ཟླ་བདུན་པའི་ཚེས་ཉི་ཤུ་ཉིན་གྱི་ཕྱི་དྲོར། རྨ་འབྲི་རྫ་གསུམ་འབྱུང་དུ་བློ་གྲོས་གཅིག་བསྡུས་བྱས་ཏེ་མཚོ་སྔོན་གསར་པར་རོགས་འདེགས་བྱེད་ཅེས་པའི་འཇོན་མིའི་ལས་གཞིའི་ཚོང་གཏམ་གྲོས་ཚོགས་སྐབས་བཞི་བ་ཟི་ལིང་དུ་བསྡུས། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་གིས་ཤིས་ཚིག་ཕུལ། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝུའུ་ཞའོ་ཅུན་གྲོས་ཚོགས་ལ་ཞུགས་པ་དང་། ཞིང་ཆེན་ཏང་ཨུའི་རྒྱུན་ལས་ཨུ་ཡོན། རྩ་འཛུགས་པུའུ་ཡི་པུའུ་ཀྲང་ཀྲའོ་ཡོའེ་ཞ་ཡིས་འགོ་འཛིན་བྱས། ཞིང་ཆེན་ཏང་ཨུའི་རྒྱུན་ལས་ཨུ་ཡོན། དྲིལ་སྒྲོག་པུའུ་ཡི་པུའུ་ཀྲང་ཝང་ཏ་ནན་དང་ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཞིང་ཆེན་ཏང་ཨུའི་དྲུང་ཡིག་ཆེན་མོ་ཀྲུའུ་ཞང་ཧྥིན། ཧྲིན་ཀྲང་གཞོན་པ་དབྱང་ཀྲི་ཝུན་བཅས་གྲོས་ཚོགས་ལ་ཞུགས།
ཁྲིན་ཀང་གིས་མཚོ་སྔོན་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ཏེ་ཡོན་ཧྲི་དང་ཆེད་མཁས་རྣམས་ལ་ལྷག་བསམ་རྣམ་གིས་དགའ་བསུ་བྱས་པ་དང་། མཚོ་སྔོན་གྱི་འཕེལ་རྒྱས་ཐད་ཐུགས་ཁུར་དང་རྒྱབ་སྐྱོར་བྱས་པའི་ལས་རིགས་སོ་སོའི་སྤུན་ཟླ་རྣམས་ལ་བཀའ་དྲིན་ཞུས། ཁོས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་རབ་དང་རིམ་པ་གནང་སྟེ་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་ཐོན་ལས་གནས་བཞི་འཛུགས་སྐྲུན་བྱེད་པའི་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུ་གསལ་བོར་བསྟན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངག་བཅོལ་ཡིད་ལ་དམ་པོར་བཟུང་ནས་མཚོ་སྔོན་གྱི་དེང་རབས་ཅན་འཛུགས་སྐྲུན་གྱི་སྐྱོད་ལམ་གསར་པར་སྐུལ་འདེད་གཏོང་བཞིན་ཡོད་པས། ང་ཚོས་འཇོན་མི་མང་པོ་མཚོ་སྔོན་དུ་ཡོང་བར་ལྷག་བསམ་ཟོལ་མེད་ཀྱིས་དགའ་བསུ་དང་རེ་བ་ཆེན་པོ་བྱེད་བཞིན་ཡོད། རྨ་འབྲི་རྫ་གསུམ་འབྱུང་ཡུལ་དུ་བློ་གྲོས་གཅིག་བསྡུས་བྱས་ཏེ་མཚོ་སྔོན་གསར་པར་རོགས་འདེགས་བྱེད་ཅེས་པའི་འཇོན་མིའི་ལས་གཞིའི་ཚོང་གཏམ་གྲོས་ཚོགས་སྤེལ་ནས་ལོ་གསུམ་འགོར་བའི་རིང་ལ། ནང་འདྲེན་བྱས་པའི་ཡོན་ཧྲི་དང་ཆེད་མཁས་པ། ཚན་རྩལ་བྱ་བ་སྒྲུབ་མཁན། ན་གཞོན་འཇོན་མི་རྣམས་ཀྱིས་སྙིང་སྟོབས་ཆེན་པོས་མཐོ་སྒང་དུ་རྐང་བཙུགས་ཏེ་སེམས་ཞིབ་མོས་ཞིབ་འཇུག་སོགས་བྱས་ནས་གྲུབ་འབྲས་གཡུར་དུ་ཟ་བ་བླངས་པ་དང་། མཚོ་སྔོན་འཕེལ་རྒྱས་ལ་རོགས་འདེགས་བྱས་པར་མ་ཟད། རིགས་སོ་སོའི་མི་དམངས་ལ་བདེ་སྐྱིད་བསྐྲུན་པས། ང་ཚོས་མཚོ་སྔོན་དུ་བྱས་རྗེས་བཞག་མྱོང་བའི་འཇོན་མི་རྣམས་ཀྱི་དྲིན་དྲན་བཞིན་ཡོད་ལ། ད་ལྟ་བྱས་རྗེས་འཇོག་བཞིན་པའི་འཇོན་མིར་གཅེས་སྤྲས་དང་། མ་འོངས་པར་ཡང་འཇོན་མི་མང་པོ་མཚོ་སྔོན་དུ་ཡོང་བར་རེ་བ་བྱེད་བཞིན་ཡོད།
ཁྲིན་ཀང་གིས་ནན་གྱིས་བསྟན་དོན། ད་ལྟའི་མཚོ་སྔོན་ལོ་རྒྱུས་སྟེང་ཆེས་བཟང་བའི་འཕེལ་རྒྱས་དུས་སྐབས་སུ་གནས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བླང་བྱ་གལ་ཆེན་ཕྱོགས་ཡོངས་ནས་ལག་བསྟར་བྱས་ཏེ་འཛམ་གླིང་ཚན་རྩལ་གྱི་མདུན་གྲལ་དུ་ཕྱོགས་པའི་ཡིད་ཆེས་དང་དཔལ་འབྱོར་འཐབ་རར་ཕྱོགས་པའི་རང་བདག རྒྱལ་ཁབ་ཀྱི་བླང་བྱ་གལ་ཆེན་ལ་ཕྱོགས་པའི་རང་ཚུགས། མི་དམངས་ཀྱི་ཚེ་སྲོག་བདེ་ཐང་ལ་ཕྱོགས་པའི་རང་སྟོབས་བཅས་ཀྱི་དགོས་མཁོ་ཡོད། རྒྱལ་དོན་གྱི་ཆེ་ཕྱོགས་ལ་དམ་པོར་དམིགས་ཏེ་རྒྱལ་ཡོངས་དང་མཉམ་དུ་དེང་རབས་ཅན་ཕྱོགས་ཡོངས་ནས་འཛུགས་སྐྲུན་བྱེད་དགོས་ན། མཚོ་སྔོན་ལ་འཇོན་མིའི་རྒྱབ་སྐྱོར་མཁོ་བ་དང་། མཚོ་སྔོན་གྱིས་འཇོན་མི་རྣམས་ལ་འཕེལ་རྒྱས་ཀྱི་གོ་སྐབས་བསྐྲུན་ཐུབ། ང་ཚོས་རྒྱ་ཆེའི་འཇོན་མི་རྣམས་ལ་འཇོན་ཐང་ངོམས་ས་དང་ལས་སྒྲུབ་ལས་སྐྲུན། མ་འོངས་གསར་སྐྲུན་གྱི་གར་སྟེགས་ཆེན་པོ་དང་འཕེལ་རྒྱས་ཀྱི་བར་སྟོང་བསྐྲུན་ནས། རིགས་སོ་སོའི་འཇོན་མིས་རང་རང་གི་ཁྱད་སྟོབས་འདོན་སྤེལ་བྱེད་པར་རྒྱབ་སྐྱོར་བྱེད་ངེས། རྒྱ་ཆེའི་ཆེད་མཁས་པ་རྣམས་མཐོ་སྒང་དུ་ཡོང་བ་དང་ཐོན་ཁུངས་གཅིག་བསྡུས་བྱེད་པ། ནུས་ཁུངས་ལ་དམིགས་ནས་འཕེལ་རྒྱས་ཀྱི་དམིགས་འབེན་དག་མཚོ་སྔོན་དུ་གཅིག་བསྡུས་བྱེད་པ་དང་། གསར་གཏོད་ཀྱི་ཐོན་ཁུངས་མཚོ་སྔོན་དུ་གཏོང་བ། ཚན་རྩལ་གྲུབ་འབྲས་དག་མཚོ་སྔོན་ནས་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་ཐོན་ལས་གནས་བཞི་འཛུགས་སྐྲུན་བྱེད་པར་འཆར་འགོད་དང་བྱས་རྗེས་འཇོག་པའི་རིག་སྟོབས་སུ་བསྒྱུར་ནས་ང་ཚོ་དང་མཉམ་དུ་འཇོན་མིས་གསར་གཏོད་ལ་སྣེ་ཁྲིད་དང་གསར་གཏོད་ཀྱིས་འཕེལ་རྒྱས་ལ་སྐུལ་འདེད་གཏོང་བའི་མཛེས་སྡུག་གི་རི་མོ་འབྲི་བ་དང་། ཚན་རྩལ་གསར་གཏོད་ཀྱི་གྲུབ་འབྲས་མངོན་པར་བྱེད་རྒྱུའི་རེ་བ་བཅངས་ཡོད།
ཐེངས་འདིའི་ཚོང་གཏམ་གྲོས་ཚོགས་སྟེང་། ཞིང་ཆེན་ཡོངས་ཀྱི་གྲོང་ཁྱེར་དང་ཁུལ་བརྒྱད་དང་སྡེ་ཁག་སོ་གསུམ་གྱིས་བསྡོམས་པས་འཇོན་མིའི་ལས་གཞི་ལྔ་བརྒྱ་དང་བདུན་སྦྲེལ་མཐུད་བྱས་པ་དང་། དེ་དག་སྐྱེ་ཁམས་ཁོར་ཡུག་དང་ནུས་ཁུངས་ཐོན་ཁུངས། སློབ་གསོ་འཕྲོད་བསྟེན་སོགས་ཁྱབ་ཁོངས་བཅུ་གཉིས་དང་འབྲེལ་ཡོད།
འགོ་རྩོམ་མཛད་སྒོའི་སྟེང་། ཁྲིན་ཀང་སོགས་ཞིང་ཆེན་གྱི་འགོ་ཁྲིད་ཀྱིས་རིམ་པ་མཐོ་བའི་འཇོན་མིའི་ལས་གཞི་བཅུ་བཀོད་པར་བདེན་དཔང་བྱས།
ཀྲུང་གོ་བཟོ་སྐྲུན་གླིང་གི་ཡོན་ཧྲི། ཀྲུང་གོ་ཚན་རིག་གླིང་ཨན་ཧུའེ་འོད་རིགས་ཞིབ་ཚགས་ཞིབ་འཇུག་ཁང་གི་རིག་གཞུང་འགོ་གཙོ་ལིའུ་ཝུན་ཆིང་དང་། ཀྲུང་གོ་བཟོ་སྐྲུན་གླིང་གི་ཡོན་ཧྲི། ཀྲུང་གོ་ཚན་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་ཁྲིན་ཞུའེ་ཏུང་གིས་ནང་འདྲེན་འཇོན་མིའི་ཚབ་བྱས་ཏེ་ཤིས་ཚིག་ཕུལ་བ་དང་། མཚོ་ཤར་གྲོང་ཁྱེར་དང་ཞིང་ཆེན་ཚན་རྩལ་ཐིན། མཚོ་སྔོན་སློབ་ཆེན་གྱི་འགན་ཁུར་བློ་མཐུན་བཅས་ཀྱིས་མི་བཀོལ་སྡེ་ཁག་གི་ཚབ་བྱས་ཏེ་གཏམ་བཤད།
ཀྲུང་གོ་བཟོ་སྐྲུན་གླིང་ཡོན་ཧྲི་ཝུའུ་ཐེན་དབྱི་དང་ཀའོ་ཅིན་ཅི། ཀྲིན་ཝེ་མིན། ཁང་ཀྲིན་ཧྲིན། ཕན་ཧྥུའུ་ཧྲིན། ཝང་ཧན་ཀྲུང་བཅས་དང་། ཀྲུང་གོ་ཚན་རིག་གླིང་གི་ཡོན་ཧྲི་ལིས་ཅིན་ཧུང་དང་། ཞིང་ཆེན་ཕྱི་ནང་གི་ཆེད་མཁས་པ་དང་འཇོན་མི། གྲོང་ཁྱེར་དང་ཁུལ་སོ་སོ་དང་མི་བཀོལ་སྡེ་ཁག་གི་འགན་ཁུར་བློ་མཐུན་གྲོས་ཚོགས་ལ་ཞུགས།
ཞིང་ཆེན་གྱི་འགོ་ཁྲིད་ཁ་ཤས་ཀྱིས་ཚོགས་ཞུགས་སྐུ་མགྲོན་ཚོ་དང་མཉམ་དུ་འཇོན་མིའི་ལས་གཞིའི་གྲུབ་འབྲས་འགྲེམ་སྟོན་ལ་བལྟས།
ལྷ་མོ་ཚེ་རིང་གིས་བསྒྱུར།
