སྙན་སྒྲོན་པ། ཉན་མཁན་རྣམ་པ། ཐེངས་འདིའི་ཀྲུང་གོ་གསར་པ་དབུ་བརྙེས་ནས་ལོ་འཁོར་དོན་ལྔ་ལོན་པར་སྐྱེས་སུ་ཕུལ་བའི་བསྟུད་འགོད་ལེ་ཚན། མཚོ་སྔོན་གསར་བའི་གཟི་དཔལ་ཞེས་པའི་ནང་དུ། རང་རེའི་ལས་ཁུངས་ཀྱི་གསར་འགོད་པ་གཡང་འབུམ་རྒྱལ་དང་ཤ་བོ་གསེར་མཚོ་གཉིས་ཀྱིས་སྒྲ་བླངས་ནས་བཀོད་པའི་ཆེད་སྒྲིག་ལེ་ཚན་སྐྱེ་ཁམས་ཡག་པོ་དམངས་ཀྱི་བདེ་སྐྱིད་ཡིན་ཞེས་པར་ཉན་རོགས།
སྙན་སྒྲོན་པ། མཚོ་སྔོན་ཞིང་ཆེན་མཚོ་ཤར་གྲོང་ཁྱེར་ཞུན་ཧྭ་ཟ་ལར་རིགས་རང་སྐྱོང་རྫོང་ནི་རྨ་ཀླུང་སྔོན་མོའི་འགྲམ་རྒྱུད་ཀྱི་མཚོ་འཕང་ལ་རྨིད་ཆིག་སྟོང་བརྒྱད་བརྒྱ་ལྷག་གི་མཐོ་ཚད་དུ་ཆགས་ཡོད། རྫོང་མཁར་ནས་ལྷོ་བྱང་ཕྱོགས་སུ་སྤྱི་ལེ་སོ་ལྔའི་ལམ་ཐག་བརྒྱུད་ན་ད་གཟོད་ཀ་རིང་ཞེས་པའི་ཡུལ་ཚོ་དེར་ཐོན་ཐུབ། ཡོངས་གྲགས་སུ་ཀ་རིང་ཞེས་པ་ནི་ཡུལ་དེའི་ལོ་བ་སྡེ་བ་དང་ཟམ་དཀར་སྡེ་བའི་བར་གྱི་རང་བྱུང་གི་ས་རྡོའི་རྣམ་པ་དེ་མཐོང་བ་ཙམ་གྱིས་ཀ་བ་རིང་བོ་གཉིས་ཀྱི་དབྱིབས་སུ་ཆགས་ཡོད་པས་མིང་དེ་ལྟར་དུ་ཐོགས་པར་བཤད། ཀ་རིང་ཡུལ་ཚོའི་སྟོད་ཕྱོགས་ཀྱི་རི་རྒྱུད་རིང་མོ་དེ་མཐིང་མདོག་གི་གསོམ་ཤིང་གིས་ཡོངས་སུ་བཀླུབས་པས་མི་རྣམས་ཀྱིས་གནས་དེ་ལ་གསོམ་ཤིང་གི་ཕ་ས་ཞེས་ཀྱང་འབོད་ཀྱིན་འདུག གསེར་རི་དངུལ་རི་ལས་ལྷག་པའི་མཐིང་མདོག་གི་ཕ་ས་འདི་ལ་ནམ་ཡང་གཅེས་སྤྲས་དང་སྲུང་སྐྱོབ་བྱས་ཏེ། བུ་རབས་ཚ་རྒྱུད་རྣམས་ལ་མཛེས་སྡུག་གི་འཚོ་གནས་ཡག་པོ་ཞིག་བསྐྲུན་རྒྱུ་ནི། ཡུལ་དེ་ན་འཚོ་ཞིང་གཞེས་པའི་མི་རེ་རེའི་ཕྲག་ཏུ་བབ་པའི་འོས་འགན་ཉག་ཅིག་རེད། དེའི་སྐོར་ནས་ཀ་རིང་ཡུལ་ཚོ་ཏང་ཨུའི་རྩ་འཛུགས་ཨུ་ཡོན་ཆོས་སྐྱོང་སྐྱབས་ཀྱིས་འདི་ལྟར་བཤད།
ང་ཚོ་ཀ་རིང་ཡུལ་ཚོ་ཡིན་རྒྱུ་ན་ནགས་ཚལ་ས་མུའུ་ཁྲི་བཅུ་བཞིའི་ཡན་ཡོད། དེ་ཡིན་ན་ས་ཁོངས་ཡོངས་སུ་བརྒྱ་ཆའི་ལྔ་བཅུའི་ཡན་ཆད་ནགས་ཀྱིས་ཟིན་ཡོད།ད་ལྟ་འུ་ཚོ་ཡོད་སའི་གྱེར་ཐང་སྡེ་བ་འདི་ནི་རི་ཆུ་ནགས་གསམ་འཛོམས་ས་ཞིག་ཡིན་ནི་རེད། དེ་བས་ཡུལ་ཚོའི་ཏང་ཨུ་དང་སྲིད་གཞུང་། སྡེ་བ་བཅས་ལ་མཚོན་ན་དགུན་ཁ་ནགས་ཚལ་ལ་མེ་དགྲ་འབྱུང་བར་སྔོན་འགོག་བྱེད་དགོས་པ་དང་དབྱར་དུས་སུ་ཆུ་དགྲ་སྔོན་འགོག་གི་འགན་ཁུར་ཡང་ལྗིད་མོ་ཡོད། དུས་རྒྱུན་ད་ང་ཚོ་སྡེ་བའི་ནང་དུ་སོང་ནས་མེ་སྐྱོན་སྔོན་འགོག་གི་སྲིད་ཇུས་སྐོར་ཁྱབ་སྒྲོག་བྱེད་བཞིན་ཡོད།
སྙན་སྒྲོན་པ། གྱེར་ཐང་སྡེ་བ་ནི་མཐིང་མདོག་གི་གསོམ་ཤིང་གིས་ཡོངས་སུ་བཀླུབས་པའི་རི་རྒྱུད་དེ་ལས་གྱེས་པའི་ལུང་གཞོངས་ཡངས་མོ་ཞིག་གི་འགྲམ་དུ་ཆགས་ཡོད་པ་དང་། ལུང་པ་དེ་རུ་ཆེ་རྒྱུ་ཆུང་རྒྱུ་མེད་པའི་ཆུ་བོ་ཞིག་ལྷུང་ལྷུང་འབབ་ཀྱིན་འདུག རྒྱུས་ལོན་བྱུང་བ་ལྟར་ན། ལོ་ངོ་མང་པོའི་ཡར་སྔོན་ནས་བཟུང་སྟེ། དབྱར་དུས་སུ་ཆར་བ་ཆེན་པོ་འབབ་ཐེངས་རེ་ལ་ཆུ་བོ་དེ་ཆེ་རུ་བྲུག་ནས་ཆུ་ལམ་གྱི་རྡོ་བ་མང་དུ་ཕྱིན་ཅིང་ལུང་པའི་འགྲམ་གཉིས་ཀྱི་སྤང་ཐང་ཆེན་པོ་དེ་ས་ནག་ཏུ་བསྒྱུར་བར་མ་ཟད། ལུང་པའི་འགྲམ་རྒྱུད་དུ་ཆགས་པའི་ཁྱིམ་ཚང་དང་ས་ཞིང་། ཕྱུགས་ཟོག་བཅས་ལའང་ཚད་མི་འདྲ་བའི་གནོད་འཚེ་ཐེངས་མང་ཐེབས་མྱོང་། རྒྱུ་མཚན་དེའི་དབང་གིས་གྱེར་ཐང་སྡེ་བའི་སྡེ་དམངས་ཨུ་ཡོན་ལྷན་ཁང་གི་ཀྲུའུ་རིན་ལྷ་རྒྱལ་ཚེ་བརྟན་གྱི་བསམ་པར། ཕ་ཡུལ་མི་དམངས་རང་བྱུང་གི་གནོད་འཚེ་ལས་རྒྱལ་བར་བྱེད་རྒྱུ་ནི་ཁོའི་ཕྲག་སྟེང་དུ་བབ་པའི་གཞོལ་མེད་ཀྱི་འགན་འཁྲི་ཡིན་པ་དང་། གསེར་རི་དངུལ་རི་ལས་ཀྱང་ལྷག་པའི་ཕ་ཡུལ་གྱི་སྐྱེ་ཁམས་ཁོར་ཡུག་དེ་རང་གི་མིག་འབྲས་ཇི་བཞིན་སྲུང་སྐྱོབ་བྱས་ཏེ་སྡོང་འཛུགས་ནགས་སྐྲུན་བྱེད་རྒྱུ་ནི། ཆུ་ལོག་ཆེན་པོའི་གནོད་འཚེ་ལ་ཁ་གཏད་འཇལ་བའི་བྱེད་ཐབས་ནུས་ལྡན་ཡིན་པའི་ངེས་ཤེས་རྙེད་དེ། ཁོད་ཡངས་པའི་ལུང་གཞོངས་དེ་རུ་སྡོང་བོ་སྣ་ཚོགས་འཛུགས་རྒྱུའི་སེམས་ཐག་བཅད།
ང་ཚོ་གྱེར་ཐང་སྡེ་བའི་སྟོད་ཕྱོགས་ནགས་ཡིན་ནི་རེད། ནགས་ཡོད་པའི་ས་ཁུལ་གྱི་མཁའ་དབུགས་བརླན་གཤེར་ཆེ་བས་དབྱར་དུས་སུ་ཆར་འབབ་ཚད་མང་གི ཆར་འབབ་ཚད་མང་བའི་སྟབས་ཀྱིས་ང་ཚོར་ཆུ་དགྲའི་གནོད་པ་ཆེན་པོ་འདུག ཆུ་ལོག་གིས་རྩྭ་ས་ས་ནག་ཅན་དུ་བསྒྱུར་བར་མ་ཟད། མི་ཕྱུགས་ཀྱི་བདེ་འཇགས་ལ་ལའང་གནོད་པ་ཐེབས་བཞིན་ཡོད། དེའི་སྟབས་ཀྱིས་ཉིས་སྟོང་བཅུ་དགུ་ལོར་ངས་གནས་ཚུལ་དེའི་སྐོར་ཀ་རིང་ཡུལ་ཚོ་སྲིད་གཞུང་ལ་ཡར་ཞུ་བྱས་པར་སྲིད་གཞུང་གིས་སྡོང་ཕྲུག་དང་ཚེར་མ། ལྕགས་ར་སོགས་ཀྱིས་རོགས་སྐྱོར་བྱས་པ་དང་། ངས་སྡེ་མི་རྣམས་ཀྱི་སྣེ་ཁྲིད་ནས་སྡོང་འཛུགས་ནགས་སྐྲུན་བྱས་པ་ཡིན། ད་སྐབས་སྡོང་བོའི་སྐྱེས་ཚད་ཧ་ཅང་བཟང་གི
སྙན་སྒྲོན་པ། ཉེ་བའི་ལོ་ཤས་རིང་། ཀ་རིང་ཡུལ་ཚོ་ཏང་ཨུ་དང་སྲིད་གཞུང་གི་རྒྱབ་སྐྱོར་འོག ལྷ་རྒྱལ་ཚེ་བརྟན་གྱིས་ལས་ལ་བརྩོན་པའི་གྱེར་ཐང་མི་དམངས་ཀྱི་སྣེ་ཁྲིད་དེ། སྡོང་འཛུགས་ནགས་སྐྲུན་བྱས་ནས་ཡུལ་ལུང་ལྗང་སྒྱུར་བྱས་པར་བརྟེན། ལུང་པ་དེའི་ས་རྒྱུ་སྲུང་འཛིན་བྱེད་པར་དགེ་མཚན་ལྡན་པའི་ནུས་པ་ཆེན་པོ་ཐོན། སྤང་ཤུན་སླར་གསོ་བྱས་པ་དང་བསྟུན་ནས་ལུང་པའི་ནང་དུ་འབབ་པའི་ཆུ་ཞེང་དེ་ཡང་རིམ་བཞིན་ཇེ་ཆུང་དུ་སོང་ནས། གྱེར་ཐང་སྡེ་བའི་མི་ཕྱུགས་ཐམས་ཅད་ཆུ་ལོག་གི་འཇིགས་པ་དང་རིང་དུ་བྲལ། གནས་ཚུལ་དེའི་སྐོར་ནས་གྱེར་ཐང་སྡེ་བའི་ཨ་ཁུ་བནྡེ་ཚེ་རིང་གིས་གསར་འགོད་པར་འདི་ལྟར་བཤད།
སྔོན་ཆད་སྡོང་ར་འདི་མ་བསྐོར་སྔོན་ལ་ཆུ་ལོག་གི་ཉེན་ཁ་འབྱུང་བཞིན་ཡོད་པས་སྡོང་ར་འདི་བསྐོར་བ་ཡིན། སྡོང་ར་འདི་ལ་བདག་སྐྱོང་བྱེད་སྟངས་ཀྱི་སྐོར་ནས་ལྕགས་ར་ཞིག་གསོ་བྱེད་པ་དང་དུས་ལྟར་ཆུ་གཏོང་བ། མེ་སྐྱོན་སྔོན་འགོག་བྱེད་ཆེད་རྩྭ་རྫོང་ཇེ་སྲབ་ཏུ་གཏོང་བ་སོགས་བྱས་ནས་བདག་བྱེད་བཞིན་ཡོད། སྡོང་ར་འདི་བསྐོར་ནོ་རྗེས་ནས་སྨད་ཕྱོགས་ཀྱི་སྡེ་བའི་ཞིང་ས་སོགས་ལ་ཆུ་ལོག་གི་གནོད་པ་ཅི་ཡང་མ་བྱུང་། སྡོང་ར་འདི་བསྐོར་ནས་ལེགས་འགྲུབ་བྱུང་བ་ལ་བཟང་ཆ་ཆེན་པོ་ཡོད།
སྙན་སྒྲོན་པ།སྐྱེ་ཁམས་ཁོར་ཡུག་བཟང་པོ་ནི་ཆེས་དྲང་གཞག་གི་སྤྱི་པའི་ཐོན་རྫས་ཡིན་ལ།ཆེས་ཕན་ཡོད་ཀྱི་དམངས་འཚོའི་བདེ་སྐྱིད་ཀྱང་ཡིན། དུས་ཡུན་རིང་བོར་རི་ཆུ་ནགས་གསུམ་དང་འགྲོགས་ནས་ཡོང་བའི་ཀ་རིང་མི་དམངས་ཀྱིས་སྐྱེ་ཁམས་ཁོར་ཡུག་སྲུང་སྐྱོབ་བྱེད་དོན་དེ་ཅི་ཡིན་པ་དང་། ཕ་ཡུལ་གྱི་སྐྱེ་ཁམས་ཁོར་ཡུག་སྲུང་སྐྱོབ་ཡག་པོ་བྱས་ན་དམངས་ཀྱི་བདེ་སྐྱིད་ཡིན་པ་གསལ་བོར་ཤེས་ཡོད།
སྙན་སྒྲོན་པ། ཉན་མཁན་རྣམ་པ། གོང་དུ་ཚང་མས་ཉན་པ་ནི་རང་རེའི་ལས་ཁུངས་ཀྱི་གསར་འགོད་པ་གཡང་འབུམ་རྒྱལ་དང་ཤ་བོ་གསེར་མཚོ་གཉིས་ཀྱིས་སྒྲ་བླངས་ནས་བཀོད་པའི་ཆེད་སྒྲིག་ལེ་ཚན། སྐྱེ་ཁམས་ཡག་པོ་དམངས་ཀྱི་བདེ་སྐྱིད་ཡིན་ཞེས་པ་དེ་ཡིན། ཁྱེད་ཚོས་ཉན་པར་བཀའ་དྲིན་ཆེ།
གསར་འགོད་པ། གཡང་འབུམ་རྒྱལ། ཤ་བོ་གསེར་མཚོ།
རྩོམ་སྒྲིག་འགན་ཁུར་པ། བསོད་ནམས་ཚེ་རིང་།
ལྟ་སྐུལ་པ། ཕྱུག་ལོ།
སྤྱི་ཁྱབ་ལྟ་སྐུལ་པ། དབང་གྲགས་ཚེ་རིང་།
