འདོམ་བྱས་ཏེ་སྐུལ་འདེད་གཏོང་བཏང་སྟེ། ཚན་རྩལ་དར་རྒྱས་དང་རྒྱལ་ཁབ་སྟོབས་ལྡན། མི་དམངས་བདེ་འཇགས་བཅས་ཡོང་བར་བྱེད་དགོས། སྟབས་བདེ་དང་ཕན་ནུས་མཐོ་བའི་ཞིབ་བཤེར་ཚད་འཇལ་ལག་རྩལ་དང་ནུས་ལྡན་སྨན་རྫས། འགོག་སྨན་བཅས་ཀྱི་འགག་སྒྲོལ་ལ་ཤུགས་སྣོན་བྱས་ནས་རིམས་ནད་འགོག་སྲུང་ཐད་གཞོགས་འདེགས་བྱེད་དགོས། རྨང་གཞིའི་ཞིབ་འཇུག་ཆུ་ཚད་ཇེ་མཐོར་གཏོང་བ་དང་ཁེ་ལས་ཀྱི་གསར་སྤེལ་ལ་ཤུགས་སྣོན་བྱེད་པ། རྐྱེན་སྲོལ་འཐུས་ཚང་དུ་བཏང་ནས་ཚན་རྩལ་གྲུབ་འབྲས་དེ་མྱུར་མོར་ཐོན་སྐྱེད་ནུས་ཤུགས་སུ་བསྒྱུར་བར་སྐུལ་འདེད་གཏོང་བ་དང་། ཐོན་ལས་མུ་འབྲེལ་ཅན་དང་མཁོ་འདོན་མུ་འབྲེལ་ཅན་གྱི་འགན་སྲུང་ཆུ་ཚད་ཇེ་མཐོར་བཏང་ནས། འཕེལ་རྒྱས་ཀྱི་སྒུལ་ཤུགས་གསར་བ་ཇེ་དྲག་ཏུ་གཏོང་དགོས། ཚན་རྩལ་ཁྱབ་ཁོངས་ཀྱི་བཅོས་བསྒྱུར་གཏིང་ཟབ་ཏུ་སྤེལ་ནས་ཚན་རྩལ་མི་སྣས་བློ་རྩེ་གཅིག་སྒྲིམ་གྱིས་འཚོལ་ཞིབ་བྱེད་པར་སེམས་ཁྲལ་གཞན་པ་མེད་པར་བྱས་ཏེ། སྔར་ལས་མང་བའི་ན་གཞོན་ཤེས་ལྡན་མི་སྣར་ལས་འགན་ཁུར་དུ་ལེན་དུ་འཇུག་དགོས་ཞེས་གསུངས།
ལོ་ཙཱ་བ། བསོད་ནམས་ཚེ་རིང་།
