དབུལ་ཐར་གྲུབ་འབྲས་སྔར་ལས་སྲ་བརྟན་དུ་གཏོང་བ་དང་། དབུལ་ཐར་སྤུས་ཚད་མཐོར་འདེགས་གཏོང་བ། གཏན་འཇགས་དབུལ་ཐར་མངོན་འགྱུར་བཅས་བྱེད་ཆེད། གཅན་ཚ་རྫོང་གིས་དབུལ་ཐར་སྙིང་སྟོབས་དེ་རྗེས་མཐུད་སྲ་བརྟན་བཟོ་སྐྲུན་ཆེན་པོ་དགུའི་ནང་དོན་གཙོ་བོར་བཞག་པ་དང་། ཆབ་སྲིད་གླེང་བ་དང་ངོས་ཟིན་ཇེ་དྲག་ཏུ་གཏོང་བ། འཕེལ་རྒྱས་གླེང་བ་དང་དྲིན་གཟོའི་བསམ་པ་ཇེ་དྲག་ཏུ་གཏོང་བ། རང་ཚུགས་གླེང་བ་དང་ཡིད་ཆེས་ཇེ་དྲག་ཏུ་གཏོང་བ། རྩལ་ནུས་གླེང་བ་དང་བྱེད་ཐབས་ཇེ་དྲག་ཏུ་གཏོང་བ། དཔལ་ཡོན་གླེང་བ་དང་བྱས་ཚད་ཇེ་དྲག་ཏུ་གཏོང་བ་སོགས་གླེང་བ་ལྔ་དང་ཇེ་དྲག་ཏུ་གཏོང་བ་ལྔའི་བྱེད་ཐབས་བརྒྱུད་དེ་དབུལ་ཕོངས་མང་ཚོགས་ཀྱིས་གཙོ་གཞིའི་འདུ་ཤེས་འཛུགས་པར་ཁྲིད་སྟོན་དང་། དབུལ་ཕོངས་མང་ཚོགས་ཀྱི་ཡོང་སྒོ་རྒྱུན་མཐུན་བརྟན་འཇགས་ངང་འཕར་སྣོན་ཡོང་བར་སྐུལ་ཁྲིད་བྱས།
གཅན་ཚ་རྫོང་གིས་དབུལ་ཐར་མཁྲེགས་གཏོར་སྲིད་ཇུས་སྒྲོག་འགྲེལ་ཚོགས་པ་བཙུགས་ཏེ་ཞང་དང་གྲོང་རྡལ། སྡེ་བ། གཞིས་ཁུལ་བཅས་སུ་ཟབ་ཞུགས་བྱས་ནས་མང་ཚོགས་དང་མཉམ་དུ་འཕེལ་རྒྱས་དང་འགྱུར་ལྡོག་གླེང་སྟེ་འདུ་ཤེས་བསྒྱུར་བ་དང་ཡིད་ཆེས་ཇེ་དྲག་ཏུ་གཏོང་བ། བརྩོན་སེམས་བསྐྱེད་པ་སོགས་ཀྱི་བྱ་བ་སྔར་ལས་བཟང་བོར་བསྒྲུབས་པ་དང་། ལས་བྱེད་པ་དང་དབུལ་ཕོངས་མང་ཚོགས་ཀྱི་བར་ཐག་ཇེ་ཉེར་བཏང་བར་མ་ཟད། དབུལ་སྐྱོར་དང་རིག་སྐྱོར་གྱི་མི་འདང་ས་ཁ་གསབ་དང་། མང་ཚོགས་དབུལ་ཐར་ཕྱུག་འགྱུར་བྱེད་པའི་ཡིད་ཆེས་དང་ཆོད་སེམས་ཇེ་བརྟན་དུ་བཏང་། ཉིས་སྟོང་བཅུ་དྲུག་ལོའི་ཚུན་ལ། རྫོང་ཡོངས་སུ་དབུལ་ཐར་མཁྲེགས་གཏོར་ཐད་ཀྱི་དམངས་ཕན་སྲིད་ཇུས་སྒྲོག་འགྲེལ་བྱ་འགུལ་ཐེངས་སྟོང་གཅིག་དང་ལྔ་བརྒྱ་ཞེ་བཞི་སྤེལ་བ་དང་། ཁྱིམ་ཚང་ཁྲི་གཅིག་དང་སྟོང་བརྒྱད་ཉིས་བརྒྱ་དོན་གཉིས་ལ་སོང་ནས་སྒྲོག་འགྲེལ་བྱས། དེ་དང་མཉམ་དུ། དཔེ་ཆ་གཞི་རིམ་དུ་སྐྱེལ་བ་དང་རིག་གནས་གཞི་རིམ་དུ་སྐྱེལ་བ་སོགས་ཀྱི་བྱ་འགུལ་ཧུར་ཐག་གིས་སྤེལ་ནས། མང་ཚོགས་ཀྱིས་རང་ཁྱིམ་གྱི་སྒོ་ཁ་ནས་རིག་གནས་ཞབས་ཞུ་ལོངས་སྤྱོད་བྱེད་ཐུབ་པར་བྱས་པ་དང་། མང་ཚོགས་ཀྱི་ཏང་དང་སྲིད་གཞུང་ལ་དྲིན་གཟོ་བའི་འདུ་ཤེས་ཇེ་དྲག་ཏུ་བཏང་། དེའི་རྨང་གཞིའི་སྟེང་། དབུལ་ཐར་མཁྲེགས་གཏོར་ཐད་ཀྱི་རིགས་སོ་སོའི་སྔོན་ཐོན་དཔེ་གཞི་འཚོལ་ཞིབ་བྱས་ནས་སྔ་གཞུག་ཏུ་དབུལ་ཐར་མཁྲེགས་གཏོར་གཟི་བརྗིད་ཁྱིམ་ཚང་ཉེར་བརྒྱད་ལ་གཟེངས་བསྟོད་བྱས་པས། དབུལ་ཕོངས་ཁྱིམ་ཚང་གི་དབུལ་ཐར་སྙིང་སྟོབས་དང་ཡིད་ཆེས་ཇེ་དྲག་ཏུ་བཏང་།
དེ་མིན། གཅན་ཚ་རྫོང་གིས་རྫོང་ཁོངས་ཀྱི་ཁྱད་ཆོས་དང་ཟུང་འབྲེལ་བྱས་ཏེ་ཞང་གཅིག་ལ་ལས་རིགས་གཅིག་དང་སྡེ་བ་གཅིག་ལ་སྲིད་ཇུས་གཅིག ཁྱིམ་ཚང་གཅིག་ལ་རྩལ་ནུས་གཅིག་གི་རྩ་དོན་རྒྱུན་འཁྱོངས་ཀྱིས་ཚན་རིག་དང་མཐུན་པའི་སྒོ་ནས་གསོ་སྦྱོང་འཆར་གཞི་དང་། གཅན་ཚ་རྫོང་གི་ལས་ཞུགས་སྤོ་སྒྱུར་དབུལ་ཐར་མཁྲེགས་གཏོར་འགུལ་སྐྱོད་འཆར་གཞི་གཏན་ཁེལ་བྱས་པ་དང་། ཞིང་ཆེན་ཕྱི་ནང་དུ་ངལ་རྩོལ་དུ་འགྲོ་བའི་ཐབས་ལམ་ཧུར་ཐག་གིས་འཚོལ་ཞིབ་བྱས་ཏེ་གཞན་ལ་བརྟེན་པ་ནས་རང་གིས་རང་ཉིད་ཕྱུག་པོར་བསྒྱུར་བའི་དབུལ་ཐར་བགྲོད་ལམ་འཚོལ་ཞིབ་བྱས།
ལོ་ཙཱ་བ་ལྷ་མོ་ཚེ་རིང་།
