ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ལམ་འགྲིམ་འགྲུལ་བདེ་འཇགས་སྐོར་གྱི་བཅའ་ཁྲིམས།
ལེའུ་གསུམ་པ། གཞུང་ལམ་ཤར་བགྲོད་ཀྱི་ཆ་རྐྱེན།
དོན་ཚན་ཉེར་ལྔ་པ། རྒྱལ་ཡོངས་སུ་གཅིག་གྱུར་གྱི་གཞུང་ལམ་འགྲིམ་འགྲུལ་བརྡ་རྟགས་ལག་བསྟར་བྱེད་དགོས།
འགྲིམ་འགྲུལ་བརྡ་རྟགས་ལ་འགྲིམ་འགྲུལ་བརྡ་རྟགས་གློག་སྒྲོན་དང་འགྲིམ་འགྲུལ་རྟགས་མཚན། འགྲིམ་འགྲུལ་ལམ་ཐིག་དང་འགྲིམ་འགྲུལ་ཉེན་རྟོག་གི་བཀོད་འདོམས་བཅས་ཚུད་ཡོད།
འགྲིམ་འགྲུལ་བརྡ་རྟགས་གློག་སྒྲོན་དང་འགྲིམ་འགྲུལ་རྟགས་མཚན། འགྲིམ་འགྲུལ་ལམ་ཐིག་སྒྲིག་འཛུགས་དེ་ངེས་པར་དུ་གཞུང་ལམ་འགྲིམ་འགྲུལ་གྱི་བདེ་འཇགས་དང་ཤར་གཏོང་གི་བླང་བྱ། རྒྱལ་ཁབ་ཀྱི་ཚད་གཞིར་འཚམ་དགོས་ལ། དེ་དང་ཆབས་ཅིག་གསལ་པོ་དང་མངོན་གསལ། ཡང་དག སྐྱོན་བྲལ་བཅས་རྒྱུན་སྲུང་བྱེད་དགོས།
ཤར་བགྲོད་ཀྱི་དགོས་མཁོ་ལྟར། ངེས་པར་དུ་གཞུང་ལམ་འགྲིམ་འགྲུལ་གྱི་བརྡ་རྟགས་དུས་ཐོག་ཏུ་འཕར་སྣོན་དང་སྡེབ་སྒྲིག གསར་བ་བརྗེ་དགོས། ཚོད་འཛིན་རང་བཞིན་གྱི་གཞུང་ལམ་འགྲིམ་འགྲུལ་བརྡ་རྟགས་འཕར་སྣོན་དང་སྡེབ་སྒྲིག གསར་བ་བརྗེ་བར་ངེས་པར་དུ་སྔོན་ལ་སྤྱི་ཚོགས་སུ་ཡོངས་བསྒྲགས་བྱེད་པ་དང༌། དྲིལ་བསྒྲགས་རྒྱ་ཆེར་སྤེལ་དགོས།
དོན་ཚན་ཉེར་དྲུག་པ། འགྲིམ་འགྲུལ་བརྡ་རྟགས་གློག་སྒྲོན་ལ་གློག་དམར་དང་གློག་ལྗང་། གློག་སེར་བཅས་ཀྱིས་གྲུབ་ཡོད། གློག་དམར་ནི་ཤར་བགྲོད་མཚམས་འཇོག་པར་མཚོན་པ་དང༌། གློག་ལྗང་ནི་ཤར་བགྲོད་ཆོག་པར་མཚོན་པ། གློག་སེར་ནི་ཉེན་བརྡ་མཚོན་པ་ཡིན།
དོན་ཚན་ཉེར་བདུན་པ། ལྕགས་ལམ་དང་གཞུང་ལམ་ཀྱི་ངོས་བསྣོལ་བའི་ལམ་མདོར། ངེས་པར་དུ་ཉེན་བརྡ་གློག་སྒྲོན་དང་ཉེན་བརྡ་རྟགས་མཚན་ནམ་ཡང་ན་བདེ་འཇགས་འགོག་སྲུང་སྒྲིག་ཆས་འཛུགས་དགོས། ལྟ་སྲུང་བྱེད་མཁན་མེད་པའི་ལྕགས་ལམ་གྱི་ལམ་མདོར། ངེས་པར་དུ་ལམ་མདོ་དང་བར་ཐག་ངེས་ཅན་ཡོད་པར་ཉེན་བརྡའི་རྟགས་མཚན་འཛུགས་དགོས།
རྩོམ་སྒྲིག་པ་དང་སྙན་སྒྲོན་པ། བཀྲ་ཤིས་དོན་གྲུབ།
རྩོམ་སྒྲིག་འགན་ཁུར་པ། ལྷ་རྒྱལ་བཀྲ་ཤིས། བཀྲ་ཤིས་དོན་གྲུབ།
ལྟ་སྐུལ་པ། ཕྱུག་ལོ།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
