སྡེ་ཆེན་རྩེད་ར་མེས་པོའི་གཅེས་ནོར་ཡིན།།
སྡེ་ཆེན་རྩེད་ར་སྲིད་པའི་ཞེ་འདང་ཡིན།།
སྡེ་ཆེན་རྩེད་ར་ཡིད་ཀྱི་དྲན་ཤིང་ཡིན།།
སྡེ་ཆེན་རྩེད་ར་སེམས་ཀྱི་ལོངས་སྤྱོད་ཡིན།།
གངས་ལྗོངས་མེ་ལོང་དྲ་བའི་འཕྲིན། (གསར་འགོད་པ། དབང་རྒྱལ་ཚེ་རིང་།) དབྱར་དྲུག་པའི་མེ་ཏོག་གི་ཁྲོད་ན་གཡུ་སྦྲང་གི་འཕུར་རྩལ་ངོམས། དབྱར་དྲུག་པའི་སྤྲིན་དཀར་གྱི་ཀློང་ན་གླུ་སྐད་ཀྱིས་བར་སྣང་བཀང་། གནས་འདི་ན། རི་བོ་བྲག་དཀར་ཐེམ་ཆེན་གྱི་བརྗིད་ཉམས་མཁའ་རུ་འཕགས་ཤིང་། གནས་འདི་ན། གཙང་བོ་བུ་ཧ་ཆུ་བོ་ཡི་རླབས་ཕྲེང་ཕྱོགས་མེད་འཕྱོ། གནས་འདི་ན། གངས་དཀར་ཕྱོགས་ལས་རྣམ་རྒྱལ་གྱི་བཀྲག་མདངས་རབ་ཏུ་འཚེར། གནས་འདི་ན། སྡེ་ཆེན་རྩེད་རའི་གླུ་སྐད་ཀྱིས་མི་སེམས་ཀྱི་སྙན་དབང་གསོས་ཤིང་སེམས་ཀྱི་དྭངས་མ་དྲངས།
རྒྱང་གི་མགྲོན་པོ་དག་རང་ཤུགས་ཀྱིས་གནས་འདིར་འདུས་ཏེ། རི་གླུ་སྙན་མོ་ཡི་འགྱུར་ཁུགས་ལ་འཐིམ་ཞིང་། སྡེ་ཆེན་རྩེད་རའི་ཚིག་གི་བརྗིད་དང་། དོན་གྱི་བྲོ། ངག་གི་དཔལ་ལ་རོལ། ཀྲུང་གོའི་གློག་འཕྲིན་ཐེན་དབྱིས་རྟགས་མའི་ལ་གཞས་འགྲན་སྡུར་སྐབས་བདུན་པའི་འགྲན་ཁུལ་གཉིས་པ་སྟེ་མཚོ་ནུབ་འགྲན་ཁུལ་གྱི་འགྲན་སྡུར་མུ་མཐུད་ནས་མགོ་བརྩམས་ཏེ་ཞེ་སྨྲེང་བ་ཐམས་ཅད་དྲན་པར་བརྒྱུས་ཤིང་རོགས་ཞེ་འདང་ཅན་པོ་སེམས་ཁ་མཐུན་ཏེ་འགྲན་སྡུར་གྱི་ཡོ་ལང་རྣམ་པར་རྒྱས། ཉིན་གཉིས་ཀྱི་རིང་ལ་འགྲན་ཞུགས་གླུ་བ་གླུ་མ་ཚོས་རོགས་མཐུན་པའི་སྐོར་དང་། དྲན་པའི་སྐོར། བྲལ་བའི་སྐོར། འགལ་བའི་སྐོར། ལབ་ཀྱི་སྐོར་སོགས་དབྱངས་རྟ་སྙན་མོ་སེམས་པའི་ཟབ་སར་དྲངས་ཏེ་སྡེ་ཆེན་པོ་རྩེད་ར་ཟིལ་གྱིས་མནན།
བྱ་ཁུ་ལོ་གཞན་ཡོང་མགྲོན་པོ་ཡིན།།
བྱིའུ་འཇོལ་མོ་ནགས་ཀྱི་གཞི་འཛིན་ཡིན།།
ནགས་ཡར་ནང་སྐྱིད་ལ་མར་ནང་སྐྱིད།།
ནགས་སྐྱིད་ས་ཞིག་ནས་འདུག་རྒྱུ་ཡིན།།
ཤིང་དྲང་ས་ཞིག་ལ་འབབ་རྒྱུ་ཡིན།།
དགུང་ཨ་སྔོན་མཐོ་ཡང་མཐོ་ཀི།
འབྲུག་ལྗང་ལོ་བསོ་ཡང་བསོ་ཀི།
གན་ཚོད་ཀི་ཆར་ཞིག་བབས་ན།།
ང་ལོ་ཡག་སྙེ་མའི་འདོད་རེད།།
ཤ་ཡུ་མོའི་སྐྱེ་བ་བླངས་བླངས་ལ།།
རྫ་ཁྲ་ཡག་ཕུ་ཉུག་མདོ་ཉུག་བྱས།།
རྩྭ་རམ་དཀར་ཕུ་བཟའ་མདོ་བཟའ་བྱས།།
སང་ནངས་མོ་རྫ་རི་ཁ་ཁ་རེད།།
སྡེ་ཆེན་པོ་གོས་ཆེན་འབྲུག་མ་རེད།།
ཡུལ་ཕ་མ་ཐོག་གི་རི་མོ་རེད།།
ཤོམ་བྱེད་ནོ་བུ་དང་བུ་མོ་རེད།།
ཆ་འདི་གསུམ་འགྲིག་ན་མཐུན་པ་རེད།།
ཨ་མཐུན་བུ་དང་ཡང་མཐུན་སྨན།།
སྡེ་ནང་ལོང་ནང་ནས་མཐུན་སོང་ན།།
ཞེ་མཐུན་འདུག་ཞི་མོའི་སེམས་ན་ཡོད།།
འགྲོག་ཐུབ་འདུག་ཞི་ལིའི་ལག་ན་ཡོད།།
ང་བྱ་བརྒྱ་ཐང་དཀར་རྒོད་པོ།།
གནའ་དེང་མ་བྱ་ཕྲུག་ཡིན་དུས།།
ཚང་དྲོན་མོ་བྲག་དམར་ཐེམ་ན་ཡོད།།
ངའི་འཕུར་རོགས་གླག་མོ་རྩིབ་ན་ཡོད།།
ལོ་དེང་སང་གཤོག་རྩལ་རླུང་ལ་གཟད།།
ཚང་དྲོན་མོའི་ནང་ལ་བོབས་གི་མེད།།
བྱ་བརྒྱ་བོ་གར་འཕུར་རིག་གི་མེད།།
ངའི་གླག་མོ་གར་ཡོད་ཤེས་གི་མེད།།
ཞེ་སྡུག་གི་ལོ་རབས་མ་བཤད།།
ཞེ་སྡུག་གི་ལོ་རབས་བཤད་ན།།
ཁྱོས་ཐབ་ཀའི་གོང་ཁའི་ནང་ན།།
ང་དྲན་ནས་གླེང་གོ་འདོད་ན།།
ཞེ་སྡུག་ནས་དྭངས་མཐའ་མེད་གི།
སྨད་ཕྱོགས་སྡེ་ཆེན་གྲོང་ནས།།
ཞེ་མཐུན་རོགས་ཞིག་རྙེད་ཡོད།།
ཞེ་རང་མཐུན་ཡིན་ནོ་ཤེས་ནས།།
ཡུལ་ཕ་མ་ཤེས་གི་བཞག་ཡོད།།
སྨད་ཕྱོགས་སྡེ་ཆེན་གྲོང་ནས།།
ཞེ་མཐུན་རོགས་ཞིག་རྙེད་ཡོད།།
ཞེ་རང་མཐུན་ཡིན་ནོ་ཤེས་ནས།།
ཡུལ་ཕ་མ་ཤེས་གི་བཞག་ཡོད།།
སྟོད་སྟོད་ནས་སྨད་ལ་བལྟས་ན།།
སྨད་ཕྱོགས་ཀི་སྡེ་བ་རིག་གི།
ཁྱོད་དེ་ན་ཡོད་ནོ་ཤེས་གི།
ཁ་བགད་ནས་འགྲོགས་ཁོམ་མེད་ན།།
སེམས་སྐྱ་མོ་ཐང་ལ་ལྷུང་གི།
