དཔའ་ཤོད་རྫོང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བའི་སློབ་གསོར་ཤུགས་བསྣན།

བོད་རང་སྐྱོང་ལྗོངས་ཆབ་མདོ་གྲོང་ཁྱེར་དཔའ་ཤོད་རྫོང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་བརྟན་དུ་གཏོང་ཆེད། ཀྲུང་ཧྭ་མི་རིགས་གཅིག་མཐུན་ཚོགས་པའི་སྐོར་གྱི་འགྲེམ་སྟོན་ཁང་ཞིག་བསྐྲུན་ཡོད་ཅིང་།འགྲེམ་སྟོན་ཁང་དེས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་བརྟན་དུ་གཏོང་བའི་གཙོ་གནད་ལ་དམ་པོར་དམིགས་ཏེ། ཀྲུང་ཧྭའི་ཤེས་རིག་གི་མངོན་གསལ་དོད་པོའི་ཁྱད་ཆོས་ལ་སྟངས་འཛིན་གང་ལེགས་བྱེད་པ་དང་། མི་རིགས་ཁག་གིས་ཕན་ཚུན་བར་འགྲོ་འོང་དང་བརྗེ་རེས། མཉམ་འདྲེས་བཅས་བྱས་མྱོང་བའི་ལོ་རྒྱུས་ཀྱི་བདེན་པ་སྔོག་འདོན་གཏིང་ཟབ་བྱས་ཏེ། གསོན་ཉམས་དོད་པོའི་ངང་ཀྲུང་ཧྭ་མི་རིགས་གཅིག་མཐུན་ཚོགས་པ་ཆགས་པ་དང་དེ་འཕེལ་རྒྱས་བྱུང་བའི་ལོ་རྒྱུས་དངོས་མངོན་པར་བྱས་ཡོད་པ་ལས་གཞན། མི་རིགས་སོ་སོའི་མང་ཚོགས་ལ་ཡང་དག་པའི་ཀྲུང་ཧྭ་མི་རིགས་ཀྱི་ལོ་རྒྱུས་ལྟ་བ་བརྟན་པོ་འཛུགས་རྒྱུར་ཁྲིད་སྟོན་བྱེད་རྒྱུ་དང་། མི་རིགས་ཁག་ཚང་མ་བདེ་སྡུག་མཉམ་མྱོང་དང་ངོ་ཚ་དང་གཟི་བརྗིད་མཉམ་ཁུར། ཤི་གསོན་མཉམ་གནས། ལས་དབང་མཉམ་གནས་བཅས་ཀྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རང་རྟོགས་ངང་ཇེ་བརྟན་དུ་གཏོང་རྒྱུར་ཁྲིད་སྟོན་གྱི་ནུས་པ་ཆེན་པོ་འདོན་བཞིན་ཡོད། དཔའ་ཤོད་རྫོང་སློབ་གསོ་ཅུའུ་ཡི་ལས་བྱེད་མི་སྣ་ཀྲའོ་དབྱིན་ཅེ་ཡིས་བཤད་རྒྱུར།

“དཔའ་ཤོད་རྫོང་གིས་ལམ་སྐྱོང་ས་ཚིགས71པའི་གནས་རྙིང་པ་བསྐྱར་ལས་བྱས་ནས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་སྐྲུན་བྱེད་པའི་བརྗོད་དོན་སློབ་གསོ་ཁང་བཙུགས་པ་མ་ཟད་ལམ་སྐྱོང་ས་ཚིགས71པའི་རྗེས་དྲན་ཁང་ལས། བརྗོད་དོན་སློབ་གསོའི་ཁང་དུ་གཙོ་བོ་དཔའ་ཤོད་ཀྱི་ལོ་རྒྱུས་དང་རིག་གནས། རང་བྱུང་མཛེས་ལྗོངས། ད་དུང་ལམ་ལས་པའི་དཀའ་སྡུག་གི་བརྒྱུད་རིམ་བཅས་བཀོད་ཡོད། ལམ་སྐྱོང་ས་ཚིགས71པའི་ནང་དུ་གཙོ་བོ་འཐབ་མོ་བ་ཚོའི་སྐབས་དེའི་ཐོན་སྐྱེད་འཚོ་བ་དང་། སྐབས་དེའི་སྤྱི་ཚོགས་ཀྱི་སྣང་བརྙན་བཅས་བཞེངས་བསྐྲུན་བྱས་ཡོད།”

ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་བརྟན་དུ་གཏོང་རྒྱུ་ནི། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་པའི་གསར་གཏོད་རང་བཞིན་གྱི་ཆོད་གཏམ་གལ་ཆེན་ཞིག་ཡིན་ལ། མར་ཁེ་སི་རིང་ལུགས་ཀྱི་མི་རིགས་རིག་པའི་གཞུང་ལུགས་ཀྲུང་གོ་ཅན་དུ་བསྒྱུར་བའི་གྲུབ་འབྲས་གསར་ཤོས་ཤིག་ཀྱང་ཡིན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཇེ་བརྟན་དུ་གཏོང་རྒྱུ་ནི། དུས་རབས་གསར་པའི་མི་རིགས་ལས་དོན་ཡག་པོ་སྒྲུབ་པའི་ཚན་རིག་གི་ཕྱོགས་སྟོན་ཡིན་པས། རྒྱལ་ཡོངས་མི་རིགས་སོ་སོའི་མི་དམངས་གཅིག་ཏུ་བསྒྲིལ་ནས་ཀྲུང་ཧྭ་མི་རིགས་རླབས་ཆེན་གྱི་བསྐྱར་དར་མངོན་འགྱུར་བྱེད་པར་མཛུབ་སྟོན་གྱི་དོན་སྙིང་གལ་ཆེན་ལྡན།དཔའ་ཤོད་རྫོང་རིག་གནས་ཅུའུ་ཡི་ཅུའུ་ཀྲང་གཞོན་པ་བཀྲ་ཤིས་ངག་དབང་གིས་བཤད་རྒྱུར།

“དཔའ་ཤོད་རྫོང་གླ་གེ་ཡུལ་ཚོ་གླ་གེ་སྡེ་བ་རུ་གནས་ཡོད་པའི་ལམ་སྐྱོང་ས་ཚིགས་དོན་གཅིག་པ་ནི་དུས་རབས་ཉི་ཤུ་པའི་ལོ་རབས་དྲུག་ཅུ་པར་ལས་པ་དང་། དེ་སྔོན་གྱི་ལས་སྒྲུབ་པ་རྒན་རབས་ཚོ་ནི་ང་ཚོ་བོད་དང་རྒྱ་རིགས་ཀྱིས་འགྲིམ་འགྲུལ་སྟེང་དཀའ་ངལ་རབ་དང་རིམ་པ་སེལ་བ་དང་། ད་ལྟ་དཔའ་ཤོད་རྫོང་ཏང་ཨུ་དང་རྫོང་སྲིད་གཞུང་གི་སྣེ་ཁྲིད་འོག ང་ཚོ་རིག་གནས་ཅུའུ་ཡིས་ས་གནས་དེ་ལ་བཟོ་བཅོས་དང་གསར་བཟོ་བྱས་ནས། གོང་གི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བའི་བརྗོད་བྱ་གཙོ་བོའི་སློབ་གསོ་ཁང་དེ་གཙོ་བོ་གསར་དུ་བསྐྲུན་པ་རེད། སློབ་གསོ་ཁང་དེ་བོད་ཀྱི་གནའ་བོའི་དུས་ཀྱི་དཀའ་ངལ་གྱི་འཚོ་བ་དང་བོད་ཞི་བས་བཅིངས་འགྲོལ་བཏང་ནས་ད་བར་དུ་གནམ་ས་བླ་འོག་བརྗེ་བ་ལྟ་བུའི་མང་ཚོགས་ཀྱི་འཚོ་བ། རྒྱལ་ཁབ་བདེ་འཇགས་དང་མི་རིགས་འཆམ་མཐུན། མང་ཚོགས་ཀྱི་བདེ་སྐྱིད་འཚོ་བ་བཅས་ངོ་སྤྲོད་བྱས་ཡོད།”

འགྲེམ་སྟོན་ཁང་དེས་ཀྲུང་ཧྭ་མི་རིགས་ཀྱི“གཅིག་གྱུར་ཆེན་པོ”དང“མཉམ་འདྲེས་ཆེན་པོ”། “མཐུན་སྒྲིལ་ཆེན་པོ”བཅས་གཟུགས་ཅན་བཞིན་དུ་བསྟན་ཡོད་ཅིང་།  “གཅིག་གྱུར་ཆེན་པོ”ཞེས་པའི་ཚན་པ་རུ་བསམ་བློའི་འདུ་ཤེས་དང་ལམ་ལུགས་ཀྱི་ལག་ལེན། རིན་ཐང་འཚོལ་སྙེག་བཅས་ཕྱོགས་གསུམ་གྱི་ཐད་ནས་ཀྲུང་ཧྭ་མི་རིགས་དང་ཀྲུང་ཧྭའི་ཤེས་རིག་རྒྱུན་མཐུད་ཟམ་མི་ཆད་པར་བྱུང་བའི་ལོ་རྒྱུས་ཀྱི་གཞི་རྒྱུ་མངོན་པར་བྱས་ཡོད་ལ།  “མཉམ་འདྲེས་ཆེན་པོ”ཞེས་པའི་ཚན་པ་རུ་རིག་གནས་ཐད་ཀྱི་མཉམ་སྡུད་མཉམ་ལེན་དང་དཔལ་འབྱོར་ཐད་ཀྱི་ཕན་ཚུན་བརྟེན་གནས། བརྩེ་སེམས་ཐད་ཀྱི་ཕན་ཚུན་མཛའ་ཉེ་བཅས་ཕྱོགས་གསུམ་ཐད་ནས་ཀྲུང་ཧྭ་མི་རིགས་ཕན་ཚུན་འགྲོ་འོང་དང་བརྗེ་རེས། མཉམ་འདྲེས་བཅས་ཀྱི་ཁྲོད་དུ་རིམ་གྱིས་འཕེལ་རྒྱས་དང་སྟོབས་ལྡན་དུ་ཕྱིན་པའི་བརྒྱུད་རིམ་དང་གོང་བུ་གཅིག་གྱུར་བྱུང་བའི་ལོ་རྒྱུས་གསལ་འགྲེལ་བྱས་ཡོད།  “མཐུན་སྒྲིལ་ཆེན་པོ” ཞེས་པའི་ཚན་པ་རུ་ཀྲུང་གོ་གུང་ཁྲན་ཏང་དབུ་བརྙེས་པ་ནས་ད་ལྟའི་བར་དུ། གཅིག་རྒྱུན་གཅིག་འཛིན་ཡིན་པའི་ཀྲུང་ཧྭ་མི་རིགས་ཀྱི་མཐུན་སྒྲིལ་ཆེན་པོའི་བསམ་བློ་དང་ཕུན་སུམ་ཚོགས་པའི་ལག་ལེན་བསྟན་ཡོད། དཔའ་ཤོད་རྫོང་མཉམ་འབྲེལ་སྨྱན་སྦྱོར་ལྟེ་གནས་ཀྱི་ཀྲུའུ་རིན་གཞོན་པ་ཚེ་རིང་དོན་གྲུབ་ཀྱིས་བཤད་རྒྱུར།

“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བའི་བརྗོད་བྱ་གཙོ་བོའི་སློབ་གསོ་ཁང་བཙུགས་རྗེས། ཕྱོགས་མང་པོའི་ཐད་ནས་ནུས་པ་གལ་ཆེན་ཐོན་ཡོད། དེ་མིན་སློབ་གསོ་དང་དྲིལ་བསྒྲགས་ཀྱི་ནུས་པ་བཏོན་ནས། ཕུན་སུམ་ཚོགས་པའི་འགྲེམ་སྟོན་རྣམ་པ་དང་ནང་དོན་ལ་བརྟེན་ནས་རྒྱ་ཆེའི་མང་ཚོགས་ལ་ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་དང་། དོན་སྙིང་། རིན་ཐང་བཅས་དྲིལ་བསྒྲགས་གཏིང་ཟབ་བྱས་ཏེ། མི་དམངས་ཀྱིས་ཀྲུང་ཧྭ་མི་རིགས་ཀྱི་སྣ་མང་གཞི་གཅིག་ཏུ་གྱུར་པའི་ཆགས་སྟངས་ལ་བསམ་ཤེས་དང་། ངོས་འཛིན་གཅིག་མཐུན་གྱི་ཤུགས་ཆེ་རུ་གཏོང་བ། རྒྱལ་གཅེས་རིང་ལུགས་ཀྱི་བརྩེ་སེམས་དང་མི་རིགས་ཀྱི་སྤོབས་སེམས་སྲུང་སྐྱོང་བྱེད་དགོས།”

འགྲེམ་སྟོན་ཁང་འདིར་ལྟ་སྐོར་བྱས་པ་བརྒྱུད། ལྟད་མོ་པ་རྣམས་ཀྱིས་ཀྲུང་ཧྭ་མི་རིགས་རིམ་གྱིས་ཆགས་ནས་འཕེལ་རྒྱས་ཆེན་པོ་བྱུང་བའི་ལོ་རྒྱུས་ཤེས་རྟོགས་ཟབ་མོ་བྱེད་ཐུབ་པ་དང་།  རྒྱ་ཆེ་ཞིང་གཏིང་ཟབ་པའི་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་ཀྱང་དངོས་སུ་ཉམས་ལེན་བྱེད་ཐུབ།

གསར་འགོད་པ། ཕྱུག་ལོ། བན་དེ་སྐྱབས།

ཤ་བོ་རིན་མཚོ། རིག་འཛིན་སྒྲོལ་མ།

རྩོམ་སྒྲིག་འགན་ཁུར་པ། བསོད་ནམས་ཚེ་རིང་།

གཡང་འབུམ་རྒྱལ།

ལྟ་སྐུལ་པ། ཕྱུག་ལོ།

སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།