ཟླ་གསུམ་པའི་ཚེས་དགུ་ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི། ཀྲུང་དབྱང་ཏོག་གསར་གློ་ཚད་རིམས་ནད་འགོག་བཅོས་བྱ་བའི་འགོ་ཁྲིད་ཚན་ཆུང་གི་ཚན་གཙོ་ལིས་ཁི་ཆང་གིས་འགོ་འཛིན་མཛད་དེ་འགོ་ཁྲིད་ཚན་ཆུང་གི་གྲོས་ཚོགས་བསྡུས།

ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། ཀྲུང་དབྱང་ཏོག་གསར་གློ་ཚད་རིམས་ནད་འགོག་བཅོས་བྱ་བའི་འགོ་ཁྲིད་ཚན་ཆུང་གི་ཚན་གཙོ་གཞོན་པ་ཝང་ཧུའུ་ཉིང་གྲོས་ཚོགས་ལ་ཞུགས།

ཚོགས་ཐོག་ནས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ནན་ཏན་སྒོས་ལག་བསྟར་བྱས་ཏེ། ཀྲུང་དབྱང་ཏོག་གསར་གློ་ཚད་རིམས་ནད་འགོག་བཅོས་བྱ་བའི་འགོ་ཁྲིད་ཚན་ཆུང་གི་བཀོད་སྒྲིག་ལྟར། རིམས་ནད་འགོག་བཅོས་ཚོད་འཛིན་བྱ་བ་མུ་མཐུད་དུ་དམ་འཛིན་བྱེད་པ་དང་། རིམས་ནད་རྒྱལ་ཁོངས་བརྒལ་ནས་འགོ་བར་དོགས་ཟོན་ནན་མོ་བྱེད་དགོས་ལ། གོ་རིམ་ལྡན་པའི་སྒོ་ནས་ལས་ཀ་དང་ཐོན་སྐྱེད་སླར་གསོ་བྱེད་པའི་བྱེད་ཐབས་དངོས་འབེབས་བཟང་བོ་བྱེད་པ་དང་། དོན་དངོས་དམ་འཛིན་བྱེད་པར་སྐུལ་ལྕག་གཏོང་དགོས་པར་མ་ཟད། རིམས་ནད་འགོག་བཅོས་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གཅིག་གྱུར་སྒོས་འཆར་འགོད་དང་སྐུལ་འདེད་གཏོང་དགོས་ཟེར།

ཚོགས་ཐོག་ནས་བསྟན་དོན། རིམས་ནད་བྱུང་རྗེས། རྒྱལ་ཡོངས་གོང་འོག་ཚང་མས་སྟོབས་ཤུགས་ཡོད་རྒུ་བཏོན་ནས་འབད་འཐབ་བྱས་པ་དང་སྟོབས་དང་ལྡན་པའི་མཉམ་ཤུགས་ཆགས་པར་བྱས། རིམ་པ་སོ་སོའི་ལས་བྱེད་པས་རིམས་ནད་འགོག་བཅོས་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གཅིག་གྱུར་སྒོས་འཆར་འགོད་དང་སྐུལ་འདེད་བཏང་བའི་རེ་བ་ལྟར། དངོས་ཐོག་བདེན་འཚོལ་རྒྱུན་འཁྱོངས་བྱེད་པ་དང་།  སྔར་ལས་ལྷག་པའི་སྤྱོད་ཚུལ་ལ་བརྟེན་ནས་རང་འགུལ་སྒོས་འགན་འཁྲི་ཁག་ཁུར་བྱེད་དགོས་ལ། སྟོབས་ཤུགས་གཅིག་བསྡུས་སྒོས་རིམས་ནད་འགོག་བཅོས་ཚོད་འཛིན་དང་ལས་ཀ་དང་ཐོན་སྐྱེད་སླར་གསོ། མང་ཚོགས་ཀྱི་གཞི་རྩའི་འཚོ་བ་འགན་སྲུང་བྱེད་པའི་ཁྲོད་ཀྱི་གནད་དོན་ངོ་མ་ཐག་གཅོད་དགོས་པ་དང་། དོན་དངོས་དམ་འཛིན་བྱེད་པར་སྐུལ་ལྕག་གཏོང་བ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ཀྱི་ངོ་བོ་ལེགས་སྒྱུར་བྱེད་པ། སླ་བཅོས་དང་རང་འགན་གཞན་དཀྲི་བྱེད་པའི་རྣམ་པ་གཏན་འགོག་བྱས་ནས། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དངོས་འབེབས་བྱས་ནས་ཕན་འབྲས་ལེགས་པོ་ཐོབ་པར་འགན་སྲུང་བྱེད་དགོས་ཟེར།

བཀྲ་ཤིས་འབུམ་གྱིས་བསྒྱུར།