བརྗོད་དོན་སློབ་གསོ་སྤེལ་བའི་ཚུན་ལ། མཚོ་སྔོན་ཞིང་ཆེན་སྨན་བཅོས་འགན་སྲུང་ཅུའུ་ཡིས་དགོངས་པ་སློབ་པ་དང་། ཏང་གཤིས་བསྐྱེད་པ། ལག་ལེན་འཛིན་པ། བྱས་རྗེས་འཇོག་པ་བཅས་ཀྱི་སྤྱིའི་བླང་བྱ་དང་དཔེ་སྡུར་བྱས་ཏེ། གཞུང་ལུགས་སློབ་སྦྱོང་རྒྱུན་འཁྱོངས་བྱེད་པ་ནས་མགོ་རྩོམ་པ་དང་། བརྟག་དཔྱད་ཞིབ་འཇུག་ནས་ལམ་བུ་བཏོད་པ། དཀའ་གནད་སེལ་བར་སྐུལ་འདེད་གཏོང་བ་བཅས་ཀྱི་ཐད་ཤུགས་བཏོན་ནས། བློ་སེམས་གཅིག་མཐུན་གྱིས་དོན་དངོས་བྱེད་ཐབས་སྤྱད་དེ་དམངས་བདེ་དམངས་ཕན་ཞབས་ཞུ་གང་ལེགས་བསྒྲུབས།
ཞིང་ཆེན་སྨན་བཅོས་འགན་སྲུང་ཅུའུ་ཡིས་སྨན་བཅོས་འགན་སྲུང་སྲིད་ཇུས་དངོས་འབེབས་དང་། སྒྲུབ་གཉེར་བྱེད་ནུས་འཛུགས་པ། དངུལ་སྤྲོད་བྱེད་ཐབས་བཅོས་སྒྱུར། སྨན་བཅོས་འགན་སྲུང་ཐེབས་རྩའི་ལྟ་སྐུལ་དོ་དམ། ཡུལ་གཞན་སྨན་བཅོས་རྩིས་སྤྲོད་སོགས་ཀྱི་གཙོ་དོན་བཅུ་ལ་དམིགས་ཏེ། གྲོང་རྡལ་དང་ཡུལ་ཚོ། མཉམ་ལས་ཁེ་ལས། སྨན་བཅོས་འགན་སྲུང་ནང་ཞུགས་པའི་མང་ཚོགས་སོགས་ལ་བརྟག་དཔྱད་ཞིབ་འཇུག་གཏིང་ཟབ་ཏུ་སྤེལ་ཏེ། བརྟག་དཔྱད་ཞིབ་འཇུག་གི་འདྲི་རྒྱུགས་དང་བབ་བསྟུན་བཅར་འདྲི་སོགས་ཀྱི་བྱེད་ཐབས་སྤྱད་ནས། བསམ་ཚུལ་བསམ་འཆར་རྒྱ་ཆེར་བསྡུ་ལེན་དང་གནས་པའི་གནད་དོན་ཡང་དག་པར་བཙལ། ཐག་གཅོད་ཐབས་ལམ་འཚོལ་ཞིབ་བྱས་ཏེ་སྨན་བཅོས་འགན་སྲུང་ཁྲོད་ཞུགས་པའི་མང་ཚོགས་ཀྱི་ཐོབ་ཚོར་དང་སྐྱིད་སྣང་དངོས་སུ་ཇེ་མཐོར་བཏང་།
མཚོ་སྔོན་གྱི་དོན་དངོས་ལ་རྐང་བཙུགས་ཏེ། མི་རིགས་ས་ཁུལ་ལ་དམིགས་པ་དང་ལྷག་པར་གཞི་རིམ་ཞིང་འབྲོག་མང་ཚོགས་ལ་ཁ་གཏད་ནས། རིམ་པ་ལྔ་འི་སྒྲུབ་གཉེར་མ་ལག་ཧུར་ཐག་གིས་བསྐྲུན་པ་དང་། རིམ་པ་སོ་སོའི་སྨན་བཅོས་འགན་སྲུང་སྡེ་ཁག་གིས་ཞབས་ཞུ་ལས་སྒོ་ཆེ་རུ་བཏང་སྟེ། སྨན་བཅོས་འགན་སྲུང་ཞབས་ཞུ་དེ་གཞི་རིམ་གྱི་ཟབ་སར་ཐོན་པར་བྱས་ནས་ཞིང་འབྲོག་མང་ཚོགས་ཀྱིས་ཐག་ཉེ་ནས་སྒྲུབ་ཐུབ་པ་དང་། སྟབས་བདེ་སྒོས་སྒྲུབ་ཐུབ་པ་མངོན་འགྱུར་བྱས།
མི་རིགས་སྨན་རྫས་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱས་ཏེ། རྒྱལ་ཡོངས་སུ་བོད་སོག་སྨན་བཅོས་སྒྲིག་གཞིའི་སྨན་རྫས་དང་སྨན་བཅོས་འགན་སྲུང་དཀར་ཆག་སྔོན་ལ་གཏན་འབེབས་བྱས་ནས། བོད་སོག་སྨན་རྫས་ཀྱི་རིགས་སྣ་བཞི་བརྒྱ་གོ་གཉིས་འདུས་པའི་སྨན་རྫས་ཉིས་སྟོང་བདུན་བརྒྱ་རེ་དྲུག་སྨན་བཅོས་འགན་སྲུང་གི་དངུལ་སྤྲོད་ཁྱབ་ཁོངས་སུ་བཞག་པས། སྨན་བཅོས་འགན་སྲུང་ཁྲོད་ཞུགས་མཁན་གྱི་སྣ་མང་ཅན་གྱི་སྨན་བཀོལ་དགོས་མཁོར་འགན་སྲུང་ནུས་ལྡན་བྱས། རིག་ནུས་ཅན་གྱི་སྨན་བཅོས་འགན་སྲུང་འཛུགས་ཚད་ཇེ་མགྱོགས་སུ་བཏང་ནས། ཡུལ་གཞན་སྨན་བཅོས་ཐོ་འགོད་སོགས་སྨན་བཅོས་འགན་སྲུང་གི་སྲིད་གཉེར་ཞབས་ཞུའི་ལས་དོན་དྲ་ཐོག་ནས་སྒྲུབ་པའི་རྒྱུ་ལམ་ཕྱེས་ཏེ། སྨན་ཁང་དུ་སྡོད་པ་དང་། སྤྱིར་བཏང་སྒོ་བསྟེན་སྨན་ཁང་། སྨན་རྫས་ཚོང་ཁང་སོགས་ཀྱི་འབྲེལ་ཡོད་འགྲོ་སོང་དྲ་ལམ་ནས་ཞིང་ཆེན་བརྒལ་ཏེ་ཐད་ཀར་རྩིས་སྤྲོད་བྱེད་ཐུབ་པར་བྱས་ཏེ། མང་ཚོགས་ལ་ཕན་བདེ་བསྐྲུན།
རིག་འཛིན་སྒྲོལ་མས་བསྒྱུར།
