ཟླ་བཅུ་བའི་ཚེས་ཉེར་བརྒྱད་ཉིན། ཞིང་ཆེན་ཡོངས་ཀྱི་དབུལ་ཐར་མཁྲེགས་གཏོར་ཆེད་དོན་གྲོས་ཚོགས་བསྡུས། གྲོས་ཚོགས་སྟེང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དབུལ་ཐར་མཁྲེགས་གཏོར་ཐད་ཀྱི་མཛུབ་སྟོན་གལ་ཆེན་དང་ཙུང་ལི་ལིས་ཁི་ཆང་གི་མཆན་བཀོད་མཛུབ་སྟོན། ཙུང་ལི་གཞོན་པ་ཧུའུ་ཁྲུན་ཧྭ་ཡི་གཏམ་བཤད་དགོངས་དོན་བཅས་བརྒྱུད་བསྒྲགས་དང་སློབ་སྦྱོང་བྱས་པ་དང་། ཞིང་ཆེན་དབུལ་ཐར་མཁྲེགས་གཏོར་བྱ་བའི་གནས་ཚུལ་ཁྱབ་བསྒྲགས་བྱས་པར་མ་ཟད། དུས་རིམ་རྗེས་མའི་བྱ་བ་གཙོ་བོར་ཞིབ་འཇུག་བཀོད་སྒྲིག་བྱས། ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཞིང་ཆེན་ཏང་ཨུའི་དྲུང་ཡིག་ཆེན་མོ་ཡུས་ཚུང་ལི་གྲོས་ཚོགས་ལ་ཞུགས་པར་མ་ཟད་གཏམ་བཤད། ཞིང་ཆེན་སྲིད་གཞུང་གི་ཏང་ཙུའུ་ཁོངས་མི། དྲུང་ཡིག་ཆེན་མོ་ཀྲང་ཧོང་ཡོན་གྱིས་གྲོས་ཚོགས་ལ་མགོ་འཛིན་བྱས།
ཡུས་ཚུང་ལི་ཡིས་བསྟན་དོན། དབུལ་ཐར་མཁྲེགས་གཏོར་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དངོས་སུ་བཀོད་འདོམས་དང་དངོས་སུ་སྐུལ་འདེད་བཏང་བའི་རླབས་ཆེན་འཐབ་རྩོད་ཅིག་ཡིན། ད་ནས་བཟུང་ལོ་མཇུག་གི་དབུལ་ཐར་མཁྲེགས་གཏོར་བྱ་བ་མཇུག་བསྡུ་རག་བར་དུ་ཉིན་དྲུག་ཅུ་ལས་མེད་པས། དུས་ཚོད་ཧ་ཅང་ཐུང་བ་དང་ལས་འགན་ཧ་ཅང་ལྕི། ས་ཁུལ་སོ་སོ་དང་སྡེ་ཁག་སོ་སོས་ངེས་པར་དུ་བསམ་བློའི་སྟེང་དམ་འཛིན་བྱེད་པ་དང་སྤྱོད་ཚུལ་ཐད་གཟབ་ནན་བྱེད་པ། བྱེད་ཐབས་ཞིབ་ཚགས་སུ་གཏོང་བ། མི་འདང་ས་ཁ་གསབ་བྱེད་པ་བཅས་བྱས་ཏེ་དུས་བཅད་ལྟར་རིགས་སོ་སོའི་ལས་འགན་ཡོངས་འགྲུབ་བྱེད་དགོས་ཟེར།
ཡུས་ཚུང་ལི་ཡིས་ནན་གྱིས་བསྟན་དོན། ས་ཁུལ་སོ་སོ་དང་སྡེ་ཁག་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་ནན་མོ་བྱེད་དགོས་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་བླང་བྱ་ལྟར་བློ་བརྟན་འགྱུར་མེད་ཀྱིས་དག་ཐེར་ལེགས་བཅོས་བྱེད་དགོས་པའི་གནད་དོན་དམ་འཛིན་བྱེད་དགོས་པ་དང་། སྟོབས་ཤུགས་ཡོད་རྒུས་རིམས་ནད་ཀྱི་ཤུགས་རྐྱེན་མེད་པར་བྱེད་དགོས། དབུལ་ཐར་ལས་གཞི་ལག་བསྟར་བྱེད་པར་མགྱོགས་མྱུར་སྐུལ་འདེད་གཏོང་བ་དང་། དངུལ་རྩའི་ལས་གཞིའི་གཞི་གྲངས་རྒྱུན་ཆད་མེད་པར་ཚད་ལྡན་དུ་གཏོང་བ། དབུལ་ཐར་མ་རྩའི་དོ་དམ་བྱ་བ་བཟང་བོར་བསྒྲུབ་ནས་ལས་གཞིའི་དངུལ་རྩའི་དོ་དམ་ཚད་ལྡན་དུ་གཏོང་བར་འགན་སྲུང་བྱེད་དགོས། ཡུལ་གཞན་གནས་སྤོར་གྱི་རྗེས་མཐུད་རོགས་སྐྱོར་ཇེ་དྲག་ཏུ་གཏོང་བ་དང་། རྨང་གཞིའི་སྒྲིག་ཆས་འཛུགས་སྐྲུན་གྱི་ཡུན་ཕན་དོ་དམ་ལ་ཤུགས་སྣོན་པ། ཕྱིར་དབུལ་བོར་འགྱུར་བ་སྔོན་འགོག་བྱེད་པའི་ལྟ་ཞིབ་རོགས་སྐྱོར་བྱ་བ་བཟང་བོར་བསྒྲུབ་པ། དབུལ་སྐྱོར་ཐད་ཀྱི་རིགས་སོ་སོའི་ཉེན་ཁ་འགོག་སྲུང་དང་མེད་པར་གཏོང་བ་བཅས་བྱས་ཏེ་དབུལ་ཐར་སྤུས་ཚད་སྔར་ལས་མཐོར་འདེགས་གཏོང་དགོས། དྲིལ་སྒྲོག་སྤྱི་སྡོམ་བྱ་བ་དུས་མཉམ་དུ་བཟང་བོར་བསྒྲུབ་པ་དང་། ཀྲུང་དབྱང་གི་བཀོད་སྒྲིག་དོན་འཁྱོལ་བྱས་ནས་ཡུན་རིང་འཕེལ་རྒྱས་ལ་འཆར་འགོད་བྱེད་པ། གཟབ་ནན་གྱི་བྱ་བའི་སྤྱོད་ཚུལ་གྱིས་དབུལ་ཐར་མཁྲེགས་གཏོར་འཐབ་རྩོད་ལ་ཁྱོན་ཡོངས་ནས་རྒྱལ་ཁ་ལེན་དགོས་ཟེར།
ལོ་ཙཱ་བ་ལྷ་མོ་ཚེ་རིང་།
